1. ?Jisas i talem wanem long saed blong ol gudfala samting long heven?

I GAT sam gudfala samting we yumi no save luk. Blong talem stret, ol samting we oli gud moa, yumi no save luk. Long bigfala toktok blong Jisas antap long hil, hem i tokbaot ol gudfala samting long heven, we oli gud moa i bitim enikaen sas samting long wol. Mo hem i talem se: “Long weples ol gudgudfala samting blong yufala oli stap long hem, ples ya nao hat blong yufala tu i stap long hem.” (Mat. 6:19-21) Hat blong yumi bambae i pulum yumi blong traem kasem ol samting we yumi tinghae long olgeta. Yumi hivimap ‘ol gudgudfala samting long heven’ taem yumi traehad blong gat gudnem long fes blong God. Jisas i talem se i no gat wan samting we i save spolem ol gudfala samting ya, mo i no gat man i save stilim.

2. (1) Long 2 Korin 4:17, 18, ?Pol i talem se yumi mas tingbaot wanem? (2) ?Bambae yumi tokbaot wanem long stadi ya?

² Aposol Pol i talem se yumi mas “tingbaot ol samting we yumi no save luk.” (Ridim 2 Korin 4:17, 18.) Sam long ol gudfala samting ya we yumi no save luk, hemia ol blesing we bambae yumi kasem long niufala wol. Long stadi ya, bambae yumi tokbaot fo gudfala samting we yumi gat naoia, be yumi no save luk olgeta. Yumi fren gud wetem God, yumi prea, tabu spirit i givhan long yumi, mo Jehova, Jisas, mo ol enjel oli halpem yumi taem yumi prij. Bambae yumi tokbaot tu, olsem wanem blong soemaot se yumi glad long ol gudfala samting ya we yumi no save luk.

3. ?Wanem presen we yumi no save luk be i gud moa i bitim ol narafala samting? ?Wanem i mekem se yumi save kasem presen ya?

³ Presen ya we yumi no save luk be i gud moa i bitim ol narafala presen, hemia se yumi fren gud wetem Jehova God. (Sam 25:14) ?Wanem i mekem se ol sinman oli save fren gud wetem God ya we i tabu tumas? Hemia ransom sakrefaes blong Jisas we i “tekemaot sin blong ol man long wol.” (Jon 1:29) Jehova i save finis se Jisas bambae i holemstrong long hem, gogo kasem we hem i ded blong sevem ol man. Taswe God i save fren gud tu wetem ol man we oli laef bifo long taem blong Jisas.—Rom 3:25.

4. Tokbaot sam man we oli fren gud wetem God, bifo we Jisas i kam long wol.

⁴ Traem tingbaot sam man we oli fren gud wetem God bifo we Jisas i kam long wol. Ebraham i wan man we i gat strong bilif. Bitim 1,000 yia afta we Ebraham i ded, Jehova i singaotem hem se “fren blong mi.” (Aes. 41:8) Hemia i soemaot se afta we man i ded, Jehova i save tingbaot hem yet olsem fren blong hem. Long tingting blong Jehova, Ebraham i laef yet. (Luk 20:37, 38) Narafala man, hemia Job. Taem ol enjel oli joen wanples long heven, Jehova i toktok gud long saed blong Job, i se: “Hem i wan gudfala man we tingting blong hem i stap strong long mi . . . mo i stap lukaot gud blong i no mekem wan samting we i no stret.” (Job 1:6-8) ?Mo wanem tingting blong Jehova long Daniel, we i holemstrong long Jehova blong 80 yia long wan kantri blong ol hiten man? Tri taem ol enjel oli talem long olfala Daniel se: “God i lavem yu tumas.” (Dan. 9:23; 10:11, 19) Yumi sua se Jehova i wantem tumas blong mekem ol fren blong hem oli laef bakegen.—Job 14:15.

5. ?Yumi mas mekem wanem blong fren gud wetem Jehova?

⁵ Tede, i gat plante milian man we oli fren gud wetem Jehova. Yumi talem olsem from we i gat fulap man, woman, mo pikinini long wol we fasin blong olgeta i soemaot se oli fren blong God. Jehova i “frengud wetem ol stret man.” (Prov. 3:32, NW) Oli save kam fren blong God from we oli bilif long ransom sakrefaes blong Jisas. Sipos yumi gat bilif olsem, yumi tu yumi save kam fren blong Jehova, givim laef blong yumi long hem mo baptaes. !Taem yumi mekem olsem, yumi joen wetem plante milian narafala Kristin we oli givim laef blong olgeta long God mo oli baptaes, nao oli “frengud” wetem Man ya we i hae moa long ol narafala long heven mo wol!

6. ?Olsem wanem yumi soemaot se yumi glad blong fren gud wetem God?

⁶ ?Olsem wanem yumi soemaot se yumi glad blong frengud wetem God? Olsem Ebraham mo Job, we tufala i holemstrong long God blong bitim 100 yia, yumi tu yumi mas holemstrong long God, nating se yumi mekem wok blong Jehova longtaem finis. Olsem Daniel, yumi mas tingbaot se i moagud blong fren gud wetem God i bitim we yumi sevem laef blong yumi. (Dan. 6:7, 10, 16, 22) Jehova i save givhan long yumi, blong yumi stanap strong taem yumi fesem enikaen trabol, nao yumi gohed blong fren gud wetem hem.—Fil. 4:13.

7. (1) Folem Ol Proveb 15:8, ?wanem tingting blong Jehova long ol prea blong yumi? (2) ?Olsem wanem Jehova i ansa long ol prea blong yumi?

⁷ Wan nara gudfala presen we yumi no  save luk, hemia prea. Ol gudfala fren oli laekem blong serem ol tingting mo filing blong olgeta. I sem mak long yumi mo Jehova. Jehova i yusum Baebol blong talemaot ol tingting mo filing blong hem long yumi. Mo yumi prea blong talemaot ol tingting mo filing blong yumi long hem. Jehova i glad blong harem ol prea blong yumi. (Ridim Ol Proveb 15:8.) Olsem wan Fren we i lavem yumi, Jehova i lesin long ol prea blong yumi, mo hem i ansa tu. Samtaem hem i ansa kwik, be samtaem yumi mas prea bakegen mo bakegen from wan samting. Nating se i olsem, yumi save sua se ansa bambae i kam long stret taem mo long rod we i beswan. Be maet ansa we God i givim i defren long samting we yumi tingbaot. Maet hem i no tekemaot wan trabol, be hem i givim waes mo paoa blong yumi save “stanap strong.”—1 Kor. 10:13.

8. ?Yumi save mekem wanem blong soemaot se yumi glad long presen ya prea?

⁸ ?Yumi save mekem wanem blong soemaot se yumi glad long nambawan presen ya prea? Yumi save obei long advaes blong Jehova blong “prea oltaem.” (1 Tes. 5:17) Jehova i no fosem yumi blong prea, be hem i letem yumi jus. Taswe sipos yumi prea plante taem evri dei, yumi stap soemaot se yumi glad long gudfala presen ya. Mo taem yumi prea, yumi no mas fogetem tu blong talem tangkiu long Jehova from evri samting we hem i givim, mo presem hem.—Sam 145:2, 3.

9. ?Wanem tingting blong wan brata long saed blong prea, mo wanem tingting blong yu?

⁹ Taem yumi gohed blong mekem wok blong Jehova, mo yumi luk olsem wanem hem i ansarem ol prea blong yumi, yumi tinghae moa long prea. Tingbaot wan brata, nem blong hem Kris, we i mekem fultaem wok blong Jehova blong 47 yia. Hem i talem se: “Mi harem gud blong prea long Jehova evri dei long eli moning. !I gud tumas blong toktok long hem long taem ya we san i stap girap mo ples i kwaet! Mi harem se mi wantem talem  tangkiu long hem from evri samting we hem i givim, mo from nambawan blesing ya blong prea. Mo taem mi prea long en blong dei, mi harem se tingting blong mi i klin long fes blong God, nao mi save slip gud.”

10. ?From wanem tabu spirit i wan gudfala presen?

¹⁰ Tabu spirit i wan nara gudfala presen we yumi no save luk. Jisas i talem se yumi mas gohed blong prea from tabu spirit. (Luk 11:9, 13) Jehova i yusum tabu spirit blong givim ‘paoa we i bigwan bitim mak.’ (2 Kor. 4:7; Wok 1:8) Spirit blong God i save mekem yumi naf blong stanap strong, taem yumi kasem enikaen trabol.

11. ?Olsem wanem tabu spirit i givhan long yumi?

¹¹ Maet yumi gat save mo gudhan long sam samting, be tabu spirit i save mekem yumi kam gud moa, nao yumi naf blong mekem enikaen wok we God i givim long yumi. Yumi save se gudfala frut we i kamaot, i no from prapa paoa blong yumi, be from we tabu spirit i givhan long yumi.

12. Folem Ol Sam 139:23, 24, ?yumi save prea blong tabu spirit i givhan long yumi olsem wanem?

¹² Wan narafala rod blong soemaot se yumi glad long presen ya tabu spirit, hemia se yumi prea blong spirit ya i mekem yumi luksave ol rong tingting mo filing long hat blong yumi. (Ridim Ol Sam 139:23, 24.) Jehova i save yusum tabu spirit blong mekem yumi luksave ol rong tingting mo filing ya. Nao yumi prea blong tabu spirit i givim paoa long yumi blong sakemaot olgeta. Taem yumi mekem olsem, yumi soemaot long Jehova se yumi no wantem mekem wan samting we i save blokem tabu spirit.—Efes. 4:30.

13. ?Olsem wanem blong glad moa long presen ya blong tabu spirit?

¹³ Bambae yumi glad moa long presen ya blong tabu spirit, sipos yumi tingbaot ol samting we spirit ya i stap mekem tede. Bifo we Jisas i go antap long heven, hem i talem long ol disaepol blong hem  se: “Taem tabu spirit i kam long yufala, bambae yufala i gat paoa nao yufala i witnes blong mi long . . . olgeta ples long wol.” (Wok 1:8) Hemia nao samting we i stap hapen tede. Tabu spirit i givhan finis long bitim eit milian man, blong oli kam ol man blong Jehova. Mo tu, ol man blong God long fulwol oli joen olsem ol brata mo sista, from we tabu spirit i halpem olgeta blong oli gat ol nambawan fasin olsem lav, glad, pis, longfala tingting, kaen fasin, gud fasin, bilif, kwaet fasin, mo bos long tingting. Ol fasin ya oli olsem “frut” blong tabu spirit. (Gal. 5:22, 23, futnot) !Tru ya, tabu spirit i wan presen we i gud tumas!

14. ?Hu i givhan long yumi long wok blong prij?

¹⁴ Yumi “wok wetem” Jehova mo oganaesesen blong hem long heven. Hemia tu i wan gudfala presen we yumi no save luk. (2 Kor. 6:1) Yumi wok wetem olgeta blong pulum ol man oli kam disaepol. Pol i tokbaot hem mo ol narafala we oli prij, se oli “joen wetem God blong mekem wok.” (1 Kor. 3:9) Mo taem yumi prij, yumi stap wok wetem Jisas tu. Afta we hem i talem long ol disaepol se oli mas ‘go long ol man blong olgeta neson, mo pulum olgeta oli kam disaepol,’ hem i se: “Bambae mi stap wetem yufala oltaem.” (Mat. 28:19, 20) Mo yumi wok wetem ol enjel tu. !Yumi glad tumas se oli lidim yumi long wok blong talemaot “gud nius ya we i blong stap olwe”!—Rev. 14:6.

15. Tokbaot wan stori blong Baebol we i soemaot impoten wok we Jehova i mekem taem yumi prij.

¹⁵ Taem olgeta long heven oli givhan long yumi, ?wanem frut i kamaot? Sam sid blong trutok we yumi sakem oli foldaon long gudfala graon, mo oli gru long hat blong ol man. (Mat. 13:18, 23) ?Hu i mekem sid ya i gru mo i karem frut? Jisas i eksplenem se i no gat man i save kam disaepol sipos “Papa . . . i no pulum hem i kam.” (Jon 6:44) I gat wan stori long Baebol we i soemaot samting ya. Pol i prij long wan grup blong ol woman afsaed long taon ya Filipae. Baebol i tokbaot wan long olgeta, Lidia, i se: “Jehova i openem hat blong hem blong hem i akseptem ol samting we Pol i stap talem.” (Wok 16:13-15) Olsem Lidia, Jehova i pulum plante milian narafala tu oli kam long hem.

16. ?Hu i mas kasem ona from ol gudfala frut long wok blong prij?

¹⁶ ?Hu i mekem se i gat gudfala frut long wok blong prij? Pol i ansarem kwestin ya taem hem i tokbaot kongregesen blong Korin se: “Mi mi planem kakae, Apolos i putum wota long hem, be God nao i stap mekem i gru, taswe hem nao i mas kasem ona, be i no man ya we i planem mo man ya we i putum wota.” (1 Kor. 3:6, 7) Olsem Pol, yumi mas givim ona oltaem long Jehova, from ol gudfala frut long wok blong prij.

17. ?Olsem wanem yumi soemaot se yumi glad blong “wok wetem” God, Kraes, mo ol enjel?

¹⁷ ?Olsem wanem yumi soemaot se yumi glad blong “wok wetem” God, Kraes, mo ol enjel? Yumi tekem evri janis blong talemaot gud nius. I gat plante rod blong mekem olsem, taem yumi prij long ol pablik ples mo “long ol haos wanwan.” (Wok 20:20) Plante brata mo sista oli storian wetem ol man enitaem nomo. Taem oli mitim wan strenja, oli talem halo long hem mo oli traem statem wan storian. Sipos hem i glad blong storian, oli pulum tingting blong hem i go long gud nius blong Kingdom.

18-19. (1) ?Olsem wanem yumi wotarem sid blong trutok? (2) Tokbaot olsem wanem Jehova i halpem wan man we i stadi Baebol.

 ¹⁸ Taem yumi “joen wetem God blong mekem wok,” yumi no sakem sid blong trutok nomo, be yumi wotarem tu. Taem yumi faenem wan man we i intres, yumi mas mekem bes blong yumi blong gobak long hem, o askem long narafala blong i gobak mo traem statem wan Baebol stadi. Bambae yumi glad blong luk olsem wanem Jehova i jenisim ol tingting mo filing blong hem, taem stadi i stap gohed.

¹⁹ Traem tingbaot wan man long Saot Afrika, we fastaem i wan kleva. Hem i laekem tumas blong stadi Baebol, be taem hem i lanem se i tabu blong traem toktok wetem ol bubu we oli ded finis, i had blong hem i akseptem. (Dut. 18:10-12) Be sloslo, hem i bilif long tok blong God mo i jenisim tingting blong hem. Biaen hem i lego wok blong kleva, nating se hem i no gat wan narafala rod blong kasem mane. Naoia hem i gat 60 yia, mo hem i talem se: “Mi talem tangkiu long ol Witnes blong Jehova from we oli givhan long mi long plante samting, olsem blong faenem wan wok blong kasem mane. Mo mi talem bigfala tangkiu long Jehova, from we hem i halpem mi blong mi jenisim laef blong mi, nao mi naf blong joen long wok blong prij mo baptaes olsem wan Witnes.”

20. ?Bambae yu traehad blong mekem wanem?

²⁰ Long stadi ya, yumi tokbaot fo gudfala presen we yumi no save luk. Presen we i gud moa, se Jehova i Besfren blong yumi. Hemia i mekem se yumi kasem plante narafala presen tu we yumi no save luk, olsem yumi prea long hem, tabu spirit i halpem yumi, mo Jehova, Jisas, mo ol enjel oli givhan long yumi taem yumi prij. Yumi mas traehad blong soemaot moa se yumi glad long ol presen ya. Mo yumi mas gohed nomo blong talem tangkiu long Jehova from we hem i Besfren blong yumi.