?YU YU faenem i had blong mekem pesnel stadi blong yu evri wik, o yu harem se i no mekem yu yu glad? Yumi evriwan i harem olsem samtaem. Be traem tingbaot ol narafala samting we yumi stap mekem oltaem, olsem blong swim. !I nidim taem mo paoa blong swim gud, be long en yumi harem gud! Taem yumi stadi Baebol, hemia i save mekem yumi harem gud tu, i olsem we yumi swim “long tok blong God we i olsem wota.” (Efes. 5:26) Traem luk sam samting we i save halpem yumi:

• Mekem wan program. Pesnel stadi i wan long “ol samting we oli moa impoten” we wan Kristin i mas mekem. (Fil. 1:10) Blong givhan long yu blong folemgud program blong yu, i gud yu putum program blong yu long wan ples we yu save luk, olsem maet long wan notis bod o long doa blong aesbokis. O maet yu save putum wan alam long fon blong yu, blong i rimaenem yu se klosap i taem blong stadi.

• Jusum taem mo fasin blong stadi we i stret long yu. ?I isi long yu blong stadi longtaem o sot taem nomo? Yu yu save gud samting we i stret long yu. Taswe, i gud yu mekem plan folem wanem we yu naf blong mekem. Sipos yu harem se yu no save stadi long taem we yu bin jusumaot, maet yu save traem stadi blong ten minit nomo. Nating sipos yu stadi blong ten minit nomo, be bambae yu lanem plante samting. Mo sipos yu mekem olsem, bambae yu harem gud mo maet bambae yu wantem gohed moa blong stadi.—Fil. 2:13.

• Jusum ol topik we yu wantem stadi long hem. Sipos long taem blong stadi, yu stap tingting se bambae yu stadi long wanem, bambae yu no “yusum gud taem” blong yu nating. (Efes. 5:16) Taswe, i gud yu mekem wan lis blong ol atikol o ol topik we yu wantem stadi long olgeta. Eksampol, sipos yu gat kwestin long saed blong wan samting, i gud yu raetemdaon long lis blong yu. Mo evritaem we yu finis stadi, maet bambae yu ademap sam moa tingting long lis blong yu, blong stadi long hem nekis taem.

• Mekem jenis sipos i nidim. Impoten samting, hemia se yu stadi evri wik. Blong mekem olsem, sipos i nidim yu save jenisim dei mo taem blong stadi blong yu, mo se stadi blong yu bambae i longfala olsem wanem, o wanem topik we yu wantem stadi long hem.

Bambae yumi kasem plante gudfala samting sipos yumi stadi evri wik. Bambae yumi kam klosap moa long Jehova, yumi lanem blong mekem ol gudfala desisen long laef blong yumi, mo yumi glad.—Jos. 1:8.