1-2. (1) Long naet bifo we Jisas i ded, ?hem i mekem wanem? (2) ?Wanem ol kwestin we bambae yumi tokbaot long stadi ya?

 LONG Tasde naet long 14 Nisan, long yia 33 K.T., Jisas i mekem Kakae Blong Masta wetem ol gudfala aposol blong hem. Hem i save se i no longtaem, Judas bambae i salem hem, mo ol enemi blong hem bambae oli mekem hem i safa mo kilim hem i ded. Taswe afta long kakae ya, hem i talem ol tok blong leftemap tingting blong ol aposol blong hem. Mo bifo we oli go wanwan, Jisas i mekem wan impoten prea. Aposol Jon i raetemdaon prea ya, mo yumi save ridim long Jon japta 17.

² Long stadi ya, bambae yumi luk sam samting we yumi save lanem long prea ya blong Jisas. ?Wanem ol samting we hem i stap wari from, jes bifo we hem i ded? ?Mo prea ya i soemaot se wanem nao i moa impoten long Jisas long taem we hem i stap long wol? Bambae yumi tokbaot ansa blong ol kwestin ya.

“MI MI MEKEM OLGETA OLI SAVE NEM BLONG YU”

3. ?Jisas i talem wanem long prea blong hem? ?Mo hem i minim wanem? (Jon 17:​6, 26)

³ Long prea ya we Jisas i mekem, hem i talem se: “Mi mi mekem olgeta oli save nem blong yu.” Hem i talem samting ya tu taem, blong soemaot se hemia i impoten long hem. (Ridim Jon 17:​6, 26.) ?Be hemia i minim se ol disaepol oli no save se nem blong God hem i Jehova? Nogat. Ol disaepol blong Jisas oli ol man Jiu, taswe oli save finis se nem blong God hem i Jehova. Mo nem ya i kamaot plante taosen taem long Hibru Haf Blong Baebol. Taswe Jisas i no stap tokbaot prapa nem blong God, be hem i stap tijim ol disaepol blong oli save se Jehova i wanem kaen God. Jisas i givhan long olgeta blong oli save gud ol tingting  we Jehova i gat long wol ya mo ol man, ol samting we Hem i mekem, mo ol fasin blong Hem. Jisas nomo i save tijim olgeta long ol samting ya, from we hem i save gud Jehova.

4-5. (1) ?Wanem i save mekem se yumi tinghae moa long nem blong wan man? Talem wan pijatok. (2) ?Olsem wanem ol disaepol blong Jisas oli save Jehova moa?

⁴ Traem tingbaot pijatok ya: Wan elda long kongregesen blong yu we nem blong hem David, hem i wan dokta, mo yu yu save hem plante yia finis. Be wan dei, laef blong yu i stap long denja, nao oli mas tekem yu yu go long hospital we brata ya i wok long hem. Ale, hem i yusum ol save we hem i gat olsem wan dokta, blong sevem laef blong yu. Afta long taem ya, sipos yu harem nem blong brata ya, bambae yu tingbaot taem ya we hem i bin sevem laef blong yu, mo yu lavem hem moa. Bambae yu no moa tingbaot hem olsem wan elda nomo, be bambae yu tingbaot se hem i dokta ya we i sevem laef blong yu.

⁵ Long sem fasin, ol disaepol blong Jisas oli save finis nem blong Jehova. Be Jisas i givhan long olgeta blong oli tinghae moa long nem ya. ?From wanem yumi talem olsem? From we long evri samting we Jisas i talem mo i mekem, hem i soemaot ol fasin blong Papa blong hem. Taswe ol aposol oli “save” Jehova moa, taem oli lesin long ol tijing blong Jisas mo oli luk ol fasin we hem i mekem long ol man.—Jon 14:9; 17:3.

“NEM BLONG YU WE YU GIVIM LONG MI”

6. ?Jisas i minim wanem taem hem i talem se Jehova i givim nem blong Hem long hem? (Jon 17:​11, 12)

⁶ Long prea we Jisas i mekem, hem i prea from ol disaepol blong hem, i se: “Plis yu lukaot gud long olgeta from nem blong yu we yu givim long mi.” (Ridim Jon 17:​11, 12.) ?Hemia i min se bambae ol man oli stat blong singaot Jisas se Jehova? Nogat. Makem se long prea blong hem, Jisas i tokbaot nem blong Jehova se “nem blong yu.” Taswe nem blong Jisas i no jenis i kam Jehova. ?Be Jisas i minim wanem taem i talem se God i givim nem blong Hem long hem? Hem i minim se Jehova i sanem hem blong i toktok long bihaf blong Hem. Jisas i kam long nem blong Papa blong hem, mo i mekem ol bigfala wok long nem blong Hem. (Jon 5:43; 10:25) Mo tu, nem ya Jisas i minim “Jehova i Sevem Man.” Taswe nem blong Jisas i joen wetem nem blong Jehova.

7. ?From wanem Jisas i gat raet blong toktok long bihaf blong Jehova? Talem wan pijatok.

⁷ Traem tingbaot pijatok ya: Wan presiden i save sanem wan ambasada blong i go toktok long ol man long bihaf blong hem. Taswe from we ambasada ya i kam long nem blong presiden, ol tok blong hem oli gat paoa sem mak olsem ol tok blong presiden. Long sem fasin, from we Jehova nao i sanem Jisas i kam long nem blong hem, Jisas i gat raet blong toktok long bihaf blong Hem.—Mat. 21:9; Luk 13:35.

8. Bifo we Jisas i kam long wol, ?from wanem Jehova i talem se Jisas i ‘kam long nem blong Hem’? (Eksodas 23:​20, 21)

⁸ Baebol i singaot Jisas se “Tok ya,” from we Jehova i yusum Jisas blong i talemaot ol samting we Hem i wantem se ol man blong Hem mo ol enjel oli save mo oli mekem. (Jon 1:​1-3) I luk olsem se Jisas nao i enjel ya we Jehova i sanem blong i lukaot gud long ol man Isrel taem oli stap wokbaot long draeples. Taem Jehova i talem long ol man Isrel se oli mas obei long enjel ya, hem i talem se: “Hem [enjel ya] i kam long nem blong mi.” a (Ridim Eksodas 23:​20, 21.) Jehova i talem olsem from we Jisas i stap toktok long bihaf blong hem, mo Jisas  nao i mekem plante samting blong leftemap nem blong Papa blong hem mo mekem nem ya i tabu.

“PAPA, YU LEFTEMAP NEM BLONG YU”

9. ?Olsem wanem Jisas i soemaot se hem i tinghae long nem blong Jehova? Yu eksplenem.

⁹ Olsem we yumi tokbaot finis, Jisas i soemaot se hem i tinghae long nem blong Jehova bifo we hem i kam long wol. Taswe taem Jisas i kam long wol, hem i gohed blong soemaot long evri samting we hem i mekem, se hem i tinghae long nem blong Jehova. Klosap long en blong laef blong hem, Jisas i talem long Papa blong hem se: “Papa, yu leftemap nem blong yu.” Wantaem nomo, wan bigfala voes we i olsem tanda i kamaot long heven, i talem se: “Mi mi leftemap finis, mo bambae mi leftemap bakegen.”—Jon 12:28.

10-11. (1) ?Olsem wanem Jisas i leftemap nem blong Jehova? (Mo tu, yu luk pija.) (2) ?From wanem Jisas i mas pruvum se ol samting we Jehova i mekem i stret mo se nem blong Hem i tabu?

¹⁰ Jisas tu i leftemap nem blong Papa blong hem. ?Hem i mekem samting ya olsem wanem? Hem i mekem olsem taem hem i tijim ol narafala long ol nambawan fasin blong Papa blong hem mo ol gudfala samting we Hem i mekem. Be i no hemia nomo. Jisas i mas pruvum tu se evri samting we Jehova i mekem i stret, mo se nem blong Hem i tabu. Jisas i soemaot se hemia i impoten tumas, taem hem i tijim ol man blong hem long Lodsprea. Long prea ya, hem i talem se: “Papa blong mifala long heven, plis yu mekem we nem blong yu i tabu.”—Mat. 6:9.

¹¹ ?From wanem Jisas i mas pruvum se ol samting we Jehova i mekem i stret, mo se nem  blong Hem i tabu? Hemia from we long garen blong Iden, Devel Setan i bin talem ol giaman tok long saed blong Jehova. Setan i talem se Jehova i wan man blong giaman, mo se Hem i stap blokem Adam mo Iv blong tufala i no kasem wan gudfala samting. (Jen. 3:​1-5) Setan i givim tingting ya tu se Jehova i stap mekem ol samting long fasin we i no stret. Ol giaman tok we Setan i talem, i sakem doti long nem blong Jehova. Biaen, long taem blong Job, Setan i talem se ol man oli wosipim Jehova nomo from we oli wantem kasem sam samting. Hem i talem tu se ol man oli no rili lavem Jehova, taswe sipos oli fesem sam trabol, bambae oli no moa wosipim Hem. (Job 1:​9-11; 2:4) Taswe, i nidim taem blong pruvum se hu nao i stap giaman, Jehova o Setan.

“MI GIVIM LAEF BLONG MI”

12. ?Jisas i rere blong mekem wanem from we hem i lavem Jehova?

¹² Jisas i lavem Jehova tumas, taswe hem i wantem mekem evri samting we hem i naf blong mekem, blong pruvum se ol samting we Jehova i mekem i stret mo se nem blong Hem i tabu. Hem i talem se: “Mi givim laef blong mi.” (Jon 10:​17, 18) Yes, hem i rere blong ded tu from nem blong Jehova. b Faswan man mo woman, hemia Adam mo Iv, tufala i stret gud be tufala i tanem baksaed long Jehova mo folem Setan. Be Jisas i defren. Hem i rere blong kam long wol ya mo pruvum se hem i lavem Jehova. Hem i mekem olsem, taem hem i holemstrong long Jehova long fasin we i stret gud. (Hib. 4:15; 5:​7-10) Long ful laef blong hem, hem i gohed blong holemstrong long Jehova gogo kasem we hem i ded long wan pos. (Hib. 12:2) Taem hem i mekem olsem, hem i pruvum se hem i lavem Jehova mo nem blong Hem.

13. ?From wanem Jisas i beswan man blong pruvum se Setan i wan man blong giaman? (Mo tu, yu luk pija.)

¹³ Evri samting we Jisas i mekem i pruvum se Setan i wan man blong giaman, be i no Jehova. (Jon 8:44) Jisas i save gud Jehova i bitim eni narafala man. Taswe sipos tok we Setan i talem agensem Jehova i tru, Jisas bambae i save samting ya. Be Jisas i gohed nomo blong difendem nem blong Jehova. Long taem ya tu we i luk olsem se Jehova i lego hem, Jisas i rere blong ded i bitim we hem i tanem baksaed long Papa blong hem.—Mat. 27:46. c

“MI FINISIM OL WOK WE YU GIVIM LONG MI”

14. ?Jehova i givim wanem pei long Jisas from we hem i holemstrong long wok blong hem?

¹⁴ Long prea we Jisas i mekem long naet bifo  we hem i ded, hem i talem se: “Mi finisim ol wok we yu givim long mi blong mi mekem.” Jisas i trastem se Jehova bambae i givim pei long hem, from we hem i holemstrong long wok ya. (Jon 17:​4, 5) I stret nomo we Jisas i trastem Papa blong hem. Jehova i no letem hem i stap olwe long gref. (Wok 2:​23, 24) Be hem i mekem Jisas i laef bakegen, mo i givim wan hae posisen long hem long heven. (Fil. 2:​8, 9) Biaen, Jisas i stat blong rul olsem King long Kingdom blong God. ?Bambae Kingdom ya i mekem wanem? Long seken haf blong prea ya we Jisas i tijim long ol disaepol blong hem, hem i talem se: “Yu mekem Kingdom blong yu i kam. Yu mekem wil blong yu i kamtru long wol ya olsem long heven.”—Mat. 6:10.

15. ?Wanem sam narafala samting we Jisas bambae i mekem?

¹⁵ I no longtaem, Jisas bambae i faet agensem ol enemi blong God mo finisim olgeta long Amagedon. (Rev. 16:​14, 16; 19:​11-16) Biaen, bambae hem i sakem Setan i go long “abys,” we i minim se Setan bambae i no moa gat paoa blong mekem wan samting. (Rev. 20:​1-3) Long taem we Jisas i rul blong wan taosen yia, bambae hem i mekem se ol man oli kam stret gud bakegen mo oli gat pis. Bambae hem i mekem ol dedman oli laef bakegen, mo i mekem fulwol i kam wan paradaes. !Yes, stamba tingting blong Jehova bambae i kamtru!—Rev. 21:​1-4.

16. ?Bambae laef i olsem wanem long en blong Wan Taosen Yia Rul Blong Kraes?

¹⁶ ?Bambae laef i olsem wanem long en blong Wan Taosen Yia Rul Blong Kraes? Bambae ol man oli no moa gat sin. Taswe bambae oli no moa nid blong askem Jehova blong i fogivim ol sin blong olgeta tru long ransom. Mo tu, bambae oli no moa nidim wan medel man o ol pris blong oli toktok long Jehova long bihaf blong olgeta. Mo tu, “laswan enemi, hemia ded” we i kamaot long Adam, bambae i lus. Bambae ol gref oli emti, from ol dedman oli laef bakegen. Bambae olgeta man long wol oli kam stret gud olgeta.—1 Kor. 15:​25, 26.

17-18. (1) ?Wanem bambae i hapen long en blong Wan Taosen Yia Rul Blong Kraes? (2) ?Bambae Jisas i mekem wanem long en blong Wan Taosen Yia Rul blong hem? (1 Korin 15:​24, 28) (Mo tu, yu luk pija.)

 ¹⁷ ?Wanem narafala samting bambae i hapen long en blong Wan Taosen Yia Rul Blong Kraes? Long taem ya, wan spesel samting bambae i hapen. Bambae yumi no moa nid blong pruvum se nem blong Jehova i tabu mo se evri samting we Hem i mekem i stret. ?From wanem? Long garen blong Iden, Setan i bin talem se Jehova i wan man blong giaman mo se Hem i no lavem ol man. Be stat long taem ya, ol man we oli ona long Jehova mo oli respektem Hem. Taswe long en blong Wan Taosen Yia Rul Blong Kraes, Jehova bambae i leftemap nem blong hem fulwan. Bambae hem i pruvum se Hem i wan Papa we i gat lav.

¹⁸ Long en blong Wan Taosen Yia Rul Blong Kraes, olgeta man bambae oli save se ol tok we Setan i talem agensem Jehova oli giaman. Biaen, ?bambae Jisas i mekem wanem? ?Bambae hem i mekem olsem Setan mo rebel agensem Jehova? !Nogat! (Ridim 1 Korin 15:​24, 28.) Jisas bambae i givim Kingdom i gobak long Papa blong hem. Bambae hem i putum hem wan i stap aninit long rul blong Jehova. Yes, Jisas i no olsem Setan, hem i glad nomo blong lego olgeta samting ya from we hem i lavem Jehova.

19. ?Olsem wanem Jisas i soemaot se hem i tinghae long nem blong Jehova?

¹⁹ Naoia yumi kasemsave from wanem Jehova i givim nem blong hem long Jisas. Jisas nao i beswan man blong toktok long bihaf blong Papa blong hem. Long evri samting we hem i mekem, hem i soemaot se hem i tinghae moa long nem blong Jehova i bitim eni narafala samting. Taswe hem i rere blong ded from nem ya, mo long en blong Wan Taosen Yia Rul blong hem, bambae hem i rere blong givim evri samting i gobak long Jehova. ?Olsem wanem yumi save folem eksampol blong Jisas? Bambae yumi tokbaot ansa blong kwestin ya long nekis stadi.