1-2. (1) ?Yumi mas mekem wanem blong fren gud wetem wan man? (2) ?Bambae yumi tokbaot wanem long stadi ya?

 ?YU YU gat wan besfren? ?Yu mekem wanem blong yutufala i save fren gud? Maet yu spenem taem wetem hem, yu kasem save ol hadtaem we hem i stap fesem, mo ol samting we hem i laekem mo i no laekem. Yu luk se hem i gat sam gudfala fasin we yu wantem folem. From samting ya, yu lavem hem.

² Blong fren gud wetem wan man, yu mas traehad blong spenem plante taem wetem hem. Mo hemia i sem mak sipos yu wantem fren gud wetem Jehova God. Long stadi ya, bambae yumi tokbaot olsem wanem yumi save kam klosap moa long God, mo luk gudfala frut we i save kamaot taem yumi mekem olsem. Fastaem, bambae yumi tokbaot from wanem i gud blong kam klosap long Besfren blong yumi, Jehova.

3. ?From wanem i gud yumi tingting dip long ol gudfala samting we i save kamaot taem yumi kam klosap long Jehova? Talem wan pijatok.

³ Ating yu agri se i gud tumas blong kam klosap long Jehova. Be taem yumi tingting dip moa long samting ya, hemia bambae i pulum yumi blong wantem gohed blong kam klosap moa long hem. (Sam 63:​6-8) Eksampol, yumi save se taem yumi kakae ol gudfala kakae, yumi mekem eksasaes, yumi slip gud, mo yumi dring plante wota, hemia bambae i mekem i gud long yumi. Be plante man oli no tinghevi long ol samting ya, mo hemia i spolem helt blong olgeta. Sipos oltaem yu tingbaot se ol samting ya bambae oli givhan long helt blong yu, bambae yu wantem gohed blong mekem ol samting ya. Long sem fasin, maet yumi save se i gud blong kam klosap long Jehova. Be sipos yumi  tingting dip long ol gudfala samting we i save kamaot from, bambae yumi wantem gohed blong kam klosap moa long Fren blong yumi, Jehova.—Sam 119:​27-30.

4. ?Man we i raetem Ol Sam 73:28 i talem wanem?

⁴ Ridim Ol Sam 73:28. Man we i raetem Ol Sam 73, i wan Livaet we oli putumap hem blong i wok olsem wan man blong plei miusik long tempol blong Jehova, mo hem i holemstrong long Jehova blong plante yia. Be hem i save se i impoten blong tingbaot oltaem se ‘taem hem i kam klosap long God,’ hemia i mekem i gud long hem. Mo hem i wantem se ol narafala oli save se taem oli kam klosap long God, hemia bambae i mekem i gud long olgeta tu. ?From wanem i gud blong save gud Jehova mo fren gud wetem hem?

‘TAEM YUMI KAM KLOSAP LONG GOD,’ YUMI GLAD

5. (1) ?From wanem yumi glad taem yumi kam klosap moa long Jehova? (2) Folem Ol Proveb 2:​6-16, ?olsem wanem waes blong Jehova i givhan long yu mo i protektem yu?

⁵ Taem yumi kam klosap moa long Jehova, bambae yumi glad moa. (Sam 65:4) ?From wanem yumi talem olsem? Wan risen hemia se taem yumi folem ol advaes blong hem long Baebol, bambae yumi kam waes. Mo hemia bambae i protektem yumi long ol samting we i save spolem yumi, mo i blokem yumi blong no mekem ol bigfala sin. (Ridim Ol Proveb 2:​6-16.) Taswe Baebol i talem se: “Man we i faenem waes mo man we i kasem fasin luksave, hem i glad.”—Prov. 3:13.

6. ?From wanem man blong raetem sam i no moa glad?

⁶ I tru, samtaem ol fren blong Jehova oli harem nogud. Man blong raetem Ol Sam 73 i no moa glad from we hem i stat blong gat ol nogud tingting. Hem i stat blong kam kros mo jalus long ol man nogud from we i luk olsem se oli gat wan gudfala laef, nating se oli no stap obei long God. Hem i ting se ol man we oli laekem faet mo oli praod, oltaem oli gat plante samting, oli gat gudfala helt, mo oli no stap safa. (Sam 73:​3-7, 12) Tingting blong hem i trabol tumas from samting ya, nao hem i harem olsem se i blong nating nomo we hem i mekem wok blong Jehova. Ale, hem i talem se: “I blong nating nomo we mi gohed blong gat wan hat we i klin, mo mi wasem han blong mi blong soemaot se mi mi no gat fol.”—Sam 73:13.

7. Sipos yumi harem nogud, ?wanem i save givhan long yumi blong glad bakegen? (Mo tu, yu luk pija.)

⁷ Nating se man blong raetem sam ya i harem nogud, be hem i mekem wan samting blong stretem tingting blong hem. Hem i “go insaed long tabu ples ya blong God,” nao long ples ya, Jehova i mekem se hem i gat stret tingting bakegen. (Sam 73:​17-19) Taem yumi harem nogud, Jehova we hem i Besfren blong yumi, hem i save samting ya. Sipos yumi prea long hem blong i lidim yumi, mo yumi akseptem help we hem i givim tru long Tok blong hem mo kongregesen, bambae yumi kasembak paoa, nao yumi naf blong stanap strong. Nating sipos yumi wari bitim mak, be Jehova bambae i mekem yumi harem gud bakegen.—Sam 94:19. a

‘TAEM YUMI KAM KLOSAP LONG GOD,’ YUMI SAVE GAT WAN GUDFALA LAEF NAOIA MO WAN HOP BLONG FIUJA

8. Taem yumi kam klosap long God, ?hemia i mekem i gud long yumi olsem wanem?

⁸ Taem yumi kam klosap long God, hemia i mekem i gud long yumi long tu narafala rod. Faswan, bambae yumi save gat wan gudfala laef naoia. Mo nambatu, yumi save gat wan gudfala hop blong fiuja. (Jer. 29:11) Naoia i gud yumi tokbaot moa tufala samting ya.

9. Taem yumi kam klosap long Jehova, ?hemia i mekem se laef blong yumi i olsem wanem?

 ⁹ Taem yumi kam klosap long Jehova, yumi save gat wan gudfala laef naoia. Plante man tede we oli gat tingting ya se i no gat wan God, oli ting se laef i no gat mining mo se long fiuja bambae i no moa gat man i laef long wol. Be yumi we yumi stadi long Tok blong God, yumi sua se “God i stap, mo we hem bambae i givim pei long ol man we oli stap traehad blong faenem hem.” (Hib. 11:6) Mo tu, Jehova i wokem yumi wetem filing ya we yumi wantem wosipim hem. Taswe taem yumi wosipim Jehova, bambae yumi glad moa long laef blong yumi.—Dut. 10:​12, 13.

10. Folem Ol Sam 37:​29, ?Jehova i mekem wanem promes long olgeta we oli trastem hem?

¹⁰ Plante man oli no gat wan hop blong fiuja. Taswe oli tingbaot nomo blong wok, mared, gat pikinini, mo rere from taem ya we bambae oli kam olfala, be oli no tingbaot God nating. Be ol man blong Jehova oli defren, oli putum hop blong olgeta long Jehova. (Sam 25:​3-5; 1 Tim. 6:17) Yumi trastem God ya we i Fren blong yumi, mo ol promes blong hem. Yumi gat plante gudfala samting we yumi stap wet blong luk i kamtru, olsem taem ya we bambae yumi save wosipim Jehova olwe long Paradaes.—Ridim Ol Sam 37:29.

11. Taem yumi kam klosap long God, ?hemia i mekem i gud long yumi olsem wanem? ?Mo yumi mekem Jehova i harem olsem wanem?

¹¹ Taem yumi kam klosap long God, hemia i mekem i gud long yumi long plante narafala rod. Eksampol, Jehova i promes blong fogivim sin blong olgeta we oli tanem tingting blong olgeta mo kam klosap long hem. (Aes. 1:18) From samting ya, yumi no nid blong gohed blong harem nogud from ol sin we yumi bin mekem bifo. (Sam 32:​1-5) Mo yumi harem gud taem yumi mekem Jehova i glad. (Prov. 23:15) Yes, i gat plante narafala gudfala samting tu we yumi save harem gud long hem, from we yumi fren gud wetem Jehova. ?Be olsem wanem yu save gohed blong kam klosap moa long God?

?OLSEM WANEM YUMI SAVE GOHED BLONG “KAM KLOSAP LONG GOD”?

12. ?Yu mekem wanem finis blong kam klosap long God?

¹² Sipos yu wan Kristin we i baptaes finis, yu bin mekem plante samting finis blong yu save kam klosap long Jehova. Yu lanem plante trutok long saed blong Jehova God mo Jisas Kraes, yu tanem tingting from ol sin blong yu, yu soemaot se yu gat strong bilif long God, mo yu mekem bes blong yu blong obei long hem. Be blong kam klosap moa long God, yumi mas gohed blong mekem ol samting ya.—Kol. 2:6.

13. ?Wanem ol trifala samting we yumi mas mekem blong gohed blong kam klosap moa long Jehova?

¹³ ?Wanem bambae i halpem yumi blong gohed blong kam klosap moa long Jehova? (1) Yumi mas gohed blong ridim mo stadi Baebol. Mo mak blong yumi i no blong lanem nomo ol stamba tijing long saed blong God, be yumi mas traehad blong kasemsave samting we God i wantem yumi blong mekem, mo folem long laef blong yumi. (Efes. 5:​15-17) (2) Yumi mas mekem bilif blong yumi i strong, taem yumi tingting dip long ol pruf we i soemaot se Jehova i lavem yumi. (3) Yumi mas gohed blong agensem ol samting we Jehova i no laekem, mo stap longwe long ol man we oli stap mekem ol samting ya.—Sam 1:1; 101:3.

14. Folem 1 Korin 10:​31, ?wanem sam samting we yumi save mekem evri dei blong mekem Jehova i glad? (Mo tu, yu luk ol pija.)

¹⁴ Ridim 1 Korin 10:31. I impoten we oltaem yumi mekem samting we Jehova i glad long hem. Hemia i no jes minim nomo se yumi go long ol miting mo wok blong prij. Be yumi mekem olsem long evri samting we yumi mekem long laef blong yumi evri dei. Eksampol, taem yumi tok tru long olgeta samting, mo  yumi serem ol samting we yumi gat long ol narafala, yumi mekem Jehova i glad. (2 Kor. 8:21; 9:7) Mo tu, Jehova i wantem se yumi tinghae long presen ya we i hem i givim long yumi, hemia laef. Yumi kam klosap moa long Man ya we i givim laef long yumi, taem yumi lukaot gud long fasin blong yumi blong kakae mo dring, mo long ol narafala samting we yumi mekem blong lukaot gud long helt blong yumi. Taem Jehova i luk we yumi stap traehad blong mekem hem i glad long evri samting we yumi mekem, bambae hem i lavem yumi moa.—Luk 16:10.

15. ?Jehova i wantem se yumi mekem wanem long olgeta man?

¹⁵ Jehova i kaen long ol gudfala man mo ol rabis man tu. (Mat. 5:45) Taswe hem i wantem se yumi tu, yumi kaen long olgeta man. Eksampol, ‘yumi no mas tok nogud long ol narafala, yumi no mas man blong rao, mo taem yumi stap wetem ol narafala yumi mas gat kwaet fasin.’ (Taet. 3:2) From samting ya, yumi no daonem ol narafala we oli no gat sem bilif olsem yumi. (2 Tim. 2:​23-25) Taem yumi kaen long olgeta man, yumi kam klosap moa long Jehova.

YUMI SAVE “KAM KLOSAP LONG GOD,” NATING SE YUMI MEKEM SAM MASTIK

16. Nating se man we i raetem Ol Sam 73 i wosipim Jehova longtaem finis, ?be hem i stat blong gat wanem tingting?

¹⁶ ?Olsem wanem sipos samtaem yu harem se Jehova i no moa lavem yu from yu mekem sam mastik? Olsem we yumi tokbaot finis, hemia nao samting we i hapen long man we i raetem Ol Sam 73. Hem i talem se: “Klosap leg blong mi i gowe long stret rod, taem mi stap wokbaot, klosap nomo mi glis.” (Sam 73:2) Mo tu, hem i talem se hat blong hem i “kam nogud,” hem i “no tingting gud,” mo long fes blong Jehova,  hem i “olsem wan wael animol we i no gat tingting.” (Sam 73:​21, 22) ?Be olsem wanem? ?Hem i harem se Jehova i no moa lavem hem from ol mastik we hem i mekem?

17. (1) Taem man blong raetem sam i harem nogud bitim mak, ?hem i mekem wanem? (2) ?Yumi save lanem wanem long eksampol blong hem? (Mo tu, yu luk ol pija.)

¹⁷ Nating sipos man blong raetem sam ya i harem olsem se Jehova i no lavem hem, be hemia i blong smoltaem nomo. Taem hem i harem nogud bitim mak, hem i luksave se hem i mas kam klosap moa long God. Taswe hem i talem se: “Be naoia mi stap wetem yu [Jehova] oltaem, yu yu holem raethan blong mi finis. Yu stap lidim mi wetem ol advaes blong yu, mo biaen bambae yu lidim mi mi go long glori.” (Sam 73:​23, 24) Yumi tu, taem yumi harem nogud o tingting i foldaon, yumi mas lukluk i go long Jehova we hem i olsem bigfala ston blong yumi. (Sam 73:26; 94:18) Nating sipos yumi gowe smoltaem long stret rod, be yumi save kambak long Jehova we yumi sua se hem i “rere blong fogif.” (Sam 86:5) Yumi mas kam klosap moa long Jehova, speseli taem yumi harem nogud bitim mak.—Sam 103:​13, 14.

“KAM KLOSAP LONG GOD” OLWE

18. ?From wanem yumi save gohed blong kam klosap long Jehova olwe?

¹⁸ Yumi save gohed blong kam klosap long Jehova blong olwe. Bambae yumi neva stop blong kasemsave moa long Jehova. Baebol i talem se “man i no naf blong kasem save” fulwan long ol rod blong Jehova, waes blong hem, mo save blong hem.—Rom 11:33.

19. ?Ol vas long Ol Sam i mekem yumi sua long wanem?

¹⁹ Ol Sam 79:13 i talem se: “Mifala ol man blong yu mo ol sipsip blong graon blong yu, bambae mifala i talem tangkiu long yu olwe. Mo bambae mifala i presem yu long ol jeneresen we i kam.” Sipos yu gohed blong kam klosap long God, yu tu yu save sua se bambae yu kasem blesing olwe, mo bambae yu save talem se: “God i olsem bigfala ston blong hat blong mi, mo i olsem haf blong olting blong mi olwe.”—Sam 73:26.