1, 2. (1) ?Yumi mas mekem wanem blong fren gud wetem Jehova? (2) ?Stori blong ol man long Baebol i givhan long yumi olsem wanem?

‘TAEM we mi mi kam stap klosap long God, mi harem se i gud tumas long mi. Hae God i sefples blong mi.’ (Sam 73:28) Long vas ya, man blong raetem Sam i soemaot se hem i trastem God. ?Wanem i mekem se hem i talem ol tok ya? Taem hem i luk we laef blong ol rabis man i stap rongud, hem i harem nogud tumas. Hem i krae mo i talem se: “Mi mi stap holem tingting blong mi i klin, mi no stap mekem sin, be hemia i blong nating nomo.” (Sam 73:2, 3, 13, 21) Be taem hem i go long haos blong God, hemia i givhan long hem blong i stretem tingting blong hem mo blong i gohed blong fren gud wetem God. (Sam 73:16-18) Samting we i hapen long laef blong man ya i tijim hem long wan impoten samting. Hemia se sipos wan man i wantem fren gud wetem Jehova, hem i mas stap wetem ol man blong God, i mas glad blong kasem ol advaes mo folem ol advaes ya.—Sam 73:24.

² Yumi tu, yumi wantem fren gud wetem God. Taswe, yumi mas letem hem i givim advaes long yumi mo i stretem yumi. Long rod ya, bambae hem i glad long yumi. Long taem bifo, Jehova i sore long ol man mo ol neson, mo i givim janis long olgeta blong oli soemaot se oli glad we hem i stretem olgeta. Oli raetem stori blong olgeta ya long Baebol, blong “tijim yumi” mo “blong wekemap yumi ya we yumi stap laef” long ol las dei. (Rom 15:4; 1 Kor. 10:11) Taem yumi stadi gud long ol stori ya, bambae oli givhan long yumi blong kasem save long ol fasin blong Jehova. Mo bambae oli soemaot gudfala samting we yumi save kasem, taem yumi letem Jehova i jenisim ol fasin blong yumi.

3. ?Wanem pijatok we Aesea 64:8 mo Jeremaea 18:1-6 i yusum? (Yu lukluk pija we i stap antap.)

³ Aesea 64:8 i yusum wan pijatok blong tokbaot raet  we Jehova i gat antap long ol man mo ol neson. Hem i talem se: “Hae God, yu yu Papa blong mifala. Mifala i olsem graon, mo yu yu man blong wokem graonpot. Yu yu mekem mifala evriwan long han blong yu nomo.” Wan man blong wokem graonpot i gat raet blong mekem graon ya i kam eni samting we hem i wantem. Graon i no save bos long man we i stap wokem hem. Long sem fasin, ol man oli no gat raet blong tok long God mo blong talem wanem we hem i mas mekem.—Ridim Jeremaea 18:1-6.

4. ?Yu ting se Jehova i stap fosem ol man blong oli kam olsem we hem i wantem? ?From wanem?

⁴ Taem Jehova i wok wetem ol man Isrel blong jenisim olgeta i kam olsem we hem i wantem, hemia i sem mak long man we i wokem graonpot. Be i gat sam samting long tufala we i no sem mak. Jehova i givim wan nambawan presen long ol man mo ol neson, hemia fasin ya we oli fri blong jusum samting we oli wantem mekem. Hem i no stap mekem we sam man oli gud mo sam man oli nogud. Mo hem i no yusum paoa blong hem blong fosem ol man blong oli kam olsem we hem i wantem. Ol man nomo oli mas jusum sipos oli wantem we Jehova i jenisim fasin blong olgeta no nogat.—Ridim Jeremaea 18:7-10.

5. ?Jehova i mekem wanem taem ol man oli no wantem we hem i jenisim olgeta?

⁵ Sipos wan man i stronghed mo i no wantem se Jehova i jenisim hem, ?bambae Jehova i mekem wanem? Jehova i mekem wan samting we i defren long man blong wokem graonpot. Wan man blong wokem graonpot, i save yusum graon blong mekem wan narafala samting, no maet hem i sakem, sipos hem i luk se hem i no save wokem samting we hem i wantem long graon ya. Plante taem, samting olsem i hapen from we hem nomo i no wokem gud graon ya olsem we hem i mas mekem. Taswe i fol blong hem nomo. (Dut. 32:4) Be long saed blong Jehova, taem wan man i no wantem we Jehova i jenisim hem, Jehova i no fosem hem. Be Jehova nao i jenisim fasin we hem i mekem long man ya. Sipos man ya i no obei, hemia i fol blong hem nomo. Be sipos hem i obei long Jehova, fasin blong hem bambae i kam gud moa, ale Jehova i save yusum hem long wok blong hem. Yu traem tingbaot ol tabu Kristin. God “i gat sore” long olgeta, nao hem i mekem olgeta oli kam olsem ‘ol graonpot we oli flas gud we i blong yusum long spesel taem.’ Be man we i no obei mo i agensem God, hem i kam olsem wan graonpot ‘we i stret nomo blong i lus.’—Rom 9:19-23.

6, 7. ?Taem Jehova i stretem King Deved mo King Sol, tufala i mekem wanem?

 ⁶ Wan rod we Jehova i yusum blong jenisim fasin blong ol man, hemia taem hem i stretem olgeta. Yumi save luk samting ya taem hem i stretem King Sol mo King Deved blong Isrel bifo. Taem King Deved i mekem rabis fasin wetem Batseba, fasin ya i mekem hem mo ol narafala oli harem nogud. Nating se Deved i King, be Jehova i sanem profet Natan blong talemaot ol strong tok blong stretem hem. (2 Saml. 12:1-12) ?Deved i mekem wanem? Hem i harem nogud bigwan from mastik blong hem mo i tanem tingting blong hem. Ale Jehova i fogivim hem.—Ridim 2 Samuel 12:13.

 ⁷ Fasin blong King Sol i defren long King Deved. Hem i no glad taem narafala i stretem hem. Jehova i sanem profet Samuel blong talemaot long King Sol se hem i mas spolem olgeta man Amalek wetem ol anamol blong olgeta. Be Sol i no obei long tok ya. Hem i no kilim King Agag i ded, mo hem i no spolem olgeta nambawan anamol blong taon ya. (1 Saml. 15:1-3, 7-9, 12) Ale Jehova i sanem Samuel blong i stretem Sol. Be Sol i no lesin, mo i no wantem letem Jehova i jenisim hem. Hem i talem se samting we hem i mekem i stret nomo, from we oli save yusum ol  nambawan anamol ya blong mekem sakrefaes. Jehova i tanem baksaed long King Sol, mo i no moa wantem blong hem i king. Afta long taem ya, Sol i no moa traehad bakegen blong fren gud wetem Jehova.—Ridim 1 Samuel 15:13-15, 20-23.

8. ?Yumi lanem wanem long stori blong ol man Isrel taem Jehova i stretem olgeta?

⁸ Jehova i stretem ol neson tu. Mo hem i givim janis long olgeta blong oli soemaot se oli wantem obei long hem no nogat. Long yia 1513 B.K.T., * taem ol man Isrel oli gofri long Ijip, Jehova i jusumaot olgeta blong oli kam man blong hem. Mo hem i promes blong jenisim olgeta i kam olsem we hem i wantem. Be ol man Isrel oli mekem ol rabis fasin, oli wosipim ol giaman god blong ol narafala neson. Jehova i sanem plante profet bakegen mo bakegen, blong oli stretem ol man Isrel, be olgeta oli no wantem lesin. (Jer. 35:12-15) From we ol man Isrel oli no obei, Jehova i stretem olgeta long wan fasin we i strong. Ol man Asiria oli kam spolem ol ten laen blong Isrel long not. Biaen, ol man Babilon oli spolem tufala narafala laen long saot. !Hemia i tijim yumi long wan impoten lesen! Sipos yumi wantem we Jehova i jenisim fasin blong yumi blong i kam gud, yumi mas letem hem i stretem yumi.

9, 10. ?Ol man Nineve oli mekem wanem taem oli harem woning blong Jehova?

⁹ Jehova i givim janis long ol man Nineve blong oli soemaot se oli wantem lesin long woning blong hem no nogat. Hem i  talem long Jona se: “Yu girap, yu go long bigfala taon ya Nineve, yu tok long olgeta, from we mi luk se fasin blong olgeta i nogud we i nogud.” Jehova i talem se Nineve i mas lus from we ol man blong taon ya oli nogud tumas.—Jona 1:1, 2; 3:1-4.

¹⁰ Taem Jona i go talemaot tok ya long ol man Nineve, olgeta “oli bilif long tok ya blong God.” Ale oli tanem tingting blong olgeta from ol rabis fasin blong olgeta. Oli livim kakae mo oli putum ol rabis klos blong soemaot we oli harem nogud tumas from sin blong olgeta. King blong olgeta “i aot long jea blong hem, nao i tekemaot flas klos blong hem, i putum rabis klos, i go sidaon long asis faea.” Ol man Nineve oli lesin long Jehova mo oli tanem tingting blong olgeta. Taswe, Jehova i no spolem taon ya.—Jona 3:5-10.

11. ?Stori blong ol man Isrel mo ol man Nineve i soemaot wanem fasin blong Jehova?

¹¹ Jehova i stretem neson blong Isrel nating se hem i jusumaot olgeta. Ol man Nineve, oli no ol spesel man blong God. Be taem oli harem woning blong Jehova, oli lesin mo oli letem hem i jenisim olgeta. Taswe Jehova i sore long olgeta mo hem i no spolem olgeta. !Tufala stori ya i soemaot klia nomo se taem Jehova i jajem man, “hem i no save wok wan saed”!—Dut. 10:17.

12, 13. (1) ?From wanem samtaem Jehova i jenisim tingting blong hem? (2) ?Taem Jehova i “jenisim tingting,” hemia i minim wanem long saed blong Sol? ?Mo i minim wanem long ol man Nineve?

¹² Jehova i save jenisim desisen blong hem taem hem i luk se ol man oli jenisim fasin blong olgeta. Yumi luk samting ya long stori blong King Sol. Baebol i talem se Jehova i sore tumas we hem i putumap Sol i kam king. (1 Saml. 15:11) Mo long stori blong ol man Nineve, Baebol i talem se God “i jenisim tingting blong hem, i no panisim olgeta olsem we hem i talem fastaem,” from we oli tanem tingting blong olgeta mo oli lego ol nogud fasin blong olgeta.—Jona 3:10.

¹³ Taem Baebol i talem se Jehova i “jenisim tingting” no i “sore tumas,” hemia i min se hem i jenisim tingting we hem i gat long saed blong wan man, no hem i jenisim desisen blong hem. Fastaem Jehova i glad long Sol. Hem i putumap Sol i kam king, be biaen hem i no moa wantem we hem i king. Hemia i no min se Jehova i rong taem hem i jusum Sol. Be hemia from we Sol i no obei long Jehova. Taem ol man Nineve oli tanem tingting blong olgeta, Jehova i jenisim desisen blong hem mo i no moa spolem olgeta. Yumi glad tumas blong save se Jehova i kaengud, i gat sore, mo i rere blong jenisim tingting blong hem taem ol man oli jenisim fasin blong olgeta.

14. (1) ?Tede, Jehova i yusum wanem blong jenisim yumi? (2) ?Yumi mas mekem wanem taem Jehova i jenisim yumi?

¹⁴ Tede, Jehova i yusum Baebol mo ogenaesesen blong hem blong jenisim yumi. (2 Tim. 3:16, 17) Yumi mas glad taem yumi kasem advaes mo taem oli stretem yumi. Nating se yumi baptaes longtaem finis no yumi kasem plante wok long ogenaesesen, be i gud we yumi gohed blong letem Jehova i stretem yumi. Long rod ya, bambae yumi kam olsem “graonpot we i flas gud, i blong yusum long spesel taem.”

15, 16. (1) ?Wanem sam nogud tingting we yumi save gat taem yumi lusum wok long kongregesen? Yu talem wan stori. (2) ?Wanem i save givhan long yumi blong sakemaot ol nogud tingting olsem?

¹⁵ ?Jehova i stretem yumi olsem wanem? Hem i tijim yumi long ol samting we hem i wantem yumi blong mekem, mo hem i givhan long yumi blong  gat stret tingting. Samtaem Jehova i mas stretem yumi long wan fasin we i strong from we yumi mekem wan samting we i no stret. Ale maet yumi lusum wok blong yumi long kongregesen. Tingbaot Denis * we bifo hem i wan elda. Hem i no lukaot gud long sam samting we hem i mekem long bisnes blong hem blong winim mane, ale hem i mekem wan samting we ol Kristin oli no mas mekem. Ol elda oli stretem hem, nao hem i lusum wok blong hem olsem elda. ?Denis i harem olsem wanem long naet ya we oli talemaot se hem i no moa elda? Hem i talem se: “Mi harem se mi ya mi nogud olgeta. Long ol 30 yia we i pas mi bin mekem plante wok. Mi bin mekem wok blong fultaem paenia, mi wok long Betel, mi kam man blong givhan, mo afta mi kam wan elda. Mo tu, mi jes givim fas tok blong mi long asembli blong tri dei. Be wantaem nomo, evri samting ya i no moa gat. Mi sem we mi sem, mo mi harem olsem se mi no moa gat ples insaed long ogenaesesen.”

¹⁶ Denis i mas tanem baksaed long rong we hem i bin mekem. ?Wanem i givhan long hem blong i sakemaot ol nogud tingting? Hem i stadi Baebol, hem i prij oltaem, mo hem i joen oltaem long ol miting. Hem i glad tumas from ol gudfala toktok we ol brata mo sista oli talem long hem. Mo tu, ol buk blong yumi oli leftemap tingting blong hem. Hem i tokbaot wan Wajtaoa blong 15 Ogis 2009 (Franis mo Inglis) we i givhan long hem. Hem i se: “!Haf ya i olsem wan leta we oli raetem i kam stret long mi! !Hem i olsem wan ansa long ol prea blong mi! Wan toktok we i givhan long mi, hemia se: ‘Naoia i gud yu traehad blong mekem fasin fren blong yu wetem Jehova i kam strong moa.’” Denis i folem olgeta advaes ya we hem i kasem blong stretem hem, mo samting ya i mekem i gud long hem. Sam yia biaen, hem i kam wan man blong givhan bakegen.

17. ?Taem kongregesen i putumaot wan man, hemia i save givhan long hem olsem wanem? Yu talem wan stori.

¹⁷ Wan narafala rod we Jehova i yusum blong stretem ol man blong hem, hemia taem hem i putumaot man long kongregesen. Hemia i mekem we kongregesen i stap klin, mo i givhan long man ya we kongregesen i putumaot hem blong i kambak. (1 Kor. 5:6, 7, 11) Robet i wan brata we kongregesen i putumaot hem. Long olgeta 16 yia we hem i no moa brata, papa mo mama blong hem, mo ol brata mo sista blong hem, oli strong blong folem advaes we i kamaot long Baebol, blong no joen nating wetem ol man we oli stap mekem sin, mo blong no talem halo long olgeta. Naoia Robet i kambak long trutok mo hem i stap gohed gud. ?Wanem i mekem se hem i wantem kambak? Hem i talem se : “Famle blong mi i no moa toktok wetem mi, i no moa kam pas blong jekem mi nating. From we oli mekem olsem, mi harem se mi nidim kampani blong olgeta. Samting ya nao i pusum mi blong wantem kambak long Jehova.”

18. ?Bambae yumi mekem wanem taem Jehova i stretem yumi?

¹⁸ Maet kongregesen i no putumaot yumi, be yumi nidim yet we oli stretem yumi. ?Bambae yumi mekem wanem taem Jehova i wantem jenisim yumi mo stretem yumi? ?Bambae yumi lesin long advaes olsem Deved i mekem? ?No bambae yumi sakemaot advaes olsem Sol i mekem? Jehova i bigfala man blong wokem graonpot, mo hem i Papa blong yumi. Yumi no mas fogetem se ‘ol man we Jehova i lavem olgeta, oltaem hem i stap stretem olgeta, olsem we papa i stap stretem pikinini blong hem, we i glad tumas long hem.’ Taswe, oltaem yu mas letem Jehova i stretem yu mo i jenisim fasin blong yu.—Prov. 3:11, 12.