Saens Mo Baebol—?Tufala i Rili Agensem Tufala?

OL SAMTING we oli mekem wan rao i kamaot bitwin Galileo mo Katolik Jos oli stat plante handred yia bifo we Copernicus mo Galileo tufala i bon. Ol man Gris bifo oli akseptem bilif ya se ol planet oli stap goraon long wol. Mo biaen, wan waes man blong wol, nem blong hem Aristotle (384-322 B.K.T. *) wetem wan man blong stadi mo talemaot fiuja from ol sta, Ptolemy (hem i laef long ol yia 100 B.K.T.), tufala i talemaot bilif ya long ol man. *

Tingting blong Aristotle long saed blong yunivas i stanap long tingting blong wan waes man blong wol, wan man Gris we i gat bigfala save long matematik, nem blong hem Pythagoras (hem i laef long ol yia 500 B.K.T.). Pythagoras i talem se ol samting we oli raon oli stretgud olgeta. Aristotle i agri wetem tingting ya, taswe hem i bilif se skae i olsem plante samting we oli raon, we wan i stap insaed long narawan olsem skin blong anian. Hem i ting se oli wokem evri raon ya long wan glas we i saen gud, mo se wol i stap long medel blong olgeta stret. Ol sta oli stap goraon, mo paoa we i pusum olgeta i kamaot long raon we i stap afsaed olgeta, hemia ples we paoa blong God i stap. Aristotle i talem tu se san mo ol narafala planet long skae oli stretgud, i no gat mak long olgeta, mo oli no save jenis.

Tingting ya blong Aristotle i stanap long waes blong ol man blong wol, i no stanap long saens. Hem i  talem se i krangke nomo blong ting se wol i save muvmuf. Mo tu, hem i no ting se i gat spes no emti ples i stap raon long wol. Hem i ting se sipos wol i stap muvmuf bambae i mas kilim no bangem sam samting, ale bambae i stop sipos i no gat wan strong paoa i stap pusum hem oltaem. Long taem blong Aristotle, ol man oli no gat plante save, taswe oli ting se Aristotle i talem tru, mo oli gohed blong bilivim tingting ya blong klosap 2,000 yia. Long ol yia 1500 K.T., * wan waes man blong Franis, Jean Bodin, i talemaot tingting we plante man oli gat se: “Ol man we oli gat stret tingting mo oli gat save long ol paoa raonabaot long yumi, oli no save ting se wol ya, we i hevi tumas blong muvum . . . , i stap . . . tanem hem wan mo i stap goraon long san; from we sipos wan samting i jokem wol ya smol nomo, be bambae ol bigfala taon, ol strong haos, mo ol bigfala hil oli foldaon wantaem.”

Jos i Agri Wetem Aristotle

Wan narafala samting we i mekem se rao i kamaot bitwin Galileo mo Jos i hapen long ol yia 1200. Wan lida blong Katolik jos, Thomas Aquinas (1225-1274), i gat bigfala respek long Aristotle, i singaotem hem se ‘Bigfala Waes Man.’ Blong 5 yia, Aquinas i traehad blong joenem ol tingting blong Aristotle wetem tijing blong Katolik jos. Wade Rowland i talem long buk blong hem Galileo’s Mistake, se taem Galileo i stap laef, “tingting blong Aquinas we i joenem ol tingting blong Aristotle wetem ol bilif blong jos, i kam olsem stamba tijing blong Jos blong Rom.” Mo yu mas rimemba tu se, long taem ya, i no gat ol man we oli joen tugeta olgeta nomo blong stadi long saens. Jos nao i bos long bighaf blong edukesen we ol man oli kasem. Mo plante taem, olgeta we oli bos long jos oli bos long saens tu.

Ol samting ya nao i mekem se jos i agensem Galileo. Bifo we Galileo i stadi long ol sta, hem i bin raetem wan pepa blong tokbaot ol sta we oli muvmuf. Pepa ya i agensem plante tingting blong Aristotle, nating se fulap man oli gat bigfala respek long hem. Be i no hemia we i mekem se Inkwisisin i jajem Galileo long yia 1633. Kot ya i jajem Galileo from we hem i strong blong talem se wol wetem ol planet oli stap goraon long san, mo tu, hem i talem se tingting ya i laenap wetem Baebol.

Blong pruvum toktok blong hem, Galileo i talem se hem i bilif strong long Baebol olsem Tok blong God. Mo tu hem i talem se oli raetem Baebol blong ol man olbaot nomo oli ridim, taswe, taem Baebol i tokbaot san we i muf, hem i no minim samting ya stret, be i gat wan narafala mining. Be ol toktok blong Galileo i blong nating nomo. !Ol lida blong jos oli jajem Galileo from we hem i no agri wetem olgeta ya we oli eksplenem Baebol folem bilif blong ol waes man blong Gris! Long 1992 nomo, Katolik Jos i talemaot long fored blong olgeta man se oli mekem wan mastik taem oli panisim Galileo.

Ol Lesen Blong Yumi

?Yumi lanem wanem samting from? Wan samting, se Galileo i trastem Baebol be hem i no trastem ol tijing blong jos. Wan man blong raetem buk long saed blong jos i talem se: “Sipos i gat wan samting we yumi save lanem from Galileo, hemia se, Jos i no strong blong folem ol trutok blong Baebol; defren olgeta, hem i no folem gud nating ol trutok ya.” Ol lida blong jos oli letem ol tijing blong ol waes man blong Gris oli gat paoa long ol bilif blong jos. Taswe oli folem ol kastom blong man, i no ol tijing blong Baebol.

Samting ya i pulum yumi blong rimemba wan woning blong Baebol we i talem se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.”​—Kolosi 2:8.

Long taem blong yumi yet, plante man long Krisendom oli folem ol tijing blong ol waes man blong wol we oli agensem Baebol. Wan eksampol: tingting blong Darwin long saed blong evolusen * i agensem buk blong Jenesis we i talem se God i wokem olgeta samting.  Taem ol jos oli akseptem tingting ya blong Darwin, oli putumap hem olsem wan narafala Aristotle, mo bilif long evolusen i kam wan bilif blong jos. *

Trufala Saens i Laenap Wetem Baebol

Be samting ya i no mas stopem yu blong soem intres long saens. Baebol hem wan i pulum yumi blong luklukgud ol wok blong God, mo luksave ol nambawan fasin blong Jeova tru long ol wok ya. (Aesea 40:26; Rom 1:20) I tru, Baebol i no wan buk blong saens. Hem i tokbaot ol tingting blong God, ol fasin blong hem we yumi no save luk tru long ol samting we hem i wokem nomo, mo Baebol i eksplenem stamba tingting blong God long saed blong ol man. (Ol Sam 19:​7-11; 2 Timoti 3:16) Be taem Baebol i tokbaot ol samting long saed blong saens, ol tok blong hem oli stret. Galileo hem wan i talem se: “God i wokem Baebol, mo Hem i wokem ol samting raonabaot long yumi tu . . . Tufala i no save agensem tufala.” Lukluk ol eksampol we oli kam biaen.

Naoia yumi save olsem wanem ol planet mo ol sta oli muvmuf. Be antap long hemia, yumi save we olgeta samting long yunivas oli obei long ol loa, olsem loa ya blong graviti. * Hanraet long saed blong ol loa ya, we i olfala moa long ol narafala hanraet we oli no stap insaed long Baebol, man ya Pythagoras i raetem. Man ya i bilif se matematik i save eksplenem olsem wanem ol sta mo ol planet oli muvmuf. Tu taosen yia biaen, Galileo, Kepler, mo Newton, trifala i jes pruvum se ol samting we yumi save lukluk mo tajem oli stap obei long ol loa.

Long Baebol, hanraet we i olfala moa blong tokbaot ol loa we oli lidim yunivas, hemia buk blong Job. Samwe long 1600 B.K.T., God i askem long Job se: “?Yu yu savegud ol loa we i holem ol samting long skae?” (Job 38:33) Jeremaea i raetem buk blong hem long ol yia 600 B.K.T. Long buk ya, hem i tokbaot Jeova olsem God ya we i wokem “ol loa blong mun mo blong ol sta,” mo ‘ol loa blong holem skae mo wol.’ (Jeremaea 31:​35, NW; 33:25) Folem ol vas ya, wan man blong eksplenem Baebol, G. Rawlinson, i talem se: “Baebol mo saens tugeta  i talem strong se ol loa oli rulum graon mo skae.”

Sipos yumi skelem toktok blong Pythagoras wetem toktok blong Job, yumi luk we tok blong Job i stret finis bitim 1000 yia bifo we Pythagoras i faenemaot trutok ya. Rimemba se God i no raetem Baebol blong tijim yumi long saens, be hem i wantem pulum yumi blong bilif se Hem [Jeova] i God ya we i wokem olgeta samting, God ya we i naf blong putumap ol loa blong ol samting long heven mo wol oli folem.​—Job 38:​4, 12; 42:​1, 2.

Yumi save tingbaot wan narafala eksampol, hemia long saed blong wota we i muf raon oltaem long wol. Blong talem long wan fasin we i isi blong kasem, yumi save eksplenem olsem: san i pulum solwota i kam antap olsem smok, i mekem ol klaod, nao wota ya i foldaon bakegen long graon olsem ren, mo biaen hem i ron i gobak long solwota. Hanraet we i olfala moa long ol narawan we oli no stap long Baebol, mo we i eksplenem samting ya, ol man oli raetem long ol yia 300 B.K.T. Be plante handred yia bifo long hanraet ya, Baebol i eksplenem finis olsem wanem san i pulum wota i go antap mo i foldaon bakegen long wol. Long ol yia 1000 B.K.T., King Solomon blong Isrel i raetem se: “Oltaem ol reva oli stap ron i godaon long solwota, be solwota i stap sem mak nomo, i no kam fulap we i bitim mak. Oltaem nomo, wota i stap gobak long ples we i kamaot long hem fastaem, nao i folem rod blong hem, i stap ron i godaon bakegen.”​—Prija 1:7.

Long sem fasin, samwe long ol yia 800 B.K.T. profet Amos, wan man we i lukaot long ol sipsip mo i wok long fam, i talem se Jeova “i gat paoa blong singaot solwota i go antap, i kam klaod, mo blong mekem i kam ren, i foldaon bakegen long wol.” (Amos 5:8) Solomon mo Amos, tufala i no yusum ol tok blong saens we i had tumas blong kasem save long hem, be tufala wanwan i yusum defdefren fasin blong eksplenem olsem wanem san i pulum wota i go antap mo i foldaon bakegen long wol.

Baebol i talem tu se God “i putum wol ya i hang long open ples nomo aninit long [skae].” (Job 26:7) Long taem we oli raetem ol tok ya, samwe long ol yia 1600 B.K.T., ol man oli no gat plante save long saens. Wan man we i talem se wol i save hang long open ples, we i no gat wan samting i holem hem, man ya i mas waes tumas. !Olsem yumi luk finis, nating se Aristotle i laef bitim 1,200 yia afta long Job, be hem i no bilif se i gat wan open ples raon long wol!

Ating yu yu sapraes blong luk we Baebol i talem ol nambawan trutok long saed blong saens, nating se long taem ya, ol man oli bilivim ol tijing blong ol man blong saens we oli rong olgeta. Ol man we oli tingting gud, oli luksave se hemia i pruvum se Baebol i no kamaot long ol man nomo, be God nao i pulum ol man blong raetem Baebol. Taswe, yumi mas waes mo yumi no mas letem wan tijing no wan tingting we i agensem Baebol i gat paoa long yumi. Plante taem tru long histri, yumi luk we ol tingting blong ol waes man blong wol oli kam antap blong smoltaem, be biaen oli lus. Defren olgeta, “tok blong Hae God bambae i stap oltaem, gogo i no save finis.”​—1 Pita 1:25.

[Ol Futnot]

[Bokis/Foto blong pija long pej 4]

Tingting Blong Ol Protestan

Ol lida we oli statem Protestan jos tu oli agensem bilif ya se ol planet oli stap goraon long san. Long ol lida ya, i gat Martin Luther (1483-1546), Philipp Melanchthon (1497-1560), mo John Calvin (1509-1564). Luther i tokbaot Copernicus i talem se: “Krangke man ya i wantem jenisim olgeta save blong ol saentis we oli stadi long ol sta.”

Ol man ya we oli statem Protestan skul oli tekem sam vas long Baebol, nao oli yusum ol vas ya blong traem sapotem tingting ya se san wetem ol sta oli stap goraon long wol. Eksampol, oli yusum stori long buk blong Josua japta 10, we i talem se san mo mun tufala i “no moa muv.” * ?Be from wanem ol Protestan oli strong long tingting ya? Buk ya Galileo’s Mistake i talem se ol Protestan oli seraot long Katolik jos, be oli no save “kamfri long ol stamba tingting” blong Aristotle mo Thomas Aquina, we “ol Katolik mo ol Protestan tugeta” oli bilivim.

[Futnot]

[Ol Foto]

Luther

Calvin

[Credit Line]

From the book Servetus and Calvin, 1877

[Tok blong pija long pej 4]

Aristotle

[Credit Line]

From the book A General History for Colleges and High Schools, 1900

[Tok blong pija long pej 5]

Thomas Aquinas

[Credit Line]

From the book Encyclopedia of Religious Knowledge, 1855

[Tok blong pija long pej 6]

Isaac Newton

[Tok blong pija long pej 7]

Bitim 3,000 yia bifo, Baebol i eksplenem finis olsem wanem san i pulum wota i go antap mo i foldaon bakegen long wol