Wan Kwestin

?Wanem tingting we wan Kristin i mas gat taem hem i go blong kilim anamol mo hukum fis?

Baebol i no talem se i tabu blong kilim anamol mo hukum fis. (Dutronome 14:4, 5, 9, 20; Matiu 17:27; Jon 21:6) Nating se i olsem, ol Kristin we oli kilim anamol mo hukum fis, oli mas tingbaot sam stamba rul blong Baebol.

God i talem long Noa mo ol pikinini blong hem blong kilim ol anamol mo kakae, be hem i talem se oli mas mekem blad blong ol anamol ya i ronaot fastaem, bifo we oli kakae. (Jenesis 9:3, 4) Yumi mas soem respek long God from we hem nao i givim laef blong ol anamol. Taswe ol Kristin oli no kilim anamol jes blong spot no blong pleplei nomo, mo tu oli no mas mekem olsem man we oli ting nating long laef mo oli no gat sore.—Ol Proveb 12:10.

Mo tu, i gat wan narafala samting blong tingbaot long saed blong fasin blong yumi. Ol aposol we oli man blong pulum fis oli glad tumas blong luk se oli bin kasem fulap fis. Nating se i olsem, oli no tok flas from. Mo tu, taem oli go sakem net no lukaotem ol wael anamol, oli no traem blong winim narafala mo blong soemaot se oli strongfala man from we oli naf blong kasem anamol, mo oli no mekem tu from we oli laekem blong ronem, kasem, mo kilim anamol i ded.—Ol Sam 11:5; Galesia 5:26.

Taswe, maet yumi save askem long yumi wan se: ‘?Mi mi soem we mi respektem tingting blong Jeova long saed blong laef? ?Ol tingting blong mi mo ol storian blong mi oli stanap oltaem long fasin blong mi blong kasem anamol mo hukum fis? ?Fasin blong laef blong mi i soemaot se mi mi man blong ronem mo kilim anamol, no mi mi man blong wok blong God? ?Fasin blong mi blong kilim anamol no hukum fis, i mekem se mi kampani oltaem wetem ol man we oli no gat bilif, no i mekem se mi no moa spenem taem wetem famle blong mi?’—Luk 6:45.

Maet samfala we oli ronem mo kilim anamol, no we oli hukum fis blong kakae, oli harem se i stret nomo sipos oli lego ol wok long saed blong spirit taem oli save se hem i stret taem blong go ronem mo kilim anamol no hukum fis. Be, yumi soem se yumi bilif mo yumi trastem Jeova sipos yumi no letem wan samting i kam pulumaot yumi long ol wok blong God. (Matiu 6:33) Antap long hemia, sipos ol Kristin oli go lukaotem mo kilim anamol no oli go hukum fis, oli mas obei long loa blong gavman, mo nating se gavman i no strong tumas long ol man blong folem loa ya, be ol Kristin oli mas folem.—Matiu 22:21; Rom 13:1.

Samfala maet oli nidim blong jenisim tingting blong olgeta blong mekem fasin blong olgeta i laenap wetem tingting blong Jeova long saed blong kilim anamol mo hukum fis. (Efesas 4:22-24) Yumi mas respektem desisen no jus we narafala i mekem. Aposol Pol i givim advaes long saed ya se: “I gud yumi livim fasin ya, we yumi stap jajem narafala man. Yumi mas gat narafala tingting, we bambae yumi no mekem wan fasin nating we i save mekem wan Kristin brata no sista i foldaon long sin.” (Rom 14:13) Sipos yumi soem trufala lav mo respektem tingting blong narafala, samting ya bambae i mekem se yumi save gat pis long kongregesen mo i save mekem God ya we i wokem yumi mo we i Stamba blong laef, i glad.—1 Korin 8:13. *

[Futnot]