STADI 41
Yumi Wosipim God Ya We i Gat “Bigfala Sore”
“Jehova i mekem i gud long olgeta samting, mo olgeta samting we hem i mekem oli pruvum se hem i gat sore.”—SAM 145:9.
SINGSING 44 Prea Blong Man We i Gat Tingting Daon
BIGFALA TINGTING *
1. ?Wan man we i gat sore hem i olsem wanem?
TAEM yumi tingbaot wan man we i gat sore, maet yumi pijarem wan man we i kaen, i gat lav, mo i glad blong givim samting. Maet hemia i mekem yumi tingbaot stori blong man Sameria we Jisas i tokbaot. Hem i blong wan narafala nesen, be hem i soem ‘sore mo i givhan’ long wan man Jiu we ol stilman oli kilim mo oli stilim ol samting blong hem. Man Sameria ya i “sore” long man Jiu ya we i kasem kil, mo i lukaotgud long hem. (Luk 10:29-37) Stori ya i soemaot wan gudfala fasin blong God blong yumi, hemia sore. God i gat sore from we hem i lavem yumi mo evri dei hem i soemaot fasin ya long plante defren rod.
2. ?Wanem wan narafala rod blong soemaot sore?
2 I gat wan narafala rod tu blong man i soem sore. Wan man we i gat sore, maet i disaed blong no panisim wan man we i sud kasem panis. Mo hemia nao samting we Jehova i mekem long yumi. Man blong raetem sam i talem se: “Hem i no panisim yumi stret long mak blong ol sin blong yumi.” (Sam 103:10) Nating se i olsem, Jehova i save panisim wan man we i mekem wan bigfala sin.
3. ?Bambae yumi ansa long wanem kwestin?
3 Long stadi ya bambae yumi tokbaot tri kwestin: ?From wanem Jehova i soem sore? ?I posibol blong soem sore long wan man, mo long semtaem stretem hem? ?Mo wanem i save halpem yumi blong soem sore? I gud yumi luk olsem wanem Tok blong God i ansarem ol kwestin ya.
?FROM WANEM JEHOVA I SOEM SORE?
4. ?From wanem Jehova i soem sore?
4 Jehova i glad nomo blong soem sore. Tabu spirit i pulum aposol Pol blong raetem se God i gat “bigfala sore.” Pol i eksplenem se from we God i gat sore, hem i jusumaot sam man blong hem we oli no stretgud blong oli gat hop blong laef long heven. (Efes. 2:4-7) Be Jehova i no soem sore nomo long ol man we hem i jusumaot. Man ya blong raetem sam, Deved, i raetem se: “Jehova i mekem i gud long olgeta samting, mo olgeta samting we hem i mekem oli pruvum se hem i gat sore.” (Sam 145:9) From we Jehova i lavem ol man, hem i soem sore taem hem i luk se i stret blong mekem olsem.
5. ?Olsem wanem Jisas i save se Jehova i gat sore?
5 Jisas nao i savegud we Jehova i glad blong soem sore, from we bifo we hem i kam long wol, hem spenem plante taosen yia wetem Papa blong hem long heven. (Prov. 8:30, 31) Jisas i luk we plante taem Papa blong hem i soem sore long ol sinman. (Sam 78:37-42) Mo taem Jisas i tij, oltaem hem i tokbaot nambawan fasin ya blong Papa blong hem.
Papa ya i no mekem boe blong hem i sem, be i welkamem bak hem (Haf 6) *
6. ?Jisas i yusum wanem parabol blong soemaot se Jehova i glad blong soem sore?
6 Olsem we yumi luk long las stadi, Jisas i yusum parabol blong boe we i lusum rod blong halpem yumi blong kasemsave se Jehova i glad blong soem sore. Boe ya i lego haos blong hem mo “i folem wan rabis laef nao hem i westem olgeta samting blong hem.” (Luk 15:13) Be biaen, hem i tanem tingting blong hem, i putum tingting blong hem i stap daon, mo i gobak long papa blong hem. ?Wanem tingting blong papa blong hem? I no tekem longtaem blong boe ya i faenemaot. Jisas i talem se: “Taem [boe ya] i stap longwe yet, papa blong hem i luk hem mo i sore tumas long hem, nao i resis i go, i putum han blong hem i goraon long boe ya, mo i kis long hem.” Papa ya i no mekem boe blong hem i sem. Be hem i sore, i fogivim hem, mo i welkamem bak hem. I tru se boe ya i mekem bigfala sin, be from we hem i tanem tingting blong hem, papa blong hem i fogivim hem. Papa long parabol ya i representem Jehova. Yes, Jisas i yusum parabol ya blong soemaot se Jehova i glad nomo blong fogivim olgeta we oli rili tanem tingting blong olgeta from sin we oli mekem.—Luk 15:17-24.
7. ?Olsem olsem waes blong Jehova i joen wetem fasin blong hem blong soem sore?
7 Jehova i soem sore from we hem i waes we i waes. Oltaem ol desisen blong Jehova oli blong mekem i gud long yumi. Baebol i talem se “waes we i kamaot long heven . . . i gat sore oltaem mo i mekem ol gudfala wok blong givhan long narafala.” (Jem. 3:17) Olsem wan papa we i gat lav, Jehova i save se taem hem i soem sore, hemia bambae i mekem i gud long ol pikinini blong hem. (Sam 103:13; Aes. 49:15) From we Jehova i soem sore long ol man blong hem, hemia i mekem se oli gat wan hop blong fiuja nating se oli no stret gud. Taswe, from we Jehova i waes we i waes, oltaem hem i soem sore taem hem i luk se i stret blong mekem. Be tu, Jehova i save wetaem blong no soem sore. From we Jehova i waes, hem i no soem sore taem wan samting i no stret.
8. ?Samtaem kongregesen i mas mekem wanem, mo from wanem?
8 Sipos wan man blong God i jusum blong folem wan fasin blong laef we i no stret, ?bambae yumi mekem wanem? Jehova i pulum Pol blong raetem se: “Yufala i mas stop blong joen wetem [hem].” (1 Kor. 5:11) Man we i mekem sin mo we i no wantem tanem tingting blong hem, kongregesen i mas putumaot hem. Hemia i protektem ol brata sista we oli holemstrong, mo i soemaot fasin blong Jehova blong stap tabu. Be sam man oli ting se taem wan man i disfelosip, hemia i no soemaot nating se God i sore long hem. ?Hemia i tru? Bambae yumi luk.
?FASIN BLONG STRETEM MAN I SOEM SORE?
Nating se sipsip we i sik i stap hem wan, be man blong lukaot long sipsip bambae i gohed blong lukaotgud long hem (Haf 9-11)
9-10. Folem Hibru 12:5, 6, ?from wanem fasin blong disfelosip i soem sore? Talem wan eksampol.
9 Taem yumi harem wan anaonsmen long miting se wan we yumi save mo lavem hem “i no moa wan Witnes blong Jehova,” yumi harem nogud tumas. Maet yumi stap tingting se, i no rili nid blong hem i disfelosip. ?Be taem man i disfelosip, hemia i soemaot sore? Yes. Sipos i nidim blong stretem wan man be yumi no mekem, hemia i soem se yumi no waes, yumi no gat sore, o yumi no lavem hem. (Prov. 13:24) Sipos man i disfelosip, ?hemia i save halpem hem blong i jenis mo i tanem tingting blong hem? Yes. Plante brata sista we oli bin mekem wan bigfala sin oli talem se taem oli disfelosip, hemia i givhan long olgeta blong luksave se samting we oli mekem i no stret, ale oli tanem tingting blong olgeta, oli jenisim fasin blong olgeta, mo oli kambak long Jehova.—Ridim Hibru 12:5, 6.
10 Traem tingbaot eksampol ya. Wan man blong lukaot sipsip i makem se wan sipsip blong hem i sik. Hem i save se blong tritim sipsip ya, hem i mas tekemaot hem long ol narafala sipsip mo putum hem i stap hem wan. Ol sipsip oli laekem blong stap wanples mo oli save fraet sipos oli stap olgeta wan. ?Olsem wanem? ?Hemia i min se man ya i mekem i strong long sipsip ya taem i putum hem i stap hem wan? Nogat. Hem i save se sipos hem i letem sipsip ya i stap, bambae hem i spredem sik blong hem i go long ol narafala sipsip tu. Taswe taem hem i putum sipsip ya i stap hem wan, hem i protektem ol narafala sipsip.—Skelem wetem Levitikas 13:3, 4.
11. (1) ?Olsem wanem wan man we i disfelosip i sem mak long wan sipsip we i sik? (2) ?Man we i disfelosip i mas mekem wanem, mo hem i save kasem wanem help?
11 Taem wan Kristin i disfelosip, yumi save tingbaot hem olsem wan sipsip we i sik. Hem i sik long saed blong spirit. (Jem. 5:14) Sik long saed blong spirit i olsem wan rabis sik we man i save pasem i go long narafala. Taswe samtaem man we i sik long saed blong spirit, kongregesen i mas putumaot hem. Hemia wan rod blong Jehova i soem lav long ol sipsip we oli holemstrong long hem, mo blong halpem hemia we i mekem sin blong i tanem tingting blong hem. Nating se hem i disfelosip, hem i save gohed blong kam long ol miting blong fidim hem wan long saed blong spirit mo mekem bilif blong hem i kam strong bakegen. Hem i save kasem ol buk mo magasin blong stadi long hem mo wajem JW Brodkasting®. Mo taem ol elda oli luk se hem i stap mekem sam jenis, wanwan taem oli save go luk hem blong givim advaes mo halpem hem blong i frengud wetem Jehova bakegen. Olsem nao, hem i save kambak olsem wan Witnes blong Jehova. *
12. ?Olsem wanem ol elda oli soem lav long wan man we i no tanem tingting from sin blong hem?
12 I impoten blong tingbaot se olgeta we oli disfelosip, hemia olgeta we oli no wantem tanem tingting from sin blong olgeta. Ol elda oli save se oli mas tingting gud bifo we oli tekem desisen blong putumaot wan man. Oli save se Jehova i stretem man “go kasem mak we i stret.” (Jer. 30:11) Oli lavem ol brata blong olgeta, mo oli no wantem mekem wan samting we i save spolem frensip blong olgeta wetem Jehova. Be samtaem, wan rod nomo blong soem lav mo sore long man we i mekem sin, hemia blong putumaot hem long kongregesen blong sam taem.
13. ?From wanem wan Kristin long Korin i mas disfelosip?
13 Traem tingbaot samting we Pol i mekem long wan Kristin we i no wantem tanem tingting from sin blong hem. Wan Kristin long Korin i stap mekem doti fasin blong seks, hem i stap tekem waef blong papa blong hem. !Hemia wan nogud samting! Pol i save we Jehova i bin talem long ol man Isrel bifo se: “Man we i slip wetem waef blong papa blong hem, hem i mekem papa blong hem i sem. Man ya wetem waef blong papa blong hem, tufala i mas ded.” (Lev. 20:11) I tru se Pol i no save talem long kongregesen se man ya i mas ded. Be hem i talem long ol Kristin long Korin se man ya i mas disfelosip. !Doti fasin blong man ya i save spolem ol narafala long kongregesen, mo samfala oli ting se samting we man ya i mekem i no wan bigfala sin!—1 Kor. 5:1, 2, 13.
14. ?Olsem wanem Pol i soem sore long man Korin ya we i disfelosip, mo from wanem? (2 Korin 2:5-8, 11)
14 Samtaem biaen, Pol i faenemaot se man ya we i mekem sin, i mekem sam jenis mo hem i tanem tingting blong hem fulwan. Nating se man ya i mekem bigfala sem long kongregesen, be Pol i talem long ol elda se hem i no wantem mekem“i strong tumas” long man ya. Hem i talem long olgeta se: “Yufala i mas fogivim hem mo yufala i leftemap tingting blong hem.” Makem from wanem Pol i talem samting ya, hem i se: “Olsem nao, bambae hem i no harem nogud tumas nao tingting blong hem i foldaon.” Pol i sore long man ya we i tanem tingting blong hem. Hem i no wantem se man ya i harem nogud bitim mak from samting we hem i bin mekem, mo luk ol narafala se oli no fogivim hem.—Ridim 2 Korin 2:5-8, 11.
15. ?Olsem wanem ol elda oli save stretem wan man mo soem sore long semtaem?
15 Olsem Jehova, ol elda oli glad blong soem sore. Sipos i nidim ol elda bambae oli tekem strong aksen blong stretem man we i mekem sin, be tu oli soem sore sipos oli luk se i stret blong mekem. Sipos ol elda oli no stretem wan man we i mekem sin, oli no stap soem sore long hem be oli spolem hem. ?Olsem wanem? ?Ol elda nomo oli mas soem sore?
?WANEM I SAVE HALPEM YUMI BLONG SOEM SORE?
16. Folem Ol Proveb 21:13, ?Jehova bambae i mekem wanem long olgeta we oli no soem sore?
16 Olgeta Kristin oli traehad blong soem sore olsem Jehova. ?From wanem? Wan risen hemia from we Jehova bambae i no lesin long olgeta we oli no soem sore long narafala. (Ridim Ol Proveb 21:13.) Yumi evriwan i wantem se Jehova i lesin long ol prea blong yumi, taswe yumi no wantem mekem i strong o no soem sore long ol narafala. Yumi no wantem blokem sora blong yumi long wan Kristin we i stap safa, be yumi wantem rere oltaem blong lesin long “puaman we i stap krae.” Long sem fasin, yumi wantem mekem bes blong yumi blong folem wanem we Baebol i talem, se: “Sipos man i no gat sore long narafala, jaj tu bambae i no gat sore long hem taem i jajem hem.” (Jem. 2:13) Sipos yumi gat tingting daon mo yumi tingbaot se yumi nidim blong narafala i soem sore long yumi, hemia bambae i pulum yumi blong wantem soem sore tu long narafala. Be antap moa, yumi wantem soem sore long man we i tanem tingting from sin we hem i mekem mo i kambak long kongregesen.
17. ?Olsem wanem King Deved i soem sore?
17 Ol eksampol long Baebol oli save halpem yumi blong soem sore mo no mekem i strong long narafala. Traem tingbaot King Deved. Plante taem hem i soem sore. Nating se Sol i wantem kilim hem i ded, be hem i gat sore long king ya we God i jusumaot, hem i neva wantem spolem o givimbak nogud fasin blong Sol.—1 Saml. 24:9-12, 18, 19.
18-19. ?Wanem tufala taem we Deved i soem se hem i no gat sore?
18 Be i no oltaem we Deved i gat sore. Eksampol, taem Nabal i tok nogud long Deved mo i no wantem givim kakae long Deved wetem ol man blong hem, Deved i kam kros tumas nao i tekem desisen blong kilim Nabal mo olgeta man long haos blong hem. Be waef blong Nabal, Abigel we i kaen mo i gat longfala tingting, i kwik blong tekem kakae i kam long Deved blong blokem hem, blong i no gat fol from blad blong narafala man.—1 Saml. 25:9-22, 32-35.
19 Long wan narafala taem, profet Natan i tokbaot long Deved stori blong wan rijman we i stilim sipsip blong neba blong hem we i pua. Taem Deved i harem samting ya, hem i kam kros tumas mo i talem se: “!Long nem blong Jehova we i laef i stap, man we i mekem samting ya i mas ded!” (2 Saml. 12:1-6) Deved i savegud Loa blong Moses. Sipos wan man i stilim wan sipsip, hem i mas givimbak fo sipsip olsem jenis blong hemia we hem i stilim. (Eks. 22:1) Be blong talem se man ya i mas ded, hemia wan jajmen we i strong tumas. Natan i yusum stori ya blong halpem Deved blong i kasemsave se hem i mekem wan bigfala sin. Mo Jehova i soem se hem i gat bigfala sore long Deved, i bitim we Deved i gat long man ya we i stilim sipsip long stori blong Natan.—2 Saml. 12:7-13.
King Deved i soem se hem i no gat sore long man ya long stori blong Natan (Haf 19-20) *
20. ?Yumi save lanem wanem long eksampol blong Deved?
20 Makem se taem Deved i kam kros, hem i jajem Nabal mo ol man blong hem se oli mas ded. Mo biaen, Deved i rere blong jajem man ya long stori blong Natan se hem tu i mas ded. Long seken taem, maet yumi stap tingting se, ?from wanem wan gudfala man olsem Deved i mas jajem stilman ya se i mas ded? I gud blong tingbaot samting we i jes hapen long laef blong Deved. Long taem ya, tingting blong Deved i stap stikim hem. Sipos wan man i jajem nogud narafala, hemia i soem se hem i no moa frengud wetem Jehova. Jisas i talem strong long ol man blong hem se: “Yufala i stop blong jajem ol narafala, olsem nao God bambae i no jajem yufala, from we fasin we yufala i folem blong jajem man, bambae God i folem blong jajem yufala.” (Mat. 7:1, 2) Taswe, yumi wantem mekem bes blong yumi blong no mekem i strong long narafala, mo blong gat “bigfala sore” olsem God blong yumi.
21-22. ?Wanem sam samting we yumi save mekem blong soem sore?
21 Sore i no jes wan filing nomo we yumi gat long narafala. Man we i gat sore i mekem samting blong givhan long ol narafala. Taswe i gud we yumi evriwan i tekem taem blong luk sipos eni man long famle, kongregesen, o komuniti, we i nidim help, ale yumi save givhan. !Yes, i gat plante rod we yumi save soem sore! ?Olsem wanem, i gat wan we i nidim blong yumi leftemap tingting blong hem? ?Yumi save givhan long samfala, maet givim kakae o sam nara samting long olgeta? ?Maet wan we kongregesen i jes tekembak hem i nidim wan gudfala fren blong enkarejem hem? ?Yumi save tokbaot wan gudfala nius we i save leftemap tingting blong ol narafala? Hemia wan long ol beswan rod we yumi save soem sore long ol man we yumi mitim olgeta.—Job 29:12, 13; Rom 10:14, 15; Jem. 1:27.
22 Sipos yumi makem se samfala oli nidim ol help olsem, bambae yumi luk se i gat plante janis blong yumi soem sore long ol narafala. Sipos yumi soem sore, bambae yumi mekem Papa blong yumi long heven i glad, from we hem i God ya we i gat “bigfala sore.”
SINGSING 43 Wan Prea Blong Talem Tangkiu
^ par. 5 Sore i wan long ol gudfala fasin blong Jehova, mo yumi wanwan i mas wokem fasin ya. Long stadi ya, bambae yumi tokbaot from wanem Jehova i soem sore, from wanem yumi save talem se fasin blong hem blong stretem man i soem se hem i gat sore, mo olsem wanem yumi save soemaot nambawan fasin ya.
^ par. 11 Blong save olsem wanem olgeta we oli kambak long kongregesen oli save frengud bakegen wetem God, mo olsem wanem ol elda oli save halpem olgeta, yu luk haf ya “Bildim Bak Frensip Blong Yu Wetem Jehova” long Wajtaoa ya.
