?Wanem Kwestin We Yu Yu Wantem Askem Long God?

OL MAN raonabaot long wol oli gat ol bigfala kwestin long saed blong laef. ?Olsem wanem long yu? ?Yu tu, yu gat ol kwestin we yu wantem faenem ansa blong olgeta? Plante man oli toktok wetem ol lida blong skul long saed blong ol kwestin we oli gat, be oli no kasem ol gudfala ansa. Sam narafala oli tingbaot ol kwestin ya olgeta nomo. Sam oli prea long God blong hem i halpem olgeta. ?Be, yu ting se God i rili save halpem yu blong faenem ansa long ol kwestin we i mekem tingting blong yu i fasfas? Hemia sam long ol kwestin we plante man oli talem se oli wantem askem long God.

?God, yu yu rili hu?

Tingting we wanwan man i gat long saed blong God i stanap long kastom we man ya i gruap long hem, skul blong papa mama blong hem, no jus we hem wan i mekem. Sam man oli yusum ol spesel nem taem oli tokbaot Bigman, sam narafala oli singaot hem nomo se God. ?Weswan i stret? ?I tru se i gat wan trufala God nomo i stap we i soemaot hem mo nem blong hem long yumi?

?From wanem plante man oli stap safa?

Man we i no lukaotgud long laef blong hem mo we i mekem rabis fasin, i save spolem helt blong hem mo kam pua tumas. Man olsem i save komplen se laef i had tumas. Be maet hem i save gud from wanem hem i stap safa.

Plante narafala man oli stap safa bigwan, be i no fol blong olgeta. Sam man oli safa from wan sik we i stap longtaem. Sam narafala oli harem se plante samting i stap agensem olgeta, mo ol samting ya oli mekem se oli mas wokhad tumas jes blong givim kakae mo ples blong slip long famle blong olgeta. Plante milian man oli kasem trabol from we man i stilim olting blong olgeta, no maet i gat faet long kantri, raf fasin i stap olbaot, ol disasta, no ol man we oli gat paoa oli mekem i no stret long olgeta.

Taswe plante ol man oli stap askem se: ‘?From wanem ol nogud fasin oli kam antap bigwan? ?From wanem God i letem ol nogud fasin ya oli stap?’

 ?From wanem mi stap laef? ?Wanem mining blong laef?

Plante taem ol kwestin ya oli kamaot from we tingting blong man i foldaon. Plante man oli harem se wok we oli stap mekem evri dei i no save givim trufala glad. Plante milian narafala man oli bilif se God nao i makemaot evri samting we i mas hapen long laef blong olgeta. ?Samting ya i tru? Sipos God i gat wan stamba tingting long saed blong laef blong yu ating bambae yu yu wantem save wanem stamba tingting ya.

Long olgeta buk we oli stap long wol ya, i gat wan buk we i talemaot klia se hem i Tok Blong God. Yes, buk ya we i karem mesej blong God long olgeta man, i kamaot long plante moa lanwis bitim eni narafala buk we man i raetem. Buk ya hemia Tabu Baebol. Man We i Wokem Heven Mo Wol, hemia God hem wan, i soemaot long Baebol se hem i hu mo wanem nem blong hem. ?Yu yu save nem blong God? ?Yu yu save wanem we Baebol i talem long saed blong God mo ol fasin blong Hem? ?Yu yu save wanem we Baebol i talem long saed blong ol samting we God i wantem yu blong mekem?

 [Foto Credit Line blong pija long pej 2]

COVER: Chad Ehlers/Index Stock Photography

[Foto Credit Line blong pija long pej 3]

Mountain: Chad Ehlers/Index Stock Photography