Wan Kwestin

?Long Eksodas 4:​24-26, wanem i hapen mo laef blong hu i stap long denja?

Taem Moses wetem waef blong hem, Jipora, mo tufala pikinini boe blong tufala, Gesom mo Eliesa, oli stap long rod blong go long Ijip, wan samting i hapen. Baebol i talem se: “Nao taem oli stap slip long rod, long wan ples, Jeova i mitim hem mo i stap lukaot wan rod blong kilim hem i ded. Nao Jipora i girap i tekem wan naef we oli wokem long ston ya flin, i mekem sakomsaes long pikinini blong hem, mo i tekem skin blong pikinini ya, i tajem leg blong hem long hem mo i talem se, ‘Hemia from we blad ya i mekem yu yu kam olsem hasban blong mi.’ Nao hem i lego hem. From we hem i mekem sakomsaes ya, Jipora i talem se: ‘Blad ya i mekem yu yu kam olsem hasban blong mi.’ ” (Eksodas 4:​20, 24-26, NW ) Ol vas ya oli no kliagud mo yumi no save suagud long mining blong hem. Nating se i olsem, Baebol i halpem yumi blong kasem sam save long ol vas ya.

Baebol i no talem stret se laef blong hu i stap long denja. Be, i sua se i no Moses, from we Jeova i jes givim oda long Moses blong lidim ol man Isrel oli aot long Ijip. (Eksodas 3:10) I no stret we enjel blong God i kam blong kilim Moses i ded, taem Moses i stap long rod finis blong mekem wok ya we God i givim. I luk olsem se laef ya we i stap long denja, hemia laef blong wan long tufala pikinini boe blong Moses. Bifo finis, Jeova i givim loa long Ebraham long saed blong sakomsaes. Loa ya i talem se: “Man we i no sakomsaes, [“yufala i mas kilim hem i ded,” NW ] mi mi no save kaontem hem se wan long ol man blong mi, from we hem i no holem saed blong hem long promes ya we mi mi mekem wetem yufala.” (Jenesis 17:14) Maet Moses i foget blong mekem sakomsaes long wan long tufala pikinini boe blong hem, mo from samting ya enjel blong Jeova i wantem kilim pikinini ya i ded.

Blong stretem bisnes ya, Jipora i mekem sakomsaes long boe blong hem. ?Be, hem i tekem skin blong sakomsaes blong tajem leg blong hu long hem? Hemia enjel blong Jeova, from we enjel ya i gat paoa blong kilim boe ya i ded. Skin ya we Jipora i tajem leg blong enjel wetem, i olsem pruf se hem i holem kontrak ya no promes we Jeova i mekem wetem ol man blong hem.

Toktok blong Jipora se “blad ya i mekem yu yu kam olsem hasban blong mi” i narakaen lelebet. ?Toktok ya i soem wanem long saed blong Jipora? Jipora i luksave se i gat wan kontrak long saed blong sakomsaes we Jeova i mekem wetem ol man blong hem, taswe hem i obei long ol rul blong kontrak ya. Kontrak blong loa we Jeova i mekem biaen wetem ol man Isrel, i soem se ol man we oli joen long kontrak ya oli save tingbaot Jeova olsem hasban blong olgeta mo oli save tingbaot olgeta olsem waef blong hem. (Jeremaea 31:32) Taswe, taem Jipora i talem long Jeova (tru long enjel blong hem) se “blad ya i mekem yu yu kam olsem hasban blong mi,” maet hem i bin soem se, hem i wantem obei long ol rul blong kontrak ya. Long kontrak ya long saed blong sakomsaes, i olsem we hem i waef mo Jeova God i hasban blong hem. Be, nomata se i olsem wanem, aksin we hem i tekem blong obei long loa blong God, i sevem laef blong boe blong hem.