1-2. (1) ?From wanem aposol Pol i talem se lav i “impoten moa”? (2) ?Wanem ol kwestin we bambae yumi tokbaot?

 TAEM aposol Pol i tokbaot bilif, hop, mo lav, long en hem i talem se: “Lav nao hem i impoten moa long trifala.” (1 Kor. 13:13) ?From wanem Pol i talem olsem? From we long fiuja, bambae yumi no moa nid blong bilif long promes blong God, o gat hop ya se ol promes blong hem bambae oli kamtru, from we oli kamtru finis. Be yet, bambae yumi mas gohed blong lavem Jehova mo ol man. Yes, lav we yumi gat bitwin yumi bambae i gohed blong gru olwe.

² From we bambae yumi mas gohed blong soemaot lav, naoia bambae yumi tokbaot tri kwestin. Faswan, ?from wanem yumi mas lavlavem yumi? Nambatu, ?olsem wanem blong soemaot lav bitwin yumi? Mo nambatri, ?olsem wanem blong mekem lav we yumi gat bitwin yumi i kam strong moa?

3. Tokbaot ol risen from wanem yumi mas lavlavem yumi.

³ ?From wanem i impoten we yumi lavlavem yumi? Wan risen, hemia se lav i makemaot yumi olsem ol trufala Kristin. Jisas i talem long ol aposol blong hem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) Mo tu, taem yumi lavlavem yumi, hemia i mekem yumi joengud. Pol i tokbaot lav se i olsem “wan rop we i save joenem ol man oli kam wan.” (Kol. 3:14) Be i gat wan narafala impoten risen from wanem yumi mas lavlavem yumi. Aposol Jon i raet i go long ol Kristin brata se: “Man we  i lavem God, hem i mas lavem brata blong hem tu.” (1 Jon 4:21) Taem yumi soemaot se yumi lavlavem yumi, hemia i soemaot se yumi lavem God tu.

4-5. Tokbaot olsem wanem lav we yumi gat long God i joen wetem lav we yumi gat bitwin yumi.

⁴ ?Olsem wanem lav we yumi gat long God i joen wetem lav we yumi gat long ol brata mo sista? Blong givhan long yumi, traem tingbaot olsem wanem hat blong yumi i joen wetem ol narafala haf blong bodi blong yumi. Taem wan dokta i tajem han blong yumi blong jekem hat blong yumi, hem i naf blong talem se hat blong yumi i wok gud o nogat. ?Yumi lanem wanem long eksampol ya?

⁵ Wan dokta i tajem han blong yumi blong jekem sipos hat blong yumi i wok gud o nogat. Long sem fasin, blong faenemaot sipos lav we yumi gat long God i strong o nogat, yumi mas jekem lav we yumi gat long ol brata mo sista. Sipos yumi luksave se yumi no moa lavem ol brata mo sista olsem fastaem, hemia i min se lav we yumi gat long God i no moa strong. Be taem yumi soemaot lav oltaem long ol brata mo sista, hemia i soemaot se lav we yumi gat long God i strong.

6. ?Yumi mas tingbaot wanem sipos yumi luksave se lav we yumi gat long ol brata mo sista i kam slak? (1 Jon 4:​7-9, 11)

⁶ Sipos lav we yumi gat long ol brata mo sista i kam slak, hemia i wan bigfala problem. ?From wanem? From hemia i soemaot se frensip blong yumi wetem Jehova i no moa strong. Aposol Jon i talemaot klia samting ya, taem i rimaenem yumi se: “Sipos man i no lavem brata blong hem we hem i stap luk oltaem, hem i no save lavem God we hem i no luk hem samtaem.” (1 Jon 4:20) ?Yumi lanem wanem? Yumi lanem se Jehova i save glad nomo long yumi sipos yumi “lavlavem yumi.”—Ridim 1 Jon 4:​7-9, 11.

7-8. ?Olsem wanem blong soemaot se yumi lavlavem yumi?

⁷ Plante taem Baebol i talem se: “Yufala i mas lavlavem yufala.” (Jon 15:​12, 17; Rom 13:8; 1 Tes. 4:9; 1 Pita 1:22; 1 Jon 4:11) Be lav i wan filing insaed long hat blong man we yumi no save luk. Taswe, ?olsem wanem blong soemaot se yumi lavlavem yumi? Yumi soemaot lav ya tru long ol toktok mo aksen blong yumi.

⁸ I gat plante rod we yumi save soemaot se yumi lavem ol brata mo sista. Hemia sam eksampol: “Yufala i mas tok tru long yufala.” (Sek. 8:16) “Yufala i gat pis wetem ol narafala.” (Mak 9:50) “Oltaem yufala wanwan i mas faswan blong ona long yufala.” (Rom 12:10) “Yufala i mas welkamem yufala.” (Rom 15:7) “Yufala i mas glad blong fofogivim yufala.” (Kol. 3:13) “Yufala i mas stap givgivhan long yufala blong karem ol baden blong yufala.” (Gal. 6:2) “Yufala i mas gohed blong leftemap tingting blong yufala.” (1 Tes. 4:18) “Yufala i mas gohed blong . . . givgivhan long yufala blong mekem yufala i strong.” (1 Tes. 5:11) “Yufala i prea from yufala.”—Jem. 5:16.

9. ?From wanem fasin blong leftemap tingting i wan impoten rod blong soemaot lav? (Mo tu, yu luk pija.)

⁹ Naoia i gud yumi luk wan long ol rod we yumi save soemaot lav long ol narafala. Bambae yumi luk tok we Pol i talem, i se: “Yufala i mas gohed blong leftemap tingting blong yufala.” ?From wanem fasin blong leftemap tingting i wan impoten rod blong soemaot lav? Wan buk we i eksplenem Baebol i talem se tok ya “leftemap tingting” we Pol i yusum, i min se “stanap klosap long wan man taem hem i fesem wan strong traem.” Taswe, taem yumi leftemap tingting blong wan brata  o sista we i safa, yumi halpem hem blong i gohed blong wosipim Jehova. Mo evritaem we yumi mekem olsem, yumi soemaot se yumi lavem hem.—2 Kor. 7:​6, 7, 13.

10. ?Olsem wanem fasin blong gat sore mo leftemap tingting i joen?

¹⁰ Fasin blong gat sore mo leftemap tingting i joen gud tugeta. ?Olsem wanem oli joen? Taem wan man i gat sore long narafala we i stap safa, hem i wantem leftemap tingting blong hem mo givhan long hem. Taem yumi gat sore long man, bambae yumi leftemap tingting blong hem. Makem olsem wanem Pol i joenem fasin blong Jehova blong gat sore wetem fasin blong hem blong leftemap tingting. Pol i tokbaot Jehova olsem wan “Papa we i gat sore, mo hem i God ya we i mekem olgeta samting blong leftemap tingting blong man.” (2 Kor. 1:3) Long vas ya, Pol i yusum tok ya “gat sore” blong tokbaot filing ya blong sore long ol narafala. Taswe Baebol i tokbaot God se hem i Papa o i Stamba blong fasin sore, from strong filing ya we hem i gat blong sore long ol man. From samting ya, hemia i pulum hem blong givhan “long yumi long olgeta trabol blong yumi.” (2 Kor. 1:4) Olsem we wan springwota i mekem ol man we oli tosta oli harem gud, Jehova i save leftemap tingting blong olgeta we oli harem nogud, blong oli harem gud bakegen. ?Olsem wanem yumi save folem eksampol blong Jehova blong gat sore long ol narafala mo leftemap tingting blong olgeta? Wan rod hemia taem yumi wokem ol fasin we bambae i halpem yumi blong leftemap tingting blong ol narafala. ?Wanem sam long ol fasin ya?

11. Folem Kolosi 3:12 mo 1 Pita 3:​8, ?wanem ol narafala fasin we yumi mas wokem blong yumi save lavem ol narafala, mo leftemap tingting blong olgeta?

¹¹ ?Wanem i save halpem yumi blong gohed blong lavem ol man, mo “gohed blong leftemap tingting” blong olgeta? Yumi mas wokem ol fasin olsem: Safa wetem olgeta we oli safa, laeklaekem yumi olsem we yumi brata nomo, mo yumi mas kaen long yumi. (Ridim Kolosi 3:12; 1 Pita 3:8.) ?Olsem wanem ol fasin ya oli save givhan long yumi? Taem yumi gat sore long ol brata mo sista mo yumi kea long olgeta, bambae yumi wantem tumas blong leftemap tingting blong olgeta taem oli safa. Olsem we Jisas i talem: “Taem man i tok, hem i stap talemaot ol samting we hat blong hem i fulap long hem. Gudfala man i talem ol gudfala samting, from we hat blong hem i fulap long ol gudfala samting.” (Mat. 12:​34, 35) Taem yumi leftemap tingting blong ol brata mo sista, hemia i wan impoten rod blong soemaot se yumi lavem olgeta.

12. (1) ?From wanem yumi mas lukaot gud? (2) ?Wanem kwestin we bambae yumi tokbaot naoia?

¹² Yumi evriwan i wantem “gohed blong lavlavem yumi.” (1 Jon 4:7) Nating se i olsem, i impoten we yumi tingbaot woning blong Jisas we i se: “Lav blong plante moa man bambae i kam kolkol.” (Mat. 24:12) Jisas i no stap talem se plante long ol disaepol blong hem bambae oli stop blong soemaot lav long olgeta. Be yumi mas lukaot gud se yumi no letem fasin blong ol man blong wol ya we oli no lavlavem olgeta, i gat paoa long yumi. Taswe, naoia i gud yumi tokbaot impoten kwestin ya: ?I gat rod blong faenemaot sipos lav we yumi gat long ol brata mo sista i strong yet?

13. ?Olsem wanem blong luksave sipos lav we yumi gat long ol brata mo sista i strong o nogat?

¹³ Wan rod blong save sipos lav we yumi gat i strong o nogat, hemia taem yumi skelem fasin we yumi gat taem yumi fesem ol defren situesen  long laef. (2 Kor. 8:8) Aposol Pita i tokbaot wan long ol situesen ya, i se: “Antap long ol samting ya, yufala i mas lavlavem yufala mo lav ya i mas strong gud, from we lav i kavremap plante plante sin.” (1 Pita 4:8) Taswe, fasin we yumi mekem taem narafala i talem o i mekem wan samting we i spolem yumi, i save halpem yumi blong luk sipos lav we yumi gat long olgeta i strong o nogat.

14. Folem 1 Pita 4:​8, ?lav we yumi gat i mas olsem wanem? Talem wan pijatok.

¹⁴ Naoia i gud yumi tingting gud long ol tok blong Pita. Fas haf blong vas 8, i tokbaot se lav we yumi gat i mas “strong gud.” Tok ya “strong gud” we Pita i yusum, prapa mining blong hem se “pulum i open bigwan.” Seken haf blong vas ya i tokbaot from wanem lav i mas strong gud. Hemia from we lav i save kavremap sin blong ol brata mo sista. Traem tingbaot se lav we yumi gat i olsem wan bigfala kaliko we yumi holem long tufala han blong yumi, mo yumi openem bigwan blong kavremap “plante plante sin,” be i no wan o tu sin nomo. Tok ya kavremap i wan narafala rod blong tokbaot fasin fogif. Lav i save kavremap ol slak fasin blong ol narafala, sem mak olsem we wan kaliko i save kavremap wan doti.

15. ?Sipos lav we yumi gat long ol brata mo sista i strong bambae yumi naf blong mekem wanem? (Kolosi 3:13)

 ¹⁵ Lav we yumi gat i mas strong, blong yumi save fogivim ol brata mo sista, nating sipos i had. (Ridim Kolosi 3:13.) Taem yumi fogivim ol narafala, yumi mekem Jehova i glad mo yumi soemaot se lav we yumi gat long ol brata mo sista i strong. ?Wanem moa i save halpem yumi blong fogivim ol mastik blong narafala, mo no kam kros kwik from ol samting we oli mekem?

16-17. ?Wanem moa i save givhan long yumi blong no tingbaot ol smol mastik blong narafala? Talem wan eksampol. (Mo tu, yu luk pija.)

¹⁶ I gud yu tingbaot nomo ol gudfala fasin blong ol brata mo sista, be i no ol slak fasin blong olgeta. Tingbaot eksampol ya. Traem tingbaot se yu joen wetem wan grup blong ol brata mo sista long wan kakae. Yufala i gat gudfala taem, mo long en yufala i tekem wan foto tugeta. Be afta, yu tekem tu moa foto from yu fraet se maet faswan foto bambae i no klia. Naoia yu gat tri foto. Be afta, yu makem se long wan long ol foto ya, wan brata i no smael. ?Bambae yu mekem wanem? Bambae yu dilitim foto ya from yu gat tu narafala foto we evriwan oli smael, inkludum brata ya.

¹⁷ Yumi save talem se ol foto ya oli olsem ol memori we yumi kipim. Plante taem yumi gat ol gudfala memori blong ol taem we yumi spenem wetem ol brata mo sista. Be maet long wan long ol taem ya, wan brata o sista i  talem o i mekem wan samting we i no kaen. ?Bambae yu mekem wanem wetem memori ya? I gud yu dilitim memori ya olsem we yu dilitim wan long ol foto ya. (Prov. 19:11; Efes. 4:32) Yumi save fogetem smol mastik blong brata o sista ya, from we yumi gat plante gudfala memori blong ol gudfala taem we yumi spenem wetem hem. Hemia nao ol memori we yumi wantem kipim mo tinghae long olgeta.

18. ?Wanem ol impoten poen long saed blong lav we yumi tokbaot long stadi ya?

¹⁸ ?From wanem yumi wantem gohed blong lavem moa ol narafala? Taem yumi lavem ol brata mo sista, yumi soemaot se yumi lavem Jehova tu. ?Olsem wanem yumi soemaot lav long ol brata mo sista? Wan rod hemia taem yumi leftemap tingting blong olgeta. Sipos yumi gat sore, bambae yumi naf blong “gohed blong leftemap tingting” blong yumi. ?Olsem wanem blong mekem lav we yumi gat bitwin yumi i stap strong? Hemia taem yumi fogivim mastik blong ol brata mo sista, nating se i no isi.

19. ?From wanem i impoten we tede yumi soemaot se yumi lavlavem yumi?

¹⁹ ?From wanem i impoten we tede yumi soemaot se yumi lavlavem yumi? Makem samting we Pita i talem, i se: “En blong evri samting i kam klosap. Taswe, . . . yufala i mas lavlavem yufala mo lav ya i mas strong gud.” (1 Pita 4:​7, 8) ?Wanem bambae i hapen taem en blong rabis wol ya i klosap? Jisas i tokbaot ol man blong hem se: “Ol man blong olgeta nesen bambae oli no laekem yufala nating from we yufala i holem nem blong mi.” (Mat. 24:9) Taswe, blong stanap strong long ol hadtaem ya, yumi mas gohed blong joen gud. Long rod ya, Setan bambae i no save seraotem yumi, from we “lav i olsem wan rop we i save joenem ol man oli kam wan.”—Kol. 3:14; Fil. 2:​1, 2.