Soem Lav Mo Ona—Lukaot Gud Long Ol Toktok Blong Yu
Soem Lav Mo Ona—Lukaot Gud Long Ol Toktok Blong Yu
“Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.”—EFESAS 5:33.
1, 2. ?Wanem impoten kwestin we olgeta we oli mared finis oli mas tingting long hem? ?From wanem?
TINGBAOT sipos yu kasem wan presen we oli kavremap long naesfala pepa mo oli raet long hem se: “Lukaot Blong No Brekem.” ?Bambae yu mekem wanem? Ating bambae yu karem presen ya sloslo nomo, mo bambae yu holemgud blong i no foldaon. Ale, mared tu i olsem wan presen. ?Bambae yu mekem olsem wanem long presen ya?
2 Wan wido woman long Isrel, nem blong hem Nomi, i toktok long tu yangfala woman, Opa mo Rut, i talem long tufala se: “Prea blong mi we Hae God bambae i givhan long yutufala [‘givim presen long yutufala,’ NW ]. . . . Hem bambae i mekem rod, blong yutufala i mared bakegen.” (Rut 1:3-9) Long saed blong wan gudfala waef, Baebol i talem se: “Man i save kasem haos mo mane long papa mo mama blong hem, be Hae God nomo i save givim woman long hem, we i waes.” (Ol Proveb 19:14) Sipos yu yu mared finis, yu mas tingbaot woman no man blong yu olsem wan presen we God i givim. ?Yu yu stap mekem wanem long presen ya we God i givim?
3. ?Wanem advaes blong Pol we ol hasban mo waef oli mas folem?
3 Aposol Pol i raetem leta i go long sam Kristin long faswan handred yia, i se: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.” (Efesas 5:33) Tingbaot olsem wanem ol hasban mo waef oli save folem advaes ya long ol toktok blong olgeta.
Blokem ‘Ol Tok We i Nogud Tumas’
4. ?Olsem wanem tang blong yumi i gat paoa blong mekem i gud no blong mekem i nogud?
4 Jemes we i raetem wan haf blong Baebol, i talem se tang blong yumi i save talem ‘ol tok we i nogud tumas,’ “i olsem posen we i save kilim man i ded.” (Jemes 3:8) Jemes i savegud impoten trutok ya: Sipos man i no bos long tang blong hem, hem i save talem ol tok we i spolemgud narafala. I klia se Jemes i save proveb blong Baebol we i talem se ol tok nogud we man i sakem we i no tingbaot, i olsem ‘naef blong faet we i stikim man.’ Be semfala proveb i talem se, “tok we i waes i save mekem man i harem gud bakegen.” (Ol Proveb 12:18) Tru ya, ol tok blong yumi oli gat paoa. Oli save spolem narafala, no oli save mekem narafala i harem gud. ?Olsem wanem long ol tok blong yu? ?Oli spolem hasban no waef blong yu, no oli mekem hem i harem gud? ?Sipos yu askem long hasban no waef blong yu blong i talemaot filing blong hem long saed blong ol tok blong yu, bambae hem i talem wanem?
5, 6. ?Wanem sam samting we oli mekem i had moa long samfala blong bos long tang blong olgeta?
5 Sloslo, maet hasban mo waef tufala i stat blong sakem ol nogud tok long tufala. Sipos samting ya i stap hapen long mared blong yu, yu mas stretem trabol ya. I gat rod blong stretem, be yutufala i mas wokhad. ?From wanem? From we yumi evriwan i sinman. Sin i save pulum yumi blong tingting nogud mo tok nogud long narafala. Jemes i raetem se: “Man we i no mekem mastik samtaem long toktok blong hem, hem i wan man we i stret gud olgeta. Man olsem bambae i save blokem olgeta rabis samting we i save spolem laef blong hem.”—Jemes 3:2.
6 Be i no fasin blong sin nomo we i save mekem toktok blong yumi i kam nogud. Famle we yumi gruap long hem mo fasin blong olgeta tu i gat paoa long yumi. Samfala oli gruap long wan famle we papa mama i ‘mekem i strong tumas oltaem long tufala, tufala i lusum hed, mo tufala i wael olgeta.’ (2 Timoti 3:1-3) Plante pikinini we oli gruap long wan famle olsem, oli gat semfala nogud fasin taem oli kam bigwan. I tru, i no stret blong yusum sin mo famle blong yumi olsem wan eskius blong tok nogud long hasban no waef blong yumi. Be sipos yumi save ol samting we i gat paoa long fasin blong yumi, yumi kasem save from wanem i had moa long samfala blong bos long tang blong olgeta mo blokem ol nogud tok.
“No Moa Tok Nogud Long Narafala”
7. ?Pita i minim wanem taem hem i talem long ol Kristin se “oli no moa tok nogud long narafala”?
7 Nomata wanem samting i pulum hasban mo waef blong tok nogud long tufala, be maet fasin ya i soemaot se tufala i no lavlavem tufala mo tufala i no stap ona gud long tufala. Taswe Pita i givim advaes long ol Kristin se oli “no moa tok nogud long narafala.” (1 Pita 2:1) Grik tok ya we long Bislama hem i “tok nogud,” i rili minim “tok we i spolem narafala.” Long lanwis Grik, tok ya i givim tingting se man i ‘sutum narafala wetem toktok blong hem.’ !Mining ya i soemaot gud wanem i save hapen taem yumi no moa bos long tang blong yumi!
8, 9. ?Wanem i save hapen taem hasban no waef i sakem ol tok blong spolem narawan? ?From wanem tufala i no mas tok olsem?
8 Maet yu ting se tok we i spolem narafala i no wan samting we yu mas tinghevi long hem. Be tingbaot wanem i save hapen taem hasban mo waef i yusum tok olsem. Sipos wan i talem long narawan se hem i krangke, hem i les, no hem i tingbaot hem wan nomo, i olsem we hem i stap talem se hemia nao prapa fasin blong narawan ya. !Tok ya i rili nogud mo i daonem narafala! ?Olsem wanem taem wan i talem ol tok we i bitim mak blong soemaot slak fasin blong narawan? Maet hem i talem se: “Yu yu let evritaem nomo,” no, “Yu yu neva lesin long mi.” Ating tok ya i no rili tru, mo i save pulum narawan blong agensem tok ya. Biaen, bigfala rao i save kamaot.—Jemes 3:5.
9 Sipos long storian blong tufala, tufala i sakem tok blong spolem tufala nomo, samting ya i save mekem se tufala i harem nogud long tufala, nao bigfala trabol i save kamaot biaen. Ol Proveb 25:24 i talem se: “I moa gud blong man i go slip hem wan afsaed, i winim we hem i stap long haos wetem woman blong hem we oltaem i stap toktok tumas.” Sem mak sipos hasban i toktok tumas. Sloslo, ol tok we tufala i talem blong spolem tufala i save mekem se tufala i no moa frengud. Maet hemia we i stap kasem ol strong tok ya oltaem bambae i harem se narawan i no moa lavem hem, no maet hem i harem se hem i nogud tumas ale i no stret we narawan i lavem hem. Taswe, i impoten tumas we yumi lanem blong bos long tang blong yumi. ?Olsem wanem yumi save mekem olsem?
‘Lukaot Gud Long Ol Toktok Blong Yu’
10. ?From wanem i impoten blong bos long tang blong yumi?
10 Jemes 3:8 i talem se: “I no gat man samtaem we i save mekem tang blong hem i stap kwaet.” Nating se i olsem, yumi mas mekem bes blong yumi blong bos long tang blong yumi. “Sipos man i ting se hem i man blong God mo i stap ona gud long hem, be hem i no lukaot gud long ol toktok blong hem, man ya i stap giaman nomo. Fasin blong hem blong ona long God i blong nating nomo.” (Jemes 1:26; 3:2, 3) Ol tok ya oli soemaot se yumi mas tinghevi long ol toktok blong yumi. Ol nogud tok i save mekem se yumi no moa frengud wetem hasban no waef blong yumi. Mo tok olsem i save mekem we yumi no moa frengud wetem Jeova God tu.—1 Pita 3:7.
11. ?Taem hasban i gat wan tingting be waef i gat defren tingting, olsem wanem blong blokem bigfala rao?
11 Yu yu waes sipos yu lukaot gud olsem wanem yu toktok long hasban no waef blong yu. Sipos i luk olsem se rao bambae i kamaot, traem mekem samting blong winim problem we i stap. Jenesis 27:46–28:4 i tokbaot wan trabol we i kamaot long laef blong Aesak mo woman blong hem Rebeka. “Rebeka i talem long Aesak se, ‘Tufala woman ya blong Esao, tufala i no kamaot biaen long olfala bubu ya blong yumi. !Mi mi taed gud long tufala! !Sipos Jekob i tekem wan gel bakegen we i laen blong Het, ating i moa gud mi mi ded nomo!’ ” Baebol i no talem se Aesak i tok strong long Rebeka. Hem i mekem samting blong givhan long Rebeka blong i harem gud. Hem i sanem Jekob i go long narafala ples blong hem i faenem wan woman we i ona gud long God, nao Rebeka bambae i no moa wari. ?Olsem wanem sipos hasban i gat wan tingting be waef i gat defren tingting? I moagud we tufala i no yusum ol tok ya “yu” mo “mi” blong blemem narawan, be tufala i traem tokbaot trabol we i stap nomo. Long rod ya, defdefren tingting we tufala i gat i no save mekem wan bigfala rao i kamaot. I nogud we wan i talem se: “!Yu yu neva spenem taem wetem mi!” I moagud we hem i talem se: “Mi mi wantem se yumitu spenem moa taem tugeta.” Yu mas tokbaot trabol we i stap, yu no mas putum i go long hasban no waef blong yu. Yu no mas tokbaot hu i bin mekem i rong mo hu i bin mekem i stret. Rom 14:19 i talem se: “Oltaem yumi mas strong blong folem ol fasin we i save mekem pis, mo we i save givhan long yumi, blong leftemap yumi.”
Lego ‘Tingting We i Agens, No Mas Holem Kros, No Mas Kros Kwik’
12. ?Blong bos long tang blong yumi, yumi mas prea olsem wanem? ?From wanem?
12 Blong bos long tang blong yumi, i no naf blong lukaot gud long ol toktok blong yumi nomo. Ol tok we yumi talem oli kamaot long hat blong yumi. Jisas i talem se: “Gudfala man we i fulap long ol gudfala tingting, hem i save mekem ol gudfala fasin. Mo rabis man we i fulap long rabis tingting, hem i save mekem ol rabis fasin, from we taem man i tok, hem i stap talemaot ol samting we tingting [“hat,” NW ] blong hem i fulap long hem.” (Luk 6:45) Taswe, blong bos long tang blong yu, maet yu mas prea olsem Deved, se: “God, plis yu mekem tingting blong mi i klin olgeta. Plis yu mekem we hat blong mi i kam niuwan bakegen, mo i stap strong long yu oltaem.”—Ol Sam 51:10.
13. ?Olsem wanem tingting we i agens, fasin blong holem kros mo kros kwik, i save lidim yu blong tok nogud?
13 Pol i talem long ol Kristin long Efesas se oli no mas tok nogud long narafala. Be i no hemia nomo. Hem i talem tu se oli mas blokem ol nogud filing we oli pulum olgeta blong tok nogud. Hem i raetem se: “Yufala i mas lego olgeta fasin blong kros [“tingting we i agens,” NW ], yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala.” (Efesas 4:31) Pol i talem se yumi no mas ‘sakem tok blong yumi i go antap mo tok nogud long narafala.’ Be bifo long hemia, hem i tokbaot ‘tingting we i agens, fasin blong holem kros mo kros kwik.’ Yes, kros we yumi holem i stap insaed long yumi, hemia nao samting we i save mekem yumi faerap mo sakem ol nogud tok. Taswe, i gud blong tingbaot se: ‘?Mi mi gat tingting agens mo kros long hat blong mi? ?Mi mi “stap faerap” long kros?’ (Ol Proveb 29:22) Sipos yu yu olsemia, yu mas prea long God blong i givhan long yu blong winim ol filing blong kros mo blong bos long fasin blong yu. Olsem nao, bambae yu no faerap long kros. Ol Sam 4:4 (NW ) i talem se: “Maet yu harem se yu kros, be yu no mas mekem sin. I moagud yu stap kwaet, yu go ledaon long bed blong yu, mo yu talemaot ol filing blong yu long yu wan bakegen.” Sipos yu luk se yutufala i stap kam kros, mo yu fraet se bambae yu faerap, i gud yu mekem olsem Ol Proveb 17:14 (NW ) i talem: “Gowe bifo [we] rao i kamaot.” Yes, go wokbaot smoltaem gogo kros blong yu i godaon.
14. ?Fasin blong holem kros i save mekem wanem long mared blong yu?
14 I no isi blong winim fasin kros, antap moa taem i kamaot long “tingting we i agens,” olsem Pol i talem. Grik tok we Pol i yusum long ples ya, i minim “man i stap kros long narafala mo i no wantem mekem pis.” Tok ya i minim tu, ‘man i no laekem narafala mo i stap holem ol rong blong narafala ya long tingting blong hem.’ Fasin badfren blong hasban mo waef i save kam olsem wan tik klaod bitwin long tufala, mo i save stap longtaem. Sipos i gat wan smol trabol nao tufala i no stretem gud, tufala i save stat blong tingrabis long tufala. Be sipos tufala i stap kros from sam rong we oli pas finis, hemia i no save givhan long tufala nating. Samting we i hapen finis, yu no save jenisim. Sipos yu fogivim hasban no waef blong yu finis from wan rong we hem i bin mekem, yu mas fogetem rong ya. Man we i gat lav, “i no save stap kros longtaem.”—1 Korin 13:4, 5.
15. ?Wanem bambae i givhan long olgeta we oli gat fasin blong tok nogud long narafala, blong oli jenisim fasin ya?
15 ?Olsem wanem sipos yu gruap long wan famle we evriwan oli saksakem ol nogud tok, ale yu tu yu lanem fasin ya? Sipos i olsem, yu save jenisim fasin blong yu. Yu yu folem finis sam rul long laef blong yu we oli blokem yu blong yu no mekem sam fasin. ?Ale, long saed blong ol toktok blong yu, bambae yu putum wanem rul? ?Bambae yu blokem maot blong yu bifo we yu sakem ol nogud tok? I gud yu folem rul we i stap long Efesas 4:29: “Long ol toktok blong yufala, yufala i no mas talem ol rabis tok we i save spolem man.” Blong mekem olsem, yu mas ‘sakemaot olfala laef blong yu, wetem ol fasin blong hem, mo yu mas putum niufala laef blong yu, olsem prapa klos blong yu. Niufala laef ya, God nomo i stamba blong hem. Mo oltaem, hem i stap mekem laef ya i kam niuwan bakegen, blong mekem yu yu savegud hem, mo blong mekem yu yu kam moa olsem hem.’—Kolosi 3:9, 10.
Yutufala i Mas “Toktokgud Tugeta”
16. ?Olsem wanem fasin blong no moa toktok i save spolem mared blong yutufala?
16 Taem wan trabol i kamaot, sam hasban mo waef oli no moa toktok. Hemia i no save givhan nating, maet i mekem trabol i kam bigwan moa. Sam man mo woman oli mekem fasin ya from we oli harem nogud mo from we tingting blong olgeta i foldaon, i no from we oli wantem panisim hasban no waef blong olgeta. Nating se i olsem wanem, be taem tufala i no moa toktok, tufala i harem nogud moa, trabol i stap sem mak, mo tufala i no stretem wan samting. Wan waef i talem se: “Taem mitufala i stat toktok bakegen, mitufala i neva tokbaot trabol we i bin stap, i min se mitufala i neva stretem trabol ya.”
17. ?Kristin hasban mo waef i mas mekem wanem taem tufala i harem nogud long tufala?
17 Taem yutufala i harem nogud long yutufala, i no gat wan sotkat. Yutufala i mas folem Ol Proveb 15:22 (NW ) we i talem se: “Olgeta plan blong man oli save foldaon sipos oli no toktok gud tugeta fastaem. Be taem i gat fulap man blong givim advaes, bambae ol plan oli kamtru.” Yu mas sidaon wetem hasban no waef blong yu mo tokbaot trabol ya. Yu mas openem tingting mo hat blong yu blong lesingud long ol tok blong hem. Sipos yu no save mekem olsem, i gud yu askem ol elda long Kristin kongregesen blong oli givhan long yutufala. Ol elda oli savegud ol tok blong Baebol, mo oli savegud olsem wanem blong mekem ol rul blong Baebol oli wok long laef. Ol man ya oli “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.”—Aesea 32:2.
Yu Save Winim Faet Ya
18. ?Wanem faet we Rom 7:18-23 i tokbaot?
18 I hadwok blong bos long tang blong yumi. Mo i hadwok tu blong bos long ol fasin blong yumi. Aposol Pol i tokbaot traem we hem i fesem, i se: “Mi mi save finis we fasin blong mekem ol gudgudfala samting, hem i no stap long tingting blong mi nating. Hemia i min se mi mi man nomo, mo i no fasin blong mi, blong mi mekem ol gudgudfala samting. I tru, mi gat tingting blong mi, se mi wantem mekem ol gudgudfala fasin, be mi no naf blong mekem. Nao oltaem mi no mekem ol gudgudfala fasin ya we mi wantem mekem, mi stap mekem ol rabis fasin ya, we mi no wantem mekem nating. Sipos mi stap mekem ol samting we mi no wantem mekem nating, ating i no mi tru, we mi stap mekem ol samting ya. Hemia fasin blong sin ya we i stap oltaem long tingting blong mi, we i stap mekem.” From we ‘fasin blong sin i stap wok oltaem long tingting blong yumi,’ i isi blong yumi yusum tang blong yumi, mo ol narafala haf blong bodi tu, long fasin we i nogud. (Rom 7:18-23) Yumi no save ronwe long faet ya. Be yumi save winim faet ya wetem help blong God.
19, 20. ?Olsem wanem fasin blong Jisas i save givhan long ol hasban mo waef blong oli bos long tang blong olgeta?
19 Long mared we i stanap long lav mo respek, i no gat ples blong ol strong tok we oli spolem narawan. Tingbaot Jisas Kraes. Jisas i neva talem ol tok we i spolem ol disaepol blong hem. Taem ol aposol oli stap raorao se hu long olgeta i hae moa, Pikinini blong God i no tok strong long olgeta, nating se long tumora blong hem bambae hem i mas ded. (Luk 22:24-27) Baebol i givim advaes ya se: “Yufala ol man we i mared, yufala i mas lavem ol woman blong yufala, olsem we Kraes i lavem [kongregesen] ya. Taswe hem i letem laef blong hem, blong sevem [kongregesen].”—Efesas 5:25.
20 ?Olsem wanem long waef? Hem “i mas ona gud long man blong hem.” (Efesas 5:33) ?Wan woman we i onagud long man blong hem, bambae i tok nogud long hem mo sakem tok blong hem i go antap? !Nogat! Pol i raetem se: “I gat wan tok we mi wantem yufala i savegud mining blong hem. God, hem i hed blong Kraes, mo Kraes, hem i hed blong man, mo man, hem i hed blong woman blong hem.” (1 Korin 11:3) Ol woman oli mas obei long man we i hed blong olgeta, olsem we Kraes i obei long Jeova we i Hed blong hem. (Kolosi 3:18) I tru se i no gat wan man no woman we i save mekem fasin blong olgeta i kam olsem Jisas stret. Be sipos ol hasban mo waef oli traehad oltaem blong ‘biaen long Jisas,’ bambae i isi moa long olgeta blong winim faet ya blong bos long tang blong olgeta.—1 Pita 2:21.
?Yu Yu Lanem Wanem?
• ?Olsem wanem ol nogud tok i save spolem mared?
• ?From wanem i no isi blong bos long tang blong yumi?
• ?Wanem i save givhan long yumi blong lukaot gud long ol toktok blong yumi?
• ?Yutufala i mas mekem wanem taem yutufala i harem nogud long yutufala?
[Kwestin]
[Tok blong pija long pej 6]
Ol elda oli givim advaes we i kamaot long Baebol