?Yu bin ridim ol Wajtaoa long ol manis we oli pas? Ale, yu traem ansa long ol kwestin ya:

?Wetaem Jisas i prij long ol spirit we oli stap long kalabus? (1 Pita 3:19)

I luk olsem se, samtaem afta we Jisas i laef bakegen, hem i talem wan strong tok long ol rabis spirit ya no ol rabis enjel ya, from panis we bambae oli kasem.—15/6, pej 23.

?Taem yu mared bakegen, wanem trifala problem we yu mas winim blong mared blong yu i stap gud?

Faswan, hemia se yu no mas stap tingbaot bakegen fas man no woman blong yu, mo namba tu se, yu mas toktok wetem ol fren blong yu we oli no save niufala man no woman blong yu. Mo namba tri problem we yu mas winim hemia se, yu mas trastem niufala man no woman blong yu, nating se faswan i bin giaman long yu.—Oktoba–Disemba, pej 8-10.

?Wetaem bambae Jisas i jajem ol man se oli sipsip no oli nani? (Matiu 25:32)

Jisas bambae i jajem ol man se oli sipsip no oli nani, long taem blong bigfala trabol, afta we olgeta giaman skul oli lus.—15/7, pej 6.

?Wetaem ol giaman Kristin long parabol blong gudfala sid mo rabis gras, bambae oli kakae tut blong olgeta? (Matiu 13:36, 41, 42)

Long taem blong bigfala trabol, taem oli luksave se oli no save ronwe.—15/7, pej 13.

?Tok blong Jisas long saed blong slef we i stret mo waes, i kamtru wetaem? (Matiu 24:45-47)

Parabol ya i no kamtru long Pentekos long yia 33, be i stat kamtru afta long yia 1914. Long 1919, Jisas i jusum sam long ol tabu brata, blong oli kam slef ya we i stret mo waes, blong lukaot long evri samting blong hem long wol, mo givim kakae long spirit long ol man blong hem.—15/7, pej 21-23.

?Wetaem Jisas i putumap slef ya blong i lukaot long olgeta samting blong hem?

Hemia long taem blong bigfala trabol. Long taem ya bambae ol memba blong slef ya oli kasem wok ya taem oli go long heven, blong rul wetem Kraes.—15/7, pej 25.

?Antap long Paoa blong God, wanem samting tu i givhan long ol 230 Witnes blong oli no ded, taem oli mas aot long wan rabis kalabus mo wokbaot 250 kilometa blong go kasem wan wof?

Nating se oli slak we oli slak from we oli hangri mo oli sik, be oli no stop blong lefleftemap tingting blong olgeta.—15/8, pej 18.

?From wanem stori blong ol man Isrel we oli wokbaot krosem Jodan Reva blong go long Promes Lan, i leftemap tingting blong yumi?

Nating se reva ya i fulap mo i ron strong, be Jehova i stopem, i no moa ron, blong ol man blong hem oli save wokbaot i go kros. Samting ya i mas mekem bilif blong olgeta i strong, mo oli mas trastem Jehova. Yes stori ya i leftemap tingting blong yumi tu.—15/9, pej 16.

?Olsem wanem profet tok blong Maeka 5:5 we i tokbaot ol nambawan lida, i stap kamtru tede?

Yumi kasemsave se “ol nambawan lida” we buk blong Maeka i tokbaot, hemia ol elda long kongregesen tede. Olgeta oli lukaot gud long ol man blong Jehova, mo oli givhan long olgeta blong oli rere from wan faet, we Baebol i tokbaot we bambae i hapen long fiuja.—15/11, pej 20.

?From wanem yumi save sua se Jehova i no laekem nating ol rabis pija?

Hemia sam risen: Jehova i save se taem man i wajem ol rabis pija, bambae i spolem gud laef blong hem. Hem i lavem yumi, taswe hem i wantem blokem ol samting nogud we oli save spolem yumi. Mo tu, hem i wantem se mared blong man mo woman i stap gud, mo hem i wantem lukaot gud long ol famle.—Oktoba–Disemba, pej 6.

?Yumi mas mekem wanem blong God i lesin long prea blong yumi?

Yumi mas bilif se God i stap. (Hibrus 11:1, 6) Taem yumi prea, yumi mas gat tingting daon mo yumi mas talemaot samting we i stap long hat blong yumi. Taswe, i moa gud we yumi traem kasem save samting we God i wantem yumi blong mekem. Blong mekem olsem, yumi mas ridim Baebol. Olsem nao, ol prea blong yumi bambae oli laenap wetem tingting blong Jehova. (1 Jon 5:14) —Oktoba–Disemba, pej 16.

?Wanem risen we i mekem se ol elda oli go visitim ol sipsip?

Ol elda oli givhan long evriwan long kongregesen, taem oli visitim ol sipsip. Taem oli go visitim ol brata mo sista, oli traem blong kasem save long ol hadtaem we oli stap fesem, mo oli yusum ol advaes blong Baebol blong leftemap tingting blong olgeta. Sipos ol elda oli kwik blong givim ol samting we ol brata oli nidim, hemia i save blokem plante trabol.—15/11, pej 29.