Kwestin Blong Olgeta We Oli Ridim Magasin Ya

?Kingdom Blong God i Stap Long Hat Blong Man?

Plante man tede oli ting se ansa blong kwestin antap hem i yes. Eksampol, The Catholic Encyclopedia i talem se: “Kingdom blong God i minim . . . se God i rul long hat blong yumi.” Plante lida blong jos oli tijim samting ya. ?Baebol i rili tijim se Kingdom blong God i stap long hat blong man?

Samfala oli talem se Jisas i faswan man we i talem se Kingdom blong God i stap long hat blong man. I tru, Jisas i talem se: “Fasin we God i stap kam King blong ol man blong hem, hem i stap finis long medel blong yufala.” (Luk 17:21, Baebol long Bislama) Sam narafala Baebol oli transletem vas ya se: “Kingdom blong God i stap long yufala,” mo samfala oli talem “i stap insaed long yufala.” ?Ol Baebol we oli tanem toktok blong Jisas olsem, oli stret? ?Jisas i rili minim se Kingdom blong God i stap long hat blong man?

Faswan samting, i gud blong tingbaot hat blong man se i minim wanem. Samtaem Baebol i yusum tok ya hat olsem wan pijatok blong minim man hem wan, mo stamba blong olgeta tingting, fasin, mo filing blong man. Maet samfala oli laekem blong tingbaot se Kingdom blong God we i hae we i hae olgeta, i save stap long hat blong olgeta. Oli glad from we oli ting se samting ya i save jenisim man mo mekem man i kam gud moa. ?Be i gat sam pruf blong sapotem tingting ya?

Baebol i talem long yumi se: “Oltaem nomo, tingting [“hat,” NW] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jeremaea 17:9) Jisas hem wan i talem long yumi se: “From we insaed long tingting [“hat,” NW] blong man i gat ol samting olsem i save kamaot. Man i save gat rabis tingting, mo i save mekem nogud wetem gel, mo i save stil, mo i save kilim man i ded. Man i save stilim woman blong narafala man, mo woman we i mared finis i save go slip wetem narafala man. Man i save wantem tumas ol samting blong narafala man, mo i save mekem ol fasin we i no stret.” (Mak 7:20-22) Tingbaot samting ya: ?Yu no ting se fasin safa we yumi stap luk long wol tede, i kamaot fastaem long hat blong man we i fulap long sin? ?Weswe Kingdom blong God we i stretgud olgeta i save kamaot long wan ples olsem? Tru ya, Kingdom blong God i no save stap long hat blong man, sem mak olsem we frut we i swit i no save kamaot long rabis rop we i gat nil.—Matiu 7:16.

Seken samting, tingbaot olgeta we oli stap lesin taem Jisas i talem tok ya we i stap long Luk 17:21. Vas 20 i talem se: “Nao ol Farisi oli askem long Jisas se, ‘?Bambae God i kam King blong ol man blong hem long wetaem?’ Mo hem i talem long olgeta se.” (Luk 17:20) Ol Farisi oli enemi blong Jisas. Jisas i talem long olgeta ya we oli gat tu fes se, bambae oli no save go insaed long Kingdom blong God. (Matiu 23:13) Nao sipos ol Farisi oli no save go insaed long Kingdom blong God, ?olsem wanem yumi save talem se Kingdom blong God i stap long hat blong olgeta? !Samting ya i no stret nating! Ale, ?Jisas i minim wanem taem hem i talem olsem?

Plante Baebol oli traem tanem stret ol toktok blong Jisas, nao oli yusum toktok we i sem mak long Baebol long Bislama. Sam long ol Baebol ya oli talem se Kingdom blong God “i stap wetem yufala” mo sam oli talem “i stap long medel blong yufala.” ?Olsem wanem Kingdom blong God i stap wetem ol man, mo ol Farisi tu, long taem ya? Jisas hem i man ya we Jeova i jusumaot hem blong i King long Kingdom. Jisas, King ya we God i makemaot hem, hem nao we i stap long medel blong ol man ya. Hem i tijim ol man long saed blong Kingdom blong God mo hem i mekem ol merikel, i stap soemaot long ol man wanem we Kingdom ya bambae i mekem. Taswe, i olsem we Kingdom ya i stap long medel blong olgeta, i stap wetem olgeta.

I klia nomo se i no gat wan vas blong Baebol we i sapotem tijing ya se Kingdom blong God i stap long hat blong man. Defren olgeta, Kingdom ya hem i wan trufala gavman we bambae i stretem ol trabol long wol, olsem we ol profet bifo oli talemaot.—Aesea 9:6,7; Daniel 2:44.