STADI 43
SINGSING 90 Yumi Leftemap Tingting Blong Yumi
?Wanem i Save Halpem Yumi Taem Yumi Gat Tu Tingting?
“Yufala i mas traem olgeta samting fastaem.”—1 TES. 5:21.
BIGFALA TINGTING
Taem yumi gat tu tingting, hemia i save blokem yumi blong no mekem wok blong Jehova. Taswe long stadi, ya bambae yumi luk samting we i save halpem yumi blong no gat tu tingting.
1-2. (1) ?Wanem i save mekem se ol man blong Jehova oli gat tu tingting? (2) ?Bambae yumi tokbaot wanem long stadi ya?
YUMI evriwan i save gat tu tingting a samtaem, nomata se yumi yangfala o olfala. Eksampol, traem tingbaot wan yangfala Witnes. Hem i no sua sipos Jehova i rili tingbaot hem, nao hem i ting se hem i no naf blong tekem baptaes. O traem tingbaot wan brata we taem hem i yangfala, hem i jusum blong putum Kingdom fasples, i bitim we hem i mekem wan wok long wol. Be naoia we famle blong hem i no gat tumas mane, maet hem i stat blong gat tu tingting. Mo traem pijarem wan olfala sista we naoia hem i kam olfala mo i no moa gat paoa. Maet hem i harem nogud from hem i no moa save mekem plante wok blong Jehova olsem bifo. Samtaem yu yu stap askem se: ‘?Jehova i tingbaot mi? ?Desisen ya we mi bin mekem blong wosipim Jehova, i stret? ?Jehova i save yusum mi yet blong mekem wok blong hem?’
2 Sipos yumi no traem faenem ansa blong ol kwestin blong yumi, hemia i save mekem se yumi lego bilif mo stop blong wosipim Jehova. Taswe long stadi ya, bambae yumi tokbaot olsem wanem ol stamba trutok blong Baebol oli save halpem yumi sipos yumi gat tu tingting mo ting se (1) Jehova i no tingbaot yumi, (2) ol desisen blong yumi bifo oli no waes, o (3) Jehova i no moa save yusum yumi long wok blong hem.
?WANEM I SAVE HALPEM YU TAEM YU GAT TU TINGTING?
3. Tokbaot wan rod we i save halpem yumi taem yumi gat tu tingting.
3 Wan rod we i save givhan long yumi, hemia blong lukluk i go long Tok blong God, blong faenem ansa blong ol kwestin blong yumi. Sipos yumi mekem olsem, bilif blong yumi bambae i kam strong, yumi fren gud wetem Jehova, mo yumi naf blong “stanap strong long bilif.”—1 Kor. 16:13.
4. ?Olsem wanem blong “traem olgeta samting fastaem”? (1 Tesalonaeka 5:21)
4 Ridim 1 Tesalonaeka 5:21. Baebol i talem se yumi mas “traem olgeta samting fastaem.” ?Olsem wanem blong mekem samting ya? Yumi mas skelem samting we yumi bilif long hem wetem wanem we Baebol i talem, blong meksua se i tru. Eksampol, traem tingbaot yangfala man ya we i no sua sipos God i tinghae long hem o nogat. ?Yu ting se i stret we hem i stap nomo olsem we i no mekem wan samting? Nogat. Hem i sud “traem olgeta samting fastaem,” hemia taem hem i traehad blong faenemaot tingting we Jehova i gat long hem.
5. ?Olsem wanem yumi “lesin” long Jehova taem i ansa long ol kwestin blong yumi?
5 Taem yumi ridim Tok blong God, yumi stap “lesin” long Jehova we i toktok long yumi. Be blong kasem ansa blong ol kwestin blong yumi, yumi mas mekem sam samting. Yumi mas stadi long ol vas we bambae oli ansa long ol kwestin blong yumi. Mo yumi save yusum ol samting we oganaesesen blong Jehova i givim blong mekem risej long ol kwestin ya. (Prov. 2:3-6) Yumi save prea blong Jehova i lidim yumi long risej ya, mo halpem yumi blong faenemaot tingting blong hem long saed ya. Biaen yumi save faenem ol stamba trutok blong Baebol mo ol gudfala save we i save givhan long yumi. Mo tu, yumi save stadi long eksampol blong sam gudfala man long Baebol we olgeta tu oli gat sem tingting mo filing olsem yumi.
6. ?Olsem wanem ol miting oli halpem yumi taem yumi gat tu tingting?
6 Long ol miting blong yumi tu, yumi lesin taem Jehova i toktok long yumi. Sipos yumi go oltaem long ol miting, yumi save harem wan gudfala samting long wan tok o ansa blong ol brata mo sista, we i ansarem gud kwestin blong yumi. (Prov. 27:17) Naoia bambae yumi tokbaot sam tingting we yumi save gat, mo samting we yumi save mekem blong winim ol nogud tingting ya.
YU NO SUA SE JEHOVA I TINGBAOT YU O NOGAT
7. ?Wanem kwestin we maet samfala oli stap askem?
7 Samtaem, yu yu stap tingbaot se, ‘?Jehova i rili tingbaot mi?’ Sipos yu gat filing ya se yu no impoten, maet yu ting se i no posibol blong fren gud wetem Krieta blong heven mo wol. Maet King Deved tu i gat sem tingting olsem. Taswe, taem hem i luk we Jehova i kea gud long ol man we oli nating nomo, hem i talem se: “O Jehova, man i nating nomo, i no stret blong yu yu lukluk long hem, ol pikinini blong man, oli blong ded nomo, i no stret nating blong yu tingbaot olgeta.” (Sam 144:3) Weples yu save faenem ansa blong kwestin ya se: “?Jehova i rili kea long yumi wanwan?”
8. Folem 1 Samuel 16:6, 7, 10-12, ?Jehova i luk wanem long ol man?
8 Long Baebol, yumi lanem se Jehova i tingbaot olgeta we ol narafala oli luk olgeta se oli no impoten. Eksampol, taem Jehova i sanem Samuel i go long haos blong Jese blong makemaot wan long ol boe blong hem, blong i kam fiuja king blong Isrel, Jese i tekem seven boe blong hem i kam long Samuel, be hem i no tekem yangfala Deved i kam. b Nating se i olsem, Jehova i jusumaot Deved. (Ridim 1 Samuel 16:6, 7, 10-12.) Jehova i luk samting we i stap insaed long hat blong Deved. Hem i save se Deved i lavem hem tumas.
9. ?From wanem yu sua se Jehova i tingbaot yu? (Mo tu, yu luk pija.)
9 Tingbaot se Jehova i soemaot finis se hem i tingbaot yu. Hem i mekem samting ya taem hem i givim ol gudfala advaes we i stret gud long yu. (Sam 32:8) Mo hemia i pruvum se hem i save gud yu. (Sam 139:1) Taem yu folem gud ol advaes blong Jehova mo luk olsem wanem hem i stap halpem yu, hemia bambae i mekem yu sua fulwan se Jehova i tingbaot yu. (1 Kron. 28:9; Wok 17:26, 27) Jehova i luk ol traehad we yu mekem blong wosipim hem. Hem i luk ol gudfala fasin blong yu mo hem i wantem we yu kam fren blong hem. (Jer. 17:10) Mo bambae hem i glad tumas sipos yu wantem kam fren blong hem tu.—1 Jon 4:19.
“Sipos yu lukaotem [Jehova], bambae hem i mekem se yu faenem hem.”—1 Kron. 28:9 (Haf 9) c
YU NO SUA SE DESISEN BLONG YU BIFO I WAES O NOGAT
10. Taem yumi tingbaot ol desisen blong yumi bifo, ?maet yumi save gat wanem kwestin?
10 Samtaem long laef, samfala oli save tingtingbak mo gat tingting ya se desisen we oli mekem bifo i no waes. Maet oli bin jusum blong lego wan gudfala wok blong oli save mekem moa long wok blong Jehova. Be taem ol yia oli pas, mo oli luk we ol narafala we oli mekem defren desisen oli gat plante mane mo gudfala laef, naoia oli stap tingting se: ‘?Desisen ya we mi bin tekem blong mekem moa long wok blong Jehova, i waes? ?O hemia i blokem mi blong gat plante mane mo gudfala laef?’
11. ?Wanem i mekem tingting blong man we i raetem Ol Sam 73 i trabol?
11 Sipos yu tu yu gat ol semfala kwestin olsem, tingbaot filing blong man we i raetem Ol Sam 73. Hem i luk se ol man we oli no wosipim Jehova, oli gat gudfala helt, gudfala laef, mo oli no wari. (Sam 73:3-5, 12) Taem hem i luk se ol man ya oli stap wingud long laef blong olgeta, hem i harem olsem se traehad we hem i stap mekem long wok blong Jehova, i nating nomo. Mo samting ya i mekem se ‘fuldei tingting blong hem i trabol.’ (Sam 73:13, 14) ?Long taem ya, wanem i givhan long hem?
12. Folem Ol Sam 73:16-18, ?olsem wanem man blong raetem sam ya i stretem nogud tingting we hem i gat?
12 Ridim Ol Sam 73:16-18. Man blong raetem sam ya i go insaed long tabu haos blong Jehova. Long ples ya, hem i naf blong tingting gud. Hem i kasemsave se, nating se ol man ya oli gat gudfala laef naoia, be oli no gat wan gudfala hop long saed blong fiuja. Mo hem i luksave se desisen ya blong mekem wok blong Jehova, hemia beswan desisen. Ale, hem i gat stret tingting bakegen mo i gat strong tingting blong gohed blong wosipim Jehova.—Sam 73:23-28.
13. ?Olsem wanem blong gat pis long tingting, sipos yu ting se desisen blong yu bifo i no waes? (Mo tu, yu luk pija.)
13 Baebol i save halpem yumi tu blong gat pis long tingting. ?Hem i mekem samting ya olsem wanem? Hem i givhan long yumi blong skelem laef blong yumi wetem laef blong ol man blong wol, mo i mekem yumi tinghae long ol gudfala samting we yumi gat, we hemia i minim tu ol blesing we Jehova i stap givim long yumi. Long tingting blong ol man blong wol, i impoten we oli gat gudfala laef naoia. Hemia from we oli no gat wan gudfala hop long saed blong fiuja. Be yu, Jehova i givim plante gudfala samting long yu naoia, mo i promes tu blong givim plante moa samting long yu long fiuja. (Sam 145:16) Mo tu, traem tingbaot: ?Yu ting se laef blong yu bambae i olsem wanem sipos yu no bin jusum blong wosipim Jehova? Wan samting we yumi sua long hem, hemia se: Olgeta we oli mekem ol desisen from oli lavem God mo neba blong olgeta, oltaem bambae oli kasem ol samting blong mekem olgeta oli hapi.
Lukluk i go long fored, long ol blesing we Jehova i promes blong mekem i kamtru (Haf 13) d
YU NO SUA SE JEHOVA I SAVE YUSUM YU YET O NOGAT
14. ?Wanem problem we sam man blong Jehova oli fesem? ?Mo hemia i mekem se oli gat wanem tingting?
14 Sam man blong Jehova oli no save mekem moa long wok blong hem, from we oli olfala, oli gat problem blong helt, o oli handikap. Hemia i mekem oli ting se Jehova i no tinghae long olgeta. Mo maet oli stap tingting se: ‘?Jehova i save yusum mi yet blong mekem wok blong hem o nogat?’
15. ?Man we i raetem Ol Sam 71, i sua long wanem?
15 Man we i raetem Ol Sam 71, i gat sem filing olsem. Taswe, hem i prea se: “Yu no lego mi taem mi no moa strong.” (Sam 71:9, 18) Nating se i olsem, hem i gohed blong trastem se sipos hem i wok strong long wok blong Jehova, Jehova bambae i lidim hem mo sapotem hem. Man blong raetem sam ya i lanem se Jehova i glad long olgeta we oli mekem bes blong olgeta long wok blong hem, nating se i gat sam samting i blokem olgeta.—Sam 37:23-25.
16. ?Jehova i save yusum ol olfala blong mekem wanem? (Ol Sam 92:12-15)
16 Ol olfala, yufala i mas gat sem tingting olsem Jehova long ol problem we yufala i fesem. Hem i save givhan long yufala blong gohed long wok blong hem, nating se bodi blong yufala i no moa strong. (Ridim Ol Sam 92:12-15.) I gud yufala i tingbaot moa samting we yufala i save mekem, i bitim ol samting we yufala i no moa save mekem. Eksampol, yufala i save givhan long ol narafala tru long gudfala eksampol blong yufala, mo taem yufala i soemaot se yufala i intres long olgeta. Yufala i save tokbaot olsem wanem Jehova i bin givhan long yufala long ol yia we i pas, mo tokbaot ol nambawan promes blong Baebol we yufala i wantem tumas blong luk i kamtru long fiuja. Mo yufala i no mas fogetem se taem yufala i prea from ol narafala, hemia i save gat bigfala paoa. (1 Pita 3:12) Nomata wanem problem yumi wanwan i fesem, be yumi evriwan i save givim samting i go long Jehova mo halpem ol narafala.
17. ?From wanem yumi no mas skelem wok blong yumi wetem blong ol narafala?
17 Sipos yu harem nogud se yu no save mekem moa long wok blong Jehova, tingbaot se Jehova i tinghae long eni wok blong hem we yu mekem. Maet yu traem blong skelem wok we yu mekem wetem wok blong narafala. Be yu no mas mekem olsem. ?From wanem? From Jehova i no stap skelem ol wok blong yumi. (Gal. 6:4) Eksampol, Meri i givim wan sas oel long Jisas olsem presen. (Jon 12:3-5) Be wan wido, hem i go putum tu smol mane nomo long tempol. (Luk 21:1-4) Jisas i no skelem presen blong tufala, be hem i luksave se tufala i gat strong bilif. Taswe, yu save sua se Jehova i tinghae long evri samting we yu mekem, from yu bilif mo lavem hem. Mo hem i tinghae long ol samting ya, nating se long lukluk blong yu, hemia i smol nomo.
18. ?Wanem i save halpem yumi blong sakemaot ol nogud tingting? (Mo tu, yu luk bokis ya “ Baebol i Save Halpem Yu Taem Yu Gat Tu Tingting.”)
18 Yumi evriwan i save gat tu tingting samtaem. Olsem we yumi luk, ol trutok blong God long Baebol oli save halpem yumi blong sakemaot ol nogud tingting. Taswe, i gud yumi traehad blong faenem ansa blong ol kwestin we yumi gat, mo lanem blong trastem Jehova. Jehova i save gud yumi wanwan. Mo hem i tinghae long evri samting we yumi mekem blong wosipim hem, mo hem i promes blong blesem yumi from. Taswe, yumi sua se Jehova i lavem mo i lukaot gud long ol man we oli stap mekem wok blong hem.
SINGSING 111 Ol Samting We Oli Mekem Yumi Glad
a MINING BLONG TOKTOK: Tok ya tu tingting long stadi ya, i tokbaot man we i no sua sipos Jehova i tingbaot hem, mo i no sua sipos ol desisen blong hem bifo oli waes o nogat. Be i no stap tokbaot tu tingting long Baebol, we i min se man i no bilif long Jehova mo long ol promes blong hem.
b Nating se Baebol i no talem stret yia we Jehova i jusumaot Deved, be i luk olsem se long taem ya hem i wan yangfala nomo.—Yu luk Wajtaoa blong 1 Septemba 2011, pej 29, haf 2 long Inglis.
