1-3. (1) ?Josua i mekem wanem we i soemaot se hem i jusumaot gudfala rod? (2) Taem yumi jusumaot rod we bambae yumi folem, ?yumi mas tingbaot wanem?

TOK YA “jusumaot” i min se i gat moa long wan rod we man i save folem. Mo tu, hem i min se man i save bos long sam samting we oli hapen long laef blong hem. Yu traem tingbaot wan man we i stap folem rod blong go long narafala ples. Taem hem i stap go, hem i sek se rod ya i seraot long tu. ?Bambae hem i folem wanem rod? Wan long tufala rod ya bambae i tekem hem i go long ples we hem i wantem go long hem. Be narawan bambae i tekem hem i go longwe long ples ya.

² Baebol i tokbaot plante man we oli mas jusum rod blong olgeta. Tingbaot man ya Ken. Hem i mas jusumaot se bambae hem i letem kros i lidim hem no bambae i blokem kros. (Jen. 4:6, 7) Josua tu i mas jusum se, bambae hem i mekem wosip long tru God, no long ol giaman god. (Jos. 24:15) Josua i wantem tumas blong stap klosap long Jehova. Ale hem i jusumaot rod we i lidim gud hem. Ken i no wantem stap klosap long Jehova. Ale hem i jusumaot rod we i lidim hem i go longwe long Jehova.

³ Samtaem, yumi tu yumi sek se rod we yumi stap folem i seraot long tu. Nao yumi mas jusumaot wanem rod we bambae yumi folem. Sipos i hapen olsem, yu mas tingbaot se rod we yu jusum bambae i lidim yu yu go wea. Yumi wantem se rod we yumi jusum i lidim yumi blong leftemap nem blong Jehova, mo blong blokem enikaen samting we i save pulum yumi i go longwe long Jehova. (Ridim Hibrus 3:12.) Long stadi ya mo long nekis stadi, bambae yumi tokbaot seven samting we oli save pulum yumi i go longwe long Jehova.

4. ?Wok i impoten from wanem?

⁴ Olgeta Kristin oli mas wok blong pem ol samting blong olgeta mo ol pikinini blong olgeta. Baebol i talem se sipos wan man i no givim ol samting we famle blong hem i nidim,  hem i moa nogud i winim man we i no bilif nating. (2 Tes. 3:10; 1 Tim. 5:8) I klia se wok i wan impoten haf blong laef. Be sipos yumi no lukaot gud, wok i save mekem se yumi go longwe long Jehova. ?Samting ya i save hapen olsem wanem?

5. Taem yu stap lukaot wok, ?yu mas tingbaot wanem?

⁵ Yu traem tingbaot se yu stap lukaot wan wok. Sipos yu stap long wan kantri we i had blong faenem wok, maet yu ting se i gud blong tekem enikaen wok nomo. Be yu mas tingbaot se: ‘?Wok ya we mi wantem mekem i agensem ol rul blong Baebol? ?Mi mas wok long ol dei we mi makemaot blong mekem ol Kristin wok? ?Mi mas go longwe long famle blong mi?’ Maet yu ting se i moagud blong tekem wan wok olsem i bitim we yu no gat wok nating. Be yu no mas fogetem se, sipos yu jusumaot rong rod, hem i save lidim yu yu go longwe long Jehova. (Hib. 2:1) Nating se yu stap lukaot wok no yu stap tingting gud long wok we yu gat finis, ?bambae yu jusumaot stret rod olsem wanem?

6, 7. (1) ?Wanem tufala risen blong wok? (2) ?Weswan long tufala risen ya bambae i lidim yu yu go klosap long Jehova? ?From wanem yu talem olsem?

⁶ Olsem yumi tokbaot finis, yu mas tingbaot se rod we yu jusum bambae i lidim yu yu go wea. I gud yu tingbaot se: ‘?Mi mi wantem mekem wok ya blong wanem?’ Sipos yu wantem wok blong sapotem yu mo famle blong yu blong yufala i save gohed long wok blong Jehova, Jehova bambae i blesem desisen blong yu. (Mat. 6:33) Sipos yu lusum wok blong yu, no wan samting i hapen we i mekem se laef i had, hemia i no save blokem paoa blong Jehova. (Aes. 59:1) Jehova i “save sevem ol man we oli bilif long hem, i save tekemaot olgeta long ol samting we i stap traem olgeta.”—2 Pita 2:9.

⁷ ?Be olsem wanem sipos yu wantem wok blong yu kam rijman? Ating bambae yu kam rijman. Be yu mas tingbaot se, sipos yu wantem kam rijman, bambae yu fesem plante samting we oli traem yu. !Lukaot! !Ol samting ya oli save mekem yu yu foldaon! (Ridim 1 Timoti 6:9, 10.) Sipos yu gat tingting ya se mane mo wok i impoten tumas, hem i save lidim yu yu go longwe long Jehova.

8, 9. ?Tingting we papa mo mama i gat long wok, i save gat paoa long hu? Yu eksplenem.

⁸ Sipos yu yu wan papa, i gud yu tingbaot eksampol we yu yu soemaot long ol pikinini blong yu. ?Oli luk se wanem samting nao i impoten moa long yu? ?Yu stap tingbaot wok blong yu nomo, no yu traehad blong fren gud wetem Jehova? Sipos oli luk se yu tingbaot moa blong kasem haenem, mo posisen, mo mane, maet bambae oli folem yu. Long rod ya, oli save kasem bigfala trabol. Nao maet bambae oli no moa gat respek long yu. Wan yangfala Kristin i talem se: “Taem mi stap tingtingbak long ol yia bifo, mi tingbaot we papa blong mi i bisi oltaem long wok blong hem. Fastaem, i luk olsem se hem i wok had from we hem i wantem lukaot gud long famle. Hem i wantem se mifala i harem gud. Be taem ol yia oli stap pas, samting ya i jenis. Hem i wok bitim mak, mo i stap pem ol samting we mifala i no nidim. From samting ya, ol man oli no moa tingbaot mifala olsem wan famle we i wok strong long wok blong Jehova, be oli tingbaot nomo se mifala i gat plante mane. Mi mi glad moa sipos papa blong mi i givhan long mi blong mi gohed gud long wok blong Jehova, i bitim we hem i givim ol gudfala samting long mi.”

⁹ Ol papa mo mama, yufala i no mas putum tingting blong yufala tumas long wok, nao yufala i go longwe long Jehova. Yufala i mas soemaot long ol pikinini blong yufala se taem man i fren gud wetem Jehova, hem i rij moa i bitim we hem i gat plante samting.—Mat. 5:3.

10. Taem wan yangfala i jusum samting we hem i wantem mekem long laef blong hem, ?i gud hem i tingbaot wanem?

¹⁰ Ating yu yu wan yangfala we yu stap tingbaot se bambae yu mekem wanem long laef blong yu. ?Olsem wanem blong jusumaot rod we i stret? Olsem yumi tokbaot finis, yu mas tingbaot se rod we yu jusum bambae i lidim yu yu go wea. ?Trening mo wok ya we yu stap tingbaot, bambae i givim moa taem blong yu yu mekem  wok blong Kingdom? ?No bambae i lidim yu yu go longwe long Jehova? (2 Tim. 4:10) Maet yu wantem folem fasin blong laef blong ol man blong wol. Olgeta ya, taem oli gat plante mane oli glad tumas. Be taem oli no gat mane, oli harem nogud mo oli kros. ?Yu yu wantem wan laef olsem? ?No yu yu wantem soemaot strong bilif olsem Deved? Hem i talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Sam 37:25) Yu mas tingbaot se wan long tufala rod ya bambae i tekem yu yu go longwe long Jehova, mo narawan bambae i lidim yu blong yu kasem laef ya we i beswan. (Ridim Ol Proveb 10:22; Malakae 3:10.) ?Bambae yu yu jusumaot wanem rod? *

11. ?Baebol i talem se i rong blong pleplei mo spel? ?Be yumi mas tingbaot wanem?

¹¹ Baebol i no agensem man we i mekem sam samting blong gat gudtaem. Mo Baebol i no talem se man we i spel mo i pleplei i westem taem. Pol i raet i go long Timoti se: “Sipos yu stap mekem bodi blong yu i strong, hemia i gud.” (1 Tim. 4:8) Baebol i talem tu se i gat wan taem blong “man i harem gud” mo wan taem blong “man i danis.” Mo Baebol i pulum yumi blong spel smol. (Pri. 3:4; 4:6) Be sipos yu no lukaot gud, spel mo pleplei i save tekem yu yu go longwe long Jehova. ?Samting ya i save hapen olsem wanem? Trabol ya i save kamaot from tufala risen ya: kaen pleplei we yu jusum, mo hamas taem yu spenem blong pleplei mo spel.

12. ?Yu mas tingbaot wanem taem yu jusum wan pleplei no samting we yu wajem blong spel?

¹² Fastaem, yu traem tingbaot kaen pleplei we yu jusum. I gat sam gudfala pleplei mo sam gudfala samting we yu save mekem mo wajem blong spel. Be i tru se, bighaf blong ol samting ya we wol i givim, oli leftemap ol fasin we God i no laekem nating, olsem: faet, wok blong kleva mo majik, rabis fasin blong man wetem woman. Taswe, yu mas jekem gud ol pleplei mo ol samting we yu mekem mo wajem blong spel. Yu save tingbaot se: ?Oli mekem wanem long mi? ?Oli pulum mi blong mi wantem kilim narafala, no blong mi wantem win oltaem? ?Oli pulum mi blong mi leftemap kantri blong mi se hem i beswan? (Prov. 3:31) ‘?Pleplei we mi jusum, hem i kakae mane blong mi? ?Hem i save mekem narafala i foldaon?’ (Rom 14:21) ‘?Mi mi joen wetem hu blong mekem pleplei ya? ?Wanem fasin blong olgeta?’  (Prov. 13:20) ‘?Pleplei ya i pulum mi blong mi wantem mekem samting we i no stret?’—Jem. 1:14, 15.

13, 14. ?Olsem wanem blong save sipos yu stap spenem tumas taem long spel mo pleplei?

¹³ Naoia, yu traem tingbaot hamas taem yu spenem blong pleplei mo spel. Yu save askem se: ‘?Mi mi westem tumas taem long pleplei mo spel, nao mi no moa gat taem blong mekem wok blong God?’ Sipos yu spel mo pleplei tumas, bambae yu luk se spel i no givim paoa long yu, mo i no mekem yu yu harem gud. Olgeta we oli spel mo pleplei smol nomo, oli harem gud long hem. ?From wanem? From we oli mekem ol impoten samting fastaem, nao taem oli spel, tingting blong olgeta i stap kwaet, i no stikim olgeta.—Ridim Filipae 1:10, 11.

¹⁴ I isi nomo blong spenem plante taem long spel mo pleplei, be sipos yu jusumaot rod ya, yu save go longwe long Jehova. Wan sista we i gat 20 yia, nem blong hem Kim, i luksave samting ya. Hem i talem se: “Fastaem, mi stap go long olgeta lafet we oli singaot mi mi go long olgeta. Evri wiken i gat wan samting, long Fraede naet, Sarede naet, mo Sande naet. Naoia, mi luksave se i gat plante samting we oli impoten moa blong mekem. From we mi mi wan paenia, mi mas wekap long 6 klok long moning blong rere from wok blong prij. Taswe, mi no save mekem lafet go kasem wan no tu klok long moning. Mi mi save se i no rong blong joen wanples blong kakae mo storian, be sipos oltaem nomo yumi mekem samting ya, bambae yumi no moa mekem ol samting we oli moa impoten. Olsem plante narafala samting, yumi mas lukaot se ol lafet oli no stap long fasples long laef blong yumi.”

15. ?Ol papa mo mama oli save mekem wanem, blong ol pikinini blong olgeta oli harem gud long spel mo pleplei?

¹⁵ Ol papa mo mama oli mas mekem se olgeta wetem ol pikinini blong olgeta oli gat ol samting we oli nidim blong laef, mo oli gohed gud long wok blong Jehova. Antap long samting ya, oli mas meksua se oli harem gud long tingting blong olgeta. Hemia i min se oli mas mekem plan blong famle i pleplei mo i spel tu. Sipos yu yu wan papa no wan mama, yu no mas ting se i rong blong pleplei, mo yu no mas ting se evri samting we man i mekem blong spel i nogud. Be yu mas lukaot gud nomo se samting we yufala i mekem i no lidim yufala i gowe long Jehova. (1 Kor. 5:6) Sipos yu tingting gud, bambae yu tingbaot sam pleplei we oli save mekem yufala i harem gud tumas. * Olsem nao, yu mo ol pikinini blong yu, bambae yufala i jusumaot rod we i tekem yufala i go klosap moa long Jehova.

16, 17. (1) ?Plante papa mo mama oli gotru long wanem hadtaem? (2) ?Wanem i soemaot se Jehova i kasem save long tingting blong olgeta?

¹⁶ Jehova i talem se hem i laekem tumas ol man blong hem, olsem we wan papa i laekem pikinini blong hem. (Aes. 49:15) Taem wan pikinini i lego Jehova, papa mo mama blong hem i harem nogud tumas. Wan sista we kongregesen i putumaot gel blong hem, i talem se: “Mi mi harem nogud bitim mak. Mi stap tingbaot se, ‘?Wanem i mekem se hem i lego Jehova?’ Mi harem se hemia fol blong mi nomo.”

¹⁷ Sipos pikinini blong yu i lego Jehova, yu yu harem i soa tumas long hat blong yu. Jehova i kasem save long samting ya. Fas man we Jehova i mekem mo plante narafala man long taem blong Noa, oli agensem hem. Hem tu i “harem nogud tumas.” (Jen. 6:5, 6) Olgeta we oli no gotru long wan hadtaem olsem, oli no kasem save. Nating se i olsem, i no waes we yu yu letem pikinini blong yu we kongregesen i putumaot, i pulum yu yu go longwe long Jehova. Taswe, ?yu save mekem wanem?

18. Taem wan yangfala i lego Jehova, papa mo mama blong hem i no mas ting se i fol blong tufala. ?From wanem?

¹⁸ Yu no mas ting se samting we i hapen i fol blong yu. Jehova i letem ol man oli jusum rod blong olgeta. Evriwan long famle we oli givim laef blong olgeta i go long Jehova mo oli baptaes,  ‘oli gat wok blong olgeta wanwan.’ (Gal. 6:5) Jehova i talem se sipos man i jusum rod we i no stret nao i mekem sin, hemia fol blong hem nomo, i no fol blong yu. (Esik. 18:20) Mo tu, yu no mas putum fol long ol narafala. Yu mas respektem plan we Jehova i stanemap blong stretem olgeta we oli mekem sin. Yu mas stanap strong agensem Setan, i no agensem ol man blong lukaot long ol sipsip blong God long kongregesen.—1 Pita 5:8, 9.

19, 20. (1) ?Ol papa mo mama we kongregesen i putumaot pikinini blong olgeta, oli save mekem wanem blong winim hadtaem ya? (2) ?l stret nomo we ol papa mo mama ya oli wantem se pikinini i mekem wanem?

¹⁹ Mo tu, yu no mas kros long Jehova. Rod ya bambae i tekem yu yu go longwe long hem. Pikinini blong yu we i mekem sin i mas luk se yu yu strong blong putum Jehova i stap fastaem long ol narafala samting. Hemia i min se yu putum Jehova i stap fastaem long hem tu. Taswe, yu mas wok had blong fren gud wetem Jehova, mo blong gohed strong long wok blong hem. Olsem nao, trabol ya bambae i no daonem yu. Yu no mas stap yu wan longwe long ol brata mo sista long kongregesen. (Prov. 18:1) Yu mas prea oltaem, blong talemaot olgeta trabol blong yu long Jehova. (Sam 62:7, 8) Yu no mas traem faenem wan eskius blong toktok long pikinini blong yu we kongregesen i putumaot, nating se long imel no long teks mesej. (1 Kor. 5:11) Yu mas bisi oltaem long wok blong Jehova. (1 Kor. 15:58) Sista we yumi tokbaot finis, i talem se: “Mi save se mi mas stap bisi oltaem long wok blong Jehova, mo mi mas mekem bilif blong mi i strong gud. Olsem nao, taem gel blong mi i kambak long Jehova, bambae mi mi naf blong givhan long hem.”

²⁰ Baebol i talem se man we i lavem narafala i “putum tingting blong hem i strong” long hem. (1 Kor. 13:4, 7) I no rong blong wantem se pikinini blong yu bambae i kambak long Jehova. Evri yia, plante we oli mekem bigfala sin oli tanem tingting blong olgeta mo oli kam joen bakegen long kongregesen. Jehova i glad tumas taem oli tanem tingting blong olgeta. Hem i rere nomo blong ‘fogivim olgeta.’—Sam 86:5.

21, 22. Taem yu stap jusum rod we bambae yu folem, ?yu mas gat strong tingting blong mekem wanem?

²¹ Jehova i letem yumi blong yumi jusum rod we yumi wantem folem. (Ridim Dutronome 30:19, 20.) Be yumi mas tingting gud se rod we yumi jusum bambae i lidim yumi i go wea. Evri Kristin i mas tingbaot se: ‘?Mi mi stap folem wanem rod? ?Mi mi letem wok, no pleplei, no famle blong mi i tekem mi mi go longwe long Jehova?’

²² Jehova i no save kam slak blong lavem ol man blong hem. Wan samting nomo we bambae i mekem se yumi go longwe long Jehova, hemia sipos yumi jusumaot rod we i no stret. (Rom 8:38, 39) !Be yu no nid blong mekem olsem! Yu mas gat strong tingting se bambae yu no letem wan samting i pulum yu yu go longwe long Jehova. Long nekis stadi, bambae yumi tokbaot fo samting bakegen we yu save jekem, blong meksua se oli no stap pulum yu yu go longwe long Jehova.