Naoia Yumi Mas Strong Moa Blong Lukaot Gud

“From samting ya, yufala i mas [“gohed oltaem blong,” NW] lukaot gud, from we yufala i no save wanem dei, mi, mi Masta blong yufala, bambae mi kamtru long hem.”​—MATIU 24:42.

1, 2. ?Wanem ol samting we oli soemaot se yumi stap klosap long taem we wol bambae i finis?

 WAN man blong raetem buk, nem blong hem Bill Emmott, i talem se: “Long handred yia we i pas, bigfala samting we i jenisim wol ya, hemia wo.” Maet yu talem se, long olgeta histri blong man i gat wo mo faet. I tru, be man ya i talem se, “laswan handred yia i defren. Ol wo mo faet oli strong moa. Hemia faswan taem long histri blong man we i gat Wol Wo . . . Mo i no gat wan Wol Wo nomo, be i gat tu.”

² Jisas Kraes i talem finis se bambae i gat wo. Hem i se: “Ol man bambae oli mekem faet long ol narafala man. Mo ol kantri bambae oli mekem faet long ol narafala kantri.” Be, ol wo oli haf nomo blong ‘saen we bambae i soemaot we Kraes i kambak bakegen, mo wol ya i finis.’ Antap long hemia, Jisas i talem long bigfala profet tok ya blong hem se bambae i gat hadtaem blong kasem kakae, ol strong sik bambae oli kasem ol man, mo bambae graon i seksek bigwan. (Matiu 24:​3, 7, 8; Luk 21:​6, 7, 10, 11) Ol trabol ya oli stap kamaot plante moa naoia, mo oli bigwan moa. Mo tu, fasin blong ol wanwan man i stap kam moa nogud. Yumi luksave samting ya taem yumi harem tingting we plante man oli gat long saed blong God mo ol narafala man. Mo yumi luk klia we ol rabis fasin oli stap kam antap, wetem fasin stil mo fasin blong kilim man. Plante man oli lavem mane i bitim we oli lavem God, mo oli krangke long ol pleplei we oli save haremgud long hem. Olgeta samting ya i soem se yumi stap long ‘taem we laef i kam strong tumas.’​—2 Timoti 3:​1-5.

3. ?Taem yumi luk “ol saen blong taem ya,” samting ya i mas mekem wanem long yumi?

³ ?Wanem tingting blong yu taem yu luk we wol ya i stap kam moa nogud? Plante man oli no wantem save long ol nogud samting we i stap hapen, mo oli no gat sore nating long ol narafala. Ol man we oli gat hae posisen mo gudfala edukesen, oli no luksave mining blong “ol saen blong taem ya.” Mo ol lida blong skul tu oli no givim stret save blong lidim ol man long bisnes ya. (Matiu 16:​1-3) Be Jisas i givim gudfala advaes long ol man blong hem, i se: “Nao from samting ya, yufala i mas [“gohed oltaem blong,” NW ] lukaot gud, from we yufala i no save wanem dei, mi, mi Masta blong yufala, bambae mi kamtru long hem.” (Matiu 24:42) Jisas i no talem nomo se yumi mas lukaot gud, be hem i talem se yumi mas ‘gohed oltaem blong lukaot gud.’ Hemia i min se yumi mas stap wekap mo rere oltaem. Blong mekem olsemia, i no naf we yumi agri se yumi stap finis long ol las dei, mo se laef i had. Antap long samting ya, yumi mas bilif strong se “yumi kam klosap finis long taem we ol samting blong wol ya bambae i lus.” (1 Pita 4:7) Bilif ya nao bambae i mekem se yumi strong moa blong lukaot gud. Taswe, kwestin we yumi mas tingtinggud long hem, hemia: ‘?Olsem wanem blong mekem bilif blong mi i strong moa se en i klosap?’

4, 5. (a) ?Olsem wanem blong mekem bilif blong yumi i strong se en blong rabis wol ya i klosap, mo from wanem samting ya i save mekem bilif blong yumi i strong? (b) ?Wanem faswan samting long saed blong taem blong Noa we i sem mak long taem ya we Pikinini blong man bambae i kamtru?

⁴ Tingbaot samting we i hapen wan taem nomo long histri​—hemia Bigfala Wota we i ron long taem blong Noa. Long taem ya, ol man oli nogud bitim mak, nao Jeova “i stap harem nogud tumas from.” Ale, hem i talem se: “Bambae mi mi spolem ol man ya we mi mekem.” (Jenesis 6:​6, 7) Mo i tru, hem i spolem olgeta olsem we hem i talem. Jisas i skelem taem ya bifo wetem taem blong yumi, i se: “Long taem ya we mi, mi Pikinini blong Man mi kamtru, bambae i olsem taem blong Noa bifo.”​—Matiu 24:37.

⁵ Yumi save se filing we Jeova i gat long saed blong wol naoia i mas sem mak long filing we hem i gat long taem blong Noa. Hem i bin mekem Bigfala  Wota i ron blong spolem ol man we oli no obei long hem, mo bambae hem i spolem ol rabis man tede tu. Sipos yumi kasem save gud long ol samting long taem blong Noa we oli sem mak long taem blong yumi, bilif blong yumi bambae i kam strong moa se en blong wol ya i klosap. ?Wanem ol samting ya we oli sem mak? I gat faef samting. Faswan: Klia woning we i goaot se God bambae i spolem wol.

Woning Blong ‘Ol Samting Ya We i No Gat Man i Luk Yet’

6. ?Long taem blong Noa, Jeova i givim woning se bambae hem i mekem wanem?

⁶ Long taem blong Noa, Jeova i talem se: ‘I nogud mi letem spirit blong mi i stap olwe long ol man ya. Olgeta oli man blong wol nomo, we oli save ded. I stat naoia, bambae oli save stap kasem wan handred twanti yia nomo.’ (Jenesis 6:​3-4, futnot) God i talem tok ya long yia 2490 B.K.T. * Hemia i makem stat blong en blong wol ya, longtaem bifo. !Tingbaot olsem wanem i impoten we ol man long taem ya oli kasem save long samting ya! Wan handred twanti yia nomo i stap, nao Jeova bambae i mekem “bigfala wota i kam long wol ya blong draonem olgeta samting ya we i laef, blong spolem olgeta.”​—Jenesis 6:17.

7. (a) ?Taem Noa i harem woning long saed blong Bigfala Wota, hem i mekem wanem? (b) ?Ol woning long saed blong en blong rabis wol ya i mas pusum yumi blong mekem wanem?

⁷ Noa i kasem woning ya plante yia bifo we bigfala trabol ya i stat, mo long waes fasin, hem i yusum taem we i stap blong mekem ol samting we i save sevem laef blong hem mo famle blong hem. Aposol Pol i talem se: “[Noa] i obei long tok blong God long taem ya we God i talemaot ol samting ya long hem fastaem, we i no gat man i luk yet . . . nao i wokem wan bigfala sip blong sevem olgeta famle blong hem.” (Hibrus 11:7) ?Olsem wanem long yumi? Ol las dei blong wol ya oli stat long 1914, mo kam kasem naoia, samwe long 90 yia oli pas finis. I tru tumas se yumi stap long taem ya we i “klosap en blong wol ya.” (Daniel 12:4) ?Yumi mas mekem wanem taem yumi harem ol woning we God i givim? Baebol i talem se: “Man we i stap mekem ol samting we God i wantem, hem bambae i no save lus samtaem.” (1 Jon 2:17) Taswe, naoia i taem blong kam strong moa blong mekem samting we Jeova i wantem, mo blong wok hareap from we taem i sot tumas.

8, 9. ?Wanem woning we Jeova i stap givim tede, mo hem i stap talemaot woning ya olsem wanem?

⁸ Long taem blong yumi, ol man we oli stadigud long Baebol oli kasem save se God bambae i spolem rabis wol ya. ?Yu yu rili bilivim samting ya? Makemgud ol klia tok blong Jisas Kraes se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Matiu 24:21) Jisas i talem tu se, bambae God i putumap hem i kam Jaj, nao bambae hem i seraot ol man olsem we man blong lukaot long sipsip i seraot ol sipsip blong hem long ol nani. Ol man we oli no naf blong kasem laef, bambae oli ‘kasem panis we i no save finis. Be ol stret man bambae oli kasem laef we i no save finis.’​—Matiu 25:​31-33, 46.

⁹ Jeova i stap givhan long ol man blong hem blong oli no fogetem ol woning ya. Blong mekem samting ya, hem i yusum ‘slef we i stret mo waes’ blong givimaot kakae long saed blong spirit, mo blong talem woning ya bakegen mo bakegen long stret taem blong hem. (Matiu 24:​45-47, NW ) Mo tu, God i stap singaot ol man long olgeta kantri, laen, lanwis, mo kala, blong oli ‘onagud long hem, mo leftemap nem blong hem, from we taem i kam finis  blong hem i jajem olgeta man.’ (Revelesen 14:​6, 7) Wan impoten haf blong gud nius blong Kingdom we ol Witnes blong Jeova oli talemaot, hemia woning ya se i no longtaem, Kingdom blong God bambae i karemaot ol man we oli stap rul tede, mo Kingdom ya nomo bambae i rul antap long olgeta man. (Daniel 2:44) Yumi mas tinghevi long woning ya. God we i gat Olgeta Paoa, i no save giaman. (Aesea 55:​10, 11) Long taem blong Noa, hem i holem promes blong hem, mo tede tu, bambae hem i holem promes blong hem bakegen.​—2 Pita 3:​3-7.

Ol Doti Fasin Blong Seks Oli Fulap

10. ?Yumi save talem wanem long saed blong ol doti fasin blong seks long taem blong Noa?

¹⁰ I gat wan narafala samting we i mekem se taem blong yumi i sem mak long taem blong Noa. Jeova i talem long fas man mo woman blong tufala i “gat plante pikinini”, mo blong oli go stap long olgeta ples blong wol. God i wantem se tufala i yusum seks long fasin we i givim ona long Hem, hemia insaed long mared. (Jenesis 1:28) Be, long taem blong Noa, sam enjel oli no obei long God. Oli mekem bodi blong olgeta i kam olsem bodi blong man, nao oli kamdaon blong mekem krangke fasin wetem ol naesfala woman blong wol. Ol rabis pikinini blong olgeta we nem blong olgeta Nefilim, oli haf man haf enjel. (Jenesis 6:​2, 4) Baebol i talem se, sin blong ol enjel ya i sem mak long ol krangke fasin we ol man Sodom mo Gomora oli mekem. (Jud 6, 7) Yes, ol doti fasin blong seks oli fulap long taem blong Noa.

11. ?Wanem ol rabis fasin we oli mekem se taem blong yumi i sem mak long taem blong Noa?

¹¹ ?Olsem wanem tede? Long ol las dei ya, seks nao i bigfala samting long laef blong plante man. Pol i yusum ol klia tok blong eksplenem fasin blong ol man ya, hem i talem se “oli no moa gat sem nating.” Oli stap gohed olbaot, “oli stap ronem woman, mo oli stap mekem ol fasin we i rabis olgeta, we i no gat wan samting blong blokem olgeta.” (Efesas 4:19) Long evri ples, fulap man oli haremgud blong lukluk ol doti pija blong seks, oli slip olbaot, oli mekem nogud long ol pikinini, man i slip wetem man bakegen mo woman i slip wetem woman. Sam long olgeta oli kasem ol sik long saed blong seks, mared blong olgeta i brok, no wan narafala trabol olsem i kasem olgeta. Yes, i olsem we oli “kasem panis blong olgeta” finis.​—Rom 1:​26, 27.

12. ?From wanem yumi mas lanem naoia blong no laekem nating ol rabis fasin?

¹² Long taem blong Noa, Jeova i mekem Bigfala Wota i ron blong spolem wol ya we i fulap long rabis fasin blong seks. Yumi no mas fogetem se, taem blong yumi i sem mak long taem blong Noa. God bambae i mekem wan “bigfala trabol” i kamaot blong spolem ‘ol man we oli stap ronem woman, ol man we oli stap slip wetem woman blong narafala man mo ol woman we oli stap mekem i krangke wetem narafala man, mo ol man we oli stap slip wetem man, mo ol woman we oli stap slip wetem woman.’ (Matiu 24:21; 1 Korin 6:​9, 10; Revelesen 21:8) !Taswe, i impoten tumas, we naoia nomo, yumi lanem blong no laekem nating ol rabis fasin ya, mo yumi stap longwe long ol samting we i save lidim yumi blong mekem rabis fasin long saed blong seks!​—Ol Sam 97:10; 1 Korin 6:18.

Long Evri Ples ‘Oli Stap Faet Mo Kilim Man i Ded’

13. ?Long taem blong Noa, from wanem ol man olbaot long evri ples ‘oli stap mekem faet mo kilim man i ded’?

¹³ Baebol i tokbaot wan narafala rabis fasin we i makem taem blong Noa: Ol man “long evri ples, oli stap faet mo oli stap kilim man i ded.” (Jenesis 6:11) Fasin blong faet mo kilim man i ded i no stat long taem blong Noa nomo. Ken we i pikinini blong Adam, hem i kilim gudfala brata blong hem i ded. (Jenesis 4:8) Lamek tu i folem fasin blong ol man long taem blong hem, hem i faet mo kilim man.  Hem i wokem wan sing blong tokflas from raf fasin blong hem blong kilim wan yangfala man i ded. Hem i yusum eskius se man ya i kilim hem fastaem, taswe hem i kilim man ya i ded. (Jenesis 4:​23, 24) Yes, raf fasin i stap longtaem finis, be samting we i defren long taem blong Noa, se ol raf fasin ya oli kam antap bitim mak. Taem ol enjel we oli no obei long God oli tekem ol woman blong wol ya mo oli givim pikinini long olgeta​—hemia ol Nefilim—​fasin blong faet mo kilim man i kam antap kasem wan mak we oli neva luk bifo. Baebol ya New World Translation i soem se ol man bifo oli yusum wan Hibru tok blong tokbaot ol bigbigfala dabolbun ya, Nefilim, we oli laekem faet. Hibru tok ya i minim “Ol Man Blong Katemdaon”​—“olgeta we oli kilimdaon narafala.” (Jenesis 6:​4, futnot long NW ) Taswe, olbaot long evri ples, ol man “oli stap faet mo oli stap kilim man i ded.” (Jenesis 6:13) !Tingbaot olsem wanem i mas hadwok long Noa blong tijimgud ol pikinini blong hem, taem wol i fulap long raf fasin olsem! Nating se i hadwok, Baebol i talem se, ‘long olgeta man long wol ya, Noa nomo i stret man.’​—Jenesis 7:1.

14. ?Olbaot long evri ples, ol man ‘oli stap mekem faet mo kilim man i ded’ go kasem wanem mak?

¹⁴ I tru se i gat fasin blong faet mo kilim man i ded long olgeta yia we oli pas finis. Be long taem blong yumi, ol raf fasin ya oli kam antap kasem wan mak we yumi neva luk bifo, olsem i bin hapen long taem blong Noa. Oltaem yumi harem nius blong ol faet insaed long ol famle, raf fasin blong ol teroris, rabis wok blong sam gavman we oli traem kilim i ded olgeta man blong wan laen, mo sam krangke man we oli kilim fulap man i ded wantaem blong nating nomo. Antap long hemia, i gat ol man we oli ded long ol wo. Yes, wol ya i fulap bakegen long raf fasin. ?From wanem? ?Wanem i mekem se raf fasin ya i kam antap moa naoia? Ansa blong kwestin ya i soemaot wan narafala samting long taem blong yumi we i sem mak long taem blong Noa.

15. (a) ?Wanem i mekem se faet mo fasin blong kilim man i kam antap long ol las dei ya? (b) ?Yumi save sua long wanem samting?

¹⁵ Long 1914, Kingdom blong God i stanap long heven, mo King blong Kingdom ya, Jisas Kraes, i mekem wan wok we i jenisim taem blong yumi bigwan. Hem i sakem Setan mo ol rabis enjel blong hem, oli aot long heven oli kamdaon long wol. (Revelesen 12:​9-12) Bifo we Bigfala Wota i ron, ol rabis enjel oli jusum blong lego ples blong olgeta long heven. Be long taem blong yumi oli no jusum, Jisas nomo i sakemaot olgeta. Mo tu, naoia oli no moa save jenisim bodi blong olgeta i kam bodi blong man, blong oli haremgud long ol rabis fasin blong seks. Taswe, oli harem nogud, oli kros tumas, mo oli fraet tu long jajmen we bambae i kasem olgeta i no longtaem. From samting ya, oli pulum ol wanwan man mo ol grup blong man, blong oli faet mo kilim narafala go kasem mak we i bigwan moa i bitim taem blong Noa. Long taem blong Noa, Jeova i spolem wol ya we ol rabis enjel mo ol pikinini blong olgeta oli mekem i kam nogud. !Yumi save sua se bambae hem i mekem i sem mak long taem blong yumi! (Ol Sam 37:10) Be,  olgeta we oli stap lukaot gud oltaem, oli save se klosap nao, bambae oli kamfri long ol trabol ya.

Talemaot Gud Nius

16, 17. ?Wanem namba fo samting long saed blong taem blong Noa we i sem mak long taem blong yumi?

¹⁶ Namba fo samting long saed blong taem blong Noa we i sem mak long taem blong yumi, hemia wok we God i givim long Noa. Noa i bildim wan bigfala sip, mo hem i “wan prija.” (2 Pita 2:5) ?Hem i prij long saed blong wanem? Noa i singaot ol man blong oli tanem tingting blong olgeta from sin, mo hem i givim woning se God bambae i spolem wol ya. Jisas i talem se ol man long taem blong Noa oli no wantem save long woning ya. Taswe, “oli no save wan samting, kamkam we wota i ron bigfala, i tekemaot olgeta.”​—Matiu 24:​38, 39, Nyutesteman wetem Ol Sam long Bislama.

¹⁷ Long sem fasin, ol Witnes blong Jeova oli gohed strong blong mekem wok we God i givim long olgeta, oli talemaot Kingdom blong God long olgeta ples blong wol. Long klosap evri ples, ol man oli save harem mo ridim tok blong Kingdom long lanwis blong olgeta. Wajtaoa we i talemaot Kingdom blong Jeova, ol Witnes oli givimaot 25 milian blong evri namba blong hem long bitim 140 lanwis. Yes, oli stap talemaot gud nius blong Kingdom blong God “long olgeta ples long wol, blong oli witnes blong hem long fes blong olgeta man.” Taem wok ya i finis go kasem mak we God i wantem, bambae en i kam.​—Matiu 24:14.

18. ?Olsem wanem samting we ol man oli mekem taem yumi prij long olgeta i sem mak long fasin blong ol man long taem blong Noa?

¹⁸ Bifo we Bigfala Wota i ron, ol man oli no kea long ol samting long saed blong spirit mo ol gudfala fasin. Taswe, olgeta ya we oli no gat bilif nating, oli laf long Noa mo famle blong hem, oli sakem ol nogud tok long hem mo jikim hem. Oli ting se en blong wol ya i no save kam, be oli rong. Long sem fasin, tede, long ol las dei ya, fulap man ‘oli laf long yumi.’ Nating se i olsem, Baebol i talem se “dei blong [Jeova] bambae i kam olsem we man blong stil i kam.” (2 Pita 3:​3, 4, 10) Yes, dei ya bambae i kam long stret taem we God i jusumaot. Hem i no save let. (Habakuk 2:3) !Yumi waes sipos yumi stap lukaot gud oltaem!

God i Sevem Sam Man Nomo

19, 20. ?Wanem narafala samting long taem blong Noa, we i sem mak long taem ya we God bambae i spolem rabis wol ya?

¹⁹ Yes, long saed blong rabis fasin blong ol man mo trabol we God bambae i mekem i kamaot blong spolem olgeta, taem blong Noa mo taem blong yumi i sem mak. Be i no long saed blong tufala samting ya nomo. Taem Bigfala Wota i ron, God i sevem sam man. Long en blong wol ya tu, God bambae i sevem sam man bakegen. Ol man we God i sevem olgeta long Bigfala Wota, oli kwaet man we oli no folem fasin blong ol man raonabaot long olgeta. Oli lesin long woning we God i givim, mo oli no joen long ol rabis fasin blong ol narafala man. Baebol i talem se: “Noa nomo, Hae God i stap glad long hem.” Mo i talem bakegen se: “[Noa] i wan stret man, we ol man oli no save jajem hem.” (Jenesis 6:​8-10) Long olgeta man we oli stap long wol long taem bifo, God i sevem wan famle nomo. Yes, “eit man nomo, we God i yusum wota blong sevem olgeta.” (1 Pita 3:20) Biaen, Jeova God i talem long olgeta ya se: “Yufala i mas gat plante pikinini, blong bambae wol ya i kam fulap long olgeta.”​—Jenesis 9:1.

²⁰ Baebol i promes se “wan bigfala hip blong ol man” bambae “oli winim” bigfala trabol we God bambae i mekem i kamaot long wol ya. (Revelesen 7:​9, 14) ?Bambae i gat hamas man long bigfala hip ya? Jisas i talem se: “Get ya we i smol nomo, mo rod we i strong, hemia i blong go kasem laef. Mo smol man nomo oli faenem.” (Matiu 7:​13, 14) Taem yumi tingbaot ol bilian man we oli laef naoia long wol, ol man we God bambae i sevem olgeta tru long bigfala trabol ya, bambae oli smol nomo. Be maet olgeta ya bambae oli gat sem janis we God i givim long ol man we hem i sevem olgeta long taem bifo. Go kasem taem we God i makemaot, maet oli save karem pikinini, blong mekem wan niufala kampani blong man we bambae oli fulumap wol ya.​—Aesea 65:23.

 “Yufala i Mas Lukaot Gud”

21, 22. (a) ?Olsem wanem stadi ya long saed blong Bigfala Wota we i ron long taem blong Noa, i givhan long yu? (b) ?Wanem nao stamba vas blong yia 2004, mo from wanem yumi mas harem advaes we vas ya i givim?

²¹ Maet yumi ting se Bigfala Wota we i ron i no impoten tumas long yumi, from we samting ya i hapen longtaem bifo. Be i klia se hem i wan woning we yumi no mas fogetem. (Rom 15:4) Ol samting long taem blong Noa we oli sem mak long taem blong yumi, oli mas mekem yumi luksave bigfala mining blong ol samting we oli stap hapen tede. Mo oli mas mekem yumi wekapgud, blong yumi rere from taem we Jisas bambae i kamtru olsem wan stilman, blong jajem ol man nogud.

²² Tede, Jisas Kraes i stap lidim wan bigfala wok blong bildim ol samting long saed blong spirit. Long taem bifo, sip i sevem Noa mo famle blong hem. Long sem fasin, tede i gat wan paradaes long saed blong spirit, we ol man blong mekem trufala wosip oli save stap sef long hem, mo we bambae i sevem laef blong olgeta. (2 Korin 12:​3, 4) Blong stap laef tru long taem blong bigfala trabol we i stap kam, yumi mas stap insaed long paradaes ya oltaem. Afsaed long paradaes ya, i gat wol blong Setan, we i rere oltaem blong pulum man we i slak mo man we i wantem slip long saed blong spirit. I impoten tumas we yumi ‘mas gohed oltaem blong lukaot gud’ mo rere from dei blong Jeova.​—Matiu 24:​42, 44.

[Futnot]

?Yu Yu Tingbaot?

• ?Wanem advaes we Jisas i givim long saed blong taem we hem bambae i kamtru?

• ?Jisas i talem se taem ya we hem i kamtru long hem, bambae i sem mak long wanem taem?

• ?Long wanem fasin, taem blong yumi i olsem taem blong Noa?

• ?Sipos yumi tingbaot ol samting long taem blong Noa we oli sem mak long taem blong yumi, olsem wanem samting ya i save mekem yumi strong moa blong lukaot gud?

[Kwestin]

[Tok blong makem poen pija long pej 18]

Stamba vas blong yia 2004, hemia: “Yufala i mas lukaot gud . . . Oltaem yufala i mas rere.”​—Matiu 24:​42, 44.

[Tok blong pija long pej 15]

Noa i harem woning we God i givim. ?Yumi mekem olsem hem?

[Tok blong pija long pej 16]

“Long taem ya we mi, mi Pikinini blong Man mi kamtru, bambae i olsem taem blong Noa bifo”