1-2. ?Wanem i impoten long Jehova? ?Mo hem i wantem se yumi mekem wanem?

 FASIN we yumi mekem long ol narafala i impoten tumas long Jehova. Jisas i talem se yumi mas lavem ol neba blong yumi olsem we yumi lavem yumi wan. (Mat. 22:​37-39) Hemia i min se yumi mas kaen tu long ol man we oli no gat sem bilif olsem yumi. Sipos yumi mekem olsem, yumi stap folem fasin blong Jehova God, we hem i “mekem san blong hem i saen long ol rabis man mo ol gudfala man, mo hem i mekem ren i foldaon long ol stret man mo ol man we oli no stret.”—Mat. 5:45.

² Nating se Jehova i lavem evri man, be hem i lavem moa olgeta we oli stap mekem ol samting we i stret. (Jon 14:21) Hem i wantem se yumi folem fasin blong hem. Taswe hem i askem yumi blong soemaot long ol brata mo sista se yumi ‘lavem’ olgeta, mo “lav ya i mas strong gud.” (Rom 12:10; 1 Pita 4:8) Lav ya, hemia sem lav we yumi gat long ol famle mo ol besfren blong yumi.

3. ?Yumi mas tingbaot wanem long saed blong lav?

³ Sipos yumi wantem se wan flaoa i gru gud mo i kam strong, yumi mas traehad blong lukaot gud long hem. Long sem fasin, sipos yumi wantem se lav we yumi gat long ol brata mo sista i gru mo i kam strong, yumi mas traehad blong soemaot lav ya oltaem. Aposol Pol i talem long ol Kristin se: “Yufala i mas gohed blong lavlavem yufala, olsem we yufala i brata nomo.” (Hib. 13:1) Jehova i wantem se yumi gohed blong mekem lav we yumi gat long ol narafala i kam strong. Taswe long stadi ya, bambae yumi tokbaot from wanem yumi mas kam klosap moa  long ol brata mo sista, mo olsem wanem yumi save gohed blong mekem olsem.

?FROM WANEM YUMI MAS KAM KLOSAP MOA LONG OL BRATA MO SISTA?

4. Folem Ol Sam 133:​1, ?olsem wanem yumi save gohed blong tinghae long ol brata mo sista? (Mo tu, yu luk ol pija.)

⁴ Ridim Ol Sam 133:1. I sua se yumi agri wetem ol tok we man blong raetem sam i talem, i se “i gud tumas mo i naes tumas” blong gat ol tru fren we oli lavem Jehova. Be taem yumi stap luk ol semfala brata mo sista plante taem long wan wik, samtaem yumi ting nating long blesing we yumi gat blong joen gud wetem olgeta. Hemia i sem mak long wan man we evri dei i stap lukluk wan bigfala tri, be i no luksave se tri ya i naes tumas. Taswe, ?olsem wanem yumi save gohed blong tinghae long ol brata mo sista? Yumi save lavem moa ol brata mo sista, sipos yumi tekem taem blong tingbaot ol gudfala fasin blong olgeta we i mekem se yumi mo kongregesen i tinghae long olgeta from.

5. Taem ol narafala oli luk se yumi lavlavem yumi, ?hemia i givhan long olgeta olsem wanem?

⁵ Sam man we fastaem blong olgeta blong kam long wan miting, oli sapraes taem oli luk se yumi lavlavem yumi. Mo hemia nomo i mekem oli luksave se oli faenem trutok. Jisas i talem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) Traem tingbaot ekspiriens blong Chaithra, wan studen long yunivesiti we i stadi wetem ol Witnes blong Jehova. Hem i agri blong kam long wan bigfala asembli, mo afta long faswan dei, hem i  talem long Baebol tija blong hem se: “Perens blong mi oli neva hagem mi blong soemaot se oli lavem mi. !Be long asembli blong yufala, i gat 52 man we oli hagem mi long wan dei nomo! Hemia i mekem mi haremsave se Jehova i lavem mi. Mi wantem kam pat blong famle blong hem.” Chaithra i gohed gud long stadi blong hem mo i baptaes long 2024. Yes, taem ol niuwan oli luk ol gudfala wok blong yumi mo oli luk se yumi lavlavem yumi, plante taem hemia i pulum olgeta blong wantem wosipim Jehova.—Mat. 5:16.

6. Taem yumi kam klosap moa long ol brata mo sista, ?hemia i protektem yumi olsem wanem?

⁶ Taem yumi kam klosap moa long ol brata mo sista, hemia i save protektem yumi. Pol i talem long ol Kristin se: “Yufala i mas gohed blong leftemap tingting blong yufala evri dei, blong mekem se sin we i gat paoa blong trikim man, i no mekem wan long yufala i kam stronghed.” (Hib. 3:13) Sipos tingting blong yumi i foldaon, nao yumi stat blong gowe long stret rod, Jehova i save yusum wan brata o sista blong givhan long yumi. (Sam 73:​2, 17, 23) Mo taem oli givhan long yumi olsem, hemia i gud tumas.

7. ?From wanem yumi talem se lav i mekem yumi joen gud? (Kolosi 3:​13, 14)

⁷ Yumi joen long wan grup blong ol man we oli traehad blong lavlavem olgeta, taswe yumi kasem plante blesing. (1 Jon 4:11) Eksampol, lav i pulum yumi blong yumi ‘no hariap blong kros,’ mo hemia i mekem se yumi joen gud. (Ridim Kolosi 3:​13, 14; Efes. 4:​2-6) Taswe yumi harem gud blong joen wanples long ol miting blong yumi, mo i no gat wan narafala grup long wol we i save joen gud olsem.

YUMI MAS ONA LONG YUMI

8. ?Olsem wanem Jehova i stap halpem yumi blong joen gud?

⁸ Fasin ya we yumi joen gud wetem ol brata mo sista raon long wol, hem i wan merikel. Jehova nomo i save mekem se yumi ol sinman i joen gud olsem. (1 Kor. 12:25) Baebol i talem se: “God i tijim yufala finis, se yufala i mas lavlavem yufala.” (1 Tes. 4:9) Hemia i min se Jehova i yusum Baebol blong talem stret samting we yumi mas mekem blong kam klosap moa long ol brata mo sista. Taem yumi stadi gud long ol tijing blong Jehova mo yumi folem long laef blong yumi, i olsem we ‘God i stap tijim yumi.’ (Hib. 4:12; Jem. 1:25) Mo hemia nao samting we ol Witnes blong Jehova oli stap traehad blong mekem.

9. ?Yumi lanem wanem long Rom 12:​9-13?

⁹ ?Baebol i talem se yumi mas mekem wanem blong kam klosap moa long ol brata mo sista? Traem tingbaot tok we Pol i talem long Rom 12:​9-13. (Ridim.) Long vas ya, hem i talem se: “Oltaem yufala wanwan i mas faswan blong ona long yufala.” ?Hemia i minim wanem? I min se yumi mas faswan blong soemaot se yumi lavem ol narafala. Yumi mekem olsem taem yumi fogivim olgeta, welkamem olgeta, glad blong givim samting long olgeta, mo mekem sam narafala samting tu. (Efes. 4:32) Yu no nid blong wet se wan brata o sista i kam klosap long yu. Yu mas “faswan” blong mekem olsem. Jisas i talem se: “Man i harem gud moa taem hem i givim samting, i bitim we hem i kasem samting.”—Wok 20:35.

10. ?Wan man we i wok had, i soemaot olsem wanem se hem i “ona” long narafala? (Mo tu, yu luk pija.)

¹⁰ Stret afta we Pol i talem se yumi mas faswan blong ona long narafala, hem i talem se yumi mas ‘wok had, mo yumi no mas les.’ Wan man we i wok had, hem i gat strong tingting mo i wok strong. Taem hem i kasem wan wok, hem i mekem gud wok ya. Ol Proveb 3:​27, 28 i talem se: “I nogud yu holembak gudfala samting we yu sud givim long man we i nidim. Sipos  yu naf blong givhan, i gud yu mekem.” Folem vas ya, sipos yumi luk se wan man i gat nid, yumi mas go kwiktaem blong givhan long hem. Be i nogud yumi wet, mo gat tingting ya se wan narafala bambae i givhan long hem.—1 Jon 3:​17, 18.

11. ?Wanem i save halpem yumi blong kam klosap moa long ol brata mo sista?

¹¹ Wan narafala rod blong soemaot se yumi ona long ol narafala, hemia taem yumi kwik blong fogivim olgeta taem oli mekem yumi harem nogud. Efesas 4:26 i talem se: “Yufala i no mas stap kros gogo kasem we san i godaon.” ?From wanem? Vas 27 i talem se sipos yumi holemtaet kros, yumi stap “givim janis long Devel.” Long Baebol, Jehova i talem bakegen mo bakegen long yumi se yumi mas fogivim narafala. Kolosi 3:13 i leftemap tingting blong yumi se yumi mas “glad blong fofogivim” yumi. Wan long ol beswan rod blong kam klosap moa long ol brata mo sista, hemia blong fogivim olgeta. Taem yumi mekem olsem, yumi stap ‘holemtaet fasin ya we yumi wan nomo long spirit, we pis i mekem se yumi joen gud.’ (Efes. 4:3) Yes, taem yumi fogivim narafala, yumi mekem se i gat pis mo yumi joen gud.

12. ?Olsem wanem Jehova i halpem yumi blong fogivim narafala?

¹² I tru, maet yumi faenem i had blong fogivim olgeta we oli mekem yumi harem nogud. Be wetem help blong tabu spirit blong Jehova, yumi save fogivim olgeta. Afta we Pol i talem se yumi mas ‘lavlavem yumi’ mo yumi mas “wok had,” hem i talem se: “Yufala i mas letem tabu spirit i mekem se yufala i wok olsem we faea i laet.” Wan man we i “wok olsem we faea i laet,” tabu spirit nao i givhan long hem blong i gat strong tingting mo i wantem tumas blong wok. (Rom 12:11) Taswe tabu spirit blong God i save halpem yumi blong soemaot lav mo fogivim narafala. From samting ya, i gud yumi askem Jehova blong i halpem yumi.—Luk 11:13.

“YUFALA I NO MAS SERAOT”

13. ?Wanem i save mekem se yumi seraot?

¹³ Long kongregesen, i gat “ol defdefren kaen man” we oli kamaot long ol defdefren kalja. (1 Tim. 2:​3, 4) From samting ya, yumi  wanwan i save mekem ol defdefren desisen long ol samting olsem, klos mo hea, ol samting we yumi mekem blong spel mo pleplei, mo blong lukaot gud long helt blong yumi. Sipos yumi no lukaot gud, ol samting ya oli save mekem se yumi seraot. (Rom 14:4; 1 Kor. 1:10) From we ‘God i tijim yumi finis se yumi mas lavlavem yumi,’ yumi mas lukaot gud blong no gat tingting ya se ol samting we yumi jusum, oli gud moa i bitim ol samting we ol narafala oli jusum.—Fil. 2:3.

14. ?Yumi mas traehad oltaem blong mekem wanem, mo from wanem?

¹⁴ Sipos oltaem yumi traehad blong leftemap tingting blong ol narafala mo mekem oli harem gud, bambae yumi joen gud, yumi no seraot. (1 Tes. 5:11) Long ol manis we i pas, i gat plante brata mo sista we oli slak long saed blong spirit mo olgeta we kongregesen i putumaot olgeta, oli kambak long kongregesen. !Yumi glad tumas blong welkamem olgeta! (2 Kor. 2:8) Makem samting we i hapen long wan sista, we blong ten yia hem i no moa kam long Haos Kingdom. Taem hem i kambak, hem i talem se: “Evriwan oli smael long mi mo oli kam sekhan long mi.” (Wok 3:19) ?Hemia i mekem hem i harem olsem wanem? Hem i talem se: “Mi harem olsem se Jehova i tekem mi mi kambak, blong mi save glad bakegen.” Sipos yumi traehad blong leftemap tingting blong ol narafala, Kraes i save yusum yumi blong mekem olgeta we ‘oli stap hadwok tumas mo oli stap karem ol hevi samting,’ oli harem gud.—Mat. 11:​28, 29.

15. ?Wanem narafala samting we yumi save mekem blong yumi joen gud? (Mo tu, yu luk pija.)

 ¹⁵ Wan narafala samting we yumi save mekem blong yumi joen gud, hemia taem yumi lukaot gud long ol toktok blong yumi. Job 12:11 i talem se: “?Yu no ting se sora i save skelem ol toktok olsem we tang i save testem kakae?” Wan man we i save kuk gud, oltaem bambae hem i testem kakae we hem i kukum fastaem, bifo we hem i givim long ol narafala. Long sem fasin, yumi tu yumi mas tingting gud long ol toktok blong yumi, bifo we yumi talem long narafala. (Sam 141:3) Yumi wantem se oltaem samting we yumi talem i leftemap tingting blong ol man, i mekem oli harem gud, mo i “givhan long ol man we oli harem.”—Efes. 4:29.

16. ?Hu i mas traehad moa blong talem ol gudfala tok blong leftemap tingting blong narafala?

¹⁶ Ol hasban mo ol perens nao oli mas traehad moa blong talem ol gudfala tok we i leftemap tingting. (Kol. 3:​19, 21; Taet. 2:4) Ol elda tu we oli stap lukaot long ol sipsip blong Jehova, oli mas talem ol gudfala tok long ol narafala blong mekem oli harem gud. (Aes. 32:​1, 2; Gal. 6:1) Baebol i talem se: “Tok we man i talem long stret taem, !I gud tumas!”—Prov. 15:23.

LAV “I MAS KAMAOT LONG OL WOK BLONG YUMI” MO “I MAS TRU”

17. ?Olsem wanem blong gat lav ya we i tru?

¹⁷ Aposol Jon i talem se: “Lav blong yumi i no mas kamaot long toktok o long maot nomo, be i mas kamaot long ol wok blong yumi tu, mo i mas tru.” (1 Jon 3:18) Yumi wantem se lav we yumi gat long ol brata mo sista i mas kamaot long hat. ?Olsem wanem blong gat lav ya we i tru? Taem yumi spenem plante taem wetem ol brata mo sista, yumi kam klosap moa long olgeta, mo yumi lavem olgeta moa. Taswe, i gud yumi spenem taem wetem ol narafala long ol miting mo long wok blong prij. Mo i gud yumi tekem taem tu blong visitim olgeta. Sipos yumi mekem olsem, yumi stap soemaot se ‘God i tijim yumi finis se yumi mas lavlavem yumi.’ (1 Tes. 4:9) Mo bambae yumi luksave se “i gud tumas mo i naes tumas, taem ol brata oli stap wanples we oli joen gud.”—Sam 133:1.