1, 2. (1) ?Yumi harem olsem wanem taem laef blong yumi i jenis kwiktaem nomo? (Yu luk pija long stat blong stadi.) (2) Folem Ol Sam 131, ?wanem i save givhan long yumi blong gat pis long tingting?

LIOYD mo Aleksandra i bin wok long Betel blong bitim 25 yia, biaen wok blong tufala i jenis, oli askem tufala blong go mekem wok blong prij. Tufala i harem nogud taem tufala i kasem nius ya. Lloyd i se: “Mi glad long jenis we i hapen, be long ol wik mo manis we pas, plante taem mi harem se mi no agri long jenis ya. Mi harem olsem se Betel mo wok blong mi, hemia nao samting we i soemaot se mi mi hu.” Long stat Lloyd i glad, be biaen tingting blong hem i foldaon.

² Samtaem bambae i gat ol jenis we yumi no tingbaot oli hapen long laef blong yumi, mo maet hemia i save mekem yumi wari bitim mak. (Ol Proveb 12:25) Taem samting olsem i hapen, ?yumi save mekem wanem blong yumi no wari tumas? (Ridim Ol Sam 131:1-3.) I gud yumi luk olsem wanem  sam man blong Jehova long taem bifo mo tede, oli naf blong holemtaet pis long tingting, nating se laef blong olgeta i jenis kwiktaem nomo.

3. ?Olsem wanem laef blong Josef i jenis kwiktaem nomo?

³ Traem tingbaot Josef. Papa blong hem Jekob, i laekem hem moa i bitim ol narafala brata blong hem. Hemia i mekem se ol narafala brata blong Josef oli jalus. Taem Josef i gat 17 yia, ol brata blong hem oli salem hem olsem wan slef. (Jenesis 37:2-4, 23-28) Taem hem i stap long Ijip, hem i safa blong samwe long 13 yia, fastaem olsem wan slef mo biaen olsem wan presina. Josef i lavem papa blong hem tumas, be naoia hem i stap longwe long papa blong hem. Taswe, hem i save kam kros, mo tingting blong hem i save foldaon bigwan, be hem i no mekem olsem. ?Wanem i halpem hem blong i stanap strong?

4. (1) ?Josef i mekem wanem taem hem i stap long kalabus? (2) ?Olsem wanem Jehova i ansa long ol prea blong Josef?

⁴ Taem Josef i stap long kalabus, ating hem i tingbaot moa ol blesing we Jehova i stap givim long hem. (Jenesis 39:21; Ol Sam 105:17-19) Mo tu, maet hem i stap tingbaot drim ya we hem i bin luk taem hem i yangfala, mo hem i harem gud, hem i save se Jehova i stap wetem hem. (Jenesis 37:5-11) I sua se oltaem hem i prea long Jehova, mo i talemaot evri samting we i stap long hat blong hem. (Ol Sam 145:18) Mo Jehova i ansa long ol prea blong Josef, hem i mekem we Josef i gat strong tingting se nomata wanem bambae i halpem, ‘Hem i stap wetem Josef.’—Ol Wok 7:9, 10. *

5. ?Olsem wanem “pis ya blong God” i save mekem yumi gohed nomo long wok blong Jehova?

⁵ Tede “pis ya blong God,” i lukaot gud long “tingting” blong yumi, nao yumi no harem nogud tumas taem wan samting i hapen long laef blong yumi. (Ridim Filipae 4:6, 7.) Mo tu, taem yumi wari tumas, “pis ya blong God” i mekem se yumi no kam slak, be yumi gohed nomo blong mekem wok blong Jehova. I gud yumi luk stori blong sam brata mo sista we oli bin fesem samting ya.

6, 7. ?Olsem wanem prea i save halpem yumi blong gat pis bakegen long tingting? Talem wan stori.

⁶ Taem Ryan mo Juliet i kasem nius se bambae tufala i no moa givhan blong mekem wok olsem ol spesel paenia, tingting blong tufala i foldaon. Ryan i se: “Mitufala i prea long Jehova from samting ya. Mitufala i luksave se mitufala i mas trastem hem. Plante brata mo sista long kongregesen blong mitufala, oli jes kam long trutok, taswe mitufala i prea blong Jehova i halpem mitufala blong soem gudfala eksampol long saed blong bilif.”

⁷ ?Jehova i mekem wanem blong ansa long prea blong tufala? Ryan i se: “Afta we mitufala prea, mitufala i no moa harem nogud mo wari. Pis ya blong God i stap lukaot gud long hat mo tingting  blong mitufala. Naoia mitufala i luksave se Jehova i save yusum mitufala yet, sipos mitufala i gohed blong gat stret tingting.”

8-10. (1) ?Olsem wanem tabu spirit i halpem yumi taem yumi wari? (2) ?Olsem wanem Jehova i halpem yumi taem yumi gohed blong mekem wok blong hem?

⁸ Tabu spirit blong God i save mekem yumi haremgud, mo i save halpem yumi blong faenem ol vas blong Baebol, we oli save givhan long yumi blong kasemsave ol impoten samting we yumi mas mekem. (Ridim Jon 14:26, 27.) Traem tingbaot samting we i hapen Filip mo waef blong hem Meri. Tufala i bin wok long Betel blong 25 yia, fo manis afta we tufala i stat blong wok, mama blong tufala tugeta mo wan famle blong Filip i ded. Mo tu, papa blong Meri i kasem sik ya dementia mo tufala i mas lukaot long hem.

⁹ Filip i talem se: “Mi ting se evri samting bae i gud nomo, be biaen mi luksave se mi mestem wan samting. Wan dei, mi ridim wan Wajtaoa we yumi stadi long hem mo mi luk vas blong Kolosi 1:11. I tru se mi stanap strong, be i no long olgeta samting. Naoia mi mas ‘stanap strong long olgeta samting mo gat longfala tingting mo glad.’ Yes, mi luksave se glad we mi kasem i no dipen long fasin blong laef blong mi, be i dipen long tabu spirit we i wok long laef blong mi.”

¹⁰ Filip mo Meri i gohed nomo blong mekem wok blong Jehova, mo hem i givim plante blesing long tufala. Smol taem afta we tufala i aot long Betel, tufala i gat ol Baebol stadi we oli gohedgud mo oli wantem stadi plante dei long wik. Meri i talem se: “Ol stadi ya oli mekem mitufala i glad mo oli olsem rod we Jehova i yusum blong talem long mitufala se evri samting bambae i oraet.”

11, 12. (1) ?Josef i mekem wanem blong Jehova i blesem hem? (2) ?Olsem wanem Jehova i blesem Josef?

¹¹ Taem laef blong yumi i jenis kwiktaem nomo, hemia i save mekem yumi wari mo yumi tingbaot moa ol problem blong yumi. Josef i save mekem olsem, be nogat, hem i putum tingting blong hem long samting we hem i naf blong mekem. Taem hem i wok blong Potifa, hem i mekem gud ol wok blong hem, mo i mekem sem mak taem hem i stap long kalabus.—Jenesis 39:21-23.

¹² Wan dei, oli putumap Josef blong i  lukaot long tu presina, we fastaem tufala i bin wok long haos blong Fero. Josef i kaen long tufala, nao tufala i no fraet blong talemaot long Josef, ol wari blong tufala mo ol drim we tufala i bin luk. (Jenesis 40:5-8) Josef i no save se bambae i gat gudfala frut i kamaot long storian blong olgeta. !Tu yia biaen, hem i kamaot long kalabus mo i kam wan haeman long Ijip, nambatu long Fero!—Jenesis 41:1, 14-16, 39-41.

13. ?Yumi save mekem wanem blong Jehova i blesem yumi?

¹³ Tede, maet yumi kasem wan trabol we i had blong winim. Be sipos yumi gat longfala tingting mo yumi gohed blong mekem samting we yumi naf blong mekem, bambae Jehova i blesem yumi. (Ol Sam 37:5) Nating sipos tingting blong yumi i paspas mo yumi wari, be bambae ‘tingting blong yumi i no foldaon.’ (2 Korin 4:8; futnot) Jehova bambae i stap wetem yumi, sipos yumi gohed long wok blong prij.

14-16. ?Olsem wanem Filip i gohed nomo blong mekem wok blong prij nating se laef blong hem i jenis?

¹⁴ Yumi save folem gudfala eksampol blong ivanjelis ya Filip, we i gohed nomo blong mekem wok blong prij nating se laef blong hem i jenis bigwan. Fastaem, hem i glad long niufala wok blong hem long Jerusalem. (Ol Wok 6:1-6) Be biaen, evri samting i jenis. Afta we oli kilim Steven i ded, ol man oli mekem i nogud long ol Kristin, nao ol Kristin oli ronwe long Jerusalem. Be Filip i wantem gohed nomo long wok blong Jehova, ale hem i go prij long Sameria.—Matiu 10:5; Ol Wok 8:1, 5.

¹⁵ Filip i glad blong go long eni ples we tabu spirit i lidim hem i go. Taswe, Jehova i yusum hem blong go prij long ol ples we ol man oli no harem gud nius yet. Long taem ya, plante man Jiu oli luk daon long ol man Sameria mo oli mekem i nogud long olgeta. Be Filip i no olsem, hem i wantem tumas blong talemaot gud nius long olgeta. Mo ol man Sameria oli “lesin gud” long hem.—Ol Wok 8:6-8.

¹⁶ Biaen, tabu spirit i lidim Filip blong i go prij long taon blong Asdod mo Sisaria. I gat plante man long tufala taon ya we oli no man Jiu. (Ol Wok 8:39, 40) Biaen laef blong hem i jenis bakegen. Naoia hem i gat prapa famle blong hem. Nating se laef blong hem i jenis, be hem i no lego wok blong prij, mo Jehova i  gohed blong blesem hem mo famle blong hem.—Ol Wok 21:8, 9.

17, 18. Taem laef blong yumi i jenis, ?olsem wanem wok blong prij i save givhan long yumi?

¹⁷ Plante brata mo sista we oli mekem wok blong Jehova fultaem, oli talem se taem oli gohed blong mekem wok blong prij, oli no lusum glad mo oli gat stret tingting nating se laef i jenis. Eksampol, taem wan kapol blong Saot Afrika, hemia Osborne mo Polite, tufala i finis wok long Betel, tufala i ting se bambae i isi nomo blong faenem wan wok mo wan haos blong slip. Be nogat, Osborne i talem se: “Mitufala i no faenem wok kwiktaem olsem we mitufala i tingbaot.” Polite i talem se: “Blong tri manis mitufala i no faenem wok, mo mitufala i nogat mane. Hemia wan samting we i rili had long mitufala.”

¹⁸ ?Wanem i bin halpem Osborne mo Polite blong stanap strong? Osborne i se: “Wok blong prij wetem ol brata mo sista i givhan bigwan long mitufala blong gohed gud long trutok, mo gat stret tingting oltaem.” Yes, tufala i no stap nomo long haos mo stap wari, be tufala i jusum blong stap bisi long wok blong prij. !Hemia i mekem we tufala i glad bigwan! Mo Osborne i gohed se: “Mitufala i gohed blong lukaot wok, mo biaen mitufala i faenem.”

19-21. (1) ?Wanem bambae i givhan long yumi blong holemtaet pis long tingting? (2) ?Wanem gudfala samting i kamaot taem yumi folem ol niufala jenis?

¹⁹ Olsem we yumi luk finis, sipos laef blong yumi i jenis, be yumi stanap strong mo yumi trastem Jehova fulwan, oltaem bambae yumi gat pis long tingting blong yumi. (Ridim Maeka 7:7.) Maet biaen bambae yumi jes luksave se jenis we i kamaot, i mekem se yumi frengud moa wetem Jehova. Polite i talem se afta we tufala i aot long Betel, hem i jes kasem  save se i minim wanem blong dipen long Jehova, antap moa taem laef i had tumas. Hem i talem se: “Naoia mi frengud moa wetem Jehova.”

²⁰ Meri, we yumi tokbaot hem finis, i gohed blong mekem wok blong paenia mo long sem taem i lukaot long olfala papa blong hem. Hem i talem se: “Mi lanem se taem mi wari, mi mas prea, mo mi mas spel. Mo tu, mi lanem se mi mas putum ol trabol blong mi long han blong Jehova, mo mi nidim moa blong mekem olsem long fiuja.”

²¹ Lloyd mo Aleksandra tufala i talemaot se taem laef blong tufala i jenis, hemia i rili traem bilif blong tufala. Be tufala i luksave se ol traem oli givhan long tufala. Naoia tufala i sua se bilif blong tufala i strong, mo i save halpem tufala blong stanap strong sipos i gat ol problem. Mo tufala i harem se laef blong tufala i kamgud.

22. Nating sipos laef blong yumi i jenis, ?be yumi save sua long wanem samting?

²² Tede, laef blong yumi i save jenis kwiktaem nomo. Maet wok blong Jehova we yumi mekem i jenis, yumi sik, o yumi mas lukaot long famle blong yumi long wan rod we i defren. Be nomata wanem i hapen, yu mas trastem Jehova se hem bambae i lukaotgud long yu mo bambae hem i halpem yu long stret taem. (Hibrus 4:16; 1 Pita 5:6, 7) Be naoia, yu mas mekem samting we yu naf blong mekem. Yu prea long papa blong yumi, Jehova, mo yu mas dipen fulwan long hem. Long rod ya, nating sipos laef blong yu i jenis, be oltaem Jehova bambae i givim pis long tingting blong yu.