Laef Stori

Mifala i Lan Blong Trastem Jeova Fulwan

NATALIE HOLTORF I TALEM STORI YA

Wan dei, long manis Jun 1945, i gat wan man we i luk olsem se i sik, i stanap long fored long doa blong haos blong mifala. Ruth, smol gel blong mi i sek mo i singaot se: “!Mama, i gat wan strenja i stanap long doa!” Hem i no save se strenja ya hem i papa blong hem​—gudfala man blong mi, we nem blong hem Ferdinand. Tu yia bifo, Ferdinand i lego hom, ol polis oli holem hem, mo oli tekem hem i go long kamp blong ol Nasi, hemia tri dei nomo afta we Ruth i bon. Be naoia Ruth i luk papa blong hem, mo famle blong mifala i joen bakegen. !Mi mo Ferdinand i gat plante samting blong tokbaot!

FERDINAND i bon long 1909 long taon ya Kiel long Jemani, mo mi tu, mi bon long Jemani, long taon ya Dresden long 1907. Taem mi mi gat 12 yia, famle blong mi i mitim ol Baebol Studen, hemia nem blong ol Witnes blong Jeova bifo. Taem mi gat 19 yia, mi lego Ivanjelikal Jos mo mi givim laef blong mi i go long Jeova.

Long sem taem, Ferdinand i kasem setifiket long haeskul mo i kam wan boskru long sip. Taem hem i stap long sip, hem i tingting plante long kwestin ya se i gat wan God i stap no nogat. Taem Ferdinand i kambak long Jemani, hem i go luk brata blong hem we i wan Baebol Studen. Taem Ferdinand i go luk brata blong hem, hem i storian wetem hem long Baebol mo Ferdinand i luksave se Baebol i gat ansa long ol kwestin we i fasfas long tingting blong hem. Hem i lego jos ya Luteran, mo tu hem i gat strong tingting blong lego wok ya blong hem olsem wan boskru. Long faswan dei we hem i joen long wok blong prij,  hem i harem se hem i rili laekem blong mekem wok ya long ful laef blong hem. Long semfala naet, Ferdinand i givim laef blong hem i go long Jeova. Ale, long Ogis 1931 hem i tekem baptaes.

Wan Boskru Mo Wan Man Blong Prij

Long Novemba 1931, Ferdinand i tekem tren i go long Netalan blong givhan long wok blong prij longwe. Taem Ferdinand i talemaot long brata we i lukaot long wok blong prij long kantri ya se bifo hem i wok olsem wan boskru, brata i talem se: “!Mifala i nidim man olsem yu ya nao!” Ol brata long ples ya oli bin rentem wan bot blong mekem se wan grup blong ol paenia oli save go prij long ol man we oli laef long not blong kantri ya. Oli jusum faef man blong go long bot ya, be i no gat wan long olgeta we i save blong stiarem bot. Taswe Ferdinand i kam kapten long bot ya.

Sikis manis biaen, Ferdinand i go mekem wok blong paenia long Tilburg long saot blong Netalan. Long taem ya tu, mi mi kam long Tilburg blong mekem wok blong paenia, mo mi mitim Ferdinand. Be kwiktaem nomo biaen, oli askem mitufala blong muv i go long Groningen, long not blong kantri ya. !Mitufala i mared long ples ya, long Oktoba 1932, mo mitufala i serem haos wetem sam narafala paenia! !Mitufala i statem ol faswan dei blong mared laef blong mitufala mo paenia long sem taem!

Long 1935, gel blong mitufala Esther i bon. Nating we mitufala i no gat plante mane, mitufala i gat strong tingting blong gohed blong paenia. Mifala i muv i go long wan vilej, mo mifala i laef long wan smol haos. Taem mi stap long haos mo lukaot long bebi, man blong mi i go long wok blong prij long ful dei. Nekis dei, man blong mi i stap long haos, mo mi mi go long wok blong prij. Mitufala i mekem olsem ya kasem taem we Esther i naf blong kam wetem mitufala long wok blong prij.

Smoltaem biaen, Yurop i gat trabol long saed blong politik. Mifala i harem nius se ol Witnes long Jemani oli stap kasem bigfala traem, mo mifala i luksave se i no longtaem bambae mifala tu i kasem ol traem. Mifala i stap tingbaot olsem wanem mifala i save winim ol strong traem ya. Long 1938, gavman blong Netalan i putumap wan loa we i blokem ol man blong narafala kantri blong mekem wok ya blong givimaot ol buk blong jos. Ol Witnes we oli man Netalan oli halpem mitufala blong gohed long wok blong prij. Taem oli faenem man we i soem intres long gud nius, oli givim nem blong olgeta ya long mitufala, mo mitufala i stadi Baebol wetem sam long olgeta.

Raonabaot long taem ya, ol Witnes blong Jeova oli stap rere blong holem wan asembli blong olgeta. Nating we mifala i no gat naf mane blong pem tikit blong go long asembli, mifala i rili wantem stap long taem blong asembli ya. Ale, mifala i putum smol Esther long wan smol jea we mifala i hangem fored long handel blong wan baskel, nao mifala i ron long baskel tri dei, blong kasem ples blong asembli. Evri naet, long wokbaot blong mifala, mifala i slip long haos blong ol Witnes we haos blong olgeta i stap long rod we mifala folem. !Mifala i glad blong stap  long faswan bigfala asembli blong mifala! Program blong asembli ya i givim paoa long mifala blong fesem ol traem we bambae mifala i kasem. Antap long olgeta samting ya, program ya i mekem mifala i tingbaot bakegen se mifala i mas trastem God fulwan. Ol toktok blong Ol Sam 31:6 i kam ol tok we mifala i stap talem oltaem se: “[Jeova] mi mi stap trastem yu oltaem.”

Ol Nasi Oli Ronem Mifala

Long Mei 1940 ol Nasi oli kam insaed long Netalan. Smoltaem biaen, ol Gestapo, no ol sikret polis, oli kam long haos blong mifala, we mifala i no save, stret long taem we mifala i stap seraotem ol buk blong Baebol blong sanem i go long defdefren ples. Oli tekem Ferdinand i go long hedkwota blong ol Gestapo. Mi mo Esther i go luk hem longwe evri dei, mo sam samtaem oli askem ol kwestin mo kilim hem fored long mitufala nomo. Wantaem nomo long Disemba, oli letem Ferdinand i gofri, be blong smoltaem nomo. Wan sapa, taem mifala i kambak long haos, mifala i luk trak blong Gestapo i stap long haos. Ferdinand i gat janis blong ronwe i go haed, taem mi mo Esther i go insaed long haos. Oli stap wet long mifala. Oli wantem Ferdinand. Long semfala naet we ol Gestapo oli aot, ol polis blong Netalan oli kam tekem mi blong askem kwestin long mi. Long nekis dei, mi mo Esther i go haed long haos blong wan brata mo sista we oli jes baptaes, nem blong famle ya Norder. Olgeta ya oli lukaot long mitufala.

Klosap long en blong Jenuware 1941, oli holem wan brata wetem waef blong hem we tufala i paenia, we tufala i laef long wan bot. Long nekis dei, man blong mi, wetem wan seket elda tufala i go long bot ya blong karem olting blong brata ya wetem waef blong hem, be ol Gestapo oli holem tufala. Ferdinand i gat janis blong ronwe long baskel blong hem. Be, oli holemtaet seket elda mo putum hem long kalabus.

Ol brata we oli lukaot long wok ya oli askem Ferdinand blong tekem ples blong seket elda ya. Hemia i min se, hem i save kambak long haos blong tri dei nomo long wan manis. Hemia i wan traem blong mifala, be mi gohed blong paenia. Ol Gestapo oli gohed strong moa blong lukaot ol Witnes, mekem se oltaem mifala i mas muv i go long plante defren haos. Long 1942, mifala i mas muv tri taem. Biaen, mifala i kam long taon ya blong Rotterdam, we hem i longwe long ples ya we Ferdinand i mekem Kristin wok blong hem long fasin haed. Long taem ya mi rere blong karem namba tu pikinini blong mitufala. Famle Kamp, we ol Nasi oli sanem tufala boe blong olgeta i go long rabis kalabus, oli glad blong tekem mifala i go long haos blong olgeta.

Ol Gestapo Oli Wajem Gud Mifala

Long Julae 1943, seken pikinini blong mitufala, Ruth, i bon. Afta we Ruth i bon, Ferdinand i naf blong stap wetem mifala blong tri dei, be hem i mas aot, mekem se mifala i no moa save luk hem blong longtaem. Tri wik biaen, oli arestem Ferdinand long Amsterdam. Oli tekem hem i go long stesen blong Gestapo, mo ol polis long ples ya oli luksave se hem i hu. Ol Gestapo oli askem fulap kwestin blong fosem hem blong givim sam infomesen long saed long wok blong prij we mifala i stap mekem. Be Ferdinand i talemaot nomo se hem i wan Witnes blong Jeova, mo se hem i no joen nating long ol bisnes blong politik. Ol Gestapo oli kros from we Ferdinand i wan man Jemani be hem i no joen long ami, mo oli talem se bambae oli kilim hem i ded from we hem i agens long kantri blong hem.

Ferdinand i stap long kalabus blong nekis faef manis. Oltaem oli talem se bambae oli kilim hem i ded. Be, hem i stap tru long Jeova. ?Wanem samting i givhan long hem blong i stap strong long saed blong spirit? Tok blong God, Baebol. From we Ferdinand i wan Witnes blong Jeova, oli blokem hem blong i no mas gat wan Baebol. Be, ol narafala presina oli save gat wan Baebol. Taswe, Ferdinand i askem presina we tufala i stap long sem rum blong askem famle blong hem blong sanem wan Baebol. Long ol yia biaen, evritaem we Ferdinand i tokbaot samting ya we i hapen, ae blong hem i saen mo i se: “!Baebol ya i rili leftemap tingting blong mi!”

Long stat blong Jenuware 1944, wantaem nomo oli tekem Ferdinand i go long rabis kalabus  ya long Vught, long Netalan. Oli no tingbaot se, samting ya i wan blesing long Ferdinand, from we hem i gat janis blong mitim 46 narafala Witnes long kalabus ya. !Taem mi harem nius ya se hem i muv, mi mi glad from we mi save se hem i laef yet!

No Stop Blong Prij Long Rabis Kalabus

Laef long rabis kalabus i strong tumas. I no gat gudfala kakae, i no gat klos blong kolkol, mo ples i kam kolkol moa evri dei. Ferdinand i kasem wan sik we oli kolem tonsillitis (soa insaed long trot). Hem i stanap longtaem long kolkol blong oli singaot nem blong hem, hem i harem nogud mo i mas go long ples blong ol sikman. Ol sikman we oli gat fiva bitim 40 digri nomo oli save stap long ples ya. !Be oli no letem Ferdinand i stap from we fiva blong hem i kasem 39 digri nomo! Ale, oli talem long hem blong i gobak long wok. Sam fren blong hem long kalabus, oli givhan long hem mo oli haedem hem smoltaem blong hem i harem gud. Taem weta i kam hot smol hem i stat kam gud. Mo tu, taem sam long ol brata oli kasem kakae, oli serem wetem ol narawan, mekem se Ferdinand i kam strong bakegen.

Bifo we man blong mi i go long kalabus, wok blong prij i faswan samting long laef blong hem, mo taem hem i stap long kalabus, hem i gohed blong tokbaot bilif blong hem. Plante taem, sam haeman long kalabus oli jikim hem from smol pis kaliko we oli somap long klos blong hem we kala blong hem i pepol, mo i gat trikona long hem. Kaliko ya i makemaot wan presina se hem i wan Witnes blong Jeova. Be Ferdinand i tingbaot ol toktok ya olsem janis blong statem storian. Fastaem ol brata oli prij nomo insaed long semfala haos ya we oli putum ol narafala witnes long hem. Ol brata oli askem long olgeta wan se, ‘?Olsem wanem yumi save prij long ol narafala presina?’ Ol haeman we oli lukaot long kalabus oli no save se ol brata oli wokem wan rod. ?Oli wokem rod ya olsem wanem?

Long fasin haed ol brata oli kasem ol buk long saed blong Baebol mo twelef Baebol. Wan dei ol sekiuriti oli faenem sam buk, be oli no save se ol buk ya oli blong hu. Ale, ol haeman long kalabus oli tekem disisen blong seraotem ol Witnes. Taswe, blong panisim ol brata, oli putum olgeta wetem ol narafala we oli no Witnes. Mo tu, long taem blong kakae ol brata oli mas sidaon wetem ol narafala we oli no Witnes. Gudfala frut i kamaot long rod ya. Naoia ol brata oli save mekem olsem we oli wantem fastaem, hemia blong prij long plante narafala presina.

Mi Wan Mi Tijim Tufala Gel

Long taem ya, mi mo tufala gel i stap yet long Rotterdam. Koltaem blong 1943/1944 i kolkol bitim mak. Biaen long haos blong mifala i gat wan masket blong sutum ol plen i stap we ol soldia blong Jemani oli stap yusum. Long fored blong haos i gat Haba ya Waal, hemia nao haba we ol ami blong narafala kantri oli wantem blong sakem bom long hem. Hemia i no wan gudfala ples blong stap haed. Mo tu, kakae i no naf. Long taem ya, mifala i lanem blong trastem Jeova fulwan, moa i bitim bifo.​—Ol Proveb 3:​5, 6.

Esther we i gat eit yia blong hem i givhan long famle. Hem i mas stanap long laen blong karem kakae long kijin. Be, plante taem i no moa gat kakae taem hem i kamtru long kijin. Wan taem we hem i go blong karem kakae, hem i fas long medel blong ol man taem wan plen i sakem bom long graon. Mi mi seksek taem mi harem bom i faerap, be afta wari blong mi i godaon mo mi glad, taem mi luk Esther i kambak sef mo i karem sam bitrut (wan kaen ligim) i kam. Ol faswan toktok blong mi se, “?Wanem i hapen?” Hem i ansa long kwaet fasin se: “Taem bom i foldaon, mi mekem olsem we papa i talem, ‘Ledaon long graon, stap kwaet, mo prea.’ !Tok ya blong papa i tru nomo!”

Taem mi toktok, ol man oli harem save se mi mi blong Jemani, taswe i sef moa blong Esther i stap pem kakae blong mifala long stoa. Samting ya i no blokem ol soldia blong Jemani blong askem fulap kwestin long Esther. Be hem i no talem wan samting nating. Mi stap tijim Esther blong rid mo raet long haos, from we hem i no save go long skul mo mi tijim hem tu long saed  blong Baebol mo sam narafala smosmol samting.

Esther i givhan long mi tu long wok blong prij. Taem mi rere blong go long wan Baebol stadi, Esther i go fastaem blong lukluk sipos i no gat man i wajem mifala. Hem i talem long mi sipos ol saen we mi talem long wan Baebol studen i stap long stret ples. Eksampol, stadi we bambae mi go luk i mas putum wan flaoa pot long wan ples klosap long windo olsem wan saen blong mi save sipos i sef blong mi go luk hem. Taem mifala i stap stadi, Esther i stap pusum Ruth long smol kat blong bebi afsaed long rod blong wajem sipos i gat denja.

Long Sachsenhausen

?Olsem wanem long Ferdinand? Long Septemba 1944, oli fosem hem mo sam narafala bakegen blong go long stesen blong tren. Long ples ya, oli seraotem olgeta long grup blong 80 man, mo putum olgeta i go long ol kat blong tren. Wanwan kat i gat wan baket blong yusum olsem toelet mo narafala baket i gat wota blong dring. !Trep ya i blong tri dei mo tri naet, mo oli stanap nomo from we kat ya i fulap gud long ol presina! I no gat ples blong win i kam insaed. Oli sarem gud doa blong ol kat ya, mo i gat ol smolsmol hol nomo blong lukluk tru. I no gat tok we i naf blong talem se hadtaem ya we oli pastru long hem i olsem wanem. Oli hot, oli hanggri, oli tosta, mo tu, smel blong ples ya i nogud tumas.

Tren i stop long rabis kalabus long Sachsenhausen.

!Oli blokem ol presina blong karem olting blong olgeta wan, be ol Witnes blong Jeova nomo oli karem twelef smol Baebol we oli gat finis!

Oli sanem Ferdinand mo eit narafala brata oli go long kamp ya we oli kolem satellite long taon ya Rathenow, blong wok long mesin blong wokem tul blong faet. Ol brata oli no wantem mekem wok ya, nating we oltaem ol soldia oli talem se bambae oli kilim olgeta i ded. Blong givgivhan long olgeta blong stanap strong, oli storian tugeta long sam vas blong Baebol olsem Ol Sam 18:​2, mekem se oli save tingting dip long hem long ful dei. Samting ya i givhan long olgeta blong tingting dip long ol samting long saed blong spirit.

Ale, wan dei, oli harem ol masket i faerap blong soem se ol ami blong Rasia oli kam. Ol man Rasia oli kam fastaem long kamp we Ferdinand mo ol fren blong hem oli stap long hem. Oli givim sam kakae long ol presina mo oli talem long olgeta blong lego kamp. Long en blong Eprel 1945, ol ami blong Rasia oli letem olgeta oli gobak hom.

Joen Olsem Famle Bakegen

Long Jun 15, Ferdinand i kambak long Netalan. Ol brata long Groningen oli welkamem gud hem. Hem i save se mifala i laef i stap samples insaed long kantri ya, mo mifala tu i kasem toktok se hem i kambak. I olsem se mifala i mas wet longtaem blong hem i kamtru. Be, wan dei Ruth i singaot se: “!Mama, i gat wan strenja i stanap long doa!” !Man we i stanap i stap, hemia gudfala hasban mo papa blong mifala!

Plante problem i stap we mifala i mas stretem fastaem. Afta mifala i save gohed long famle laef blong mifala bakegen. Mifala i no gat ples blong stap long hem, mo wan long ol bigfala traem hemia  blong kasem pepa blong stap long Netalan bakegen. From we mifala i man Jemani, mekem se blong plante yia finis ol haeman blong Netalan oli lukluk nogud long mifala. Sloslo mifala i naf blong faenem wan ples blong stap mo gat wan laef we mifala i rili wantem​—hemia nao blong mekem wok blong Jeova olsem wan famle.

‘Jeova Mi Mi Trastem Yu Oltaem’

Long ol yia biaen, taem mi mo Ferdinand i joen wetem sam long ol fren we oli laef tru long ol hadtaem ya, mifala i tingbaot lav we Jeova i bin soem blong protektem mifala. (Ol Sam 7:1) Long ol yia we i pas, mifala i glad we Jeova i letem mifala blong joen long wok ya blong talemaot Kingdom. Mo tu, oltaem mifala i tingbaot glad we mifala i gat blong yusum yangtaem blong mifala long wok blong Jeova.​—Prija 12:1.

Afta long raf fasin blong ol Nasi, mi mo Ferdinand tugeta i mekem wok blong Jeova bitim 50 yia, bifo we Ferdinand i finisim wok blong hem long wol ya long Disemba 20, 1995. Klosap nao bambae mi gat 98 yia blong mi. Evri dei mi talem tangkiu long Jeova from se ol pikinini oli givhan long mifala long ol hadtaem ya. Mo tu, mi glad we mi naf yet blong givim ona long nem blong Jeova. Mi mi talem tangkiu from olgeta samting we Jeova i stap givim long mi. Mo long hat blong mi, mi wantem tumas blong gohed blong mekem laef blong mi i laenap wetem ol tok ya: “[Jeova] mi mi stap trastem yu oltaem.”​—Ol Sam 31:6.

[Tok blong pija long pej 19]

Mi mo Ferdinand, long Oktoba 1932

[Tok blong pija long pej 19]

Bot ya “Almina” we oli yusum blong prij, wetem olgeta we oli bin pas long hem

[Tok blong pija long pej 22]

Mi mo Ferdinand wetem ol pikinini