Long Jeremaea 31:15, yumi ridim se: “Hae God i talem se, ‘Ol man Isrel. Olgeta long Rama oli harem wan woman we i krae we i krae, from we hem i harem nogud tumas. Hemia Rejel ya, we i stap krae from ol pikinini blong hem. Mo hem i no moa wantem blong man i kam toktok gud long hem blong mekem hem i harem gud bakegen, from we ol pikinini blong hem oli lus finis.’”

Jeremaea i raetem tok ya 1,000 yia afta we Rejel i ded. Mo Rejel i ded fastaem long tufala boe blong hem. Ale hem i no save krae from tufala. Taswe, ?vas ya i minim wanem?

Fasbon boe blong Rejel, hemia Josef. (Jenesis 30:22-24) Sekenbon, hemia Benjamin, mo Rejel i ded taem i bonem hem. Taswe, taem Jeremaea 31:15 i talem se Rejel i krae from ol pikinini blong hem we “oli lus finis,” ?hem i minim wanem?

Josef i gat tu pikinini boe blong hem, Manase mo Efrem. (Jenesis 41:50-52; 48:13-20) Long 10 laen blong kingdom blong Isrel long not, laen blong Efrem nao i kam strong moa, mo i toktok long bihaf blong olgeta evriwan. Narafala pikinini blong Rejel, Benjamin, i wan laen long kingdom blong Juda long saot. Taswe, yumi save talem se Rejel i pija blong olgeta mama long Isrel, olgeta long not mo olgeta long saot.

Taem Jeremaea i raetem buk blong hem, ol man Asiria oli winim finis kingdom blong Isrel long not. Mo oli tekem plante long olgeta oli go kalabus. Be maet sam long ol laen blong Efrem oli ronwe i go long Juda. Long yia 607 bifo Kraes, ol man Babilon oli winim kingdom blong Juda mo oli tekem olgeta oli go kalabus. Oli tekem plante long olgeta oli go long taon ya Rama, we i stap samwe long 8 kilometa long not blong Jerusalem. (Jeremaea 40:1) Maet oli kilim sam i ded long ples ya, long graon blong laen blong Benjamin we oli berem Rejel long hem. (1 Samuel 10:2) Taswe, maet Jeremaea i stap tokbaot ol man we oli sore long olgeta long laen blong Benjamin we oli ded, no oli sore long olgeta nomo we oli ded klosap long taon ya Rama. Sipos no, maet Jeremaea i stap tokbaot olgeta mama blong Isrel we oli krae from ol man blong God we oli ded no oli go kalabus.

Nating se i olsem wanem, tok blong Jeremaea i wan profet tok. Hem i talemaot samting we bambae i kamtru plante handred yia biaen, taem Jisas i smol pikinini yet. King Herod i kilim i ded ol pikinini boe we oli no bitim 2 yia, long taon ya Betlehem, long saot blong Jerusalem. Yu traem tingbaot olsem wanem ol mama oli krae we oli krae taem ol pikinini blong olgeta “oli lus finis.” I olsem we ol man long taon ya Rama long not blong Jerusalem, oli save harem krae blong olgeta.—Matiu 2:16-18.

Taswe, tok ya se ‘Rejel i krae from ol pikinini blong hem,’ i kamtru long taem blong Jeremaea mo long taem blong Jisas tu. Tok ya i soemaot sore blong ol mama blong Isrel taem oli krae from ol pikinini blong olgeta we oli ded. Be yumi glad tumas se olgeta we oli go long ‘ples blong enemi blong olgeta,’ ded, bambae oli laef bakegen.—Jeremaea 31:16; 1 Korin 15:26.