“Oli No Lego Bilif Blong Olgeta”

JISAS i talem long ol man blong hem se: “Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud.” (Matiu 5:11) Tede, ol Witnes blong Jeova oli glad from we oli folem tijing mo eksampol blong Kraes se oli “no man blong wol” mo oli no joen long politik blong wol ya. Oli stap tru long God nomo, nomata wanem samting i hapen long laef blong olgeta.​—Jon 17:14; Matiu 4:​8-10.

Toomas Paul i wan Luteran we i stadi long bilif blong ol jos mo i man blong tanem Baebol tu. Hem i raetem buk ya Kirik keset küla (Jos We i Stap Long Medel Blong Vilej) mo long buk ya hem i tokbaot ol Witnes blong Jeova long Soviet Yunion, wetem olgeta long Estonia tu mo olsem wanem oli holemstrong long bilif blong olgeta. Hem i se: “I no gat plante man oli save samting ya we i bin hapen long eli moning blong Eprel 1, 1951. [Gavman] i mekem plan blong ronemaot olgeta Witnes blong Jeova wetem ol man ya tu we oli stap biaenem ol Witnes​—olgeta evriwan i gat 279 man we oli arestem mo sanem olgeta i go long Saebiria . . . Oli givim janis long ol Witnes se sipos oli no wantem go kalabus oli mas saenem wan pepa we i talem se oli lego bilif blong olgeta. . . . Namba blong olgeta evriwan, wetem sam narafala we oli holem olgeta fastaem finis, i kasem 353 man, mo long namba ya i gat 171 man we oli stap joen nomo wetem ol kongregesen blong ol Witnes be oli no baptaes yet. Oli no lego bilif blong olgeta​—nating se oli stap long Saebiria be oli gohed yet blong holemstrong long bilif. . . . I no gat plante memba blong [Jos ya Luteran blong Estonia] we oli gat bilif olsem ol Witnes blong Jeova.”

Ol Witnes blong Jeova raonabaot long wol oli trastem God se, bambae hem i halpem olgeta blong obei mo holem bilif long hem, nating we ol man oli mekem i nogud long olgeta. Oli glad from we oli save se blesing we bambae oli kasem from we oli holem strong long bilif i bigwan.​—Matiu 5:12.