Wantaem, taem Jisas i stap long Siria we i wan provins blong Rom, wan woman Gris i kam askem help long hem. Taem Jisas i ansa long woman ya, hem i yusum wan pijatok blong “ol smol dog” we i stret long ol man we oli no man Jiu. Folem Loa blong Moses, ol dog oli ol anamol we oli no klin. (Levitikas 11:27) ?Olsem wanem? ?Jisas i wantem tok nogud long woman ya mo ol man we oli no man Jiu?

Nogat. Olsem Jisas i bin talem long ol disaepol blong hem, mak blong hem long taem ya, hemia blong givhan long ol man Jiu fastaem. Taswe hem i wantem mekem tingting ya i klia long woman ya, taem hem i talem long hem se: “I no stret blong man i tekem ol kakae blong pikinini blong hem, i sakem long ol dog.” (Matiu 15:21-26; Mak 7:26) Be ol man Gris mo Rom oli laekem ol dog, oli letem ol dog oli slip long haos blong olgeta, mo oli pleplei wetem ol pikinini. So, taem Jisas i tokbaot pijatok blong “ol smol dog” long woman ya, maet woman ya i stap tingbaot se dog i wan gudfala anamol. Taswe, hemia nao from wanem hem i talem long Jisas se: “Yes Masta, be ol smol dog oli save kakae ol doti blong bred we oli foldaon aninit long tebol blong masta blong olgeta.” Jisas i talem gudfala toktok long woman ya, from we hem i gat strong bilif mo i mekem gel blong hem i kam gud bakegen.—Matiu 15:27, 28.

Sip we Pol i stap long hem blong go long Itali, i stap fesem wan strong win. Ale taem oli stop smol, Pol i givim advaes se bae oli no mas aot. (Ol Wok 27:9-12) ?Olsem wanem? ?Advaes blong Pol i stret?

Ol man blong sip bifo, oli savegud se long ol manis blong koltaem, i no sef blong sip i pas long solwota blong Mediteranian, from we win i strong tumas long ples ya. Long 15 Novemba kasem 15 Maj, oli blokem ol sip blong oli no aot nating. Be, trip we Pol i tokbaot, hem i long manis Septemba o Oktoba. ?So advaes blong Pol i stret? Long buk ya Epitome of Military Science, man Rom ya Vegetius (yia fo handred K.T.) i tokbaot solwota se: “Sam manis i sef blong travel, sam manis i denja blong travel, mo i gat sam manis we sip i no mas aot nating.” Vegetius i talem se i sef blong travel long solwota stat long 27 Mei kasem 14 Septemba. Be tufala manis we i denja blong travel hem i 15 Septemba kasem 11 Novemba mo 11 Maj kasem 26 Mei. Pol i travel oltaem long sip, taswe hem i savegud ol samting ya. Kapten blong sip mo ona blong sip i mas save samting ya tu, be tufala i no wantem harem advaes blong Pol. Samting we i hapen se, sip ya i rek.—Ol Wok 27:13-44.