Wokem Tingting Daon We Hem i Truwan
Wokem Tingting Daon We Hem i Truwan
“Ol man we tingting blong olgeta i stap daon, yu yu stap sevem olgeta.”—2 SAMUEL 22:28.
1, 2. ?Wanem samting we i sem mak long saed blong plante bigman blong wol?
OL BIGBIGFALA piramid we ol king blong Ijip bifo oli bin wokem, oli stap yet tede olsem pruf se ol king ya oli bin rul long taem bifo. Sam narafala man we ol buk blong histri oli tokbaot olgeta, hemia Senakerib blong Asiria, Bigfala Aleksanda blong Gris, mo Julias Sisa blong Rom. I gat wan samting we i sem mak long saed blong olgeta man ya we oli bin rulum kantri blong olgeta. Stori blong olgeta i soemaot se oli no gat trufala tingting daon.—Matiu 20:25, 26.
2 ?Ol bigman ya we yumi tokbaot antap, oli gat wanem fasin? ?Yu ting se wan long olgeta ya i aot samtaem long bigbigfala haos blong hem blong traem faenem hu man long kantri blong hem we i nidim help? ?Yu ting se i gat wan long olgeta ya we i bin wokbaot i go long haos blong ol manples blong hem blong leftemap tingting blong olgeta we oli stap harem nogud? !Nogat! !Fasin we ol bigman ya oli mekem long ol parakot man i defren olgeta long fasin blong Jeova God we hem i Haefala Rula blong heven mo wol!
Nambawan Eksampol Blong Tingting Daon
3. ?Haefala Rula blong heven mo wol i gat wanem fasin long ol man blong hem long wol?
3 Yumi no save talem olsem wanem Jeova i hae we i hae. Nating se i olsem, Baebol i talem se hem i “stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kronikel 16:9) ?Jeova i mekem wanem taem hem i faenem we ol man blong hem oli harem nogud, tingting blong olgeta i foldaon from ol traem we oli kasem? Hem i yusum tabu spirit blong hem blong “leftemap tingting blong olgeta, blong tingting blong olgeta i stap strong,” yes, i olsem we hem i “stap wetem” ol man ya. (Aesea 57:15) Long rod ya, ol man blong hem oli kam strong, nao oli save mekem wok blong hem bakegen wetem glad. !Tru ya, hemia i rili soemaot we God i gat tingting daon!
4, 5. (a) ?Wanem tingting blong man blong raetem Sam long saed blong fasin blong God blong rulum man? (b) ?Wanem mining blong tok ya se God i “lukluk i kamdaon” blong halpem ol “puaman”?
4 I no gat wan narafala man long heven no long wol we i putum hem wan i stap daon olsem we Haefala Masta Jeova i mekem blong halpem ol sinman. Man we i raetem Sam ya i save talem stret se: “[Jeova] nomo i stap rulum olgeta man long evri ples. Nem blong hem i hae we i hae, i bitim skae antap. [Jeova] i God blong yumi, mo i no gat man we i olsem hem. Hem i King, i stap sidaon long bigfala jea blong hem long ples blong hem antap, be hem i glad blong lukluk i kamdaon long skae mo graon. Hem i stap leftemap ol puaman, i stap tekemaot olgeta long ol trabol blong olgeta.”—Ol Sam 113:4-7.
5 Yumi makem tok ya “lukluk i kamdaon.” Taem yumi yusum tok ya blong talem fasin we wan man i gat long narafala man, maet hem i save minim wan nogud fasin, from i save saon olsem se man ya i ‘tinghae long hem wan mo i lukluk daon long narafala olsem we oli nating.’ Be fasin flas olsemia i no stret nating long Jeova God, we hem i klin mo i tabu mo fasin blong “flas” i stap longwe tumas long hem. (Mak 7:22, 23) Tok ya “lukluk i kamdaon” i save minim we wan man i lego posisen blong hem no i fogetem haenem no ona we i blong hem, nao i save toktok no givhan long narafala we i daon moa long hem. Taswe, sam Baebol oli tanem tok blong Ol Sam 113:6 se God i mekem tingting blong hem i stap daon. !Tok ya i laenapgud wetem fasin blong God blong yumi we i gat tingting daon! From fasin ya nao hem i rere blong tingbaot nid blong ol man blong hem we oli no stretgud nating.—2 Samuel 22:36.
?From Wanem Jisas i Gat Tingting Daon?
6. ?Wanem samting we i bigfala moa long ol narafala samting we Jeova i mekem we i soemaot fasin daon?
6 Wan long ol bigfala samting we God i mekem from we hem i gat tingting daon mo lav, hemia taem hem i sanem stret Pikinini blong hem we hem i lavem tumas, i bon i kam long wol ya olsem wan man blong sevem ol man long wol. (Jon 3:16) Jisas i tijim yumi long trutok long saed blong Papa blong hem long heven, mo i lego laef blong hem we i stretgud olgeta blong “tekemaot sin blong olgeta man long wol.” (Jon 1:29; 18:37) Jisas i folemgud fasin daon mo olgeta narafala fasin blong Papa blong hem, Jeova. From samting ya hem i rere blong mekem olgeta samting we God i askem hem blong mekem. Hemia beswan eksampol blong fasin daon mo lav. I no gat wan narafala enjel no man we i soemaot fasin daon mo lav we i bigwan olsem Jisas. I no evri man we oli tinghae long fasin blong Jisas blong gat tingting daon. Ol enemi blong hem oli luk hem olsem wan man we i ‘no gat hae nem.’ (Daniel 4:17) Nating se i olsem, aposol Pol i luksave se ol Kristin brata blong hem oli mas folem eksampol blong Jisas mo soem tingting daon taem oli joen mo wok tugeta.—1 Korin 11:1; Filipae 2:3, 4.
7, 8. (a) ?Olsem wanem Jisas i lanem fasin daon? (b) ?Jisas i talem wanem long ol man we bambae oli kam disaepol blong hem?
7 Pol i tokbaot nambawan eksampol we Jisas i soem taem hem i raetem se: “Tingting blong yufala i mas kam stretgud wetem tingting we Jisas Kraes i gat. Fastaem, bifo olgeta, bodi blong hem i olsem bodi blong God, be hem i no ting se hem i mas traehad tumas blong kam olsem we hem i sem mak wetem God, no gat. Hem nomo i lego ol samting blong laet ya, nao i kam olsem man blong wok nomo. Hem i bon long wol ya, i kam olsem man. Mo tu, hem i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long pos.”—Filipae 2:5-8, NW.
8 Be maet samfala oli askem se, ‘?Olsem wanem Jisas i lanem tingting daon?’ Hem i lanem fasin ya from we hem i kampani wetem Papa blong hem long heven blong plante milian yia. Long olgeta yia ya, hem i wok wetem God olsem “man we i mekem ol plan we hem i stap folem” blong wokem olgeta samting. (Ol Proveb 8:30) Afta we faswan man mo woman tufala i brekem loa blong God long garen blong Iden, Fasbon Pikinini blong God i wajemgud fasin we Papa blong hem, we i gat tingting daon, i mekem long ol sinman. Taswe, taem Jisas i stap long wol, hem i soemaot fasin daon olsem Papa blong hem mo i talem long ol man se: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.”—Matiu 11:29; Jon 14:9.
9. (a) ?Wanem samting we Jisas i laekem long ol pikinini? (b) ?Jisas i tekem wan pikinini i kam fored long ol disaepol blong hem blong tijim wanem lesen?
9 From we Jisas i rili gat tingting daon, ol smol pikinini oli no fraet long hem. Defren olgeta, oli harem se oli wantem kam long hem. Hem i soem se hem i laekem ol pikinini mo i intres long olgeta. (Mak 10:13-16) ?Wanem samting we i pulum Jisas blong intres long ol smosmol pikinini? Ating Jisas i luk we ol pikinini oli gat gudfala fasin we sam long ol bigman we oli disaepol blong hem, samtaem oli mestem. Yumi savegud se ol smosmol pikinini oli luk ol bigman olsem se oli hae moa long olgeta. Yu luksave samting ya from ol kwestin we pikinini i askem. Yes, taem yu skelem pikinini wetem bigman, yu luksave se i isi moa blong tijim ol pikinini mo se flas fasin i no bos long olgeta olsem we i bos long tingting blong bigman. Wan taem, Jisas i tekem wan pikinini mo i talem long ol man blong Hem i se: “Sipos yufala i no jenisim fasin blong yufala blong kam olsem pikinini, bambae yufala i no save kam samtaem we God i King blong yufala.” Nao hem i gohed i se: “Man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i King blong olgeta.” (Matiu 18:3, 4) Jisas i talem rul ya se: “Man we hem i stap leftemap hem blong i kam haeman, bambae God i putum hem i stap daon. Be man we tingting blong hem i stap daon, bambae God i leftemap hem i kam haeman tru.”—Luk 14:11; 18:14; Matiu 23:12.
10. ?Wanem ol kwestin we bambae yumi tokbaot?
10 Rul ya we Jisas i talem, i stanemap sam impoten kwestin blong tingbaot. Wan samting we i save halpem yumi blong kasem hop ya blong laef we i no save finis, hemia tingting daon we i truwan. ?Be from wanem i had samtaem blong ol Kristin oli gat tingting daon? ?From wanem i no isi long yumi blong daonem fasin praod mo fesem ol traem blong yumi wetem tingting daon? ?Mo wanem bambae i halpem yumi blong wokem tingting daon long laef blong yumi?—Jemes 4:6, 10.
?From Wanem i Had Blong Gat Tingting Daon?
11. ?From wanem yumi no sapraes se i hadwok blong gat tingting daon?
11 Sipos yu yu faenem i had blong wokem tingting daon, yu no mas ting se yu wan nomo i olsem. Long yia 1920, magasin ya Wajtaoa i tokbaot advaes blong Baebol se yumi mas wokem tingting daon, i se: “Taem yumi luk olsem wanem Masta blong yumi i rili tinghae long fasin daon, samting ya i mas pulum ol trufala disaepol blong oli traem wokem fasin ya evri dei.” Afta long toktok ya oli raetem se: “Nating se Baebol i givim plante plante advaes long saed blong fasin ya, i luk olsem se ol sinman we oli kam man blong Masta mo we oli tekem desisen blong wokbaot folem hem, oli faenem i had moa, mo oli nid blong faet strong moa, blong wokem tingting daon i bitim ol narafala fasin.” Hemia i soemaot klia wan risen from wanem ol trufala Kristin oli mas faet strong blong gat tingting daon—from we yumi sinman yumi wantem tumas blong kasem haenem mo ona. Hemia from we yumi ol pikinini blong Adam mo Iv, we tufala i pasem sin i kam long yumi. Tufala i tingbaot tufala nomo, nao tufala i letem fasin ya i winim tufala.—Rom 5:12.
12, 13. (a) ?From wanem wol ya i mekem i had long ol Kristin blong gat tingting daon? (b) ?Hu i mekem se i hadwok moa blong yumi wokem tingting daon?
12 Wan narafala risen from wanem i hadwok blong gat tingting daon, hemia se yumi stap long wan wol we ol man blong hem oli wantem kam hae moa long ol narafala. Ol man blong wol ya oli wokhad blong kasem ol samting we ‘tingting blong olgeta i wantem, mo ol samting we ae blong olgeta i luk, mo blong flas tumas long ol samting we oli gat.’ (1 Jon 2:16) Ol disaepol blong Jisas oli no letem ol samting ya i bos long laef blong olgeta. Oli mekem ae blong olgeta i kliagud mo i stap nomo long ol samting we God i wantem olgeta blong mekem.—Matiu 6:22-24, 31-33; 1 Jon 2:17.
13 Namba tri risen from wanem i had blong wokem mo soemaot tingting daon, hemia se stamba blong flas fasin, hemia Devel Setan, i stap rulum wol ya. (2 Korin 4:4; 1 Timoti 3:6) Setan i traem pulum ol man blong karem ol rabis fasin blong hem. Hem i rere blong givim ‘olgeta kantri blong wol ya wetem ol gudgudfala samting we oli gat’ i go long Jisas sipos Jisas i wosipim hem. Be Jisas we tingting blong hem i stap daon oltaem, i sakemaot tingting ya blong Setan. (Matiu 4:8, 10) Long sem fasin, Setan i traem pulum ol Kristin blong oli wantem kasem haenem. Be ol Kristin we oli gat tingting daon oli traem folem eksampol blong Jisas blong leftemap mo ona long nem blong God.—Mak 10:17, 18.
Wokem Mo Soemaot Trufala Tingting Daon
14. ?Wanem ya “giaman fasin blong stap daon”?
14 Aposol Pol i raetem wan leta i go long ol man Kolosi mo i givim woning long olgeta blong lukaot long giaman tingting daon we man i soem nomo blong flas long fored long narafala. Pol i tokbaot fasin ya se hem i “giaman fasin blong stap daon.” Ol man we oli mekem olsem se oli gat tingting daon, oli no rili man we tingting blong olgeta i stap long ol samting long saed blong spirit. Defren olgeta, fasin ya we oli stap giaman long hem i soemaot klia se rili fasin blong olgeta hemia se oli “flas” tumas. (Kolosi 2:18, 23, NW ) Jisas i tokbaot eksampol blong samfala we oli gat giaman tingting daon ya. Hem i tok agensem ol Farisi from we oli mekem ol longlongfala prea blong soem olgeta, mo oli stap mekem fes blong olgeta i kam nogud blong ol man oli luksave se oli livim kakae blong olgeta. Sipos yumi wantem we God i tinghae long ol prea blong yumi, yumi mas prea wetem tingting daon.—Matiu 6:5, 6, 16.
15. (a) ?Yumi save mekem wanem blong holemtaet fasin daon? (b) ?Wanem sam gudfala eksampol blong fasin daon?
15 Samting we i halpem ol Kristin blong holem trufala fasin daon, hemia taem oli tingting oltaem long beswan eksampol blong tingting daon, Jeova God mo Jisas Kraes. Blong mekem olsem, oli mas stadi Baebol oltaem mo ridim ol buk we “slef ya we i stret mo waes” i givim blong stadi long Baebol. (Matiu 24:45, NW ) I impoten we ol Kristin elda oli gat fasin blong stadi olsem, from we ‘samting ya bambae i save blokem olgeta blong oli no tingbaot se oli hae moa i winim’ ol brata blong olgeta. (Dutronome 17:19, 20; 1 Pita 5:1-3) Tingbaot eksampol blong olgeta ya we God i blesem olgeta from we oli gat tingting daon, olsem Rut, Hana mo Elisabet, mo plante narawan bakegen. (Rut 1:16, 17; 1 Samuel 1:11, 20; Luk 1:41-43) Mo tu, tingbaot nambawan eksampol blong ol man ya we oli mekem wok blong Jeova wetem tingting daon nating se oli holem bigfala wok, olsem Deved, Josaea, Jon Baptaes, mo aposol Pol. (2 Kronikel 34:1, 2, 19, 26-28; Ol Sam 131:1; Jon 1:26, 27; 3:26-30; Ol Wok 21:20-26; 1 Korin 15:9) Mo i gat plante stori blong ol man mo woman long Kristin kongregesen tede tu we oli soemaot gudfala eksampol blong tingting daon. Sipos ol trufala Kristin oli tingting dip long ol eksampol ya, samting ya i save halpem olgeta blong ‘mekem tingting blong olgeta i stap daon blong givhan gud long narafala.’—1 Pita 5:5.
16. ?Olsem wanem Kristin wok blong prij i halpem yumi blong gat tingting daon?
16 Fasin blong joen oltaem long Kristin wok blong prij, hemia tu i save halpem yumi blong gat tingting daon. Tingting daon i save givhan long yumi taem yumi prij long ol haos wanwan no long narafala ples, blong yumi save olsem wanem blong toktok wetem ol man we yumi no save olgeta nating. Mo hemia i tru moa taem ol man we yumi mitim oli no wantem lesin long gud nius blong Kingdom, no maet oli tok nogud long yumi. Plante taem ol man oli agensem ol bilif blong yumi, ale tingting daon i save halpem yumi blong ‘toktok gud long olgeta mo ona long olgeta’ taem hem i ansa long kwestin blong olgeta. (1 Pita 3:15) Sam man blong God we oli gat tingting daon, oli muv i go long ol niufala teritori mo oli halpem ol man we kalja mo fasin blong laef blong olgeta i defren. Ol Kristin man ya oli nidim tingting daon taem oli lanem wan narafala lanwis blong kam naf blong serem gud nius wetem ol man. !Yumi glad from traehad we olgeta ya oli mekem!—Matiu 28:19, 20.
17. ?Wanem ol Kristin wok we i nidim tingting daon blong mekem?
17 Plante narafala brata mo sista oli gat tingting daon blong mekem ol Kristin wok blong olgeta we i blong tingbaot narafala fastaem long olgeta. Eksampol, wan Kristin papa i mas gat tingting daon blong i save tekemaot taem long ol wok blong hem blong rerem mo mekem Baebol stadi wetem ol pikinini blong hem. Mo taem ol pikinini oli gat tingting daon, samting ya i halpem olgeta tu blong gat respek mo obei long papa mama blong olgeta, we tufala i no stretgud olgeta. (Efesas 6:1-4) Ol sista we man blong olgeta i no stap long trutok, oli fesem plante defdefren kaen traem. Oli nidim tingting daon blong winim ol traem ya mo blong pulum ol man blong olgeta blong laekem trutok from ‘fasin we i klin gud, mo we i soem ona.’ (1 Pita 3:1, 2) Tingting daon mo lav we i pulum man blong no tingbaot hem wan, hemia sam nambawan fasin tu we yumi nidim taem yumi mas kea long wan sikman mo long olfala papa mama blong yumi.—1 Timoti 5:4.
Tingting Daon i Winim Ol Problem
18. ?Olsem wanem tingting daon i save halpem yumi blong winim ol problem?
18 Olgeta man blong God oli no stretgud olgeta. (Jemes 3:2) Samtaem, tu Kristin maet tufala i no agri long sam samting no maet wan i no kasem save long fasin no toktok blong narafala. Maet wan long tufala i harem nogud from we narafala i bin mekem i nogud long hem. Plante taem, taem samting olsem i kamaot, yumi save stretem problem sipos yumi folem advaes ya: “Yufala i no mas hareap blong kros long narafala, mo taem wan long yufala i gat poen agens long narawan, yufala i mas rere oltaem blong fofogivim yufala. Jeova i rere oltaem blong fogivim yufala, nao yufala tu i mas mekem sem mak.” (Kolosi 3:13, NW ) I sua se i no isi blong folem advaes ya, be tingting daon bambae i halpem yumi blong traem mekem advaes ya i wok.
19. ?Yumi mas tingbaot wanem taem yumi go toktok wetem wan we i mekem nogud long yumi?
19 Samtaem wan Kristin i gat wan risen we i stret blong komplen from we samting we narafala i mekem long hem i rili nogud. Ale, tingting daon bambae i halpem Kristin ya blong go luk narafala we i mekem i nogud long hem mo traem mekem pis wetem hem bakegen. (Matiu 18:15) Wan risen from wanem samtaem ol problem bitwin tu Kristin oli gohed longtaem, hemia from we tufala i flas tumas blong luksave rong blong tufala. No maet hemia we i go luk narawan blong toktok wetem hem, i mekem long wan fasin we i blong soem se hem i moagud i bitim narawan ya mo i agensem hem. Defren olgeta, trufala fasin daon i save givhan bigwan blong stretem ol smosmol problem olsem.
20, 21. ?Wanem wan long ol beswan samting we i save halpem yumi blong gat tingting daon?
20 Wan stamba samting we i save halpem yumi blong wokem tingting daon, hemia taem yumi prea blong God i halpem yumi mo i givim tabu spirit blong hem long yumi. Be tingbaot samting ya se, “olgeta we tingting blong olgeta i stap daon, [God] i stap givhan long olgeta” mo i givim tabu spirit tu long olgeta. (Jemes 4:6) Taswe, sipos yu gat wan smol problem wetem wan brata no sista, i gud yu prea long Jeova blong i halpem yu blong gat tingting daon blong talemaot mastik we yu wan yu mekem we maet hem i smol no i bigwan. Sipos narafala i mekem yu yu harem nogud mo naoia hem i rili talem sori long yu, ale yu yu mas gat tingting daon tu blong fogivim hem. Sipos i had long yu blong mekem olsem, yu mas prea long Jeova blong i halpem yu blong sakemaot eni smosmol flas tingting we i stap long hat blong yu.
21 Taem yumi kasem save wanem blesing i kamaot from we yumi gat tingting daon, samting ya i mas pulum yumi blong wantem wokem mo holemtaet fasin ya we i sas tumas. !Blong mekem olsem, yumi gat nambawan eksampol blong Jeova God mo Jisas Kraes! I gud yumi neva fogetem tok ya we i kamaot long God we i se: “Man we i obei long Hae God, mo i mekem tingting blong hem i stap daon, hem bambae i kam rijman. Bambae hem i gat longfala laef, mo ol man bambae oli ona long hem.”—Ol Proveb 22:4.
Tingting Dip Long Ol Poen Ya
• ?Hu ol beswan eksampol blong fasin daon?
• ?From wanem i no isi blong wokem tingting daon?
• ?Wanem sam samting we oli save halpem yumi blong gat tingting daon?
• ?From wanem i impoten blong holem tingting daon?
[Kwestin]
[Tok blong pija long pej 26]
Jisas i gat trufala fasin daon
[Tok blong pija long pej 28]
Wol ya i pulum ol man blong traehad blong kam hae moa long narafala
[Credit Line]
WHO photo by L. Almasi/K. Hemzǒ
[Tok blong pija long pej 29]
Tingting daon i halpem yumi blong storian wetem enikaen man long wok blong prij
[Tok blong pija long pej 30]
Plante taem yumi save stretem ol smosmol problem blong yumi wetem narafala sipos yumi gat tingting daon mo letem lav i lidim yumi
[Tok blong pija long pej 31]
I gat plante rod blong wan Kristin i save soem tingting daon