1. ?I minim wanem se man i tanem tingting blong hem?

 TAEM yumi mekem wan samting we i no stret, i impoten we yumi tanem tingting blong yumi. Long Baebol, wan man we i tanem tingting, hem i jenisim tingting we hem i gat long wan nogud fasin, i stop blong mekem fasin ya, mo i gat strong tingting blong no moa mekem nogud fasin ya bakegen.—Yu luk Diksonari long tok ya, “Tanem Tingting.”

2. ?From wanem yumi evriwan i mas save se i minim wanem blong tanem tingting? (Nehemaea 8:​9-11)

² Yumi evriwan i mas save se i minim wanem blong tanem tingting. ?From wanem? From we evri dei, yumi evriwan i stap mekem sin. From we yumi kamaot long Adam mo Iv, yumi evriwan i gat sin mo yumi stap ded. (Rom 3:23; 5:12) Yes, yumi evriwan i sinman, taswe yumi nidim blong tanem tingting blong yumi. Ol man we oli gat strong bilif olsem aposol Pol, olgeta tu oli traehad blong faet agensem sin. (Rom 7:​21-24) ?Be hemia i min se oltaem bambae yumi stap harem nogud from ol sin blong yumi? Nogat. Jehova i gat sore, mo hem i wantem se yumi glad. Traem tingbaot ekspiriens blong ol man Jiu long taem blong Nehemaea. (Ridim Nehemaea 8:​9-11.) Jehova i no wantem se oli gohed blong harem nogud from ol sin we oli bin mekem bifo, be hem i wantem se oli glad blong wosipim hem. Jehova i save se taem yumi tanem tingting blong yumi, bambae yumi harem gud. Taswe, hem i tijim yumi olsem wanem blong tanem tingting blong yumi. Sipos yumi tanem tingting from ol sin blong yumi, yumi save sua fulwan se Papa blong yumi we i gat sore bambae i fogivim yumi.

3. ?Bambae yumi tokbaot wanem long stadi ya?

³ Naoia bambae yumi tokbaot moa fasin blong tanem tingting. Bambae yumi tokbaot tri samting. Fastaem, bambae yumi  tokbaot samting we Jehova i talem blong tijim ol man Isrel long saed blong fasin blong tanem tingting. Biaen bambae yumi luk olsem wanem Jehova i halpem ol sinman blong oli tanem tingting blong olgeta. Mo laswan, bambae yumi tokbaot samting we Jisas i talem blong tijim ol man blong hem long saed blong fasin blong tanem tingting.

SAMTING WE JEHOVA I TALEM BLONG TIJIM OL MAN ISREL LONG SAED BLONG FASIN BLONG TANEM TINGTING

4. ?Jehova i talem wanem blong tijim ol man Isrel long saed blong fasin blong tanem tingting?

⁴ Taem Jehova i rerem ol man Isrel blong oli kam wan nesen, hem i mekem wan kontrak o agrimen wetem olgeta. Sipos oli obei long ol loa blong hem, bambae hem i protektem mo i blesem olgeta. Hem i tokbaot ol loa ya se: “Komanmen ya we mi stap talem long yu tede, hem i no strong tumas long yu, mo hem i no longwe tumas blong yu kasem.” (Dut. 30:​11, 16) Be sipos oli rebel agensem hem, eksampol, sipos oli jusum blong wosipim ol narafala god, bambae hem i no moa blesem olgeta mo bambae oli safa. Nating se i olsem, oli save mekem God i glad yet. Oli save ‘kambak long Jehova we i God blong olgeta, mo oli lesin long voes blong hem.’ (Dut. 30:​1-3, 17-20) Yes, oli save tanem tingting blong olgeta. Mo sipos oli mekem olsem, Jehova bambae i kam klosap long olgeta mo i blesem olgeta bakegen.

5. ?Olsem wanem Jehova i soemaot se hem i no lego ol man blong hem? (2 King 17:​13, 14)

⁵ Ol man we Jehova i jusumaot olgeta, oli rebel agensem hem plante taem. Antap long hemia, oli wosipim ol aedol, mo oli mekem plante moa nogud samting. From samting ya oli safa. Be Jehova i no lego ol man blong hem. Hem i sanem ol profet bakegen mo bakegen blong traem pulum ol man blong hem blong oli tanem tingting blong olgeta mo kambak long hem.—Ridim 2 King 17:​13, 14.

6. ?Olsem wanem Jehova i yusum ol profet blong tijim ol man blong hem se i impoten blong oli tanem tingting? (Mo tu, yu luk pija.)

⁶ Plante taem, Jehova i yusum ol profet blong wonem ol man blong hem, mo stretem olgeta. Eksampol, tru long Jeremaea, God i talem se: “O Isrel, yu yu lego bilif finis, yu kambak, . . .  Bambae mi no lukluk i kamdaon long yufala we mi kros, from we mi mi holem promes blong mi oltaem, . . . Bambae mi no stap kros olwe. Yu talemaot ol rong blong yu nomo, from we yu yu bin rebel agensem Jehova.” (Jer. 3:​12, 13) Mo Jehova i yusum Joel blong talem se: “Yufala i kambak long mi long fulhat blong yufala.” (Joel 2:​12, 13) Mo tu, hem i pulum Aesea blong talem se: “Yufala i mekem yufala i klin, yufala i tekemaot ol rabis fasin blong yufala i gowe long fes blong mi, yufala i stop blong mekem ol samting we i nogud.” (Aes. 1:​16-19) Mo Jehova i yusum Esikel tu blong askem se: “?Yufala i ting se mi mi glad taem wan rabis man i ded? ?Yufala i no ting se mi wantem moa blong hem i tanem tingting blong hem mo i gohed blong stap laef? Mi mi no glad nating taem wan man i ded, so yufala i mas tanem tingting blong yufala mo stap laef.” (Esik. 18:​23, 32) Jehova i glad tumas taem hem i luk we ol man oli tanem tingting blong olgeta, from hem i wantem se oli gohed blong laef olwe. ?Be Jehova i wet se ol sinman oli jenisim fasin blong olgeta, bifo we hem i halpem olgeta? Blong ansa long kwestin ya, bambae yumi luk sam eksampol.

7. ?Jehova i yusum stori blong profet Hosea mo waef blong hem blong tijim wanem long ol man blong hem?

⁷ Traem luk olsem wanem Jehova i yusum stori blong profet Hosea mo waef blong hem Goma, blong tijim ol man blong hem. Afta we Goma i mekem adaltri, hem i lego Hosea mo i go stap wetem narafala man. ?Jehova i mekem wanem? From we Jehova i save samting we i stap long hat blong man, hem i talem long Hosea se: “Yu go bakegen, yu lavem woman ya we narafala man i lavem hem mo i stap mekem adaltri, stret olsem we Jehova i lavem ol man Isrel, nating se oli stap wosipim ol narafala god.” (Hos. 3:1; Prov. 16:2) Makem se long taem ya, Goma i stap mekem bigfala sin yet. Be Jehova i talem long Hosea blong i go luk hem, i fogivim hem, mo i tekem hem i kam waef blong hem bakegen. a Long sem fasin, Jehova i no lego ol man blong hem we oli stronghed. Nating se oli mekem plante bigfala sin, be hem i lavem olgeta yet. Mo hem i gohed blong sanem ol profet blong oli halpem olgeta blong oli tanem tingting mo jenisim ol fasin blong olgeta. Eksampol ya i tijim yumi se ‘Jehova we i man blong skelem hat blong ol man,’ bambae i halpem man ya we i stap mekem yet wan bigfala sin blong i tanem tingting blong hem. (Prov. 17:3) Naoia bambae yumi luk olsem wanem Jehova i mekem samting ya.

SAMTING WE JEHOVA I MEKEM BLONG HALPEM OL MAN BLONG OLI TANEM TINGTING BLONG OLGETA

8. ?Jehova i mekem wanem blong halpem Ken blong i tanem tingting blong hem? (Jenesis 4:​3-7) (Mo tu, yu luk pija.)

⁸ Ken i fasbon boe blong Adam mo Iv. From samting ya, hem i bon wetem filing ya blong wantem mekem samting we i no stret. Be hem i no kontrolem ol filing ya. Mo tu, Baebol i talem se: “Ol wok blong hem oli nogud.” (1 Jon 3:12) Maet hemia nao from wanem taem hem i givim sakrefaes, Jehova ‘i no glad long hem mo ofring blong hem.’ Ken i no jenisim ol fasin blong hem, be hem “i kros we i kros, mo fes blong hem i kam nogud.” ?Ale Jehova i mekem wanem? Hem i toktok long Ken. (Ridim Jenesis 4:​3-7.) Makem se Jehova i toktok gud long Ken, i talem se bambae i blesem hem sipos hem i mekem samting we i stret, mo i wonem hem tu se fasin blong kros i save lidim hem blong mekem samting we i no stret. Sore tumas, Ken i no lesin. Hem i no letem Jehova i halpem hem blong i tanem tingting blong hem. From we Ken  i no lesin, ?hemia i mekem se Jehova i no moa wantem halpem ol narafala sinman blong oli tanem tingting blong olgeta? !Nogat!

9. ?Olsem wanem Jehova i halpem Deved blong i tanem tingting blong hem?

⁹ Jehova i lavem tumas King Deved. Hem i talem se Deved i “wan man we i stret long tingting blong mi.” (Wok 13:22) Be Deved i mekem sam bigfala sin, olsem i mekem adaltri mo i kilim man i ded. Folem Loa Blong Moses, Deved i sud ded. (Lev. 20:10; Nam. 35:31) Be Jehova i wantem halpem Deved blong i tanem tingting blong hem. b Taswe hem i sanem profet Natan blong i go visitim Deved, nating se hem i no soemaot yet se hem i tanem tingting blong hem. Natan i yusum wan pijatok blong givhan long Deved blong i luksave sin blong hem. Nao hemia i pulum hem blong i tanem tingting blong hem. (2 Saml. 12:​1-14) Mo hem i raetem wan sam we i soemaot klia se hem i sore from samting we hem i mekem. (Sam 51, supaskripsen) Sam ya i leftemap tingting blong plante man we oli mekem sin, mo i pulum olgeta tu blong oli tanem tingting blong olgeta. Yumi glad tumas se Jehova i lavem Deved mo i halpem hem blong i tanem tingting blong hem.

10. ?Yu yu harem olsem wanem taem yu save se Jehova i gat longfala tingting, mo i rere blong fogivim yumi?

¹⁰ Jehova i no laekem sin nating, mo hemia i minim enikaen sin. (Sam 5:​4, 5) Be hem i save se yumi sinman, mo from we hem i lavem yumi, hem i jusum blong halpem yumi. Oltaem hem i traehad blong halpem olgeta we oli mekem bigfala sin blong oli tanem tingting blong olgeta, mo kam klosap long hem. !I gud tumas blong save samting ya! Taem yumi tingbaot se Jehova i gat longfala tingting mo i rere blong fogif, yumi gat strong tingting blong holemstrong long hem, mo kwik blong tanem tingting taem yumi mekem sin. Naoia bambae yumi tokbaot samting we Jisas i talem, blong tijim ol man long saed blong fasin blong tanem tingting.

SAMTING WE JISAS I TALEM BLONG TIJIM OL MAN BLONG HEM LONG SAED BLONG FASIN BLONG TANEM TINGTING

11-12. ?Jisas i talem wanem parabol blong soemaot se Jehova i wantem tumas blong fogivim yumi? (Yu luk pija.)

¹¹ Long yia 29 K.T., hemia nao taem we Mesaea bambae i kamtru. Olsem we yumi luk long las stadi, Jehova i yusum Jon Baptaes mo Jisas  Kraes blong tijim ol man se i impoten blong oli tanem tingting blong olgeta.—Mat. 3:​1, 2; 4:17.

¹² Taem Jisas i stap long wol, hem i tijim ol man blong hem se Papa blong hem i wantem tumas blong fogivim yumi taem yumi mekem sin. Blong mekem oli kasemsave long samting ya, Jisas i tokbaot parabol blong boe we i lusum rod. Yangfala man ya i jusum wan rod blong laef we i no stret. Be taem “gudfala tingting i kambak long hem,” hem i gobak long haos. ?Nao papa blong hem i mekem wanem? Jisas i talem se taem boe ya “i stap longwe yet, papa blong hem i luk hem mo i sore tumas long hem, nao i resis i go, i putum han blong hem i goraon long boe ya, mo i kis long hem.” Boe ya i askem sipos hem i save kam wan slef long haos blong papa blong hem, be papa blong hem i singaot hem se ‘boe blong mi’ mo i tekem hem i kambak long famle. Papa ya i talem se: “Hem i lus finis, be naoia hem i kambak.” (Luk 15:​11-32) Bifo, taem Jisas i stap long heven, i sua se hem i luk we Papa blong hem i bin sore long plante sinman we oli tanem tingting blong olgeta. !Hemia wan nambawan stori we Jisas i yusum blong soemaot se Papa blong hem Jehova i gat sore!

13-14. ?Aposol Pita i lanem wanem long fasin blong tanem tingting, mo hem i tijim ol narafala blong oli mekem wanem? (Mo tu, yu luk pija.)

¹³ Aposol Pita i lanem wan impoten lesin long Jisas, long saed blong fasin blong tanem tingting mo fogif. Pita i mekem plante mastik, be Jisas i wantem tumas blong fogivim hem. Eksampol, afta we Pita i giaman tri taem se hem i no save Jisas, hem i harem nogud tumas. (Mat. 26:​34, 35, 69-75) Be afta we Jisas i laef bakegen, hem i kamtru long Pita taem hem i stap hem wan. (Luk 24:​33, 34; 1 Kor. 15:​3-5) Long taem ya, Jisas i save se Pita i tanem tingting blong hem, mo hem i wantem soemaot long hem se hem i fogivim hem.

¹⁴ Pita i glad taem hem i tanem tingting blong hem nao God i fogivim hem, taswe hem i naf blong tijim ol narafala tu blong oli mekem sem mak. Samtaem afta long lafet blong Pentekos, Pita i givim wan tok long wan bigfala hip blong  ol man Jiu we oli no bilif, mo i eksplenem long olgeta se olgeta nao oli kilim Mesaea i ded. Nating se i olsem, hem i leftemap tingting blong olgeta, i se: “Taswe yufala i mas tanem tingting blong yufala, mo yufala i tanraon blong Jehova i tekemaot sin blong yufala, nao hem bambae i mekem yufala i gat niufala paoa.” (Wok 3:​14, 15, 17, 19) Pita i tijim se wan man i tanem tingting blong hem, taem hem i tanemraon. Hemia i min se hem i jenisim rong tingting blong hem, i stop blong mekem samting we i no stret, mo i stat blong mekem samting we God i glad long hem. Mo tu, hem i soemaot se Jehova bambae i tekemaot fulwan sin blong olgeta, i olsem we hem i waepemaot, oli no moa stap. Mo plante yia afta, Pita i talem long ol Kristin se: “Jehova . . . i gat longfala tingting long yufala, from we hem i no wantem se wan man i ded, hem i wantem se olgeta man oli tanem tingting blong olgeta.” (2 Pita 3:9) !Yumi glad tumas blong save se sipos yumi mekem ol bigfala sin mo yumi tanem tingting blong yumi, Jehova bambae i fogivim yumi fulwan!

15-16. (1) ?Olsem wanem Pol i lanem se Jehova mo Jisas i gat fasin ya blong fogif? (1 Timoti 1:​12-15) (2) ?Bambae yumi tokbaot wanem long nekis stadi?

¹⁵ Sol blong Tasas i mekem plante nogud samting. Hem i wan rabis man we i stap ronem mo kilim ol man blong Kraes. Plante Kristin oli ting se bambae hem i neva tanem tingting blong hem. Be Jisas i save se Sol i save tanem tingting blong hem mo jenisim ol fasin blong hem. Jisas mo Papa blong hem i luk sam gudfala samting long Sol. Taswe, Jisas i talem se: “Mi mi jusum man ya.” (Wok 9:15) Jisas i mekem wan merikel blong halpem Sol blong i tanem tingting blong hem. (Wok 7:58–8:3; 9:​1-9, 17-20) Afta we Sol o Pol i tanem tingting blong hem mo i kam wan Kristin, oltaem hem i soemaot se hem i glad se Jehova mo Jisas i kaen mo sore long hem. (Ridim 1 Timoti 1:​12-15.) Pol i tijim ol brata mo sista se: ‘God i kaen long yufala, mo i traem blong pulum yufala blong yufala i tanem tingting blong yufala.’—Rom 2:4.

¹⁶ Taem Pol i harem se kongregesen blong Korin i letem wan man we i mekem doti fasin blong seks i stap long kongregesen, ?hem i mekem wanem? Hem i talem samting we oli mas mekem long man ya. Mo tru long ol toktok blong hem, yumi save lanem olsem wanem Jehova i soem lav taem hem i stretem ol man blong hem, mo i soem sore long olgeta taem oli tanem tingting blong olgeta. Bambae yumi tokbaot stori ya moa long nekis stadi.