?Olsem Wanem Blong Wokem Trufala Lav?

“Lav i olsem meresin blong evri trabol long laef; lav hemia laef.”​—Wan buk ya Living to Purpose, we Joseph Johnson i raetem, long 1871.

?OLSEM wanem man i save lan blong lavem narafala? ?Hem i mas stadi long tingting mo fasin blong man? ?Hem i mas ridim ol buk we oli fulap long advaes blong mekem laef i kam gud moa? ?Hem i mas lukluk ol stori blong lav long ol video kaset? !Nogat! Ol man oli lanem lav fastaem long eksampol mo trening blong papa mama. Wan pikinini i save lanem mining blong lav, sipos hem i gruap long wan famle we i soem lav, taem papa mama i lukaotgud long hem mo givim kakae long hem, storian wetem hem, mo intres bigwan long hem. Mo tu, hem i lanem lav taem papa mama i tijim hem blong folem ol gudfala rul long saed blong ol fasin we i stret mo ol fasin we i no stret.

Trufala lav i no jes wan filing nomo. Man we i gat trufala lav, oltaem i traehad blong mekem i gud long narafala, nating se long taem ya narafala i no rili gat tangkiu from. Plante taem, pikinini i no gat tangkiu taem papa mama i stretem hem wetem lav. Nambawan eksampol long saed blong fasin ya blong soem trufala lav, hemia eksampol blong Man we i Wokem olgeta samting. Aposol Pol i raetemdaon tok blong God i se: “Pikinini blong mi, mi mi Hae God. Sipos mi mi mekem wan samting long yu blong stretem yu, yu yu mas rere blong lan. Sipos mi tok strong long yu, bambae yu no harem nogud, we tingting blong yu i foldaon. Mi mi Hae God, mo mi save stretem olgeta ya we mi lavem olgeta.”​—Hibrus 12:​5, 6.

?Papa mama, olsem wanem yutufala i save mekem olsem Jeova mo soem lav long famle blong yutufala? ?Mo eksampol we yutufala i soem long saed blong fasin fren blong hasban mo waef, i impoten olsem wanem?

Tijim Lav Tru Long Eksampol

?Sipos yu wan hasban, yu yu tinghae long waef blong yu olsem we hem i wan sas samting, mo yu soem ona mo respek long hem? ?Sipos yu wan waef, yu yu lavem mo sapotem hasban blong yu? Baebol i talem se hasban mo waef tugeta i mas soem lav mo respek. (Efesas 5:28; Taetas 2:4) Taem oli mekem olsem, ol pikinini oli luk long prapa ae blong olgeta we Kristin lav i stap wok. !Hemia i rili wan impoten mo gudfala lesen!

Mo tu, ol papa mama oli leftemap fasin lav long famle, taem oli folemgud ol hae rul long saed blong pleplei, ol gudfala fasin, ol mak we oli traehad blong kasem long laef, mo ol samting we oli moa impoten bitim ol narafala samting. Ol man long olgeta ples blong wol, oli faenem se Baebol i givhan long olgeta blong putumap ol rul ya long famle. Long rod ya, oli pruvum se Baebol i rili “kamaot long God fastaem. . . . Ol tok ya i stret gud blong tijim yumi long ol trutok, mo blong  blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Tru ya, tingbaot ol rul mo ol gudfala advaes we yumi save faenem long Bigfala Toktok blong Jisas antap long Hil. Plante man oli luksave se ol rul ya oli nambawan.​—Matiu, japta 5 go kasem 7.

Taem ful famle i trastem God blong lidim famle mo i folemgud ol rul blong hem, ol wanwan memba blong famle i harem sef mo glad. Mo tu, bambae i isi moa long pikinini blong gat lav mo respek long papa mama. Defren nao, long wan famle we i gat tu fes, we i no folem ol gudfala rul, no we ol rul oli slak, tingting blong pikinini i save foldaon, hem i save kam kros, mo i save rebel.​—Rom 2:21; Kolosi 3:21.

?Olsem wanem long famle we papa no mama nomo i lukaot long ol pikinini? ?Bambae i hadwok moa long olgeta blong tijim lav long pikinini blong olgeta? No, i no minim samting ya. I tru se, i no gat wan samting we i moa gud i bitim we pikinini i gat wan gudfala papa mama we tufala i wok gud tugeta. Be, long ol taem we i pas, yumi luk se i gat wan samting we i save givhan bigwan long ol famle we papa no mama nomo i stap. Hemia fasin joengud insaed long famle. Sipos yu yu wan papa no mama we yu wan nomo i lukaot long famle blong yu, traehad blong mekem ol rul blong Baebol i wok. Yes, wan waestok i talem se: “Trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem”​—hemia i minim tu se God bambae i soemaot rod blong papa no mama i folem.​—Ol Proveb 3:​5, 6; Jemes 1:5.

Plante gudfala yangfala oli gruap long ol famle we papa no mama nomo i lukaot long olgeta. Ol yangfala ya oli stap long ol plante taosen Kristin kongregesen blong ol Witnes blong Jeova raon long wol, mo oli gohed strong long wok blong Jeova. Samting ya i pruvum se nating we papa no mama nomo i lukaot long famle, be hem i save tijim lav long pikinini blong hem.

?Olsem Wanem Yumi Evriwan i Save Wokem Lav?

Baebol i talemaot se long taem blong “lasdei,” bambae ol man “oli no man blong gat sore.” Hemia i min se, bambae i no moa gat spesel fasin fren we i stap oltaem bitwin ol memba blong famle. (2 Timoti 3:​1, 3) Nating se i olsem, olgeta we oli gruap long wan famle we i no soem lav, olgeta tu oli save lan blong wokem lav. ?Olsem wanem oli save wokem lav? Oli save lanem lav long eksampol blong Jeova, we i Stamba blong fasin lav mo we i soem lav mo filing long olgeta we oli stap trastem hem wetem fulhat blong olgeta. (1 Jon 4:​7, 8) Wan man blong raetem Ol Sam i talem se: “Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.”​—Ol Sam 27:10.

Jeova i soemaot lav long yumi long plante defren rod. Tru long Baebol, hem i givim advaes olsem wan papa. Hem i givim tabu spirit blong givhan long yumi, mo ol Kristin brata sista blong sapotem yumi. (Ol Sam 119:​97-105; Luk 11:13; Hibrus 10:​24, 25) Tingbaot olsem wanem trifala rod ya i save halpem yumi blong lavem moa God mo ol man raonabaot long yumi.

God i Givim Advaes Olsem Wan Papa

Blong lavem wan man, yumi mas save gud hem. Jeova i wantem se yumi kam stap klosap long hem. Taswe Hem i soemaot ol tingting blong hem long yumi tru long ol pej blong Baebol. Be, i no naf blong ridim Baebol nomo. Yumi mas mekem ol tijing blong Baebol i wok long laef blong yumi mo yumi mas luk ol gudfala frut we i kamaot from. (Ol Sam 19:​7-10) Long Aesea 48:​17, Jeova i talem se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” Yes, Jeova, we i stamba blong fasin lav, i no putumap ol rul we yumi no rili nidim, jes blong  blokem fasin fri blong yumi, nogat. Hem i tijim yumi blong givhan long yumi.

Stret save blong Baebol tu i givhan long yumi blong lavem moa ol narafala man. Hemia from we trutok blong Baebol i tijim yumi long tingting blong God long saed blong ol man. Mo tu, Baebol i talem ol rul we yumi mas folem long ol fasin we yumi mekem long ol narafala. Save ya i halpem yumi blong wokem fasin ya blong lavem ol man raonabaot long yumi. Aposol Pol i talem se: “Mi mi stap prea we oltaem bambae yufala i save kam we yufala i stap lavlavem yufala moa, mo oltaem bambae yufala i gohed blong kasem moa stret save mo blong gat fasin luksave fulwan.”​—Filipae 1:​9, NW.

Blong soemaot olsem wanem “stret save” bambae i halpem yumi blong lavem moa ol man, tingbaot wan stamba trutok long Ol Wok 10:​34, 35. Vas ya i talem se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” God i no jajem man from kantri no kala blong hem. Hem i glad long enikaen man we i ona long hem mo we i mekem ol samting we i stret. ?Taswe yu no ting se yumi tu, yumi mas gat fasin olsem Jeova we i mekem i sem mak long olgeta man?​—Ol Wok 17:​26, 27; 1 Jon 4:​7-11, 20, 21.

Lav​—Wan Frut Blong Tabu Spirit

Sipos ren i foldaon long stret taem long wan plantesen blong ol frut tri, oli save givim plante frut. Long sem fasin, tabu spirit blong God i save mekem ol man we hat blong olgeta i stret, oli karem ol fasin we Baebol i kolem se ol ‘frut blong tabu spirit.’ (Galesia 5:​22, 23, NW ) Nambawan long ol frut ya hemia lav. (1 Korin 13:13) ?Be yumi mas mekem wanem blong kasem tabu spirit blong God? Wan impoten rod hemia prea. God i save givim tabu spirit long ol man we oli askem long hem. (Luk 11:​9-13) ?Yu stap “gohed” blong prea from tabu spirit? Sipos yu mekem olsem, bambae yu soem ol nambawan frut blong tabu spirit, olsem lav, long laef blong yu.

Be, i gat wan narafala spirit we i agensem tabu spirit blong God. Baebol i tokbaot spirit ya se ‘spirit blong wol.’ (1 Korin 2:12, NW; Efesas 2:2) Spirit ya i olsem wan rabis paoa we i kamaot long Devel Setan. Hem “i stap rulum wol ya” mo wol ya i stap longwe long God. (Jon 12:31) Olsem win we i mekem smok mo doti blong graon i go olbaot, “spirit blong wol ya” i pulum man blong wantem ol samting nogud, ol samting we bodi nomo i wantem, mo we i spolem fasin lav.​—Galesia 5:​19-21.

Rabis paoa ya i save kam bos long laef blong man taem man i ronem ol sas samting, i tingbaot hem wan fastaem, i laekem raf fasin, mo i holem rong tingting long saed blong lav, olsem plante man long wol. Sipos yu wantem wokem trufala lav, yu mas agensem spirit blong wol ya. (Jemes 4:7) Be, yu no save mekem samting ya long paoa blong yu wan; yu mas askem Jeova blong givhan long yu. Tabu spirit blong God​—we i moa strong i bitim olgeta narafala paoa long heven mo wol​—i save mekem yu yu strong mo mekem yu yu win.​—Ol Sam 121:2.

Lanem Lav Long Eksampol Blong Ol Kristin Brata Sista

Ol pikinini oli lan blong soem lav, taem oli luk lav insaed long famle. Long sem fasin, yumi evriwan​—ol yangfala mo ol olfala​—yumi save lan blong  lavem moa ol man, taem yumi joen wetem ol narafala Kristin. (Jon 13:​34, 35) Tru ya, wan impoten wok blong Kristin kongregesen i blong givhan long ol man blong hem blong oli ‘pulum olgeta blong soem lav mo mekem ol gudfala wok.’​—Hibrus 10:​24, New International Version.

Wol ya i no gat lav. Taswe, ol man we “oli trabol tumas, [we] oli no moa gat paoa,” oli glad tumas blong faenem trufala lav ya. (Matiu 9:36) Nating se sam pikinini oli gruap long famle we i no soem lav, plante stori oli soemaot se taem oli kam bigwan oli save lanem lav long eksampol blong ol gudfala fren blong olgeta. !Taswe, i impoten tumas se olgeta Kristin we oli givim laef blong olgeta i go long Jeova finis, oli welkamem wetem fulhat ol niuwan we oli kam joen long kongregesen!

‘Lav Bambae i No Save Finis Samtaem’

Baebol i talem se ‘lav bambae i no save finis samtaem.’ (1 Korin 13:8) ?Olsem wanem samting ya i tru? Aposol Pol i talem se: “Man we i stap lavem man, tingting blong hem i longfala, mo hem i gat sore long man. Man olsem, hem i no save jalus, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik, mo i no save stap kros longtaem.” (1 Korin 13:​4, 5) I klia se, lav ya i no wan naesfala tingting we man nomo i mekemap mo hem i no jes wan filing we i stap blong smoltaem. Defren olgeta​—ol man we oli soem lav ya oli luksave se laef i fulap long trabol we i mekem tingting i foldaon. Be oli no letem trabol ya i spolem lav we oli gat long ol narafala man. Lav ya i rili “save joenemgud olgeta samting, blong oli kam wan.”​—Kolosi 3:​12-14.

Tingbaot eksampol blong wan Kristin gel long Koria, we hem i gat 17 yia nomo. Taem hem i stat blong mekem wok blong Jeova God, famle blong hem i no glad mo hem i mas muvaot long haos blong hem. Be, hem i no kam kros from. Hem i prea long Jeova from problem ya, mo i letem Tok blong God mo tabu spirit i lidim tingting blong hem. Afta long taem ya, hem i raetem plante leta long famle blong hem, we ol tok blong olgeta oli soemaot trufala lav we hem i gat long olgeta. Risal blong samting ya, tufala brata blong hem i stat blong stadi Baebol mo naoia tufala i Kristin we tufala i givim laef blong tufala long Jeova finis. Mama mo smol brata blong hem, tufala tu i akseptem trutok blong Baebol. Biaen, papa blong hem, we i bin agensem hem bigwan, i sore mo i jenisim tingting blong hem. Gel ya we hem i wan Witnes i raetem se: “Mifala evriwan i mared wetem ol Kristin brata sista, mo naoia i gat 23 man long famle we oli joen long wosip blong Jeova.” !Stori ya i pruvum se lav i save win!

?Yu yu wantem gat trufala lav mo halpem ol narafala blong wokem fasin ya? Ale, yu mas kam long Jeova God, we i Stamba blong nambawan fasin ya. Yes, folem advaes blong Baebol, askem God blong givim tabu spirit long yu, mo joen oltaem wetem ol Kristin brata sista. (Aesea 11:9; Matiu 5:5) !Yumi glad tumas blong save se i no longtaem bambae olgeta rabis man oli lus, mo ol man we oli soemaot trufala lav, olgeta nomo bambae oli stap long wol! Tru ya, lav nao hem i rod blong faenem trufala glad mo laef.​—Ol Sam 37:​10, 11; 1 Jon 3:14.

[Tok blong pija long pej 6]

Prea mo stadi long Tok blong God bambae i givhan long yumi blong wokem trufala lav