‘Yumi Mas Joen Long Masta Blong Kasem Paoa’

“Yufala i mas joen long Masta blong yumi, blong kasem paoa. Hem i gat olgeta paoa, mo yufala i mas kam strong long paoa blong hem.”​—EFESAS 6:10.

1. (a) ?Wanem faet i bin hapen bitim 3,000 yia bifo? (b) ?From wanem Deved i winim faet ya?

 SAMWE long 3,000 yia bifo, i gat tu man blong faet we tufala i kamaot long tu defren ami. Tufala i stanap fesem tufala, tufala i rere blong faet. Wan long tufala i yang moa, hem i boe blong lukaot long sipsip nomo, nem blong hem Deved. Narafala man hemia Golaeat. Hem i wan bigfala man we i strong moa mo i longfala moa long ol narafala man. Man ya i werem wan klos blong blokem ara we hevi blong hem i kasem 57 kilo, mo hem i karem wan longfala spia mo wan bigfala naef blong faet tu. Deved i no werem wan aean klos nating blong blokem ara. Wan tul blong faet nomo we Deved i holem, hemia wan sling. Bigfala man Filistia, Golaeat, i kros taem i luk we ol man Isrel oli sanem wan smol boe i kam blong faetem hem. Hem i ting se ol man Isrel oli stap jikim hem. (1 Samuel 17:​42-44) Ol man long tugeta saed blong faet ya oli ting se bambae Deved i mas ded nomo fored long bigfala man ya. Be i no ol strong man blong faet nomo we oli stap win long faet. (Prija 9:11) Deved i winim faet ya from we hem i faet long paoa blong Jeova. Deved hem wan i talem se: “[Jeova] i gat paoa blong win long faet.” Stori long Baebol i talem olsem se: “Deved i yusum sling mo ston nomo blong kilim Golaeat i ded.”​—1 Samuel 17:​47, 50.

2. ?Wanem kaen faet we ol Kristin oli joen long hem?

² Ol Kristin oli no joen long ol faet blong wol ya. Oli traehad blong gat pis oltaem wetem olgeta man. Be oli mas faet yet long wan faet long saed blong spirit, agensem ol enemi we oli strong moa i bitim olgeta. (Rom 12:18) Long laswan japta blong leta we Pol i raetem i go long ol man Efesas, hem i tokbaot wan faet we olgeta Kristin oli joen long hem. Hem i raetem se: “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak long wol ya.”​—Efesas 6:12.

3. ?Olsem Efesas 6:10 i talem, yumi nidim wanem blong winim faet ya long saed blong spirit?

³ “Ol devel” ya hemia Setan wetem ol rabis enjel blong hem we oli wantem karemaot yumi long Jeova God. From we oli strong moa i bitim yumi, yumi sem mak olsem Deved, yumi no save winim faet ya sipos yumi no gat paoa blong God. Tru ya, taswe Pol i talem se yumi mas ‘joen long Masta blong yumi, blong kasem paoa, [God] i gat olgeta paoa, mo yumi mas kam strong long paoa blong hem.’ (Efesas 6:10) Afta we aposol ya i givim advaes ya, hem i tokbaot sam samting long saed blong spirit we God i givim, mo sam Kristin fasin tu, we oli save halpem yumi blong winim faet ya.​—Efesas 6:​11-17.

4. ?Wanem tufala bigfala poen we bambae yumi tokbaot long stadi ya?

 ⁴ I gud we naoia yumi lukluk wanem we Baebol i talem long saed blong ol rod mo trik we enemi blong yumi i stap yusum. Ale bambae yumi tingbaot rod blong blokem Setan, blong yumi no foldaon long ol trik ya blong hem. Sipos yumi folem ol tok we Jeova i talem blong lidim yumi, ale bambae yumi sua se ol enemi blong yumi oli no save winim yumi.

Faet Blong Yumi Agensem Ol Devel

5. ?Tok ya resling we ol olfala hanraet oli putum long Efesas 6:12 i givhan long yumi blong luksave wanem long saed blong trik blong Setan?

⁵ Pol i eksplenem se yumi gat wan ‘faet agens long ol devel [rabis enjel] we oli stap olbaot long wol ya.’ Wan long ol rabis enjel we i gat moa paoa hemia Devel Setan we i “jif blong ol devel.” (Matiu 12:​24-26) Lanwis we oli yusum blong raetem ol faswan hanraet blong Baebol, i yusum tok ya “resling” blong tokbaot faet blong yumi. Long Gris bifo, tufala man we tufala i resling, tufala i mas traehad blong mekem se narawan i no moa stanap strong long tufala leg blong hem, nao i isi blong mekem hem i foldaon. Hemia sem samting we Setan i wantem mekem long yumi. Hem i wantem mekem we yumi no moa stanap strong long saed blong spirit. ?Hem i mekem samting ya olsem wanem?

6. Yusum Baebol blong soem olsem wanem Setan i yusum ol defdefren samting blong spolem bilif blong yumi.

⁶ Setan i save tekem fasin blong wan snek no blong wan laeon we i stap singaot bigwan, no i save jenisim hem i kam wan enjel blong laet. (2 Korin 11:​3, 14; 1 Pita 5:8) Hem i save yusum ol man long wol ya blong kilim yumi no blong sakem ol tok we oli mekem tingting blong yumi i foldaon. (Revelesen 2:10) Fulwol i blong Setan, taswe hem i save yusum eni samting long wol ya blong pulum ae mo filing blong yumi mo mekem yumi foldaon. (2 Timoti 2:26; 1 Jon 2:16; 5:19) Hem i save yusum ol tingting blong wol mo tingting blong ol man blong apostasi * blong lidim yumi i gorong, olsem we hem i trikim Iv.​—1 Timoti 2:14.

7. ?Wanem samting we ol devel oli no naf blong mekem? ?Mo wanem samting we i mekem se yumi naf blong winim faet ya?

⁷ Ol tul we Setan mo ol narafala devel oli yusum, mo paoa blong olgeta tu, maet i luk olsem se oli strong tumas, be oli no save win fulwan. Ol rabis spirit ya oli no save fosem yumi blong mekem samting we i nogud mo we i mekem se Papa blong yumi long heven i no moa glad long yumi. God i wokem yumi long wan fasin we yumi fri blong jusum samting, mo yumi wan i bos long ol tingting mo aksin blong yumi. Antap long hemia, yumi no stap yumi wan long faet ya. Samting we i hapen long taem blong Elisa i tru tu long yumi tede, taem hem i se: “Olgeta long saed blong yumi oli plante moa, i winim olgeta ya.” (2 King 6:16) Baebol i mekem yumi harem gud taem hem i talem se sipos yumi putum yumi i stap daon aninit long han blong God, mo yumi blokem Setan, ale Setan bambae i ronwe long yumi.​—Jemes 4:7.

Yumi Savegud Ol Plan Blong Setan

8, 9. ?Wanem traem we Setan i mekem long Job blong traem pulum hem blong lego Jeova? ?Mo wanem ol denja tede we oli save mekem yumi slak long saed blong spirit?

⁸ Yumi savegud ol plan blong Setan from we Baebol i soemaot ol trik blong hem long yumi. (2 Korin 2:11) Taem Setan i agensem Job, hem i yusum olkaen  trabol, olsem trabol long saed blong mane, ded insaed long famle, stret famle blong hem i agensem hem, sik we i spolem bodi blong hem, mo ol fren we oli tok jik. Tingting blong Job i foldaon mo hem i harem olsem se God i lego hem. (Job 10:​1, 2) Tede, Setan i no stamba blong evri trabol we oli kamaot long ol Kristin. Be hem i save yusum sam long ol hadtaem ya we oli kasem wan Kristin, blong mekem Kristin ya i foldaon.

⁹ Long taem blong en, ol denja we oli save mekem yumi foldaon long saed blong spirit, oli kam plante we plante. Yumi laef long wan wol we ol man blong hem oli laekem moa blong ronem ol sas samting blong bodi i bitim ol samting long saed blong spirit. Oltaem nomo, ol buk, televisin, niuspepa mo radio oli tokbaot olkaen nogud fasin long saed blong seks. Plante taem oli soemaot fasin ya olsem wan rod blong man i hapi, be oli no talem se fasin ya i save karem trabol. Mo bighaf blong ol man oli ‘laekem moa ol pleplei, i winim we oli laekem God.’ (2 Timoti 3:​1-5) Sipos yumi no ‘faet strong blong holem bilif,’ olkaen tingting ya oli save mekem we yumi no moa stanap strong long saed blong spirit.​—Jud 3.

10-12. (a) ?Wanem woning we Jisas i givim long parabol blong man blong planem sid? (b) Talem wan pijatok we i soemaot olsem wanem ol samting blong wol ya oli save jokem ol gudfala wok we yumi mekem long saed blong spirit.

¹⁰ Wan long ol beswan trik we Setan i stap yusum hemia blong mekem we yumi tingting tumas long ol samting blong wol ya no yumi bisi tumas blong ronem ol sas samting long hem. Long parabol blong man we i planem sid, Jisas i talem se taem man ‘i tingting tumas from laef blong hem long wol ya, mo i wantem tumas blong kam rijman, [ale] olgeta samting ya oli kam blokem tok ya [blong Kingdom].” (Matiu 13:​18, 22) Grik tok we long ples ya oli tanem i kam “blokem” i minim “jokem gogo i ded.”

¹¹ Long ples blong yumi i gat wan tri we i gat fasin ya blong jokem narafala tri. Tri ya hemia nambangga. Sid blong nambangga i save gru antap long narafala tri. Taem hem i gru, ol rus blong hem oli goraon long narafala tri ya. Sloslo nambangga i stap kam bigwan moa mo i stap kam strong moa. Ol rus blong nambangga ya we oli plante tumas, oli godaon long graon, oli tekem kakae long stamba blong tri ya, mo long semtaem, oli blokem laet blong san blong i no moa kasem tri ya. Ale, sloslo narafala tri ya aninit long nambangga, i ded.

¹² Long sem fasin, ol wari blong wol ya mo fasin blong lukaot rod oltaem blong kasem ol sas samting mo gudfala laef long wol ya, oli save kakae taem mo paoa blong yumi. From we tingting blong yumi i stap nomo long ol samting blong wol, i isi nomo blong yumi lego fasin blong stadi Baebol mo maet yumi stat mestem ol Kristin miting. Hemia i min se sloslo yumi no moa stap kakae long saed blong spirit. Naoia ol mak blong yumi hemia blong kasem ol samting blong bodi, i no moa blong kasem ol samting long saed blong spirit. Long taem olsem, yumi stap long klia ples nomo blong Setan i kasem yumi.

Yumi Nidim Fasin Blong Stanap Strong

13, 14. ?Yumi mas olsem wanem taem Setan i kam agensem yumi?

¹³ Pol i pulum ol Kristin brata blong hem blong ‘stanap strong taem Setan i stap wokem ol giaman trik blong hem.’ (Efesas 6:11) I tru we yumi no save kilim i ded Setan mo ol rabis enjel blong hem. God i givim wok ya long Jisas Kraes nomo. (Revelesen 20:​1, 2) Be bifo we taem ya i kam yumi mas “stanap strong” blong bambae hem i no save winim yumi long ol trik blong hem.

¹⁴ Aposol Pita i talem se i impoten blong stanap strong agensem Setan. Hem i raetem tok ya se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala  oltaem. Hem i olsem wan laeon we i stap singaot bigwan, i stap lukaot man blong i kakae. Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:​8, 9) Tru ya ol Kristin brata sista blong yumi oli impoten tumas blong halpem yumi blong stanap strong taem Setan i kam agensem yumi olsem wan laeon we i stap singaot bigwan.

15, 16. Givim wan eksampol long Baebol we i soem olsem wanem ol Kristin brata sista blong yumi oli save halpem yumi blong stanap strong.

¹⁵ Long bus long Afrika, taem ol laeon oli singaot bigwan, kwiktaem nomo ol anamol olsem dia oli ronwe, oli spid gogo oli stap longwe, long ples we i sef. Be ol elefen oli mekem fasin we i defren. Fasin blong olgeta i save stap olsem wan eksampol long yumi. Wan buk (Elephants​—Gentle Giants of Africa and Asia) i tokbaot ol elefen i se: “Wan rod we ol elefen oli yusum taem i gat trabol, hemia blong stanap raon long ol smosmol elefen. Ol bigfala elefen oli fesem ol laeon, mo long semtaem, bodi blong olgeta i blokem ol smosmol elefen oli stapgud long medel blong olgeta.” From fasin ya we ol elefen oli stap mekem oltaem, ol laeon oli fraet blong ronem ol elefen.

¹⁶ Long sem fasin, taem Setan i kam agensem yumi, yumi mas kam wanples, yumi mas joen wetem ol brata blong yumi we oli strong long bilif, we solda blong yumi i joen long solda blong olgeta. Pol i luksave se sam Kristin brata blong hem oli ‘stap mekem hem i harem gud tumas,’ no olsem New World Translation i talem ‘oli mekem hem i strong’ taem hem i stap kalabus long Rom. (Kolosi 4:​10, 11) Grik tok long ples ya, we New World Translation i tanem i kam “mekem mi mi strong,” i kamaot wan taem nomo long Kristin Grik haf blong Baebol. Long diksonari ya Expository Dictionary of New Testement Words, W. E. Vine i talem se: “Veb blong tok ya i minim ol meresin we oli daonem soa we man i harem long bodi blong hem.” Tru ya, ol man blong Jeova we oli strong long bilif oli save mekem soa blong yumi long saed blong filing mo bodi i no moa bigwan tumas, olsem we meresin i save mekem yumi haremgud bakegen.

17. ?Wanem i save halpem yumi blong stap tru long God?

¹⁷ Tede, ol Kristin brata sista blong yumi oli leftemap tingting blong yumi. Samting ya i save mekem yumi strong moa blong holem wok blong God. Ol Kristin elda nao oli traehad moa blong givhan long ol Kristin blong oli stap strong long saed blong spirit. (Jemes 5:​13-15) Sam samting we oli save halpem yumi blong holem bilif, hemia fasin blong stadi Baebol oltaem mo blong stap long evri Kristin miting mo asembli. Gudfala fasin fren we yumi wanwan i gat wetem God i save halpem yumi blong yumi stap tru long hem. Tru ya, i nating sipos yumi stap kakae, dring, no yumi stap mekem eni nara samting, be yumi mas wantem mekem evri samting blong leftemap nem blong God. (1 Korin 10:31) Mo i klia se i impoten tumas blong prea mo dipen long Jeova sipos yumi wantem gohed blong wokbaot folem rod we i mekem Hem i glad.​—Ol Sam 37:5.

18. ?From wanem yumi no mas kam slak nating sipos yumi fesem ol trabol we maet oli karemaot paoa blong yumi?

¹⁸ Samtaem, Setan i faet agensem yumi taem yumi harem se yumi slak lelebet long saed blong spirit. Oltaem laeon i jam long ol anamol we oli no strong. Ol trabol insaed long famle, ol hadtaem blong kasem mane, mo sik tu, oli save karemaot paoa blong yumi nao yumi save kam slak long saed blong spirit. Be yumi no mas kam slak blong mekem samting we God i glad long hem, from we Pol i talem se: “Long taem we mi mi no gat paoa, long taem ya nao, mi mi gat  paoa.” (2 Korin 12:10; Galesia 6:9; 2 Tesalonaeka 3:13) ?Hem i minim wanem? Hem i minim se paoa blong God i save givhan long yumi long sam samting we yumi slak long hem, sipos yumi lukluk i go long Jeova blong kasem paoa ya. Deved hem i naf blong winim Golaeat. Hemia i soem se God i save givim paoa long ol man blong hem, mo se hem i mekem samting ya plante taem finis. Ol Witnes blong Jeova tede oli save givim pruf se long taem blong trabol we maet i bigbigwan tumas, oli harem se God i mekem olgeta oli strong.​—Daniel 10:19.

19. Givim wan eksampol we i soem se Jeova i stap givim paoa long ol man blong hem.

¹⁹ Wan man wetem woman blong hem, tufala i tokbaot olsem wanem God i bin givhan long tufala. Tufala i raetem se: “Long ol yia we oli pas, mitufala i mekem wok blong Jeova tugeta. Mitufala i bin harem gud long plante blesing mo mitufala i mitim plante man we oli kam ol gudfala fren blong mitufala. Mo tu, Jeova i trenem mitufala mo i mekem mitufala i strong naf blong mitufala i save winim ol trabol fulwan. Samtaem mitufala i olsem Job, mitufala i no rili kasem save from wanem sam samting i bin hapen long mitufala. Be mitufala i sua fulwan se oltaem Jeova i bin stap klosap long mitufala blong halpem mitufala.”

20. ?Wanem pruf i stap long Baebol we i soemaot se Jeova i stap givhan long ol man blong hem oltaem?

²⁰ Yumi no mas ting se Jeova i no gat naf paoa blong givhan long ol man blong hem we oli stap tru long hem. (Aesea 59:1) Deved i raetem Sam ya we i olsem wan singsing, i se: “[Jeova] i stap givhan long olgeta we oli stap long trabol, mo i stap leftemap olgeta we oli foldaon.” (Ol Sam 145:14) Yes, “evri dei, [Papa blong yumi long heven] i stap karem ol hevi samting blong yumi” mo i stap givim wanem we yumi rili nidim.​—Ol Sam 68:19.

Yumi Nidim “Olgeta Klos Blong Faet” We God i Givim

21. ?Olsem wanem Pol i soemaot se yumi nidim ol klos blong faet long saed blong spirit?

²¹ Yumi tokbaot finis, sam long ol trik blong Setan mo yumi luk se i impoten we yumi stanap strong taem hem i agensem yumi. Be naoia i gud yumi tokbaot wan narafala samting we i save halpem yumi blong winim faet blong yumi blong holem bilif. Taem aposol Pol i raetem leta i go long ol man Efesas, hem i tokbaot wan impoten samting we i save halpem yumi blong stanap strong agensem ol trik blong Setan. Hem i tokbaot samting ya tu taem, mo hem i talem se samting ya i save halpem yumi blong winim faet blong yumi agensem ol rabis enjel. Pol i raetem se: “Yufala i mas kasem paoa blong God, we i olsem olgeta samting [“klos,” NW ] blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong. . . . Yufala i mas kasem paoa blong God we i olsem olgeta samting blong faet. Nao taem dei blong faet long Setan i kam, be bambae yufala i save stanap strong. Long fasin ya, bambae yufala i save faet long ol enemi gogo kasem en blong hem, nao biaen, bambae yufala i save stanap strong yet.”​—Efesas 6:​11, 13.

22, 23. (a) ?Wanem ya ol klos blong faet long saed blong spirit? (b) ?Bambae yumi tokbaot wanem long nekis stadi?

²² Yes, yumi mas ‘putum olgeta klos blong faet’ ya we God i givim. Taem Pol i raetem leta ya i go long ol man Efesas, hem i stap long kalabus, mo i gat wan soldia  blong Rom we i stap gad long hem. Ating sam samtaem soldia ya i werem fulwan klos blong faet blong hem. Be tabu spirit blong God i pulum Pol blong tokbaot ol narafala klos blong faet, hemia ol klos long saed blong spirit we olgeta man blong Jeova oli nidim tumas.

²³ Klos ya blong faet we God i givim, hem i sam fasin we ol Kristin i mas wokem, mo hem i ol samting long saed blong spirit we Jeova i givim blong halpem yumi. Long nekis stadi bambae yumi tokbaot ol wanwan haf blong klos ya blong faet long saed blong spirit. Samting ya bambae i givhan long yumi blong luksave sipos yumi reregud from faet ya long saed blong spirit. Long semtaem, bambae yumi luk olsem wanem nambawan eksampol blong Jisas Kraes i save halpem yumi blong winim Devel Setan.

[Futnot]

?Bambae Yu Yu Ansa Olsem Wanem?

• ?Wanem faet we evri Kristin oli stap long hem?

• Talem sam long ol trik we Setan i yusum.

• ?Olsem wanem ol Kristin brata sista blong yumi oli save mekem yumi strong?

• ?Yumi mas dipen long paoa blong hu? ?Mo from wanem yumi dipen long hem?

[Kwestin]

[Tok blong pija long pej 11]

Ol Kristin ‘oli gat wan faet agensem ol rabis enjel’

[Tok blong pija long pej 12]

Ol wari blong wol ya oli save jokem tok blong Kingdom

[Tok blong pija long pej 13]

Ol Kristin brata sista blong yumi oli save ‘mekem yumi strong’

[Tok blong pija long pej 14]

?Yu yu stap prea long God blong kasem paoa?