1, 2. ?Wanem samting we i had long Jeftaha mo gel blong hem?

WAN gel i ron i go blong mitim papa blong hem we i winim faet mo i kambak sef. Hem i singsing mo i danis from we hem i glad we i glad. Be hem i sapraes long samting we papa blong hem i mekem mo i talem. Papa blong hem i terem klos blong hem mo i krae se: “!O, pikinini blong mi, yu yu mekem mi mi harem nogud tumas!” Nao hem i talem long gel ya se hem i mekem wan promes long Jehova. Promes ya bambae i mekem se gel ya i no save mared mo gat pikinini. Be kwiktaem nomo, gel ya i talem ol gudfala toktok long papa blong hem. Hem i talem se papa blong hem i mas holem promes we hem i mekem long Jehova. Ol tok blong gel ya i soemaot se hem i trastem Jehova. Hem i save se samting we Jehova i askem bambae i mekem i gud long hem. (Jajes 11:34-37) Taem papa blong hem i luk se hem i gat bilif, hem i glad tumas, from we hem i save se gel ya i mekem Jehova i glad.

 ² Jeftaha mo gel blong hem, tufala i trastem Jehova mo ol rod blong hem. Tufala i holemtaet bilif nating se i no isi. Tufala i wantem se Jehova i glad long tufala, mo tufala i rere blong lego evri samting blong mekem Jehova i glad.

3. ?Olsem wanem eksampol blong Jeftaha mo gel blong hem i givhan long yumi?

³ Samtaem i no isi blong holem strong bilif long Jehova. Yumi mas “faet strong blong holem trutok ya we yumi bilif long hem finis.” (Jud 3) Blong givhan long yumi, bambae yumi tokbaot olsem wanem Jeftaha mo gel blong hem tufala i winim ol samting we i had long tufala. ?Tufala i mekem wanem blong holem strong bilif long Jehova?

4, 5. (1) Taem ol man Isrel oli kasem Promes Lan, ?Jehova i talem wanem? (2) Folem Ol Sam 106, ?wanem i hapen long ol man Isrel we oli no obei?

⁴ Evri dei, Jeftaha mo gel blong hem, tufala i luk nogud frut blong fasin blong ol man Isrel we oli no moa obei long Jehova. Klosap 300 yia bifo, taem ol man Isrel oli kasem Promes Lan, Jehova i talem se oli mas kilim i ded ol man we oli wosipim ol giaman god, be oli no obei. (Dutronome 7:1-4) Plante man Isrel oli folem fasin blong ol man Kenan, nao oli wosipim ol giaman god mo oli mekem rabis fasin blong man wetem woman.​—Ridim Ol Sam 106:34-39.

⁵ From we ol man Isrel oli no obei, Jehova i letem ol enemi oli winim olgeta. (Jajes 2:1-3, 11-15; Ol Sam 106:40-43) Long taem ya, ating i had blong ol famle we oli lavem Jehova, oli holem bilif. Be Baebol i tokbaot samfala we oli holem strong bilif, olsem Jeftaha mo gel blong hem, wetem Elkana, Hana, mo Samuel. Olgeta ya oli gat strong tingting blong mekem Jehova i glad.​—1 Samuel 1:20-28; 2:26.

6. ?Wanem ol fasin blong wol we oli save pulum yumi? ?Yumi mas mekem wanem?

⁶ Long taem blong yumi, ol man oli gat sem tingting mo sem fasin olsem ol man Kenan. Oltaem oli tingbaot rabis fasin blong man wetem woman, oli mekem faet, mo oli ronem mane. Be Jehova i stap givim woning long yumi. Hem i wantem lukaot gud long yumi olsem we i wantem lukaot gud long ol man Isrel, blong ol rabis fasin oli no pulum olgeta. ?Olsem wanem? ?Yumi lanem samting from ol mastik blong olgeta? (1 Korin 10:6-11) Yumi mas mekem evri samting we yumi naf blong mekem, blong blokem ol tingting blong wol. (Rom 12:2) ?Bambae yu traehad blong mekem olsem?

7. (1) ?Wanem nogud samting we ol manples blong Jeftaha oli mekem long hem? (2) ?Jeftaha i mekem wanem?

⁷ Long taem blong Jeftaha, ol man Filistia mo Amon oli mekem i strong tumas long ol man Isrel. Jehova i letem samting ya i hapen from we ol man Isrel oli no obei long hem. (Jajes 10:7, 8) Be i no ol enemi nomo we oli agensem Jeftaha. Ol brata blong hem mo ol lida blong Isrel, olgeta tu oli agensem hem. From we ol brata blong hem oli jalus mo oli no laekem hem nating, oli ronemaot hem long graon blong hem. (Jajes 11:1-3) Be Jeftaha i no letem nogud fasin blong olgeta i spolem gudfala fasin blong hem. ?Olsem wanem yumi save samting ya? Yumi save from we taem ol lida blong Isrel oli plis long hem blong i givhan long olgeta, wantaem nomo hem i givhan. (Jajes 11:4-11) ?Wanem i pulum Jeftaha blong i mekem olsem?

8, 9. (1) ?Wanem ol tok long Loa blong Moses we maet i givhan long Jeftaha? (2) ?Wanem i moa impoten long Jeftaha?

 ⁸ Jeftaha i wan strong man blong faet. Be hem i save tu Loa blong Moses, mo i save gud ol samting we Jehova i mekem finis long ol man Isrel. Samting ya i tijim hem long ol fasin we oli stret mo oli no stret long tingting blong Jehova. (Jajes 11:12-27) Jeftaha i yusum save ya blong mekem ol desisen long laef blong hem. Hem i save gud tingting blong Jehova long fasin blong kros mo givimbak. Mo hem i save se Jehova i wantem we ol man blong Hem oli lavlavem olgeta. Mo tu, Loa i tijim hem blong i mekem i stret long ol narafala, mo long ol enemi blong hem tu.​—Ridim Eksodas 23:5; Levitikas 19:17, 18.

⁹ Ating eksampol blong Josef i givhan long Jeftaha. Hem i save gud stori blong Josef we i sore long ol brata blong hem, nating se oli mekem i nogud long hem. (Jenesis 37:4; 45:4, 5) Taem Jeftaha i tingbaot eksampol blong Josef, ating samting ya i givhan long hem blong i mekem fasin we Jehova i glad long hem. Samting we ol brata blong Jeftaha oli mekem, i spolem gud hem. Be hem i tingbaot se i moa impoten blong faet blong leftemap nem blong Jehova mo sevem ol man blong hem, i bitim we hem i harem nogud long ol brata blong hem. (Jajes 11:9) Hem i gat strong tingting blong holem bilif. Tingting ya i mekem se Jehova i blesem hem mo ol man Isrel tu.​—Hibrus 11:32, 33.

10. ?Olsem wanem ol tok blong Baebol i save givhan long yumi, blong yumi mekem ol Kristin fasin?

¹⁰ ?Yumi lanem wanem long eksampol blong Jeftaha? Taem wan Kristin brata i mekem yumi harem nogud no i spolem yumi, ?yumi mekem wanem? Yumi no mas lego wosip blong Jehova. Yumi mas gohed nomo blong joen long ol Kristin miting mo spenem taem wetem kongregesen. I gud yumi folem fasin blong Jeftaha mo yumi obei long Jehova. Hemia bambae i givhan long yumi, blong yumi winim ol hadtaem olsem, nao bambae yumi soemaot wan gudfala eksampol.—Rom 12:20, 21; Kolosi 3:13.

11, 12. ?Jeftaha i mekem wanem promes, mo promes ya i minim wanem?

¹¹ Jeftaha i save se hem i no naf blong tekemaot ol man Isrel long han blong ol man Amon, Jehova i mas givhan long hem. Hem i promes se sipos Jehova i mekem hem i win, bambae hem i givim faswan we i kamaot long haos blong hem, i go long Jehova olsem wan sakrefaes we oli “bonem” long olta. (Jajes 11:30, 31) ?Tok ya i minim wanem?

¹² Jehova i no laekem nating we man i bonem pikinini blong hem long olta, olsem wan sakrefaes. Taswe, yumi save se Jeftaha i no mekem olsem. (Dutronome 18:9, 10) Folem Loa blong Moses, wan sakrefaes we oli bonem fulwan long olta, i wan spesel presen we man i givim long Jehova. Taswe Jeftaha i wantem minim se, bambae hem i givim faswan we i kamaot long haos blong hem taem i kambak long faet, i go long Jehova, blong i wok ful laef blong hem long haos blong God.  Jehova i lesin long Jeftaha, mo i givhan long hem blong i win. (Jajes 11:32, 33) ?Be hu man ya we Jeftaha bambae i givim long Jehova?

13, 14. ?Ol tok blong Jeftaha long Jajes 11:35 i soemaot wanem?

¹³ Olsem yumi tokbaot finis, taem Jeftaha i kambak long faet, gel blong hem nao i faswan we i kamaot blong mitim hem. Hemia wan pikinini nomo we hem i gat, mo i lavem hem tumas. ?Olsem wanem? ?Bambae Jeftaha i holem promes blong hem? ?Bambae hem i givim gel blong hem i go long Jehova, blong i wok ful laef blong hem long haos blong God?

¹⁴ Bakegen, ating Loa blong God i givhan long Jeftaha blong i mekem stret desisen. Maet hem i tingbaot ol tok blong Eksodas 23:19, we i talem se ol man blong Jehova oli mas givim ol nambawan samting blong olgeta i go long hem. Loa i talem tu se, man i “mas mekem evri samting we hem i promes” long Jehova. (Namba 30:2) Jeftaha i gat strong bilif olsem Hana, we ating hem tu i laef long taem ya. Jeftaha i holem promes blong hem, nating se i had long hem mo gel blong hem. Gel blong hem bambae i wok ful laef blong hem long haos blong God, hemia i min se hem i no save gat pikinini. Taswe, Jeftaha bambae i no gat wan bubu, blong karem nem blong hem mo graon blong hem. (Jajes 11:34) Nating se i had, Jeftaha i talem wetem strong bilif se: “!Mi mi mekem wan strong promes finis long Hae God, mo bambae mi no save brekem promes ya!” (Jajes 11:35) Jehova i glad long Jeftaha from we hem i rere blong lego evri samting blong mekem Jehova i glad, mo Jehova i blesem hem from. ?Sipos yu, bambae yu gat strong bilif olsem Jeftaha?

15. ?Wanem promes we plante long yumi i mekem finis? ?Olsem wanem yumi save holem promes blong yumi?

¹⁵ Taem yumi givim laef blong yumi i go  long Jehova, yumi promes blong mekem samting we hem i wantem, nomata wanem i hapen. Yumi save finis se bambae i no isi oltaem blong holem promes ya. Yu traem tingbaot: ?Yumi mekem wanem taem Jehova i askem long yumi blong mekem samting we yumi no laekem? Sipos yumi winim nogud tingting ya mo yumi obei long God, yumi stap holem promes blong yumi. Maet yumi harem nogud blong lego samting we yumi wantem, be blesing we Jehova i givim bambae i bigwan moa i bitim samting we yumi lego. (Malakae 3:10) ?Olsem wanem long gel blong Jeftaha? ?Hem i mekem wanem taem hem i harem promes blong papa blong hem?

16. ?Gel blong Jeftaha i mekem wanem taem hem i harem promes blong papa blong hem? (Yu luk pija long stat blong stadi.)

¹⁶ Promes we Jeftaha i mekem i defren long promes blong Hana. Hana i promes blong givim boe blong hem Samuel olsem wan Nasiraet, blong i mekem wok long haos blong God. (1 Samuel 1:11) Wan Nasiraet i save mared mo gat pikinini. Be Jeftaha i givim gel blong hem olsem wan sakrefaes we oli “bonem” fulwan long olta. Taswe gel ya i no save mared mo gat pikinini olsem ol narafala woman. (Jajes 11:37-40) !Yu traem tingbaot! Papa blong hem i lida blong Isrel. Taswe ating gel ya i save mared long wan haeman long Isrel. Be naoia, bambae hem i mekem ol smosmol wok nomo long haos blong God. ?Olsem wanem? ?Gel ya i glad blong mekem olsem? Yes, long tingting blong hem, wok blong Jehova i moa impoten i bitim ol narafala samting long laef blong hem. Taswe, hem i talem long papa blong hem se: “Yu mas mekem long mi olsem we yu talem finis se bambae yu mekem.” (Jajes 11:36) Hem i lego samting we hem i wantem, hemia blong mared mo gat pikinini, blong i mekem wok blong Jehova. ?Olsem wanem yumi save folem eksampol blong hem?

17. (1) ?Olsem wanem yumi save soemaot bilif, olsem Jeftaha mo gel blong hem? (2) ?Ol tok blong Hibrus 6:10-12 i pulum yu blong mekem wanem?

¹⁷ Long taem blong yumi, plante taosen yangfala Kristin oli jusum blong no mared, mo sam we oli mared oli jusum blong no gat pikinini. ?From wanem? From we oli wantem mekem moa long wok blong Jehova. Mo  tu, plante we oli olfala, oli lego janis we oli gat blong spenem taem wetem ol pikinini mo smol bubu blong olgeta, from we oli wantem yusum taem mo paoa blong olgeta long wok blong Jehova. Sam long olgeta oli mekem wok blong bildim ol haos wosip, mo samfala oli joen long Skul Blong Ol Man Blong Talemaot Kingdom. Biaen, oli muv i go long kongregesen we i nidim moa man blong prij. Sam narafala oli mekem plan blong prij moa long taem blong Memoriol. Jehova i no save fogetem ol samting we ol man ya blong bilif oli lego, blong soemaot se oli lavem hem. (Ridim Hibrus 6:10-12.) ?Olsem wanem long yu? ?Yu yu save lego sam samting blong mekem moa long wok blong Jehova?

18, 19. ?Yumi lanem wanem long stori blong Jeftaha mo gel blong hem? ?Olsem wanem yumi save folem fasin blong tufala?

¹⁸ ?Wanem i givhan long Jeftaha blong i winim ol samting we i had? Hem i folem tingting blong Jehova taem hem i mekem desisen long laef blong hem. Hem i no letem fasin blong ol man raonabaot long hem i pulum hem. Mo hem i holem strong bilif taem ol brata blong hem oli mekem hem i harem nogud. Jehova i blesem Jeftaha mo gel blong hem, from we tufala i rere blong lego evri samting blong mekem Jehova i glad. Mo hem i yusum tufala long spesel fasin blong givhan long tru wosip. Nating se ol narafala oli no moa mekem i stret, be Jeftaha mo gel blong hem i holem strong bilif long Jehova.

¹⁹ Baebol i talem se, yumi mas “folem fasin blong olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.” (Hibrus 6:12) I gud yumi folem fasin blong Jeftaha mo gel blong hem. Yumi save gat strong tingting se sipos yumi holemtaet bilif, bambae Jehova i blesem yumi.