YUMI glad tumas blong luk plante yangfala Witnes we oli mekem laef blong olgeta i no fasfas, blong oli save mekem moa long wok blong Jehova. (Mat. 6:22) ?Wanem sam samting long laef blong olgeta we oli jenisim? ?Wanem ol trabol we oli kasem? Blong faenem ansa, i gud yumi tokbaot samfala we oli stap mekem wok blong Jehova long Meksiko.

Dustin mo Jassa, tufala i blong Yunaeted Stet. Tufala i mared long Jenuware 2007. Tufala i wantem tumas blong laef long wan seling bot. Ale, smoltaem afta we tufala i mared, tufala i pem wan seling bot mo tufala i laef long hem blong wan yia. Bot blong tufala i angka klosap long Astoria, hemia long Oregon. Hem i wan bigfala taon, we raon long hem i gat ol hil we i fulap long ol tri, mo i gat ol bigbigfala hil wetem sno antap long olgeta. Ples ya i no longwe tumas long Solwota blong Pasifik. Dustin i talem se: “!Evri ples we yu luk, oli naes we oli naes!” Tufala i talem se: “Long bot blong mitufala, mitufala i laef long wan smol spes nomo blong 7.9 meta. Mitufala i wok haftaem, mitufala i joen long wan kongregesen we i toktok narafala lanwis, mo sam samtaem mitufala i mekem wok blong haftaem paenia.” Taswe, tufala i ting se tufala i no mekem laef blong tufala i fasfas, mo tufala i trastem Jehova. Be biaen, tufala i luksave se tingting blong tufala i trikim tufala nomo. Dustin i talem se: “Mitufala i spenem plante taem blong fiksimap bot blong mitufala, i bitim we mitufala i givhan long kongregesen. Mitufala i save se, sipos mitufala i wantem putum wok blong Jehova long fasples long laef blong mitufala, mitufala i mas jenisim sam samting.”

 Jassa i talem se: “Bifo we mi mared, mi stap long Meksiko, mo mi joen long wan kongregesen we ol brata mo sista oli toktok Inglis. Mi glad tumas blong wok wetem kongregesen ya, mo mi wantem blong gobak long kongregesen ya bakegen.” Tufala i wantem tumas blong go prij long wan narafala ples. ?Tufala i mekem wanem blong tingting blong tufala i stap long mak we tufala i wantem kasem? Long famle stadi blong tufala, tufala i ridim ol stori blong ol brata sista we oli go prij long narafala ples we i gat plante kakae long garen we oli rere finis blong man i go tekem. (Jon 4:35) Dustin i talem se: “Mitufala tu i wantem harem gud olsem.” Sam fren blong tufala long Meksiko, oli talem long tufala se i gat wan niufala grup long ples ya we i nidim moa man blong prij. Ale, Dustin mo Jassa tufala i mekem desisen blong go. Tufala i lego wok blong tufala, tufala i salem bot blong tufala, mo tufala i go long Meksiko.

Dustin mo Jassa tufala i stap long taon ya Tecomán. Ples ya i klosap yet long Solwota blong Pasifik, be hem i samwe 4,345 kilometa long saot blong Astoria. Dustin i talem se: “Mitufala i ting se ples ya hem i wan ples we win i kolkol, mo i gat ol naesfala hil. Be i defren olgeta. Ples ya i hot tumas mo i gat plante stamba blong laman.” Fastaem, tufala i no save faenem wok. Tufala i no moa gat mane, taswe evri wik, tufala i kakae raes mo bin nomo. Jassa i talem se: “Be stret long taem we mitufala i taed long kakae ya, ol Baebol stadi blong mitufala oli stat blong givim manggo, banana, popo mo plante frut blong laman.” Samtaem biaen, tufala i faenem wan wok, hemia blong wok wetem wan skul blong lanem lanwis. Skul ya i stap long Taewan, mo tufala i mas yusum Intenet blong mekem wok ya. Mane we tufala i kasem, i givhan long tufala blong pem ol samting we tufala i nidim.

?Dustin mo Jassa, tufala i harem olsem wanem long niufala ples we tufala i stap long hem? Tufala i talem se: “Hemia beswan desisen we mitufala i mekem long laef blong mitufala. Mitufala i fren gud moa wetem Jehova mo wetem mitufala. Mitufala i neva ting se bambae i olsem. Evri dei, mitufala i mekem plante samting tugeta. Mitufala i go prij tugeta, tokbaot olsem wanem blong givhan long ol Baebol stadi blong mitufala, mo rerem ol miting. Mo tu, mitufala i no moa wari olsem fastaem. Naoia mitufala i kasem save wan samting we mitufala i no save bifo. Hemia trutok blong promes ya we i stap long Ol Sam 34:8, ‘Yu traem trastem [Jehova]. Bambae yu faenemaot we hem i tru.’”

Moa long 2,900 brata mo sista, we plante long olgeta oli gat 20 kasem 30 yia, mo samfala oli mared, samfala oli no mared, oli go long ol ples long Meksiko, we i nidim moa man blong talemaot gud nius blong Kingdom. ?From wanem ol Witnes ya oli wantem mekem wok ya? Oli askem kwestin ya long wan grup blong olgeta, mo oli talem tri risen we oli pulum olgeta blong mekem olsem. ?Wanem ol risen ya?

 Oli wantem soemaot se oli lavem Jehova mo ol man. Leticia i baptaes taem hem i gat 18 yia. Hem i talem se: “Taem mi givim laef blong mi long Jehova, mi kasem save se mi mas mekem wok blong hem wetem olgeta hat mo olgeta laef blong mi. Ale, blong soemaot se mi lavem Jehova tumas, mi wantem yusum moa taem blong mi mo paoa blong mi blong mekem wok blong hem.” (Mak 12:30) Taem Hermilo i gat bitim 20 yia, hem i go prij long ples we i nidim moa man blong talemaot gud nius blong Kingdom. Bifo long taem ya, hem i wok long wan bang, long wan bigfala taon we nem blong hem Monterrey. Hem i harem gud long laef blong hem. Be hem i talem se: “Mi luksave se beswan rod blong soemaot se mi lavem ol man, hemia blong givhan long olgeta blong oli bilif long God.” (Mak 12:31) Ale, hem i aot long Monterrey, mo i go stap long wan taon we i smol moa. Biaen hem i mared long Leticia.

Oli wantem kasem tru glad we i stap olwe. Jes afta we Leticia i baptaes, hem i folem wan sista we i paenia longtaem finis, blong go long wan taon farawe blong prij. Tufala i stap wan manis long taon ya. Leticia i talem se: “Mi mi sapraes tumas. Mi harem gud tumas taem mi luk we ol man oli lesin long gud nius blong Kingdom. Long en blong manis, mi tingting se, ‘!hemia nao samting we mi wantem mekem long laef blong mi!’” Sem mak long Essly. Hem i wan sista we i no mared mo naoia hem i gat bitim 20 yia. Taem hem i bin stap long hae skul, hem i storian wetem plante Witnes we oli go prij long ol ples we i nidim man blong prij. Hem i luk glad we oli kasem long wok ya, ale, hem tu i wantem mekem wok ya. Hem i talem se: “Taem mi luk ol brata mo sista ya oli glad mo oli smael, samting ya i mekem se mi tu mi wantem gat wan laef olsem olgeta.” Plante sista oli talem sem toktok olsem Essly. Yes, i gat moa long 680 sista we oli no mared, mo oli stap prij long ol ples long Meksiko we i nidim moa man blong prij. !Hemia wan nambawan eksampol we ol yangfala mo ol olfala tu oli save folem!

Oli wantem se laef blong olgeta i hapi mo i gat mining. Afta we Essly i finisim hae skul blong hem, hem i kasem wan skolasip blong go long yunivesiti. Ol narafala yangfala oli talem se i gud we hem i tekem skolasip ya, mo i go long yunivesiti. Olsem nao hem i save kasem pepa blong hem, hem i save faenem wan wok, gat wan trak, mo i save tekem taem blong go visitim ol narafala ples. Be Essly i no folem advaes blong olgeta. Essly i talem se: “Plante long ol fren blong mi we oli Kristin, oli mekem ol samting ya, mo mi luk se oli no moa putum tingting blong olgeta long ol mak long saed blong spirit. Mo tu, mi luk se oli kam kros from ol problem we oli kasem, taem oli joen moa long ol samting blong wol ya. Mi mi wantem yusum yangtaem blong mi blong mekem wok blong Jehova fulwan.”

Essly i tekem sam kos we i halpem hem blong faenem wan wok, we i save givhan long hem blong mekem wok blong paenia. Mo biaen, hem i go long ples we i nidim moa man blong talemaot gud nius blong Kingdom. Be i  no hemia nomo. Hem i traehad tu blong lanem lanwis blong ol man Otomi mo Tlapaneco. Naoia i mekem tri yia finis we hem i stap long ol ples ya blong prij. Hem i talem se: “Taem mi tingbaot wok we mi mekem long ples ya we i nidim moa man blong prij long hem, samting ya i mekem laef blong mi i hapi mo i gat mining. Antap long samting ya, hem i mekem se mi fren moa wetem Jehova.” Phillip wetem waef blong hem Racquel, tufala i blong Yunaeted Stet. Tufala i gat bitim 30 yia mo tufala i talem se. “Wol ya i stap jenis kwiktaem tumas, ale plante man oli harem se laef i olbaot nomo. Be taem mifala i go prij long ol ples we plante man oli lesin long ol tok blong Baebol, samting ya i mekem se laef blong mifala i gat mining. !Mitufala i harem gud tumas!”

I tru se i gat sam trabol tu we oli hapen, taem man i go prij long ol ples we i nidim moa man blong prij. Wan long ol trabol ya, hemia mane. ?Bambae yu karem mane wea, blong yu save pem ol samting we yu nidim? Blong yu save kasem mane we yu nidim, yu mas rere blong jenisim fasin blong laef blong yu, blong i laenap wetem fasin blong laef blong ol manples. Verónica, wan sista we i paenia longtaem finis, i eksplenem se: “Long wan ples we mi stap long hem, mi rerem mo mi salem ol kakae we oli no sas. Long wan narafala ples, mi salem klos mo mi katem hea. Long ples we mi stap long hem naoia, mi klinim haos mo mi tijim ol yangfala papa mo mama blong oli save olsem wanem blong toktok long ol pikinini blong olgeta.”

Wan narafala trabol hemia kalja mo kastom. I no isi blong laef wetem ol man we kalja mo kastom blong olgeta i defren long hemia blong yu. Hemia nao samting we i hapen long Phillip mo Racquel, taem tufala i stap prij long wan ples we ol man oli toktok Nahuatl. Philip i talem se: “Fasin blong laef blong olgeta i defren olgeta.” ?Wanem i givhan long tufala blong tufala i stretem tingting blong tufala? Racquel i talem se: “Mitufala i tingbaot ol gudfala samting long ol man Nahuatl. Olgeta oli joen gud wetem famle blong olgeta, oli trastem olgeta, mo oli kaen long ol narafala. Mitufala i lanem plante samting taem mitufala i stap long ples ya, mo taem mitufala i wok wetem ol brata mo sista we oli manples.”

Sipos yu wantem go prij long wan narafala ples we i nidim moa man blong talemaot gud nius, ?wanem sam samting we yu mas mekem naoia, blong yu save go? Ol brata mo sista we oli bin mekem olsem finis, oli talem se: Bifo we yu go, yu mas stat blong mekem laef blong yu i no fasfas, mo yu mas lanem blong harem gud long ol samting we yu gat. (Fil. 4:11, 12) ?Yu save mekem wanem bakegen? Leticia i talem se: “Mi mi no wantem ol wok we oli blokem mi blong mi no moa save go samples. Mi laekem wan wok we i givim janis long mi blong muv i go samples eni taem.” Hermilo i talem se: “Mi lanem blong kuk, wasem ol klos, mo aeanem klos.” Verónica i talem se: “Taem mi stap wetem famle blong mi, mi givhan blong klinim ol samting, mi lanem blong rerem ol kakae we oli gud be oli no sas. Mi lanem tu blong sevem mane.”

Levi mo Amelia tufala i blong Yunaeted Stet mo tufala i mared eit yia finis. Tufala i tokbaot olsem wanem samting we tufala i talem long prea blong tufala, i givhan long tufala blong tufala i save go long Meksiko. Levi i talem se: “Mitufala i kaontem hamas mane we mitufala i nidim blong mitufala i save laef long Meksiko blong wan yia. Mo mitufala i prea long Jehova blong i givhan long mitufala blong kasem stret mane ya we mitufala i nidim.” Long wan manis nomo, tufala i kasem stret mane ya, mo kwiktaem nomo tufala i go long Meksiko. Levi i talem se: “Jehova i ansa long prea blong mitufala, taswe naoia mitufala i mas go.” Amelia i talem se: “Mitufala i ting se bambae mitufala i stap blong wan yia nomo, be naoia mitufala i stap seven yia finis mo mitufala i no tingbaot nating blong aot long ples ya. Taem mitufala i stap long ples ya, mitufala i luksave olsem wanem Jehova i givhan long mitufala. Evri dei, mitufala i luk olsem wanem Jehova i gud.”

Adam mo woman blong hem Jennifer, tufala i blong Yunaeted Stet. Tufala i go prij long wan ples long Meksiko we ol man oli toktok Inglis. Tufala tu i talem se prea i impoten tumas. Tufala i se: “Yu no mas wet long taem we yu ting se i stret. Sipos yu wantem go prij long ples we i nidim moa man blong prij, yu mas tokbaot long prea, mo biaen, yu mas wok folem prea blong yu. Yu mas mekem laef blong yu i no fasfas, yu raet long branj ofis we i lukaot long ples we yu wantem go long hem, yu wokemaot praes, mo biaen, yu save go.” * Sipos yu mekem olsem, bambae yu harem gud long laef blong yu, mo bambae yu strong long saed blong spirit.