Tok Blong Jeova i Wan Samting We i Laef

Ol Bigfala Poen Long Buk Blong Esta

WAN man i mekem plan blong kilim i ded olgeta man Jiu, i luk olsem we plan ya bambae i wokgud. Hem i makemaot wan stret dei blong mekem olsem long olgeta man Jiu we oli stap olbaot long ol kantri ya we king i rul long olgeta, stat long kantri ya India i go kasem kantri ya Itiopia long tingting blong hem, bambae i no moa gat wan man Jiu i stap. Be i gat wan impoten samting we man ya i no tingbaot. Hemia se God i save mekem ol man we Hem i jusumaot, oli fri long ol bigfala trabol we i kasem olgeta. Buk blong Esta long Baebol i tokbaot olsem wanem hem i sevem olgeta.

Wan olfala man Jiu we nem blong hem Modekae, hem nao i raetem buk blong Esta. Buk ya i tokbaot ol samting we oli hapen blong klosap 18 yia, long taem we King ya blong Pesia Sekses (Ahasuerus) i stap rul. Nating se ol man blong Jeova oli stap olbaot long ol bigfala kantri ya we king i rul long olgeta, stori blong buk ya bambae i soemaot olsem wanem Jeova i sevem olgeta long rabis plan ya blong ol enemi blong olgeta. Tru ya, save ya i rili mekem bilif blong ol man blong Jeova tede, we oli mekem wok blong Hem long 235 kantri, i strong. Mo tu, ol man we buk blong Esta i tokbaot, oli givim eksampol we yumi save folem mo hemia we yumi no mas folem. Yes, “Tok blong God i wan samting we i laef, mo i stap wok.”​—Hibrus 4:12.

KWIN I MAS TOKTOK

(Esta 1:1–5:14)

Long namba tri yia (493 B.K.T.) we King Sekses i rul, hem i mekem wan bigfala lafet. Kwin Vasti we plante man oli save hem from we hem i naes tumas i no obei long King Sekses. From samting ya, king i no glad long hem mo i mekem hem i no moa kwin. Long olgeta naesfala gel blong ples ya, oli jusumaot wan gel Jiu we nem blong hem Hadasa blong i tekem ples blong Kwin Vasti. Hadasa i no talemaot se hem i wan gel Jiu from we Modekae i talem long hem finis blong i no talemaot. Taswe, hem i yusum nomo nem blong hem long lanwis Pesia hemia Esta.

Sloslo, king i putumap wan praod man we nem blong hem Haman i kam praeminista. Haman i kros tumas long Modekae from we hem i no ‘nildaon no bodaon long hem.’ Ale, Haman i mekem plan blong kilim i ded olgeta man Jiu we oli stap olbaot long ol kantri we king blong Pesia i rul long olgeta. (Esta 3:2) Haman i pulum King Sekses blong i agri wetem hem nao king i givim raet long hem blong mekem samting we hem i wantem mekem. Modekae i harem nogud tumas, i putum “rabis klos, mo i sakem asis blong faea i go long hed blong hem.” (Esta 4:1) Naoia Esta i mas toktok. Ale Esta i singaot king mo praeminista oli kam kakae long haos blong hem. Tufala i glad tumas blong kam. Nao Esta i askem tufala blong kambak nekis dei long wan narafala kakae bakegen. Haman i harem gud tumas. Be, hem i kros tumas taem Modekae i no wantem ona long hem. Haman i mekem plan blong kilim Modekae i ded bifo we hem i go long kakae ya long nekis dei.

Ansa Blong Sam Kwestin Long Saed Blong Baebol:

1:​3-5​—?Olsem Wanem? ?Lafet ya i stap blong 180 dei? Baebol i no talem se lafet ya i stap longtaem  olsem be i talem nomo se king i stap soemaot long ol haeman ol gudgudfala samting blong ol kantri ya we hem i rul long olgeta mo ol flas samting blong haos blong hem blong 180 dei. Maet king i yusum longfala taem ya jes blong soem paoa blong kingdom blong hem blong pulum ol haeman blong oli luk se hem i naf blong mekem ol plan blong hem oli kamtru. Sipos i olsem, ating vas 3 mo 5 i tokbaot wan lafet blong seven dei we i stap long en blong ol 180 dei ya we ol man oli stap hivap wanples.

1:8​—?Wanem mining blong tok ya se “i fri long olgeta man blong oli dring olsem we oli wantem”? Long lafet ya, King Sekses i jenisim kastom blong ol man Pesia hemia blong makemaot hamas dring ol man oli mas tekem long taem blong ol lafet olsem mo fosem olgeta blong dring kasem mak ya. Wan buk i talem se: “Oli save dring plante no oli save dring smol, olsem we oli wantem.”

1:​10-12​—?From wanem Kwin Vasti i no wantem kam luk king? Sam man blong stadi oli talem se kwin i no wantem obei from we hem i no wantem “stanap long fored blong ol man we king i singaot olgeta i kam long lafet we oli drong. Samting ya bambae i daonem hem tumas.” Narafala risen se, maet kwin ya we i naes tumas i no gat fasin ya blong obei long man blong hem. Baebol i no talem from wanem Vasti i no obei. Be ol waes man long taem ya oli luk fasin ya blong no wantem obei long hasban olsem wan samting we oli mas stretem. Mo tu, oli stap tingbaot se rabis eksampol ya blong Vasti bambae i gat paoa long olgeta waef long ol provins long Pesia.

2:​14-17 (NW )​—?Olsem wanem? ?Esta i mekem nogud fasin long saed blong seks wetem king? Ansa blong kwestin ya se, nogat. Vas ya i talem se long moning oli tekem ol narafala woman we oli bin go luk king oli go stap long namba tu haos blong king, we man blong wok blong king ‘i stap lukaot long ol narafala woman blong king.’ Ol woman we oli stap wetem king long naet ya oli kam ol narafala waef blong king. Long saed blong Esta i defren. Taem Esta i go luk king finis, hem i no moa go stap long haos blong ol narafala waef blong king. Taem oli tekem Esta i go luk king Sekses, “[king] i laekem hem tumas, we olgeta tingting blong hem i go long hem nomo, i winim ol narafala gel ya.” (Esta 2:​17) ?Olsem wanem Esta i mekem se Sekses i “laekem hem tumas”? Hemia long sem fasin nomo we hem i mekem blong ol narafala oli laekem hem. “[Hegae] i laekem Esta tumas, we olgeta tingting blong hem i stap long hem.” (Esta 2:​8, 9) Wan samting we i mekem se Hegae i laekem Esta tumas hemia from we Esta i naes mo hem i gat ol gudfala fasin. Mo tu, “ol man we oli luk hem oli laekem hem tumas.” (Esta 2:15) Sem mak, king i sapraes tumas long gudfala fasin blong Esta taswe hem i laekem hem tumas.

3:2; 5:9​—?From wanem Modekae i no wantem bodaon long Haman? Sipos wan man Isrel i bodaon long wan haeman from hem i luksave haenem blong man ya, man Isrel ya i no mekem rong. Be, long saed blong Haman, i gat sam moa samting we i joen long bisnes ya. Haman i wan man Agag, ating hem i wan laen blong Amalek we Jeova i talem finis se oli mas lus evriwan. (Dutronome 25:19) Modekae i save se sipos hem i bodaon long Haman, hemia i soemaot we hem i no stap tru long Jeova. Hem i talemaot klia se hem i no save bodaon long Haman from hem i wan man blong laen blong Isrel.​—Esta 3:​3, 4.

Ol Lesen Blong Yumi:

2:​10, 20; 4:​12-16. Esta i lesin long tok mo advaes blong wan man we i wosip long Jeova blong longtaem finis. Yumi waes taem yumi ‘ona long ol lida blong yumi, mo yumi obei long ol tok blong olgeta.’​—Hibrus 13:17.

2:11; 4:5. Yumi no mas stap ‘lukaot long ol bisnes blong yumi nomo, be yumi mas stap lukaotgud long ol bisnes blong ol narafala man tu.’​—Filipae 2:​4, NW.

2:​15 (NW ). Esta i soemaot tingting daon mo fasin blong bos long tingting taem hem i no askem blong oli givim ol sas samting olsem ol gol jen, ol sas ston no ol gudfala klos antap long ol samting we Hegae i givim. Samting we i mekem se king i laekem tumas Esta hemia “ol fasin we oli stap haed long hat blong [hem we] oli flasem [hem], olsem klos we oli no save kam nogud samtaem. Hemia ol fasin olsem kwaet fasin mo kaen fasin.”​—1 Pita 3:​4, NW.

2:​21-23. Esta mo Modekae tufala i gudfala eksampol long yumi long fasin ya blong “obei long ol haeman we oli stap rul.”​—Rom 13:​1, NW.

 3:4. Samtaem, i waes blong no talemaot se yumi hu, olsem Esta i mekem. Be, taem yumi mas stanap long saed blong wan impoten samting, olsem hae rul blong Jeova mo fasin blong holemstrong long Jeova, yumi no mas fraet blong talemaot klia se yumi ol Witnes blong Jeova.

4:3. Taem yumi fesem ol traem, yumi mas prea long Jeova blong i givim paoa mo waes long yumi.

4:​6-8. Modekae i lukaot wan rod we i no brekem loa blong stopem plan ya blong Haman, hemia blong kilim i ded ol man Jiu.​—Filipae 1:​7, NW.

4:14. Fasin blong Modekae blong trastem Jeova i wan gudfala eksampol blong yumi.

4:16. From we Esta i trastem Jeova fulwan, hem i stap tru mo i no fraet blong mekem samting we hem i save ded from. I impoten we yumi lanem blong trastem Jeova i bitim we yumi trastem yumi wan.

5:​6-8. Esta i singaot King Sekses blong i kam long wan narafala kakae bakegen, blong mekem se king ya i laekem hem moa. Hem i mekem ol samting wetem waes fasin. Yumi tu yumi mas mekem olsem Esta.​—Ol Proveb 14:15.

WAN BIGFALA JENIS

(Esta 6:1–10:3)

Taem bisnes ya blong Haman i kam long klia ples, samting we i kamaot i defren olgeta long wanem we Haman i plan from. !Oli hangem Haman long pos ya we hem i bin mekem blong hangem Modekae! !Mo Modekae i kam praeminista! ?Olsem wanem long plan ya blong kilim olgeta man Jiu oli ded? Plan ya tu i mas jenis.

Esta i toktok bakegen. Hem i putum laef blong hem long denja taem hem i kam long king mo i askem long hem blong i blokem plan blong Haman. Sekses i save wanem samting blong mekem. Taswe, taem dei blong kilim i ded ol man Jiu i kamtru, ol man Jiu oli no ded be olgeta we oli wantem kilim olgeta nao oli ded. Modekae i givim oda se evri yia bambae oli mekem Lafet blong Purim blong tingbaot fasin fri ya blong ol man Jiu. Olsem praeminista blong King Sekses, Modekae i “wok strong blong mekem ol man ples blong hem oli stap gud, mo blong olgeta we bambae oli  stap kamaot biaen long olgeta oli save stap gud oltaem nomo.”​—Esta 10:3.

Ansa Blong Sam Kwestin Long Saed Blong Baebol:

7:4​—?Olsem wanem plan ya blong kilim i ded ol man Jiu i save mekem ‘trabol long king’? Esta i soemaot long kaen fasin se sipos oli kilim ol man Jiu i ded, samting ya bambae i mekem king i trabol. Bambae i givhan moa long king sipos oli salem olgeta olsem ol slef. Ol 10,000 pis silva [fiftin taosen milian vatu] ya we Haman i promes blong givim i smol, taem yumi skelem wetem mane we king i save kasem sipos Haman i folem plan blong salem ol man Jiu olsem slef. Mo tu, sipos ol plan blong Haman oli kamtru olsem we hem i wantem, bambae kwin tu i mas ded.

7:8​—?From wanem ol man blong king oli kavremap fes blong Haman? Hemia i blong soem se hem i mekem samting blong sem no blong soemaot we trabol bambae i kasem hem i no longtaem. Wan buk i talem se, “samtaem ol man bifo oli kavremap hed blong olgeta we bambae oli kilim olgeta oli ded.”

8:17​—?From wanem ‘plante narafala man oli kam laen blong Isrel’? I luk olsem we plante man Pesia oli joen wetem ol man Jiu olsem ol proselaet, from oli ting se niufala tok we king i talemaot i wan saen se God i glad long ol man Jiu. Samting we i klosap sem mak i hapen taem profet tok blong Sekaraea i kamtru. Hem i talem se: “Ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’ ”​—Sekaraea 8:23.

9:​10, 15, 16​—?From wanem ol man Jiu oli no wantem karem olting blong ol man we oli bin winim olgeta long faet olsem oda blong king i talem? I klia se oli wantem sevem laef blong olgeta nomo, be oli no wantem kasem ol rij samting.

Ol Lesen Blong Yumi:

6:​6-10. “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.”​—Ol Proveb 16:18.

7:​3, 4. ?Olsem wanem? ?Yu yu fraet blong talemaot se yu wan Witnes blong Jeova taem yu save kasem trabol from?

8:​3-6. Yumi mas askem help long ol haeman blong gavman mo long kot blong i protektem yumi long ol enemi blong yumi.

8:5. Esta i lukaotgud se hem i no putum fol long king from oda ya blong kilim i ded ol man Jiu. Sem mak tede, yumi nidim blong lukaotgud long ol toktok blong yumi taem yumi stap prij long ol haeman.

9:22. Yumi no mas fogetem ol puaman.​—Galesia 2:10.

Jeova Bambae i ‘Givhan Mo i Sevem’ Ol Man Blong Hem

Modekae i mekem yumi tingbaot from wanem God i wantem se Esta i kam kwin. Ol man Jiu oli livim kakae blong olgeta mo oli askem help tru long prea taem Haman i agensem olgeta. Kwin i go luk king nating se king i no singaot hem blong kam, mo oltaem king i glad blong luk hem. Long wan impoten naet, King i no save slip. Tru ya, buk blong Esta i soemaot olsem wanem Jeova i save jenisim ol samting we oli kamaot mo wokem rod blong givhan long ol man blong hem.

Ol samting we buk blong Esta i tokbaot oli leftemap tingting blong yumi ya we yumi laef long “taem blong en.” (Daniel 12:​4, NW ) “Long laswan haf blong ol dei,” we hemia laswan haf blong taem blong en, Gog blong Magog​—Devel Setan—​bambae i yusum olgeta paoa blong hem agensem ol man blong Jeova. Mak blong hem i blong finisim olgeta man blong Jeova. Be olsem long taem blong Esta, Jeova bambae i ‘givhan mo i sevem’ ol man we oli mekem wosip long hem.​—Esikel 38:​16-23, NW; Esta 4:14.

[Tok blong pija long pej 28]

Esta mo Modekae i kam stanap long fored blong Sekses