‘Holemstrong Ol Stret Fasin Blong Winim Ol Rabis Fasin’

“Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.”—ROM 12:21.

1. ?From wanem yumi sua se yumi save winim rabis fasin?

 ?I GAT rod blong stanap strong taem ol man oli yusum raf fasin blong traem stopem trufala wosip? ?I gat rod blong stanap strong taem wol ya blong Setan i traem pulum yumi, yumi gobak long hem? !Ansa blong tufala kwestin ya se, yes i gat rod! ?From wanem yumi talem se i gat rod? From we aposol Pol i raetem long leta blong hem long ol Kristin long Rom, se: “Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.” (Rom 12:21) Sipos yumi trastem Jeova mo tingting blong yumi i strong blong no letem wol i winim yumi, ale bambae ol rabis fasin blong wol ya oli no save winim yumi. Tok ya we Pol i yusum se “yufala i mas holemstrong” i soem se yumi naf blong winim ol rabis fasin sipos yumi no kam slak long faet blong yumi long saed blong spirit. Ol man we oli kam slak mo oli stop blong faet, olgeta ya nomo bambae oli letem we rabis wol ya mo rabis rula blong wol ya, hemia Devel Setan, i winim olgeta.—1 Jon 5:19.

2. ?From wanem bambae yumi tokbaot laef blong Nehemaea?

² Samwe long 500 yia bifo we Pol i bon, i gat wan man blong God we i laef long Jerusalem. Man ya i soemaot we ol tok ya blong Pol long saed blong faet agensem rabis fasin, oli tru tumas. Man ya nem blong hem Nehemaea. Ol man we oli no obei long God oli agensem hem, be hem i stanap strong, mo tu, hem i winim rabis fasin taem hem i mekem gudfala fasin. ?Wanem ol traem we hem i fesem? ?Wanem i halpem hem blong win? ?Olsem wanem yumi save folem eksampol blong hem? Blong ansa long ol kwestin ya, yumi mas tingbaot sam samting we oli hapen long laef blong Nehemaea. *

3. ?Laef blong Nehemaea i olsem wanem, mo wanem bigfala samting we hem i mekem we plante man oli sapraes long hem?

³ Nehemaea i wok long haos blong King Ataksekses blong Pesia. Nating se hem i laef wetem ol man we oli no gat bilif, hem i no letem ‘fasin blong hem i kam olsem fasin blong ol man long wol’ long taem ya. (Rom 12:2) Hem i gat gudfala laef long haos blong King. Be taem hem i harem se oli nidim hem long kantri blong Juda, hem i lego laef ya mo hem i mekem trip we i had tumas, i go kasem Jerusalem. Ale hem i lidim bigfala wok ya blong bildim bakegen stonwol blong taon blong Jerusalem. (Rom 12:1) Nehemaea i kam olsem distrikejen long Jerusalem. Nating se i olsem, hem i wok had evri dei wetem ol manples blong hem, ol man Isrel, i stat long ‘taem we i jes brok delaet nomo, gogo kasem tudak.’ !From samting ya, afta long tu manis nomo, wok blong  olgeta ya i finis! (Nehemaea 4:21; 6:15) Hemia wan samting we i mekem plante man i sapraes bigwan from we taem ol man Isrel oli stap bildim bak stonwol ya, oli fesem plante trabol from ol man we oli agensem olgeta. ?Hu olgeta we oli agensem Nehemaea, mo oli agensem hem from wanem?

4. ?From wanem sam man oli girap agensem Nehemaea?

⁴ Ol stamba man we oli agensem Nehemaea, hemia Sanbalat, Tobia, mo Gesem. Olgeta ya oli ol haeman long kantri klosap long Juda, mo oli no laekem nating ol man blong God. Taswe, ‘taem oli harem nius we [Nehemaea i] kam blong mekem ol samting blong leftemap laef blong ol laen blong Isrel, oli kros we i kros.’ (Nehemaea 2:10, 19) Ol enemi blong Nehemaea oli strong we oli strong blong wantem blokem ol plan blong bildim bak stonwol ya. Oli wokem sam rabis plan tu blong agensem wok ya. ?Nehemaea bambae i letem ‘rabis fasin i winim hem’?

‘Hem i Kros We i Kros Mo i Stap Tok Nogud’

5, 6. (a) ?Ol enemi blong Nehemaea oli mekem wanem taem oli harem nius blong bildim stonwol bakegen? (b) ?From wanem Nehemaea i no fraet long ol man we oli agensem hem?

⁵ Nehemaea i no fraet blong talem long ol man se: “Yumi mas stanemap stonwol ya [blong Jerusalem] bakegen.” Nao ol man ya oli ansa se: “Yes, yumi mas statem wok ya.” Nehemaea i stori se: “Oli go blong mekemrere blong statem wok ya,” be ol man we oli agensem olgeta oli ‘laf nogud long olgeta, oli stap talem se, “!A! ?Wanem tingting ya blong yufala? ?Yufala i ting se yufala i save girap blong agens long king?” ’ Nehemaea i no fraet long tok jik blong olgeta mo i no wari tu long ol toktok we oli sakem we i giaman nomo. Hem i talem long olgeta ya we oli agensem hem se: “God ya blong heven, hem bambae i givhan long mifala. Mifala i man blong wok blong hem, mo bambae mifala i statem wok ya blong stanemap bigfala stonwol blong taon ya bakegen.” (Nehemaea 2:17-20) Tingting blong Nehemaea i strong blong statem gudfala wok.

⁶ Wan long ol man ya we oli agensem Nehemaea, hemia Sanbalat, “hem i kros we i kros, nao i stap tok nogud” long olgeta. Hem i sakem plante toktok blong jikim olgeta i se: “?Ol laen blong Isrel ya oli wantem mekem wanem ya? . . . !Oli no naf blong mekem wan samting! . . . Ol ston ya blong fastaem, taem ol enemi blong olgeta oli spolem taon ya bifo, faea i spolem olgeta finis. !Olgeta oli krangke ya! !Oli no save yusum ol ston ya bakegen!” Tobia i joen long tok jik ya i se: “Stonwol ya we oli stap wokem i no strong nating. !Smol dog nomo i naf blong brekemdaon!” (Nehemaea 4:1-3) ?Nehemaea i mekem wanem taem hem i harem ol toktok ya?

7. ?Nehemaea i mekem wanem taem ol man we oli agensem hem oli sakem nogud tok long hem?

⁷ Nehemaea i no tingbaot tok jik blong olgeta nating. Hem i gohed nomo blong folem oda blong God mo i no lukaot rod blong givimbak nogud fasin blong olgeta. (Levitikas 19:18) Defren olgeta, hem i livim bisnes ya long han blong Jeova mo i prea se: “God blong mifala. Plis yu harem prea blong mi. Olgeta ya oli stap laf nogud long mifala, oli stap jikim mifala. Plis yu mekem ol tok ya we oli stap sakem i kam long mifala i kasem olgeta bakegen.” (Nehemaea 4:4) Nehemaea i trastem ol tok ya blong Jeova se: “Bambae mi givimbak ol fasin ya we ol enemi ya oli mekem long yufala. Bambae mi givim panis long olgeta.” (Dutronome 32:35) Ale, Nehemaea mo ol man Isrel oli “gohed blong wokem bigfala stonwol ya bakegen.” Oli no letem wan samting i pulum tingting blong olgeta i gowe long wok ya. Tru ya, from samting ya nao, “i no longtaem, hae blong stonwol ya i go antap, i kasem stret haf blong mak blong hem, from we ol man oli glad tumas blong wok.” (Nehemaea 4:6) !Ol man we oli wantem agensem trufala wosip oli no naf nating blong stopem wok ya! ?Olsem wanem yumi save folem eksampol blong Nehemaea?

8. (a) ?Taem ol man oli sakem giaman tok blong agensem yumi, olsem wanem yumi save folem fasin blong Nehemaea? (b) Talem wan ekspiriens we i hapen long yu no we yu bin harem, we i soem se i waes blong no givimbak fasin nogud we man i mekem long yumi.

⁸ Tede, ol man oli agensem yumi long skul, long wok, mo maet long prapa famle blong yumi nomo. Maet oli sakem strong tok long yumi mo oli blemem yumi from samting we yumi no mekem. Plante taem, beswan rod blong folem taem narafala i sakem ol giaman tok ya agensem yumi, hemia blong folem advaes ya blong Baebol se, i gat “taem blong man i stap kwaet.” (Prija 3:1, 7) Taswe yumi mas mekem olsem Nehemaea. I nogud blong sakem strong tok i gobak long olgeta blong mekem olgeta tu oli harem nogud. (Rom 12:17) Yumi lukluk i go long Jeova long prea, mo yumi trastem hem we hem nao i mekem promes ya se: ‘Bambae mi mi givimbak long olgeta.’ (Rom 12:19; 1 Pita 2:19, 20) Long rod ya, yumi no letem ol man blong agens oli pulum yumi i gowe long wok we God i putum long han blong yumi—hemia  wok blong talemaot gud nius blong Kingdom blong God mo blong pulum ol man oli kam disaepol. (Matiu 24:14; 28:19, 20) Evri taem we yumi joen long wok blong prij mo yumi no letem man we i agensem yumi i win, yumi soem se yumi gat strong bilif olsem Nehemaea.

‘Yumi Kilim Hem i Ded’

9. ?Ol enemi blong Nehemaea oli plan blong mekem wanem, mo Nehemaea i mekem wanem?

⁹ Taem ol man we oli agensem trufala wosip long taem blong Nehemaea, oli harem se ‘oli stap wokem bigfala stonwol blong Jerusalem i gud bakegen,’ oli tekem ol naef blong faet blong olgeta nao oli go blong ‘mekem faet long olgeta.’ I luk olsem se olgeta ya bambae oli winim ol man Jiu. I gat ol man Sameria long not, i gat ol man Amon long is, i gat ol man Arab long saot, mo i gat ol man Asdod long wes. Ol man ya oli stap raon long Jerusalem mo i luk olsem se ol man Jiu oli fas. ?Bambae oli mekem wanem? Nehemaea i talem se: “Mifala i stap prea long God blong yumi.” Nao ol enemi oli traem mekem hem i fraet oli se: “Yumi kilim olgeta oli ded, mo long fasin ya, bambae yumi save blokem ol wok blong olgeta.” Taem Nehemaea i harem tok ya hem i “givimaot ol naef blong faet mo ol spia mo bonara long ol man” we oli stap bildim stonwol ya blong oli rere blong faet blong blokem ol enemi. I tru se long lukluk blong man ol man Jiu ya oli smol tumas, oli no gat janis nating blong win fored long bigbigfala ami blong ol man nogud ya. Be Nehemaea i talem long ol man Jiu se: “!Yufala i no fraet long ol enemi ya blong yumi! . . . !Masta blong yumi [Jeova] i gat paoa, mo olgeta man oli fraet long hem!”—Nehemaea 4:7-9, 11, 13, 14.

10. (a) ?From wanem ol enemi blong Nehemaea oli no moa kam mekem faet? (b) ?Wanem desisen we Nehemaea i tekem?

¹⁰ Wantaem nomo ol samting oli jenis. Ol enemi ya oli no moa kam blong faet agensem Nehemaea mo ol man Jiu. ?From wanem? Nehemaea i raetem se: “God i spolem plan ya blong olgeta finis.” Be Nehemaea i save se ol enemi ya oli stap yet olsem wan denja long olgeta. Taswe, hem i tingting se i moa waes blong jenisim fasin blong wok blong ol man Jiu. Stat long taem ya, “olgeta we oli stap karem ol ston i kam, be oli stap wok long wan han nomo, long narafala han oli stap holem samting blong faet.” Mo tu, Nehemaea i givim wok long wan man se sipos ol enemi oli kam agensem olgeta, hem i mas blu “pupu” blong givim woning long ol man we oli stap wok. Antap long hemia, Nehemaea i toktok blong leftemap tingting blong ol man se: “God blong yumi bambae i faet long saed blong yumi.” (Nehemaea 4:15-20) From we Nehemaea i talem ol tok blong leftemap tingting mo i rerem olgeta tu blong fesem fasin agens ya, ol man Jiu oli gohed nomo blong wok. ?Yumi lanem wanem lesen long stori ya?

11. ?Wanem i givhan long ol trufala Kristin blong stanap agensem rabis fasin long kantri we oli putum tabu long wok blong Kingdom? ?Olsem wanem oli mekem we stret fasin i winim rabis fasin?

¹¹ Samtaem, ol trufala Kristin oli fesem hadtaem from ol man we oli agensem olgeta. Tru ya, long sam kantri ol man we oli agens trufala wosip bigwan maet oli plante mo oli gat paoa tu. Maet long lukluk blong ol man nomo, ol Kristin brata sista ya blong yumi oli no save win agensem olgeta. Nating se i olsem, ol Witnes oli trastem se ‘God bambae i faet long saed blong olgeta.’ Yes, plante taem finis, olgeta we oli kasem kil from bilif blong olgeta oli luksave se Jeova i ansa long prea blong olgeta mo i “spolem plan” blong ol enemi ya nating se oli gat bigfala paoa. Long ol kantri we gavman i putum tabu long wok blong  Kingdom, ol Kristin oli faenem rod oltaem blong gohed long wok blong talemaot gud nius. Ol man blong wok long Jerusalem oli jenisim fasin blong olgeta blong mekem wok taem ol enemi oli wantem agensem olgeta. Long sem fasin, ol Witnes blong Jeova tede, oli waesgud taem man i agensem olgeta mo oli jenisim fasin blong olgeta blong prij. Be oli no yusum ol tul blong faet. (2 Korin 10:4) Nating sipos ol man oli save kilim olgeta, be samting ya i no save stopem olgeta long wok blong prij. (1 Pita 4:16) Defren olgeta, ol brata sista oli no fraet nating blong ‘holemstrong ol stret fasin blong olgeta, blong winim ol rabis fasin.’

‘Plis Yu Kam Luk Mifala’

12, 13. (a) ?Wanem plan we ol enemi blong Nehemaea oli mekem? (b) ?From wanem Nehemaea i no wantem go taem ol enemi blong hem oli singaot hem long wan miting?

¹² Afta we ol enemi blong Nehemaea oli luksave se oli no save faet agensem ol man Jiu, oli yusum sam narafala rod we i haed moa. Oli traem tri defren rod. ?Wanem ol rod ya?

¹³ Faswan samting, ol enemi blong Nehemaea oli traem trikim hem. Oli talem long hem se: ‘Plis yu kam luk mifala long wan long ol vilej longwe long bigfala levelples ya Ono.’ Ono i stap bitwin long Jerusalem mo Sameria. Taswe, ol enemi ya oli wantem we Nehemaea i kam mitim olgeta long hafrod ya blong oli stretem problem bitwin long olgeta. Maet Nehemaea i save tingting se hemia wan gudfala plan, from we i moagud blong toktok bitim blong faet. Be Nehemaea i no wantem go mitim olgeta. Hem i talem from wanem i se: ‘Oli wantem trikim mi nomo blong spolem mi.’ Nehemaea i luksave wanem i stap biaen long plan blong olgeta mo i no foldaon long trap ya. Hem i talem fo taem long ol enemi ya se: ‘Mi no save livim wok ya blong godaon long ples ya. Mi no save livim wok ya i stap, blong go nomo blong luk yufala.’ Traehad we ol enemi oli mekem blong pulum Nehemaea i kam long olgeta, i no wok nating. Nehemaea i putum tingting blong hem i stap nomo long wok blong bildim bak stonwol.—Nehemaea 6:1-4.

14. ?Nehemaea i mekem wanem taem ol man oli talem giaman tok long saed blong hem?

¹⁴ Seken samting, ol enemi blong Nehemaea oli talem ol giaman stori olbaot, oli talem se Nehemaea i “wantem girap agens” long King Ataksekses. Ale, long taem ya bakegen, oli singaot Nehemaea se ‘i gud hem i kam luk olgeta, blong oli tokbaot samting ya.’ Bakegen, Nehemaea i no agri from we hem i luksave plan we i stap long tingting blong ol enemi ya. Nehemaea i talem se: “Olgeta ya oli stap traem blong mekem mifala i fraet, blong mifala i no moa gohed blong finisim wok ya.” Long taem ya nao, Nehemaea i tokbak from giaman toktok we ol enemi ya oli bin talem. Hem i se: ‘!Tok ya we yufala i talem, hem i no tru nating! !Yufala nomo i stap mekem tok ya!’ Mo tu, Nehemaea i lukluk i go long Jeova blong i halpem hem, hem i prea se: “Plis yu mekem mi mi strong.” Hem i trastem se sipos Jeova i halpem hem bambae hem i naf blong winim rabis plan ya mo gohed nomo long wok ya blong bildim bak stonwol.—Nehemaea 6:5-9.

15. ?Wanem advaes we wan giaman profet i talem long Nehemaea, mo from wanem Nehemaea i no lesin long advaes ya?

¹⁵ Namba tri samting, ol enemi blong Nehemaea oli yusum wan man Isrel nomo we hem i rabis man, nem blong hem Semaea, blong traem pulum Nehemaea blong brekem Loa blong God. Semaea i talem long Nehemaea se: “Bambae yumitufala i go haed insaed long Rum ya we i Tabu, long haos blong God, yumitufala i lokem doa, from we olgeta ya oli wantem kam kilim yu.” Semaea i talem long Nehemaea se ol man oli wantem kilim hem i ded ale hem i save sef sipos i go haed long tempol. Be, Nehemaea i no wan pris. Sipos hem i go haed long haos blong God, hem i mekem wan bigfala sin ya. ?Olsem wanem? ?Nehemaea bambae i brekem Loa blong God blong traem sevem hem wan? Nehemaea i talem long Semaea se: “?Yu ting se mi save go haed long haos blong God blong sevem laef blong mi? !Mi mi no save mekem samting ya!” ?From wanem Nehemaea i no foldaon long trap ya? From we hem i save se, nomata sipos Semaea i wan man Isrel nomo, be i no ‘God we i talem samting ya long hem.’ Hem i save se wan trufala profet blong God bambae i neva talem long wan man blong mekem samting we i agensem Loa blong God stret. Long taem ya bakegen, Nehemaea i no letem ol enemi blong hem oli winim hem. Smoltaem biaen, hem i save raetem se: “Olgeta wok blong bigfala stonwol ya i finis long manis ya Elul, long namba twanti faef, mo mifala i wok fifti tu dei long hem.”—Nehemaea 6:10-15; Namba 1:51; 18:7.

16. (a) ?Yumi mekem wanem long saed blong giaman fren, sam giaman toktok long saed blong yumi, no maet sam giaman brata? (b) ?Olsem wanem yu soem se yu no wantem lego bilif blong yu long hom, skul, no long wok?

¹⁶ I gud yumi mekem olsem Nehemaea. Samtaem  i save gat sam man we oli giaman se oli fren blong yumi, no sam man oli save talem sam giaman toktok long saed blong yumi, no maet sam man oli talem se oli brata blong yumi be oli no tru. Maet i gat sam man we oli wantem storian wetem yumi, olsem ol man ya bifo we oli singaot Nehemaea blong kam long miting, from we oli wantem yumi lego sam samting blong folem tingting blong olgeta. Maet oli traem pulum yumi blong ting se sipos yumi no wok had tumas long wok blong Jeova, bambae yumi save gat taem blong kasem sam gudfala samting long wol ya. Be, from we yumi putum Kingdom blong God fasples long laef blong yumi, ale yumi no save lego wok blong Kingdom blong folem tingting blong man. (Matiu 6:33; Luk 9:57-62) Mo tu, ol man we oli agensem yumi maet oli talem ol giaman stori long saed blong yumi. Long sam kantri, ol man oli talem se yumi wan denja long gavman, olsem we ol man bifo oli bin talem se Nehemaea i wantem girap agensem king. I gat sam taem we yumi bin putum man long kot from ol giaman stori we oli talem agensem yumi, mo yumi bin winim ol kot kes ya. Be nomata wanem samting i kamaot, yumi trastem Jeova mo yumi prea long hem se bambae hem i lidim evri samting olsem we hem nomo i wantem. (Filipae 1:7) Samtaem olgeta we oli agensem yumi, oli man we oli giaman se oli stap mekem wok blong Jeova. Olsem Semaea we hem tu i man Jiu, i bin traem pulum Nehemaea blong brekem Loa blong God blong i sevem laef blong hem, tede tu i gat sam man we maet oli Witnes blong Jeova fastaem, be biaen oli lego mo agensem trufala wosip. Olgeta ya maet oli traem pulum yumi blong lego bilif. Nating se i olsem, yumi sakemaot ol man ya blong apostasi from we yumi save se yumi no save kasem laef sipos yumi brekem ol loa blong God—yumi kasem laef nomo from we yumi obei long ol loa ya. (1 Jon 4:1) Yes, taem Jeova i stap halpem yumi, yumi save winim enikaen rabis fasin.

Talemaot Gud Nius Nating Se Rabis Fasin i Fulap

17, 18. (a) ?Setan mo ol man blong hem oli traehad from we oli wantem mekem wanem? (b) ?Tingting blong yu i strong blong mekem wanem, mo from wanem yu wantem mekem olsem?

¹⁷ Baebol i tokbaot ol tabu brata blong Kraes i se: “Oli faet agens long [Setan], oli winim hem finis . . . long paoa blong trutok ya we oli stap talemaot.” (Revelesen 12:11) Taswe, wok blong talemaot gud nius blong Kingdom i joen stret wetem fasin blong winim Setan we hem i stamba blong ol rabis fasin. Yumi no sapraes se from samting ya, Setan i wantem pulum ol man blong agensem mo spolem ol tabu Kristin we oli stap yet long wol wetem “bigfala kampani” tu.—Revelesen 7:9, NW; 12:17.

¹⁸ Yumi tokbaot finis se ol man oli save agensem yumi wetem strong tok, oli save talem sam tok blong mekem yumi fraet se bambae oli kilim yumi, no maet oli save yusum sam rod we i haed moa. Nomata wanem rod oli yusum, man we i biaen long fasin agens ya, hemia Setan, mo hem i mekem olsem from we hem i wantem stopem wok blong prij. Be bambae hem i no save win nating. Ol man blong God tede oli gat semfala strong tingting olsem Nehemaea bifo. Oli ‘holemstrong ol stret fasin, blong winim ol rabis fasin.’ !Blong mekem samting ya bambae oli gohed blong talemaot gud nius gogo kasem taem we Jeova bambae i talem se wok ya i finis!—Mak 13:10; Rom 8:31; Filipae 1:27, 28.

[Futnot]

?Yu Yu Tingbaot?

• ?Wanem kaen fasin agens we i kasem ol man blong God bifo mo we i stap kasem ol Kristin tede tu?

• ?Ol enemi blong Nehemaea oli agensem hem from we oli wantem mekem wanem, mo ol enemi blong God tede tu oli wantem mekem wanem?

• ?Olsem wanem yumi save winim rabis fasin wetem gudfala fasin tede?

[Kwestin]

[Bokis blong pija long pej 29]

Ol Lesen We Yumi Lanem Long Buk Blong Nehemaea

Ol man blong God oli kasem

• ol tok blong jikim olgeta

• ol tok blong mekem olgeta oli fraet

• ol tok we i save trikim olgeta

Ol man we oli save trikim yumi hemia

• ol giaman fren

• ol man we oli talem ol giaman stori

• ol giaman brata

Ol man blong God oli winim rabis fasin taem

• oli no lego wok we God i putum long han blong olgeta

[Tok blong pija long pej 27]

Nehemaea wetem ol man Jiu oli bildim stonwol blong Jerusalem bakegen, nating se ol enemi oli agensem olgeta long plante rod

[Tok blong pija long pej 31]

Ol trufala Kristin oli no fraet nating blong talemaot gud nius