Baebol i no talem. Be hem i tokbaot sam intresting samting we i soemaot from wanem maet oli jusum blong no gobak long Nasaret.

Wan enjel i talem long Meri se bambae hem i gat bel mo i bonem wan pikinini. Taem enjel i kam talemaot mesej ya, Meri mo Josef i laef long Nasaret, wan taon long Galili we Josef i gruap long hem. (Luk 1:26-31; 2:4) Afta we oli kambak long Ijip, oli gobak long Nasaret. Jisas i gruap long ples ya mo hem i kam wan Nasarin. (Mat. 2:19-23) Hemia nao from wanem taem yumi tokbaot Jisas, Josef, mo Meri, yumi tingbaot taon ya Nasaret.

Meri i gat wan famle, nem blong hem Elisabet, we i laef long Juda. Elisabet i waef blong pris ya Sekaraea mo hem i kam mama blong Jon Baptaes. (Luk 1:5, 9, 13, 36) Meri i bin go visitim Elisabet mo i stap wetem hem blong tri manis long Juda. Biaen Meri i gobak long Nasaret. (Luk 1:39, 40, 56) Hemia nao from wanem Meri i save gud ol eria long Juda.

Samtaem biaen, Josef i obei long oda ya blong go “rejista.” Taswe Josef i aot long Nasaret mo i travel i go long Betlehem we i “taon blong Deved,” mo hemia nao ples we profet tok i tokbaot se Mesaea bambae i bon long hem. (Luk 2:3, 4; 1 Saml. 17:15; 20:6; Mae. 5:2) Afta we Meri i bonem Jisas long ples ya, Josef i no traem pulum Meri blong oli mekem longfala trip i gobak long Nasaret. Be oli stap nomo long Betlehem, we i samwe naen kilometa longwe long Jerusalem. Mo hemia i gud, from we bambae oli save tekem pikinini blong tufala we i jes bon i go long tempol, mo mekem ofring olsem we Loa i talem.—Lev. 12:2, 6-8; Luk 2:22-24.

Enjel i bin talem long Meri se God bambae i givim “tron blong Deved” long boe blong hem mo bambae hem i ‘rul olsem King.’ Maet Josef mo Meri i save gat tingting ya se ?i impoten we Jisas i bon long taon blong Deved? (Luk 1:32, 33; 2:11, 17) Maet tufala i gat tingting ya se i waes blong stap long ples ya, mo wet go kasem taem we oli faenemaot samting we God i wantem blong oli mekem.

Yumi no save stret se oli stap hamas taem long Betlehem, taem ol man blong lukluk ol sta blong talemaot fiuja oli kam. Be long taem ya, Josef mo Meri i laef long wan haos, mo boe blong tufala i “wan smol pikinini,” be i no wan bebi. (Mat. 2:11) So i luk olsem se oli no moa travel i go long Nasaret, be oli stap longtaem lelebet long Betlehem mo ples ya i kam hom blong olgeta.

Herod i givim oda long ol man blong hem blong “oli go long Betlehem mo . . . kilim i ded evri pikinini boe we oli no bitim tu yia yet.” (Mat. 2:16) Be wan enjel i wonem Josef long saed blong samting ya, ale Josef mo Meri i tekem Jisas mo oli ronwe i go Ijip, mo oli stap long ples ya kasem we Herod i ded. Biaen Josef i tekem famle blong hem i go long Nasaret. ?From wanem oli no gobak long Betlehem? From long taem ya, Akeleas we i boe blong Herod i rul long Judia mo hem i wan rabis man. Mo tu, from wan enjel i wonem Josef blong i no gobak long ples ya. Nasaret i wan ples we i sef blong Josef i save lukaot gud long Jisas mo tijim hem blong i wosipim Jehova.—Mat. 2:19-22; 13:55; Luk 2:39, 52.

I luk olsem se Josef i ded bifo we Jisas i openem rod blong sam man oli save go laef long heven. Taswe, Josef bambae i laef bakegen long wol ya. Plante long yumi bambae oli save mitim hem, mo lanem moa from wanem hem mo Meri i jusum blong stap long Betlehem afta we Jisas i bon.