Paoa We Jisas i Gat Long Ol Man Long Fulwol
Paoa We Jisas i Gat Long Ol Man Long Fulwol
EDGAR Goodspeed wan man blong tanem Baebol i go long narafala lanwis i talem se: “Olgeta samting we ol gospel oli talem se Jisas i tijim long ol man long pablik no long ol aposol blong hem nomo, hem i save talem long tu aoa nomo. . . . Nating we ol tijing ya oli sot nomo, be yumi save talem se oli rili kasem hat blong ol man mo gat paoa long laef blong olgeta. I no gat narafala man we toktok blong hem i gat bigfala paoa olsem ya long plante man long wol.”
Taem Jisas Kraes i finisim minista wok blong hem long wol ya long yia 33 K.T., * i gat klosap 120 man mo woman we oli biaen long hem. (Ol Wok 1:15) Tede, i gat bitim tu bilian man we oli talem se oli Kristin. Plante handred milian man bakegen oli luksave Jisas olsem wan profet. Tru ya, ol tijing blong hem oli gat spesel paoa long laef blong ol man.
Ol lida we oli no Kristin, olgeta tu oli luksave paoa we Jisas i gat long laef blong ol man long fulwol. Wan rabae, no tija, blong ol man Jiu, nem blong hem Hyman Enelow, i raetem se: “Plante man oli save Jisas, oli stadi moa long hem i bitim narafala man, mo hem i gat moa paoa long laef blong man i bitim ol narafala man we ol defdefren kaen skul oli tinghae long olgeta.” Masta Enelow i talem tu se: “Jisas nomo i gat paoa long laef blong ol man long fulwol. Hem i soemaot lav, hem i kea long ol man, i mekem i gud long ol man, i givim glad mo hop long olgeta—i no gat narafala man long wol ya we i mekem olsem. I gat plante haeman mo gudfala man tu we oli wokbaot long wol ya, be i no gat wan nating we i gat paoa long laef blong ol man olsem we Jisas i gat long wol. Hem nomo wan man long histri we olgeta man oli intres tumas long hem.” Wan lida blong ol man Hindu, nem blong hem Mohandas K. Gandhi, i talem se: “Mi no save wan narafala man bakegen we i olsem Jisas, we i mekem i gud long olgeta man. Tru ya, i no gat wan samting i rong long Kristin skul.” Be, hem i talem se: “Yufala ol Kristin man, yufala nao i mekem trabol. Fasin blong yufala i no laenap nating wetem ol tijing we yufala i stap tijim.”
Longtaem finis ol skul we oli talem se oli Kristin oli no laef folem ol tijing blong Jisas. Wan man blong raetem histri long saed blong Kristin skul, nem blong hem Cecil John Cadoux, i talem se ol lida we oli laef raonabaot long ol yia 140 K.T., oli bin luk finis olsem wanem sloslo ol jos oli kam slak blong folem ol gudfala fasin. Hem i talem tu se: “From we oli kam slak blong folem ol gudfala fasin, samting ya nao i mekem se sloslo fasin blong olgeta i gobak folem fasin blong wol ya.”
Long ol yia 300 K.T. ol rabis fasin oli kam antap moa, taem Hedgavman blong Rom, Constantine, i kam wan Kristin. Masta Cadoux i raetem se: “Ol man blong raetem histri oli luk ol samting we i hapen mo oli sore tumas long fasin ya we Jos i rere blong brekem sam Kristin rul blong mekem kontrak wetem Constantine.” Long ol handred yia we oli kam biaen, ol man we oli talem se oli Kristin, oli mekem fulap rabis samting we i no ona nating long nem blong Kraes.
Taswe, sam kwestin blong tingbaot se: ?Jisas i rili tijim wanem? ?Mo olsem wanem ol tijing ya i mas gat paoa long laef blong yumi?
[Futnot]
^ K.T. i minim Kristin Taem.
[Tok blong pija long pej 3]
“Mi no save wan narafala man bakegen we i olsem Jisas, we i mekem i gud long olgeta man.”—Mohandas K. Gandhi
[Tok blong pija long pej 3]
“I no gat narafala man we toktok blong hem i gat bigfala paoa olsem ya long plante man long wol.”—Edgar Goodspeed
[Credit Line]
Culver Pictures