WAN SAED LEG BLONG LUSIA I NOGUD. Taem Lusia i smol, hem i kasem strong sik ya polio, we i save pas i go long narafala man, mo i spolem ol nev long bodi. Taem hem i gat 16 yia, wan woman i talem se: “God i panisim yu ya, from we yu tok nogud long mama blong yu mo yu no obei long hem.” Ol yia oli pas, be Lusia i tingbaot yet filing we hem i gat long taem ya.

TAEM DAMARIS I FAENEMAOT SE HEM I GAT KANSA LONG BREN, papa blong hem i askem se: “?From wanem yu kasem sik ya? Ating yu mekem wan nogud samting, nao God i stap panisim yu.” Damaris i harem nogud tumas.

Longtaem bifo finis, ol man oli gat tingting ya. Wan buk (Manners and Customs of Bible Lands) i talem se plante man long taem blong Jisas oli bilif se “taem wan man i sik, hem i stap kasem panis from sin blong hem o sin blong wan famle blong hem.” Wan narafala buk (Medieval Medicine and the Plague) i talem se long ol yia 500 kasem 1500, “sam man oli bilif se God nao i mekem olgeta oli sik blong panisim olgeta from sin blong olgeta.” Long Yurop long ol yia 1300 kasem 1400, plante man oli ded from wan bigfala sik. ?Olsem wanem? ?God i stap panisim olgeta? Ol dokta oli faenemaot se sik ya i kamaot from wan smol bebet nomo. Be maet samfala oli wantem save yet se: ?God i stap mekem mi mi sik from ol sin blong mi? *

TINGBAOT: Sipos God i stap mekem ol man oli sik mo oli safa, ?from wanem Jisas we i pikinini blong Hem, i mekem ol sikman oli kam gud bakegen? ?Jisas i agensem stret fasin blong God? (Matiu 4:23, 24) Jisas i no save agensem wan samting we God i mekem. Hem i talem se: “Oltaem mi mekem ol samting we hem i glad long hem,” mo “mi mas mekem ol samting we Papa i talem long mi.”—Jon 8:29; 14:31.

Baebol i talem klia se: “Oltaem God i stap mekem ol samting we i stret.” (Dutronome 32:4) Traem tingbaot: ?God i save mekem wan plen i kras mo kilim i ded plante handred gudfala man, sipos hem i wantem panisim wan man nomo long plen ya? !Nogat! Ebraham, wan man blong God, i talem se, God bambae i neva ‘kilim ol man nogud wetem ol stret man tu. !Hemia i no fasin blong hem!’ (Jenesis 18:23, 25) Baebol i talem tu se: “!God ya, hem i no save mekem wan samting we i no stret!”—Job 34:10-12.

Taem yu safa, God i no stap panisim yu from wan sin blong yu. Jisas tu i soemaot samting ya taem hem wetem ol disaepol blong hem oli luk wan man we i blaen finis taem hem i bon. “Ol disaepol blong hem oli askem se: ‘Rabae, ?sin blong hu i mekem man ya i blaen taem hem i bon? ?Sin blong hem no sin blong papa mo mama blong hem? Jisas i ansa se: ‘I no from sin blong hem mo i no from sin blong papa mo mama blong hem. Be samting ya i kamaot blong ol man oli luk ol wok blong God.’”—Jon 9:1-3.

Ol man long taem ya oli gat rong tingting. Taswe ol disaepol oli mas sapraes taem Jisas i talem se i no sin blong man ya o sin blong papa mo mama blong hem we i mekem se hem i blaen. Taem Jisas i mekem blaen man ya i kam gud bakegen, hem i soemaot se i no stret blong bilif se wan man i safa  from we God i stap panisim hem. (Jon 9:6, 7) Olgeta we oli stap safa from wan rabis sik tede bambae oli harem gud blong save se God i no stamba blong trabol blong olgeta.

Baebol i promes se:

• “Ol samting nogud oli no save traem God mo tu God i no save yusum ol samting nogud blong traem ol man.” (JEMES 1:13) I no longtaem, “ol samting nogud” we oli stap spolem ol man plante yia finis olsem sik, harem nogud, mo ded, bambae oli lus.

• Jisas Kraes i “mekem olgeta sikman oli kam gud bakegen.” (MATIU 8:16) Taem Jisas i mekem olsem, hem i stap soemaot samting we Kingdom blong God bambae i mekem long fulwol long fiuja.

• “[God] bambae i ravemaot wota blong ae blong olgeta, mo bambae i no moa gat man i ded, mo bambae man i no moa krae from we hem i sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—REVELESEN 21:3-5.

?Be from wanem yumi stap harem nogud mo yumi safa? Ol man oli stap askem kwestin ya longtaem finis i kam. Sipos i no God we i stap mekem yumi safa, ?be hu nao i stap mekem samting ya? Bambae yumi tokbaot ansa blong kwestin ya long nekis pej.