?Hem i Wan Kastom Nomo No i Wan Kruked Fasin?

LONG sam haeskul long kantri ya Polan, ol studen oli stap hivimap mane blong pem presen blong givim long tija blong olgeta, mekem se taem oli gat eksam, tija i save givim gud mak long olgeta. Taswe wan yangfala Kristin we nem blong hem Katarzyna i gat wan traem long saed ya. Hem askem long hem wan se: “?Bambae mi givim mane no nogat?” Ol fren blong hem long skul oli talem long hem se: “Hemia wan kastom we fulap man oli mekem. Yu no tingting strong tumas, bambae yu no lusum wan samting, be bambae yu winim plante samting.”

Katarzyna i talem se: “Mi mas talemaot se long faswan yia we mi skul, mi joen long rod ya blong hivimap mane. Be afta nomo mi luksave se taem mi mekem olsemia mi sapotem wan kruked fasin we Baebol i tok agensem.” Hem i tingting bak long ol vas blong Baebol we oli soemaot se Jeova i no laekem nating kruked fasin. (Dutronome 10:17; 16:19; 2 Kronikel 19:7) Katarzyna i talem se: “Mi save se i isi tumas blong folem ol fren. Mi tingting gud long poen ya, mo stat long taem ya mi no moa joen long kastom ya bakegen.” Long ol tri yia we i pas, nating we ol narafala studen oli tok spolem hem, be hem i gat janis blong eksplenem long sam long olgeta from wanem hem i no joen long fasin ya blong givim presen, from stret save we Baebol i givim long hem.

Sam narafala oli talem se Katarzyna i tingbaot hem wan nomo mo i no wantem blong joen wetem ol narafala. Hem i talem se: “I gat sam long olgeta ya we oli stap badfren yet wetem mi. Be long semtaem, plante oli respektem tingting we mi gat, mo samting ya i mekem mi mi glad.” Ol man oli save se Katarzyna i wan Witnes blong Jeova, we i obei long ol rul blong Baebol long laef blong hem evri dei.