1. ?Wetaem bambae olgeta tabu Kristin oli go long heven?

 BLONG plante yia ol man blong Jehova oli stap tingting se: ‘?Wetaem bambae lashaf blong ol tabu Kristin oli go long heven?’ Bifo yumi ting se maet sam long ol tabu Kristin bambae oli laef long paradaes long wol ya blong samtaem afta long faet long Amagedon. Be long Wajtaoa blong 15 Julae 2013, yumi lanem se olgeta tabu Kristin we oli stap yet long wol bambae oli go long heven bifo we faet blong Amagedon i stat.—Mat. 24:31.

2. ?Wanem kwestin we maet samfala oli gat, mo bambae yumi tokbaot wanem long stadi ya?

² Maet sam oli askem se: ?Wanem bambae i hapen long “ol narafala sipsip” blong kraes we bambae oli gohed blong holemstrong long Jehova long taem blong “bigfala trabol”? (Jon 10:16; Mat. 24:21) Maet sam long ol narafala sipsip ya oli wari se bambae i no gat man blong halpem mo lidim olgeta afta we olgeta tabu Kristin oli go long heven. Taswe, bambae yumi tokbaot tu stori long Baebol we i save mekem se oli gat tingting ya. Biaen bambae yumi tokbaot ol risen from wanem yumi no nid blong wari.

?WANEM BAMBAE I NO HAPEN?

3-4. ?Samfala maet oli wari long wanem mo from wanem?

³ Maet samfala oli wari se ol narafala sipsip bambae oli lego trutok taem i no moa gat ol tabu brata blong Hed Kampani blong lidim olgeta. Maet i gat sam stori long Baebol we i mekem se oli gat tingting olsem. Bambae yumi luk tu eksampol. Faswan eksampol hemia blong Hae Pris Jehoeada. Hem i wan gudfala man blong God. Hem mo waef blong hem Jehosabiat  i sevem wan yang boe hemia Jehoas, mo tufala i halpem hem blong i kam wan gudfala king. Taem Jehoeada i laef yet, Jehoas i wosipim Jehova mo i mekem ol gudfala samting. Be afta we Jehoeada i ded, Jehoas i stat blong mekem samting we i no stret. Hem i lesin long ol prins we oli no holemstrong long Jehova, nao hem i lego Jehova.—2 Kron. 24:​2, 15-19.

⁴ Seken eksampol hemia blong ol Kristin we oli laef afta long taem blong ol Aposol. Laswan aposol we i ded hemia Jon. Taem hem i laef yet, hem i halpem plante Kristin blong oli gohed blong holemstrong long Jehova. (3 Jon 4) Jon tu i wok had olsem ol narafala disaepol blong Jisas blong faet agensem ol giaman tijing blong apostasi. (1 Jon 2:18; 2 Tes. 2:7.) Be afta we Jon i ded, plante long kongregesen oli folem ol tijing blong apostasi. Taswe long ol yia we i kam biaen, Kristin kongregesen i fulap gud long ol tijing blong apostasi.

5. ?Wanem rong tingting we yumi no mas gat long tufala eksampol ya we yumi tokbaot?

⁵ ?Tufala eksampol ya i soemaot se sem samting bambae i hapen long ol narafala sipsip, taem ol tabu Kristin oli go long heven? ?Long taem ya, ol Kristin we oli holemstrong bambae oli lego Jehova olsem we Jehoas i mekem? O ?Bambae oli folem ol tijing blong apostasi olsem we plante Kristin oli mekem afta we ol aposol oli ded? Ansa hemia se nogat. Yumi sua se taem ol tabu Kristin oli go long heven, Jehova bambae i gohed blong lukaot gud long ol narafala sipsip mo bambae hem i lidim olgeta long saed blong spirit. ?From wanem yumi sua long samting ya?

TRU WOSIP BAMBAE I GOHED NOMO

6. ?Wanem trifala taem we bambae yumi tokbaot?

⁶ ?From wanem yumi sua se tru wosip bambae i gohed nomo, nating se bambae i gat hadtaem long fiuja? Hemia from we Baebol i eksplenem se taem we yumi laef long hem naoia, i defren olgeta long taem blong ol man Isrel bifo mo long taem we evri aposol i ded. Taswe, i gud yumi tokbaot moa trifala taem ya: (1) Taem blong ol man Isrel bifo, (2) taem we evri aposol i ded, mo (3) taem blong yumi, hemia “taem we olgeta samting oli kam niuwan bakegen.”—Wok 3:21.

7. ?From wanem ol gudfala man Isrel oli gohed blong wosipim Jehova, nating se ol king mo ol narafala oli mekem ol samting we i no stret?

⁷ Taem blong ol man Isrel bifo. Smoltaem bifo we Moses i ded, hem i talem long ol man Isrel se: “Mi mi savegud se afta we mi ded, bambae yufala i mekem ol samting we oli nogud, mo yufala i tanem baksaed long rod ya we mi stap talem long yufala blong yufala i folem.” (Dut. 31:29) Moses i givim woning tu long ol man Isrel se sipos oli rebel, bambae oli go kalabus long narafala kantri. (Dut. 28:​35, 36) ?Ol tok blong Moses i kamtru? Yes. Blong plante handred yia, plante king oli jusum blong folem wan rod we i no stret mo oli lidim ol man i gowe long God. From samting ya, Jehova i panisim ol man Isrel we oli stronghed mo hem i no moa putumap wan king blong i rul long olgeta. (Esik. 21:​25-27) Be ol man Isrel we oli holemstrong long Jehova, oli gohed blong wosipim hem taem oli luk we ol tok blong hem oli kamtru.—Aes. 55:​10, 11.

8. ?Yumi sapraes se afta we ol aposol oli ded, Kristin kongregesen i fulap long ol tijing blong apostasi? Yu eksplenem.

⁸ Taem we evri aposol oli ded. ?Olsem wanem? ?Yumi sapraes se afta we ol aposol oli ded, Kristin kongregesen i fulap long ol tijing blong apostasi? Nogat. Jisas i bin talemaot finis se apostasi bambae i kam antap bigwan. (Mat. 7:​21-23; 13:​24-30, 36-43) Aposol Pol,  Pita, mo Jon oli talem se profet tok blong Jisas i stat blong kamtru finis long taem blong ol fas Kristin. (2 Tes. 2:​3, 7; 2 Pita 2:1; 1 Jon 2:18) Mo afta we ol aposol oli ded, Kristin kongregesen i fulap long ol tijing blong apostasi. Mo hemia i kam haf blong Bigfala Babilon, hemia olgeta giaman skul long wol. Yes, samting we Jisas i talem i kamtru.

9. ?Olsem wanem taem we yumi laef long hem tede, i defren long taem blong ol man Isrel bifo mo taem ya we evri aposol oli ded?

⁹ “Taem we olgeta samting oli kam niuwan bakegen.” Taem blong yumi i defren long taem blong ol man Isrel mo long taem we tijing blong apostasi i kam antap bigwan afta we ol aposol oli ded. ?Baebol i singaot taem we yumi stap laef long hem naoia se hem i wanem? Hem i singaot taem ya se “ol las dei” blong rabis sistem blong wol ya. (2 Tim. 3:1) Baebol i soemaot se wan taem we i impoten tumas mo i longfala se, i stat long sem taem ya. Mo taem ya bambae i gohed olsem kasem we Kingdom blong Mesaea i mekem ol man oli kam stret gud olgeta mo i mekem wol ya i kam wan paradaes. Baebol i singaot impoten taem ya se, “taem we olgeta samting oli kam niuwan bakegen.” (Wok 3:21) Taem ya i stat long 1914. ?Wanem samting i kam niuwan bakegen? Jisas i kam King long heven. Jehova i putumap bakegen wan king we i kamaot long laen blong King Deved, blong i rul long nem blong hem. Jehova i no jes putumap nomo wan king, be hem i halpem ol man blong Hem tu blong oli wosipim hem bakegen long rod we hem i wantem. (Aes. 2:​2-4; Esik. 11:​17-20) ?Olsem wanem? ?Ol man bambae oli stopem tru wosip bakegen?

10. (1) ?Baebol i talem wanem long saed blong tru wosip long taem blong yumi? (Aesea 54:17) (2) ?From wanem profet tok ya i leftemap tingting blong yumi?

¹⁰ Ridim Aesea 54:17. Traem tingbaot profet tok ya: !“Eni tul blong faet we oli wokem agensem yu bambae i no win”! Ol tok ya oli stap kamtru tede. Mo ol tok we i kam biaen tu i stret long yumi tede, i se: “Jehova bambae i tijim ol boe blong yu, mo pis we ol boe blong yu oli gat bambae i bigwan tumas. Bambae yu yu stanap strong long stret fasin. . . . Bambae yu no fraet long wan samting mo bambae i no gat wan samting i mekem yu seksek, from we samting olsem bambae i no kam klosap long yu.” (Aes. 54:​13, 14) Antap moa “god blong sistem blong wol ya” hemia Setan, i no gat paoa blong stopem yumi long wok blong tijim trutok long ol man tede. (2 Kor. 4:4) Tru wosip i stanap bakegen mo bambae i neva gat wan samting i save spolem bakegen. Tru wosip bambae i stap  blong olwe. !Mo bambae i no gat eni tul blong faet we i save spolem yumi!

?WANEM BAMBAE I HAPEN?

11. ?Wanem i mekem yumi sua se bigfala hip blong ol man bambae oli no stap olgeta wan nomo, taem ol tabu Kristin oli go long heven?

¹¹ ?Wanem bambae i hapen taem ol tabu Kristin oli go long heven? Tingbaot, Jisas nao i stap lukaot gud long yumi. Hem i hed blong Kristin kongregesen mo hem i talem klia se: “Yufala i gat wan Lida nomo, hemia Kraes.” (Mat. 23:10) Oltaem king blong yumi bambae i lukaot gud long yumi. From we Kraes nao i rul, ol man blong hem long wol oli no nid blong fraet long eni samting. I tru, yumi no save evri smosmol samting we Kraes bambae i mekem blong lidim ol man blong hem long taem ya. Taswe, i gud yumi luk sam eksampol long Baebol we i save leftemap tingting blong yumi blong no fraet long eni samting.

12. ?Olsem wanem Jehova i lukaot gud long ol man blong hem (1) afta we Moses i ded? (2) afta we Elaejah i kasem wan narafala wok? (Mo tu, yu luk pija.)

¹² Bifo we ol man Isrel oli go insaed long Promes Lan, Moses i ded. ?Wanem i hapen long ol man God? ?Jehova i stop blong halpem ol man blong hem afta we Moses i ded? Nogat. Taem oli gohed blong holemstrong long Jehova, hem i givim samting we oli nidim. Bifo we Moses i ded, Jehova i talem long hem blong i putumap Josua blong i lidim ol man blong hem. Moses i bin trenem Josua blong plante yia. (Eks. 33:11; Dut. 34:9) Antap long hemia, i gat ol narafala man we oli naf blong kam ol lida blong taosen man, lida blong handred man, lida blong fifti man, mo lida blong ten man. (Dut. 1:15) God i lukaot gud long ol man blong hem. Wan narafala eksampol hemia blong Elaejah. Hem i bin wok had blong plante yia blong halpem ol man Isrel blong oli wosipim Jehova. Be biaen, Jehova i sanem hem i go daon long saot blong Juda. (2 King 2:1; 2 Kron. 21:12) ?Olsem wanem? ?Jehova i letem ol gudfala man long ol ten traeb blong Isrel blong oli stap olgeta nomo? Nogat. Elaejah i bin trenem Elisa blong plante yia. Mo tu, i gat ol “pikinini blong ol profet” we oli kasem trening. (2 King 2:7) Taswe, i gat plante gudfala man we oli naf blong givhan blong lidim ol man blong God. Jehova i gohed blong mekem stamba tingting blong hem i kamtru, mo i gohed blong lukaot gud long ol man we oli wosipim hem.

13. ?Olsem wanem Hibru 13:5b i leftemap tingting blong yumi? (Mo tu, yu luk pija.)

¹³ Folem ol eksampol ya, ?yu ting se wanem  bambae i hapen taem laswan haf blong ol tabu Kristin oli go long heven? Yumi no nid blong wari. Baebol i talemaot wan trutok we i leftemap tingting i se: Jehova bambae i neva livim ol man blong hem we oli stap long wol. (Ridim Hibru 13:5b.) Olsem Moses mo Elaejah, smol grup blong ol tabu Kristin we oli stap lidim yumi tede, oli kasemsave se i impoten blong trenem ol narafala. Blong plante yia finis, Hed Kampani i stap trenem ol brata long grup blong ol narafala sipsip blong oli lidim ol man blong Jehova. Eksampol, oli oganaesem plante skul blong trenem ol elda, ol eria elda, ol memba blong Branj Komiti, ol ovasia long Betel mo plante moa. Mo tu, Hed kampani i trenem ol helpa blong ol defdefren komiti blong Hed Kampani. Naoia ol helpa ya oli stap mekem plante bigfala wok long oganaesesen. Mo oli reregud blong gohed blong mekem wok ya blong lukaot long ol sipsip blong Kraes.

14. ?Wanem stamba poen blong stadi ya?

¹⁴ Hemia stamba poen blong stadi ya: Taem lashaf blong ol tabu Kristin oli go long heven klosap long en blong bigfala trabol, tru wosip bambae i gohed nomo long wol. Mo from samting ya, yumi wantem talem bigfala tangkiu long lida blong yumi Jisas Kraes. I tru, long taem ya wan grup blong ol nesen we Baebol i singaot se, Gog blong Magog, bambae i atakem ol man blong God. (Esik. 38:​18-20) Be hemia blong smol taem nomo, mo bambae oli no save stopem wosip blong yumi long Jehova. !I sua se Jehova bambae i sevem yumi! Long wan vison, aposol Jon i luk wan “bigfala hip blong ol man,” we hemia ol narafala sipsip blong Kraes. Jon i talem se “bigfala hip blong ol man” ya oli “pastru long bigfala trabol.” (Rev. 7:​9, 14) !So yumi sua se Jehova bambae i sevem yumi!

15-16. Folem Revelesen 17:​14, ?ol tabu Kristin bambae oli mekem wanem long faet blong Amagedon, mo from wanem hemia i leftemap tingting?

¹⁵ Maet sam man oli wantem save se: ‘?Ol tabu Kristin bambae oli mekem wanem taem oli go long heven?’ Baebol i givim klia ansa blong kwestin ya. Hem i talemaot se, ol gavman blong wol ya bambae oli “faet wetem Smol Sipsip.” Be i sua se bambae oli lus. Yumi  ridim se: ‘Smol Sipsip ya bambae i winim olgeta.’ ?Mo hu bambae i halpem hem? Vas ya i givim ansa se, hemia olgeta we God i “singaot” olgeta, i “jusumaot” olgeta, mo we oli “holemstrong” long hem. (Ridim Revelesen 17:14.) ?Hu ya olgeta ya? !Hemia ol tabu Kristin we oli laef bakegen! So taem laswan haf blong ol tabu Kristin we oli stap long wol oli go long heven klosap long en blong bigfala trabol, faswan wok blong olgeta hemia blong faet. !Hemia wan nambawan wok! Sam long ol tabu Kristin oli bin joen long ol faet bifo we oli kam ol Witnes blong Jehova. Samfala oli bin joen long ami. Be biaen, oli kam ol tru Kristin mo oli lanem blong mekem pis wetem narafala. (Gal. 5:22; 2 Tes. 3:16) Oli stop blong sapotem ol wo. Nating se i olsem, afta we oli go long heven bambae oli joen wetem Kraes mo ol tabu enjel blong hem, blong faet long laswan faet agensem ol enemi blong God.

¹⁶ !Traem tingbaot! Long wol, sam tabu Kristin oli olfala mo oli no strong. Be taem oli laef bakegen mo oli go long heven, bambae oli kam ol strongfala spirit man we oli no save ded samtaem, mo we bambae oli joenem King blong olgeta Jisas Kraes blong faet. Afta long faet blong Amagedon, bambae olgeta oli wok wetem Jisas blong halpem ol man blong oli kam stret gud olgeta. I sua se long heven bambae oli naf blong mekem plante moa samting, blong givhan long ol Kristin brata mo sista blong olgeta, i bitim taem ya we oli bin stap long wol olsem ol sinman.

17. ?Olsem wanem yumi save se olgeta gudfala man blong God bambae oli sef long taem blong faet blong Amagedon?

¹⁷ ?Yu yu stap long grup blong ol narafala sipsip? Sipos yes, ?bambae yu mekem wanem taem impoten faet blong Amagedon i stat? Yu mas trastem Jehova, mo folem ol advaes blong hem. ?Yu mekem samting ya olsem wanem? Baebol i talem se: “Yufala i go insaed long ol rum blong yufala we i stap insaed olgeta, mo yufala i stap insaed, yufala i satem doa. Yufala i haed smoltaem gogo kasem we kros blong God i godaon.” (Aes. 26:20) Olgeta gudfala man blong God long heven mo long wol, bambae oli sef long taem ya. Olsem aposol Pol, yumi sua se i no gat “ol gavman, ol samting we oli stap naoia, ol samting we bambae oli kam . . . we i save tekemaot yumi long lav ya blong God.” (Rom 8:​38, 39) I gud yu tingbaot oltaem se, !Jehova i lavem yu, mo bambae i neva livim yu yu stap yu wan!