1, 2. (1) ?Sam lida blong skul oli askem wanem long Pita? ?Pita i ansa olsem wanem? (Yu luk pija long stat blong stadi.) (2) ?From wanem Pita i no moa fraet?

SAM wik afta we Jisas i ded, aposol Pita i stanap long fes blong sam lida blong skul blong ol man Jiu, we oli kros tumas. Ol man ya nao oli bin kilim Jisas i ded. Oli kros long Pita from we hem i mekem wan man we leg blong hem i nogud, i kamgud bakegen. Oli askem long Pita se: ‘?Yu mekem samting ya olsem wanem? ?Yu yusum wanem paoa, no yu mekem long nem blong hu?’ Pita i ansa wetem strong tingting se: ‘Man ya i stap stanap long fes blong yufala, we leg blong hem i gud finis, long paoa blong nem blong Jisas Kraes, man Nasaret. Hemia Jisas ya we yufala i nilim hem long pos, nao hem i ded, be God i mekem hem i laef bakegen.’—Ol Wok 4:5-10.

² Sam wik bifo, Pita i fraet nao i giaman 3 taem se hem i no save Jisas. (Mak 14:66-72) Be taem hem i ansa long ol lida blong skul ya, hem i no moa fraet. ?From wanem hem i gat strong tingting? Wan samting, tabu spirit i givhan long hem, mo narafala samting, hem i bilif strong se Jisas i laef i stap. ?From wanem hem i bilif strong olsem? ?Mo from wanem yumi tu yumi save bilif strong?

3, 4. (1) ?I gat sam we oli laef bakegen bifo we ol aposol oli bon? Yu eksplenem. (2) ?Jisas i mekem hu i laef bakegen?

 ³ Ol aposol oli save gud se ol dedman oli save laef bakegen. Longtaem bifo we ol aposol oli bon, God i givim paoa long profet Elaeja mo Elisa blong tufala i mekem man i laef bakegen. (1 King 17:17-24; 2 King 4:32-37) Mo tu, afta we Elisa i ded, oli sakem wan dedbodi i go long beregraon blong hem. Taem dedman ya i tajem bun blong Elisa, hem i laef bakegen. (2 King 13:20, 21) Ol Kristin bifo oli bilif se ol stori ya oli tru, olsem we yumi tede yumi bilif se Baebol i tru.

⁴ Taem yumi ridim stori blong ol merikel blong Jisas, hemia tu i tajem hat blong yumi. Yu traem tingbaot olsem wanem wan wido woman we i stap krae, i sapraes tumas taem Jisas i mekem boe blong hem i laef bakegen. (Luk 7:11-15) Mo yu tingbaot olsem wanem papa mo mama blong wan smol gel we tufala i harem nogud tumas, tufala i glad bitim mak taem Jisas i mekem gel ya i laef bakegen. (Luk 8:49-56) !Mo tu, ol man oli sapraes bitim mak taem Lasaros i kamaot long hol blong ston we oli putum dedbodi blong hem long hem!—Jon 11:38-44.

5. Taem Jisas i laef bakegen, ?hemia i defren olsem wanem long ol narafala we oli laef bakegen?

⁵ Ol aposol oli save se taem Jisas i laef bakegen, hemia i defren long ol narafala we oli laef bakegen bifo. Olgeta we oli laef bakegen fastaem oli girap wetem bodi we i gat mit mo blad, mo oli save ded bakegen. Be Jisas i girap bakegen wetem bodi we i blong laef long heven, mo i no save ded bakegen samtaem. (Ridim Ol Wok 13:34.) Pita i tokbaot Jisas se: “Long laef blong hem we hem i man, ol man oli kilim hem i ded, nao God i mekem hem i laef bakegen long laef blong hem we i blong heven.” Mo hem i talem tu se Jisas “i go antap long heven, nao hem i stap sidaon long raet saed blong God. Mo God i mekem ol enjel, mo ol haeman, mo ol lida blong heven, oli stap ona long hem.” (1 Pita 3:18-22) Taem ol man oli laef bakegen bifo, hemia ol bigbigfala merikel. Be taem Jisas i laef bakegen, hemia wan merikel we i bigwan bitim olgeta evriwan.

6. Taem Jisas i laef bakegen, ?samting ya i mekem wanem long ol disaepol blong hem?

⁶ Taem Jisas i laef bakegen, samting ya i mekem tingting blong ol disaepol i strong. Ol enemi blong Jisas oli ting se hem i ded, be hem i laef bakegen finis long spirit bodi we i gat bigfala paoa, taswe i no moa gat man we i save spolem hem. Taem hem i laef bakegen, samting ya i pruvum se hem i Pikinini  blong God. From we ol disaepol oli save se Jisas i laef i stap, oli no moa harem nogud mo oli no moa fraet. Be oli glad mo oli gat strong tingting. Sipos Jisas i no laef bakegen, stamba tingting blong God bambae i no kamtru, mo oli prij blong nating nomo.

7. ?Naoia Jisas i stap mekem wanem? ?Wanem kwestin we yumi save askem?

⁷ Yumi save finis se, taem Jisas i stap long wol, hem i hae moa long ol narafala man. Be naoia, hem i King blong Kingdom blong God long heven, mo i stap lukaot long wok blong prij long olgeta ples long wol. I no longtaem, Kingdom ya bambae i tekemaot olgeta nogud samting long wol ya, mo bambae i mekem wol ya i kam wan paradaes we ol man oli save laef olwe long hem. (Luk 23:43, NW) Sipos Jisas i no laef bakegen, olgeta samting ya i no save kamtru. Ale, ?from wanem yumi save bilif strong se Jisas i laef bakegen? ?Mo yumi kasem wanem from?

8, 9. (1) ?From wanem ol lida blong ol man Jiu oli wantem se sam man oli gad long beregraon? (2) ?Wanem i hapen taem tufala woman i go long beregraon?

⁸ Afta we Jisas i ded, sam lida blong skul blong ol man Jiu oli kam luk Paelat, mo oli talem se: “Masta. Mifala i stap tingbaot man blong giaman ya. Taem we hem i stap laef yet, hem i stap talem se, ‘Biaen long tri dei, bambae God i mekem mi mi laef bakegen.’ Nao from samting ya, plis yu talem long ol man blong yu blong oli go lukaot gud long hol ya long ston, gogo kasem namba tri dei blong hem. I nogud ol man blong hem oli go tekemaot bodi blong hem long taem we ol man oli no luk olgeta, nao bambae oli talemaot long ol man, se hem i laef bakegen. Sipos i olsem, bambae las giaman ya i nogud moa, i winim hemia blong fastaem.” Nao Paelat i talem long olgeta se: “Yufala i save tekem sam soldia, yufala i go mekem evri samting we yufala i save mekem, blong lukaot gud long ples ya.” Ale oli mekem olsem we hem i talem.—Matiu 27:62-66.

⁹ Taem oli putum dedbodi blong Jisas long hol blong ston, oli blokem maot blong hol ya wetem wan bigfala ston. Ol lida blong skul oli wantem se Jisas i stap olwe long hol ya, be tingting blong Jehova i defren olgeta. Tri dei afta we Jisas i ded, Meri blong Magdala mo narafala Meri we tufala i disaepol blong Jisas, tufala i go long beregraon. Wan enjel i rolemaot ston ya finis mo i stap sidaon antap long hem. Nao enjel i talem long tufala woman ya blong tufala i go luk insaed, i se: “Hem i no stap long ples ya. Hem i laef bakegen finis.” (Matiu 28:1-6) !Yes, Jisas i girap finis, mo hem i laef i stap!

10. ?Pol i talem wanem blong soemaot se Jisas i laef bakegen?

¹⁰ Ol samting we oli hapen long ol 40 dei we i kam biaen, oli soemaot gud se Jisas i laef bakegen. Aposol Pol i raet i go long ol Kristin long Korin, se: “Ol prapa tok ya blong bilif blong yumi, we mi mi kasem fastaem, hem i nambawan olgeta, mo mi mi talemaot olgeta finis long yufala. Ol tok ya i olsem. Kraes i ded blong tekemaot ol sin blong yumi, olsem we Baebol i talem. Olgeta oli berem hem. Mo long namba tri dei blong hem, hem i laef bakegen, olsem we Baebol i talem. Nao biaen, hem i kamtru long Pita, mo biaen, hem i kamtru long ol twelef man blong hem. Mo biaen, hem i kamtru long wan kampani blong ol man  blong hem we oli moa long faef handred man, nao olgeta evriwan oli luk hem wantaem. Sam long kampani ya oli ded finis, be bighaf blong olgeta oli stap laef yet. Mo biaen, hem i kamtru long Jemes, mo biaen bakegen, hem i kamtru long olgeta aposol blong hem. Nao biaen long olgeta ya, hem i kamtru long mi, we mi mi olsem wan pikinini we i no bon long stret taem blong hem.”—1 Korin 15:3-8.

11. ?“Baebol i talem” wanem, blong soemaot se Jisas bambae i laef bakegen?

¹¹ “Baebol i talem” se Jisas bambae i laef bakegen. Deved i tokbaot wan man we ‘oltaem i stap strong long wok blong God,’ mo bambae i no stap olwe long beregraon, be bambae hem i laef bakegen. (Ridim Ol Sam 16:10.) Long lafet blong Pentekos long yia 33, Pita i eksplenem se man ya hem i Jisas, i se: “King Deved i luksave samting ya we God bambae i mekem i kamtru long fiuja, nao hem i tok. Taem hem i talem se, ‘God i no livim hem i stap long Hom blong ol Dedman, bodi blong hem i no roten blong i sting,’ hem i stap tokbaot Mesaea ya, we i laef bakegen.”—Ol Wok 2:23-27, 31.

12. ?Hu i luk Jisas afta we hem i laef bakegen?

¹² Plante man oli luk Jisas afta we hem i laef bakegen. Long ol 40 dei afta we Jisas i laef bakegen, hem i kamtru long ol disaepol blong hem long garen klosap long beregraon, mo long rod we i go long vilej blong Emeas, mo long sam narafala ples bakegen. (Luk 24:13-15) Hem i toktok long wanwan long olgeta olsem Pita, mo i toktok long olgeta taem oli stap long grup. Wan taem, hem i kamtru long wan kampani blong moa long 500 man. Yumi no save sakemaot pruf ya se plante man oli luk Jisas wetem prapa ae blong olgeta, afta we hem i laef bakegen.

13. ?Wanem i soemaot se ol disaepol oli bilif strong se Jisas i laef bakegen?

¹³ Ol disaepol oli strong blong talemaot se Jisas i laef bakegen. Ol man oli ronem mo kilim ol disaepol ya, oli mekem olgeta oli harem nogud long bodi blong olgeta, mo oli kilim sam long olgeta oli ded, from we oli stap prij. Pita i rere blong kasem trabol olsem, taem hem i talemaot long ol man we oli kilim Jisas i ded se hem i laef bakegen. ?Be sipos i no tru se Jisas i laef bakegen, yu ting se Pita i rere blong kasem trabol olsem? !Nogat! Pita mo ol narafala disaepol oli bilif strong se Jisas i laef i stap, mo i stap lukaot long wok blong prij. Mo tu, from we Jisas i laef bakegen, ol man blong hem oli putum tingting blong olgeta i stap strong long promes ya se olgeta tu bambae oli laef bakegen. Yu traem tingbaot Steven. Jes bifo we hem i ded, tingting blong hem i strong se bambae hem i girap bakegen.—Ol Wok 7:55-60.

14. ?From wanem yu yu bilif se Jisas i laef i stap?

¹⁴ Plante samting oli soemaot se Jisas i stap rul olsem King, mo hem i Hed blong Kristin kongregesen. Tede, plante moa man oli stap joen long tru Kristin skul. ?Yu ting se samting ya i save hapen sipos Jisas i no laef bakegen? Sipos hem i no laef bakegen, ating bambae yumi neva harem stori long saed blong Jisas. I gat plante samting we oli soemaot se Jisas i laef i stap, mo i stap lukaot long wok blong prij long olgeta ples long wol.

15. ?Olsem wanem save ya se Jisas i laef bakegen i mekem se yumi no fraet blong prij?

¹⁵ Yumi no fraet blong prij. Stat long taem blong Jisas, ol enemi blong God oli traem plante rabis rod blong blokem wok blong prij. I gat ol man blong apostasi * mo ol man blong mekem raf fasin. Mo tu, ol  man oli jikim yumi, oli putum tabu long wok blong prij, oli mekem yumi harem nogud long bodi blong yumi, mo oli kilim sam long yumi oli ded. Nating se i olsem, Baebol i talem se: “Ol samting ya blong mekem faet bambae oli no save mekem yufala i karekil.” (Aesea 54:17) Yumi no fraet long ol man blong Setan. Jisas i stap givhan long yumi, olsem we hem i promes finis. (Matiu 28:20) !Yumi save bilif strong se, nomata wanem samting ol enemi oli mekem, be bambae oli no satem maot blong yumi!

16, 17. (1) From we Jisas i laef bakegen, ?olsem wanem long ol tijing blong hem? (2) ?Jon 11:25 i talem se God i givim wanem paoa long Jisas?

¹⁶ From we Jisas i laef bakegen, ol tijing blong hem oli tru. Wan man we i gat bigfala save long Baebol i talem se sipos Jisas i no laef bakegen, ol Kristin oli krangke from we oli bilivim wan bigfala giaman. Pol i talem se sipos Jisas i no laef bakegen, bilif mo wok blong ol Kristin i blong nating nomo. Stori blong ol Gospel bambae i wan kastom stori nomo blong tokbaot wan gudfala man we i gat hed, we ol enemi blong hem oli kilim hem i ded. Be stori ya i no wan kastom stori, from we Jisas i rili laef bakegen, mo samting ya i pruvum se olgeta tijing blong hem oli tru.—Ridim 1 Korin 15:14, 15, 20.

¹⁷ Jisas i talem se: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.” (Jon 11:25) Tok ya blong Jisas i wan strong promes we bambae i kamtru. Jehova i givim paoa long Jisas finis blong mekem olgeta we bambae oli rul wetem hem long heven oli laef bakegen, wetem ol milian man we bambae oli laef long wol tu. Taem Jisas i  ded mo i laef bakegen, hemia wan strong promes se long fiuja ded bambae i finis. !Taswe, yumi naf blong stanap strong taem yumi kasem enikaen trabol, mo yumi no fraet blong ded tu!

18. Taem Jisas i laef bakegen, ?samting ya i wan strong promes se bambae God i mekem wanem?

¹⁸ From we Jisas i laef bakegen, yumi save se Jehova bambae i jajem ol man long stret fasin. Pol i toktok long wan grup blong ol man mo woman long Atens, i talem se: “[God] i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man. Mo hem i soemaot finis long olgeta man we hem bambae i mekem olsem, from we hem i mekem man ya i laef bakegen finis.” (Ol Wok 17:31) God i putumap Jisas blong i jajem yumi, mo yumi save se jajmen blong hem bambae i stret mo i soemaot se hem i lavem yumi.—Ridim Aesea 11:2-4.

19. From we yumi bilif se Jisas i laef bakegen, ?yumi mekem wanem?

¹⁹ Yumi mekem samting we God i wantem from we yumi bilif se Jisas i laef bakegen. Sipos Jisas i no ded mo i no laef bakegen, bambae yumi neva save kamaot long sin mo ded. (Rom 5:12; 6:23) Bambae yumi no gat janis blong kasem wan gudfala laef long fiuja. Bambae yumi talem nomo se: “I gud yumi gohed, yumi kakae, yumi dring, from we tumora bambae yumi ded.” (1 Korin 15:32) Be yumi no putum tingting blong yumi i stap nomo long ol samting long laef blong yumi naoia we oli givim glad. Long defren fasin, yumi bilif strong long promes blong laef bakegen, mo yumi traehad blong obei long Jehova.

20. Taem Jehova i mekem Jisas i laef bakegen, ?hem i soemaot wanem?

²⁰ Jehova i soemaot paoa blong hem taem i mekem Jisas i laef bakegen, mo hem i soemaot tu se hem i “mekem i gud long olgeta we oli stap traem faenem hem.” (Hibrus 11:6) Jehova i yusum bigfala paoa mo waes blong hem, blong mekem Jisas i laef bakegen long laef ya we i blong heven mo i no save finis samtaem. Mo tu, God i soemaot se hem i naf blong mekem ol promes blong hem oli kamtru. Wan long ol promes ya, hemia profet tok ya se wan spesel “pikinini” bambae i stretem kwestin ya, ?hu i naf blong rulum heven mo wol? Blong promes ya i kamtru, “pikinini” ya Jisas i mas ded mo i mas laef bakegen.—Jenesis 3:15.

21. From we Jisas i laef bakegen finis, ?yu yu save kasem wanem?

²¹ Yumi talem tangkiu long Jehova from promes ya blong laef bakegen. Baebol i talem se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” Mo long Revelesen ya we aposol Jon i kasem, hem i harem wan voes we i talem se: “Yu raetem tok ya, from we tok blong mi i tru, mo ol man oli save bilif long hem.” ?Voes ya i blong hu? !Jisas Kraes we i laef bakegen finis!—Revelesen 1:1; 21:3-5.