1, 2. (1) ?From wanem yu yu gat strong tingting se Jehova i lavem ol man blong hem? (2) ?Jehova i wokem ol man wetem wanem kaen fasin?

?FROM wanem yu gat strong tingting se Jehova i lavem ol man blong hem? Bifo we yumi ansa long kwestin ya, i gud yumi tingbaot ol eksampol ya. Blong plante yia, sam brata mo sista oli leftemap tingting blong wan sista, nem blong hem Taylene. Oli talem se hem i no mas mekem i strong tumas long hem wan. Sista ya i talem se: “Sipos Jehova i no lavem mi, ol advaes blong hem bambae oli no givhan long mi.” Brigitte i wan narafala sista we i gat tu pikinini mo man blong hem i ded. Hem i talem se: “Long wol ya blong Setan, i no isi blong lukaot tufala pikinini blong mi, from we mi mekem wok ya mi wan. Be mi gat strong tingting from we Jehova i lavem mi, hemia i givhan long mi blong winim ol hadtaem blong mi, mo Jehova i no letem wan samting i traem mi we i strong tumas.” (1 Korin 10:13) Sandra i wan sista we i kasem wan strong sik we i no gat meresin blong hem. Long wan asembli, wan sista i kam luk hem mo i storian gud wetem hem. Man blong sista ya i talem se: “Nating se mifala i no save gud sista ya, be gudfala fasin blong hem i mekem mifala i glad tumas. Nating we ol  brata mo sista oli mekem wan smol samting we i soemaot lav, samting ya i mekem mi tingbaot bigfala lav we Jehova i gat long yumi.”

² Jehova i wokem yumi wetem fasin ya blong lavem narafala, mo blong harem gud long lav we narafala i soemaot long yumi. Be i isi nomo blong tingting blong yumi i foldaon taem yumi sik, taem yumi gat problem blong mane, no taem yumi no karem frut long wok blong prij. Sipos yumi stat blong gat tingting ya se Jehova i no lavem yumi, yumi mas tingbaot se Jehova i tinghae long yumi mo hem i stap holem han blong yumi mo i stap givhan long yumi. Bambae hem i neva fogetem yumi sipos yumi holemstrong long hem oltaem.—Aesea 41:13; 49:15.

3. ?Wanem i mekem se yumi gat strong tingting se Jehova i lavem yumi blong olwe?

³ Ol brata mo sista we yumi jes luk stori blong olgeta, oli gat strong tingting se God i stap wetem olgeta. Taswe, yumi save gat strong tingting se God i stap klosap long yumi. (Ol Sam 118:6, 7) Long stadi ya bambae yumi tokbaot fo presen we Jehova i givim, blong soemaot se hem i lavem yumi. Ol presen ya hemia (1) ol samting we God i wokem, (2) Baebol, (3) prea, mo (4) sakrefaes blong Jisas. Taem yumi tingting dip long ol gudfala samting we Jehova i givim, hemia i save givhan long yumi blong talem tangkiu from lav blong Jehova we i stap blong olwe.—Ridim Ol Sam 77:11, 12.

4. ?Yumi luksave wanem long ol samting we Jehova i wokem?

⁴ Taem yumi luk ol samting we Jehova i wokem, yumi luksave se hem i lavem yumi tumas. (Rom 1:20) Eksampol, Jehova i wokem wol ya blong yumi save mekem plante gudfala samting, i bitim we yumi stap laef nomo. Hem i givim evri samting we yumi nidim blong harem gud long laef. !Jehova i givim plante kaen kakae we yumi nidim blong save harem gud! (Prija 9:7) Wan sista we nem blong hem Catherine, hem i harem gud blong luk ol samting we Jehova i wokem, long taem we ol tri oli stat blong putum flaoa long Kanada. Hem i talem se: “I gud tumas blong luk olsem wanem Jehova i wokem ol laef samting raonabaot long yumi. Hem i wokem ol flaoa we oli stap kamaot long graon long prapa taem blong olgeta, mo ol pijin we oli flae i kambak long ples blong olgeta afta we kol taem i finis. Mo tu, hem i wokem smol pijin ya hummingbird, we i stap kam kakae long ples blong kakae blong hem afsaed long kijin blong mi. Jehova i lavem yumi, taswe hem i wantem mekem yumi harem gud.” Papa blong yumi i laekem ol samting we hem i wokem, mo hem i wantem se yumi tu yumi harem gud long olgeta.—Ol Wok 14:16, 17.

5. ?Olsem wanem yumi luksave lav blong Jehova long fasin we hem i wokem yumi?

⁵ Jehova i wokem yumi long fasin we yumi naf blong mekem ol gudfala wok mo blong harem gud long hem. (Prija 2:24) Hem i givim wok long ol man blong oli go stap long olgeta ples long wol, blong oli wok long hem, mo oli lukaotgud long ol fis, ol pijin, mo ol narafala samting we oli laef long wol. (Jenesis 1:26-28) !Mo tu, Jehova i wokem yumi wetem ol gudfala fasin, olsem nao yumi save folem ol fasin blong hem!—Efesas 5:1.

6. ?From wanem yumi mas glad tumas long Baebol?

⁶ Jehova i givim Baebol long yumi from we hem i lavem yumi tumas. Baebol i soemaot long yumi ol save blong Jehova, mo ol fasin we hem i gat long ol man. Eksampol, Baebol i tokbaot fasin we Jehova i gat long ol man Isrel, we oltaem oli no obei long hem. Ol Sam 78:38 i talem se: “God i gat sore long ol man blong hem, mo i fogivim olgeta, i tekemaot ol sin blong olgeta, nao i no spolem olgeta. Plante taem, hem i holem kros blong hem. Hem i kros tumas long olgeta be i no letem i kamaot.” Taem yumi tingting dip long vas ya, samting ya i save givhan long yumi blong luksave se Jehova i lavem yumi, mo i kea long yumi. Taswe, yumi save gat strong tingting se Jehova i kea bigwan long yumi.—Ridim 1 Pita 5:6, 7.

7. ?From wanem yumi mas luk Baebol olsem wan sas presen?

⁷ Yumi mas luk Baebol olsem wan sas presen. ?From wanem? From we hemia nao rod  we Jehova i yusum blong toktok long yumi. Taem wan papa no mama i storian gud wetem pikinini blong hem, lav blong tufala i kam strong moa, mo tufala i trastem gud tufala. Jehova i Papa blong yumi we i lavem yumi. Nating se yumi no luk hem, no harem voes blong hem, be hem i yusum Baebol blong toktok long yumi. !Yumi mas gohed blong lesin long hem! (Aesea 30:20, 21) Taem yumi ridim Baebol, yumi save Jehova mo yumi trastem hem, we hem nomo i stap lidim yumi mo i protektem yumi.—Ridim Ol Sam 19:7-11; Ol Proveb 1:33.

8, 9. ?Jehova i wantem se yumi save wanem? Yu tokbaot wan stori long Baebol.

⁸ Jehova i wantem yumi save se hem i lavem yumi mo hem i no stap luk ol mastik blong yumi nomo. Hem i luk ol gudfala samting we yumi mekem. (2 Kronikel 16:9) I gud yumi luk olsem wanem Jehova i tingbaot ol gudfala samting we King Jehosafat blong Juda i mekem. Jehosafat i mekem wan rong desisen taem hem i joen wetem King Ehab blong Isrel, blong mekem faet agensem ol man Siria long taon ya Ramot long Gilead. Nating se i gat 400 giaman profet we oli talemaot long Ehab se bambae hem i winim faet, be Jehova i talem long profet Mikaea, blong talemaot long Jehosafat mo Ehab se sipos tufala i joen long faet, bambae tufala i lus. Mo samting ya i kamtru stret olsem we Jehova i talem. Ehab i ded long faet mo Jehosafat i lusum faet. Biaen, Jehova i sanem Jehu blong tok strong long Jehosafat from mastik we hem i mekem. Be tu, Jehu i talem long hem se: “I gat samfala samting we yu stap mekem we oli gud.”—2 Kronikel 18:4, 5, 18-22, 33, 34; 19:1-3.

⁹ Long ol yia bifo, Jehosafat i talemaot long ol prins, ol Livaet, mo ol pris blong oli go long olgeta taon blong Juda, blong tijim ol man long ol Loa blong Jehova. Oli mekem wan gudfala wok, mekem se ol man blong ol narafala kantri oli save Jehova. (2 Kronikel 17:3-10) Taswe, nating se Jehosafat i mekem wan rong desisen, be Jehova i no fogetem ol gudfala samting we hem i mekem. Stori ya i leftemap tingting blong yumi from we yumi tu yumi save mekem mastik. Be sipos yumi mekem bes blong yumi long wok blong Jehova, bambae hem i gohed blong lavem yumi, mo bambae hem i no save fogetem ol gudfala samting we yumi mekem.

10, 11. (1) ?From wanem prea i wan spesel presen we Jehova i givim long yumi? (2) ?God i save ansa long ol prea blong yumi olsem wanem? (Yu luk pija long stat blong stadi.)

¹⁰ Wan papa we i lavem ol pikinini blong hem, bambae i lesin long olgeta taem oli wantem toktok wetem hem. Hem i wantem kasemsave filing blong olgeta from we hem i kea gud long olgeta. Long sem fasin, Papa blong yumi Jehova we i lavem yumi, hem tu i mekem i sem mak. Hem i lesingud long yumi taem yumi prea long hem. !Yumi mas tingbaot se prea i wan nambawan janis we yumi gat blong toktok wetem Papa blong yumi!

¹¹ Yumi save prea long Jehova enitaem. Hem i Fren blong yumi mo oltaem hem i rere blong lesin long yumi. Taylene, we yumi tokbaot hem finis, i talem se: “Yu save prea mo tokbaot eni samting long Jehova.” Taem yumi talemaot ol dip filing blong yumi long Jehova, maet hem i save ansa long yumi wetem wan vas long Baebol, wan stori we i stap long ol buk blong yumi, no taem wan brata no sista i leftemap tingting blong yumi. Jehova i harem ol prea we yumi mekem long fulhat, mo hem i kasemsave wanem we yumi nidim nating sipos narafala i no kasemsave. Ol ansa blong ol prea blong yumi oli  soemaot se lav we Jehova i gat long yumi i blong stap olwe.

12. ?From wanem yumi mas tingting dip long ol prea we oli stap long Baebol? Yu talem wan eksampol.

¹² Yumi save lanem sam gudfala lesen taem yumi tingting dip long ol prea we oli stap long Baebol. Samtaem, i gud we yumi stadi long ol prea ya long taem blong famle wosip. Ol prea blong yumi oli save kamgud moa, taem yumi tingting dip long ol prea we ol gudfala man blong God bifo oli mekem. Eksampol, yu stadi long prea we Jona i mekem taem hem i stap long bel blong wan bigfala fis. (Jona 1:17–2:10) Mo yu tingbaot bakegen prea we King Solomon i mekem, taem haos tempol i finis. (1 King 8:22-53) Mo tu, yu tingting dip long prea we Jisas i mekem. (Matiu 6:9-13) Be, samting we i moa impoten hemia se oltaem, ‘yu mas talem tangkiu long Jehova.’ From samting ya, ‘pis we hem i givim, we i bigfala moa, i bitim save blong yu, bambae hem i putum long tingting blong yu.’ Olsem nao, bambae yumi gohed blong soemaot tangkiu from lav blong Jehova we i stap blong olwe.—Filipae 4:6, 7.

13. ?Presen ya ransom i givim wanem janis long yumi?

¹³ Jehova i givim presen ya ransom long yumi “blong yumi kasem laef.” (1 Jon 4:9) Aposol Pol i tokbaot nambawan lav ya we Jehova i soemaot long yumi, taem hem i talem se: “Kraes i ded blong sevem ol man nogud. Sipos wan man i ded blong sevem wan stret man, hemia wan strong samting ya. Maet i gat sam man we oli save ded blong sevem wan gudfala man. Be God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:6-8) Ransom sakrefaes blong Jisas i nambawan rod we i soemaot se Jehova i lavem yumi, mo i givim janis blong yumi save fren gud wetem hem.

14, 15. ?Olsem wanem ransom i givhan long (1) olgeta we tabu spirit i makemaot olgeta? (2) olgeta we bambae oli laef long wol?

¹⁴ Wan smol grup blong ol Kristin oli haremsave se Jehova i lavem olgeta long wan spesel fasin. (Jon 1:12, 13; 3:5-7) God i makemaot olgeta wetem tabu spirit blong hem, mo naoia oli olsem ol pikinini blong hem. (Rom 8:15, 16) I gat samfala long olgeta we oli laef yet long wol, taswe ?from wanem Pol i talem se ‘Jisas Kraes, i leftemap olgeta, i givim hae nem long olgeta long heven’? (Efesas 2:6) From we Jehova i givim janis ya long olgeta blong oli kasem laef we i no save finis long heven.—Efesas 1:13, 14; Kolosi 1:5.

¹⁵ Olgeta we tabu spirit i no makemaot olgeta oli save kam fren blong God, sipos oli soemaot se oli bilif long ransom sakrefaes blong Jisas. Olgeta tu oli gat janis ya blong kam olsem ol pikinini blong God, mo oli save laef long paradaes we bambae i stap long wol ya. Ransom sakrefaes blong Jisas i soemaot bigfala lav we Jehova i gat long ol man. (Jon 3:16) !Yumi glad tumas blong save se, sipos yumi gat strong tingting blong mekem wok blong God, bambae  hem i givim beswan laef long yumi long niufala wol! Taswe, i gud yumi soemaot se yumi tinghae long ransom sakrefaes blong Jisas, we i pruvum se Jehova i lavem yumi blong olwe.

16. Taem yumi tingting dip long lav blong Jehova, ?samting ya i pusum yumi blong mekem wanem?

¹⁶ Yumi no naf blong kaontem ol gudfala samting we Jehova i mekem blong soemaot lav long yumi. King Deved i talem se: “God, i strong tumas blong mi kasem ol tingting blong yu. Olgeta oli plante we plante. Sipos mi kaontem olgeta, bambae mi faenemaot se oli plante moa, i winim sanbij long solwota.” (Ol Sam 139:17, 18) Taem yumi tingting dip long ol samting we Jehova i mekem blong soemaot lav long yumi, samting ya i pusum yumi blong lavem hem, mo mekem samting we yumi naf blong mekem long wok blong hem.

17, 18. ?Wanem sam rod we yumi save soemaot se yumi lavem God?

¹⁷ I gat plante rod we yumi save soemaot se yumi lavem Jehova. Eksampol, taem yumi gat strong tingting oltaem blong talemaot gud nius blong Kingdom long ol man, hemia i soemaot se yumi lavem Jehova. (Matiu 24:14; 28:19, 20) Yumi soemaot tu se yumi lavem Jehova taem yumi stanap strong long ol trabol we oli traem bilif blong yumi. (Ridim Ol Sam 84:11; Jemes 1:2-5.) Sipos ol trabol we yumi kasem oli strong tumas, yumi sua se Jehova i luk ol hadtaem we yumi fesem mo hem bambae i givhan long yumi from we yumi sas tumas long ae blong hem.—Ol Sam 56:8.

¹⁸ Lav we yumi gat long Jehova i pusum yumi blong tingting dip long ol naesfala samting we hem i wokem. Yumi soemaot long Jehova se yumi lavem hem mo Tok blong hem, taem yumi gohed blong stadi gud long Baebol. Oltaem yumi wantem prea long Jehova from we yumi lavem hem mo yumi wantem fren gud wetem hem. Mo taem yumi tingting dip long ransom sakrefaes blong Jisas, lav blong yumi long Jehova bambae i kam bigwan moa. (1 Jon 2:1, 2) Hemia sam rod we yumi soemaot long Jehova se yumi glad tumas long fasin ya blong hem blong lavem yumi blong olwe.