1. I no longtaem, ?Jisas bambae i mekem wanem?

 !YUMI laef long wan taem we bambae i gat ol bigbigfala samting oli hapen! I no longtaem, Jisas bambae i jajem evri man. Jisas i talem ol samting we bambae oli hapen long wol ya bifo we hem i jajem ol man. Hem i talem long ol disaepol blong hem ol “saen” we i soemaot se hem i stap mo se yumi stap laef long “lashaf blong sistem blong wol ya.” (Mat. 24:3) Ol saen ya we hem i tokbaot i stap long Matiu japta 24 mo 25, long Mak japta 13, mo Luk japta 21.

2. ?Bambae yumi tokbaot wanem long stadi ya? ?Mo from wanem hemia bambae i halpem yumi?

² Jisas i tokbaot tri parabol we oli olsem ol woning long yumi. Hemia parabol blong sipsip mo nani, parabol blong ol ten yang gel we faef oli waes, mo faef oli no waes, mo parabol blong talen mane. Ol parabol ya wanwan bambae oli halpem yumi blong kasemsave se Jisas bambae i jajem man folem samting we hem i mekem. Taem yumi tokbaot ol parabol ya, i gud yumi traem faenem ol lesen we yumi save lanem mo luk olsem wanem blong folem long laef blong yumi. Faswan parabol we bambae yumi tokbaot hemia blong ol sipsip mo nani.

OL SIPSIP MO OL NANI

3. ?Wetaem Jisas bambae i jajem ol man?

³ Long parabol blong ol sipsip mo ol nani, Jisas i talem se bambae hem i jajem ol man folem samting we oli mekem taem oli harem gud nius, mo sipos oli sapotem ol tabu brata blong hem o nogat. (Mat. 25:​31-46) Long taem blong “bigfala trabol,” bambae hem i jajem ol man jes bifo long faet blong Amagedon. (Mat. 24:21) Jisas bambae i seraotem olgeta we oli sapotem  ol tabu Kristin long olgeta we oli no mekem olsem, sem mak olsem we man blong lukaotem ol sipsip i seraotem ol sipsip long ol nani.

4. Folem Aesea 11:​3, 4, ?from wanem yumi sua se Jisas bambae i jajem ol man long stret fasin? (Mo tu, yu luk pija.)

⁴ Profet tok blong Baebol i soemaot se jaj ya we Jehova i putumap, hemia Jisas, bambae i jajem ol man long stret fasin. (Ridim Aesea 11:​3, 4.) Hem i stap lukluk gud samting we ol man oli mekem, fasin blong olgeta, ol toktok blong olgeta, mo tu hem i luk olsem wanem oli tritim ol tabu brata blong hem. (Mat. 12:​36, 37; 25:40) Jisas bambae i save se hu i stap sapotem ol tabu brata blong hem mo ol wok we oli mekem. a Wan long ol beswan rod we ol sipsip oli sapotem ol tabu brata blong Kraes, hemia taem oli givhan long olgeta long wok blong prij. Olgeta we oli mekem olsem, Jisas bambae i jajem olgeta se oli ol “stret man” mo bambae oli gat janis blong kasem “laef we i no save finis” long wol. (Mat. 25:46; Rev. 7:​16, 17) !Hemia i wan nambawan blesing long olgeta we oli gohed blong holemstrong! Yes, sipos oli gohed blong holemstrong long taem blong bigfala trabol mo afta long hem, bambae nem blong olgeta i stap long “buk blong laef.”—Rev. 20:15.

5. ?Wanem lesen i stap long parabol blong ol sipsip mo ol nani? ?Mo parabol ya i go stret long hu?

⁵ Soemaot se yu holemstrong mo yu fasgud long God. Parabol blong Jisas long saed blong ol sipsip mo ol nani i go moa long olgeta we oli gat hop blong laef long wol. Olgeta oli soemaot se oli gat bilif, taem oli givhan long ol tabu brata blong Kraes long wok blong prij, be tu, taem oli obei gud long gudfala slef we Jisas i putumap. (Mat. 24:45) Be olgeta tu we oli gat hop blong laef long heven oli mas lesin gud long woning we i stap long parabol ya. ?From wanem? From we Jisas bambae i lukluk gud long samting we oli mekem, fasin blong olgeta, mo ol toktok blong olgeta. Taswe, olgeta tu oli mas soemaot se oli holemstrong. Be Jisas i tokbaot tu narafala parabol we i gat ol woning we i go stret long ol tabu Kristin. Yumi faenem tufala parabol ya tu long Matiu japta 25. Naoia i gud yumi tokbaot parabol blong ol ten yang gel we faef oli waes mo faef oli no waes.

FAEF YANG GEL WE OLI WAES MO FAEF OLI NO WAES

6. ?Olsem wanem faef long ol yang gel ya oli soemaot se oli waes? (Matiu 25:​6-10)

⁶ Long parabol blong ol yang gel, Jisas i tokbaot ten yang gel we oli go blong mitim man we i jes mared. (Mat. 25:​1-4) Olgeta evriwan oli wantem folem man we i jes mared i go long lafet blong mared. Jisas i talem se faef long olgeta oli “waes” mo faef oli “no waes.” Olgeta we oli waes oli rere gud mo oli lukaot gud. Mo olgeta oli rere blong wet long man we i jes mared nating sipos hem i kam let long naet. Taswe, oli karem ol laet mo sam moa oel blong oli save yusum long naet, from we maet man we i jes mared i kam let. Yes, olgeta oli rere gud taswe laet blong olgeta i save gohed blong laet. (Ridim Matiu 25:​6-10.) Ale, taem man we i jes mared i kamtru, ol yang gel ya we oli waes oli go wetem hem long lafet blong mared. Long sem fasin, ol tabu Kristin we oli soemaot se oli stap lukaot gud mo holemstrong long Jehova go kasem we Kraes i kam, bambae hem i jajem olgeta se oli stret blong joen wetem man ya we i jes mared, hemia Jisas, long Kingdom blong hem long  heven. b (Rev. 7:​1-3) ?Be olsem wanem long ol faef yang gel ya we oli no waes?

7. ?Wanem i hapen long ol faef yang gel we oli no waes, mo from wanem?

⁷ Ol faef yang gel we oli no waes, oli no rere taem man we i jes mared i kamtru. Laet blong olgeta klosap i ded, mo oli no karem sam moa oel wetem olgeta. Taem oli harem se klosap nao man we i jes mared bambae i kamtru, oli wantem gobak blong pem sam moa oel. Be oli no kambak yet taem man we i jes mared i kamtru. Long taem ya, “ol yang gel ya we oli rere, oli go insaed wetem hem long ples blong kakae blong mared, mo ol man oli satem doa.” (Mat. 25:10) Biaen taem ol yang gel ya we oli no waes oli kambak mo oli wantem go insaed, man ya we i jes mared i talem long olgeta se: “Mi mi no save yufala.” (Mat. 25:​11, 12) Ol yang gel ya oli no rere blong wet go kasem taem we man we i jes mared i kamtru. ?Wanem lesen blong ol tabu Kristin?

8-9. ?Wanem lesen we ol tabu Kristin oli save lanem long parabol blong ol ten yang gel? (Mo tu, yu luk pija.)

⁸ Soemaot se yu rere mo yu lukaot gud. Jisas i no stap talem se bambae i gat tu grup blong ol tabu Kristin, we wan i rere blong wet kasem en blong sistem blong wol ya mo narawan nogat. Be hem i stap tokbaot samting we bambae i hapen long ol tabu Kristin sipos oli no rere blong stanap strong kasem en. Sipos samting olsem i hapen, bambae oli no save kasem pei blong olgeta. (Jon 14:​3, 4) !Mo hemia bambae i nogud tumas! Nating se yumi gat hop blong laef long heven o long wol, yumi evriwan i mas lesin gud long woning we i stap long parabol blong ol ten yang gel ya. I gud yumi wanwan i gohed blong lukaot gud mo rere, blong yumi save stanap strong go kasem en.—Mat. 24:13.

⁹ Afta we Jisas i tokbaot parabol blong ol ten yang gel blong makemaot se i impoten blong yumi rere mo lukaot gud, hem i tokbaot parabol blong ol talen mane. Parabol ya i soemaot se yumi mas wok had.

 OL TALEN MANE

10. ?Olsem wanem tufala slef ya i soemaot se tufala i holemstrong long masta blong tufala? (Matiu 25:​19-23)

¹⁰ Long parabol blong ol talen mane, Jisas i tokbaot tu slef we tufala i holemstrong long masta blong olgeta, mo wan nogat. (Mat. 25:​14-18) Tufala slef ya i soemaot se tufala i holemstrong, taem tufala i wok had blong winim plante moa mane blong masta blong tufala. Bifo we masta blong olgeta i aot, hem i givim mane long olgeta. Hemia wan bigfala mane. Tufala slef ya i wok had mo tufala i yusum gud mane we tufala i kasem. ?Wanem i kamaot from? Taem masta blong olgeta i kambak, tufala i winim moa mane antap long wanem we tufala i kasem. From samting ya, masta i talem gudfala toktok long tufala nao ‘tufala i glad tumas, tufala i kam joen wetem hem.’ (Ridim Matiu 25:​19-23.) ?Be olsem wanem long nambatri slef? ?Hem i mekem wanem long mane ya we masta blong hem i givim long hem?

11. ?Wanem i hapen long slef ya we i “les tumas” mo from wanem?

¹¹ Nambatri slef i kasem wan talen mane, be hem i “les tumas.” Masta blong hem i ting se bambae hem i yusum gud talen mane ya, be hem i girap i go berem long graon. Taem masta i kambak, slef ya i givimbak nomo wan talen mane we masta i bin givim long hem. Slef ya i no gat gudfala fasin. Hem i no talem sore from samting we hem i mekem, be hem i singaot masta blong hem se “wan had man.” Yes, masta ya i no glad long slef ya. Antap moa, hem i tekemaot talen mane ya long hem mo i sakemaot hem long haos.—Mat. 25:​24, 26-30.

12. ?Tufala gudfala slef ya i minim hu tede?

¹² Tufala slef ya we i holemstrong, hemia ol tabu Kristin. Mo masta, hemia Jisas, i invaetem olgeta blong ‘oli kam joen wetem hem’ from we ‘hem i glad tumas.’ Mo olgeta oli kasem pei blong olgeta long heven, hemia faswan laef bakegen. (Mat. 25:​21, 23; Rev. 20:5b) Be nogud eksampol blong slef we i les tumas, i wan woning long ol tabu Kristin. ?From wanem yumi talem olsem?

13-14. ?Ol tabu Kristin oli save lanem wanem long parabol blong ol talen mane? (Mo tu, yu luk pija.)

¹³ Soemaot se yu wok had. Long parabol  blong ol talen mane mo ol ten yang gel, Jisas i no stap talem se ol tabu Kristin bambae oli kam les. Be hem i stap tokbaot samting we bambae i hapen sipos oli no moa wok strong. God bambae i no moa ‘jusumaot olgeta mo singaot olgeta,’ mo bambae hem i no letem olgeta i go insaed long Kingdom blong hem long heven.—2 Pita 1:10.

¹⁴ Parabol blong Jisas long saed blong ol ten yang gel mo ol talen mane, i makemaot klia se ol tabu Kristin oli mas rere mo lukaot gud, mo tu oli mas wok had. ?Be i gat wan moa narafala samting we Jisas i talem we i olsem woning long ol tabu Kristin? Yes, mo yumi save faenem woning ya long ol tok blong Jisas long Matiu 24:​40, 41.

?BAMBAE “GOD I TEKEM” HU?

15-16. Folem Matiu 24:​40, 41, ?from wanem ol tabu Kristin oli mas wekap gud?

¹⁵ Bifo we Jisas i tokbaot trifala parabol ya, hem i tokbaot laswan jajmen blong ol tabu Kristin we bambae i soemaot se God i glad long olgeta o nogat. Hem i tokbaot tu man we tufala i stap wok long garen mo tu woman we tufala i stap yusum smol ston blong granem ol sid. Long olgeta ya, i luk olsem tu tu long olgeta i stap mekem sem wok, be Jisas i talem se bambae God i “tekem wan, wan i stap.” (Ridim Matiu 24:​40, 41.) Biaen, hem i talem long ol man blong hem se: “Yufala i mas gohed blong lukaot gud, from we yufala i no save wanem dei we mi Masta blong yufala, bambae mi kam long hem.” (Mat. 24:42) Jisas i talem sem samting afta we hem i tokbaot parabol blong ol ten yang gel. (Mat. 25:13) ?Ol tok ya oli joen? Yes i luk olsem. Ol tabu Kristin nomo we oli holemstrong, Jisas bambae i “tekem” olgeta i go insaed long Kingdom blong God long heven.—Jon 14:3.

¹⁶ Soemaot se yu wekap gud. Eni tabu Kristin we i no gohed blong wekap gud long saed blong spirit, bambae hem i no stap wetem olgeta we God i “jusumaot olgeta.” (Mat. 24:31) Olgeta man blong God, nomata wanem hop we oli gat, oli mas luk ol tok ya blong Jisas olsem wan woning blong oli gohed blong wekap gud mo gohed blong holemstrong.

17. ?From wanem yumi no mas wari sipos Jehova i jes jusumaot sam moa tabu Kristin long ol yia we i pas?

¹⁷ Yumi save gud Jehova taswe yumi trastem ol jajmen blong hem. Mo yumi no wari sipos Jehova i jes jusumaot sam moa tabu Kristin long ol yia we i pas. c Hemia i mekem yumi tingbaot samting we Jisas i talem long pijatok blong hem we i tokbaot ol man we oli kam wok long plantesen blong grep long namba 11 aoa. (Mat. 20:​1-16) Olgeta we oli invaetem olgeta blong kam wok long plantesen blong grep long en blong dei, oli kasem sem pei nomo olsem olgeta we oli stat wok long eli moning finis. Long sem fasin, nomata wetaem Jehova i jusumaot ol tabu Kristin, be bambae olgeta evriwan oli kasem pei blong olgeta long heven, sipos oli gohed blong holemstrong.

LESIN GUD LONG OL WONING

18-19. ?Wanem ol lesen mo ol woning we yumi bin tokbaot?

¹⁸ ?Yumi bin lanem wanem kam kasem naoia? Yumi lanem se olgeta we oli gat hop blong laef olwe long wol, parabol blong ol sipsip mo ol nani i soemaot se i impoten we oli gohed blong holemstrong mo fasgud long Jehova naoia mo go kasem taem blong bigfala trabol. Long fiuja, Jisas bambae i jajem olgeta we oli holemstrong se oli stret blong “kasem laef we i no save finis.”—Mat. 25:46.

 ¹⁹ Mo tu, yumi bin tokbaot tu parabol we oli olsem ol woning long ol tabu Kristin. Long parabol blong ol ten yang gel, Jisas i tokbaot faef we oli no waes mo faef oli waes. Olgeta ya we oli waes, oli rere mo oli lukaot gud. Taswe, oli naf blong wet go kasem taem we man we i jes mared i kamtru. Be ol faef yang gel ya we oli no waes, oli no rere. Taswe, man we i jes mared i no wantem we oli kam long lafet blong mared blong hem. Yumi tu, yumi mas rere blong wet go kasem taem we Jisas bambae i finisim rabis sistem blong wol ya. Mo tu, long parabol blong ol talen mane, yumi luk we Jisas i tokbaot tu slef we i wok had. Tufala i wok had blong masta blong tufala, taswe masta i glad long tufala. Be hem i sakemaot slef we i les tumas. ?Yumi lanem wanem? Yumi mas gohed blong stap bisi long wok blong Jehova kasem en. Mo laswan yumi tokbaot olsem wanem ol tabu Kristin oli mas gohed blong wekap, blong Jisas i save “tekem” olgeta blong kasem pei blong olgeta long heven. Olgeta oli stap wet long taem ya we bambae oli “stap wanples” wetem Jisas long heven. Afta long Amagedon, bambae oli joen olsem woman we bambae i mared long Jisas we hem i Smol Sipsip.—2 Tes. 2:1; Rev. 19:9.

20. ?Jehova bambae i mekem wanem long olgeta we oli lesin gud long ol woning?

²⁰ Nating se dei blong jajmen i stap kam klosap, be yumi no nid blong fraet. Sipos yumi gohed blong holemstrong, Papa blong yumi long heven we i lavem yumi tumas, bambae i givim “paoa ya we i bigwan bitim mak” blong yumi save holemstrong, nao yumi naf blong “stanap long fes blong Pikinini blong man.” (2 Kor. 4:7; Luk 21:36) Nating se yumi gat hop blong laef long heven o long wol, be bambae yumi mekem Papa blong yumi i glad sipos yumi lesin gud long ol woning we i stap long ol parabol blong Jisas. Mo from we Jehova i kaen tumas long yumi, bambae oli save ‘raetemdaon nem blong yumi long buk’ blong laef.—Dan. 12:1; Rev. 3:5.