“!Naoia Mi Save Wanem i Rong Long Mi!”

HEMIA toktok we wan man long Tokyo i talem taem hem i ridim laef stori long Wajtaoa blong Disemba 1, 2000. Nem blong stori ya se “Yu No Save Nating Wanem Bambae i Save Kamtru Long Laef Blong Yu Tumora.” Stori ya i tokbaot laef blong wan brata we bifo hem i misinari, mo naoia i stap harem nogud from wan sik we ol dokta oli kolem manic-depressive psychosis.

Man ya blong Tokyo i raetem leta i go long olgeta we oli prentem magasin ya mo i talem se: “Ol saen blong sik ya we magasin i tokbaot, oli stret long hemia we mi stap kasem. Taswe mi go long wan hospital we i lukaot long ol sik blong tingting mo oli talem long mi se mi tu mi kasem sik ya manic depression. Dokta we i jekem mi i sapraes. Hem i talem se, ‘plante taem ol man we oli gat sik ya oli no ting se oli sik.’ Mi bin kasem help blong faenemaot sik ya kwiktaem bifo we hem i kam moa nogud.”

Plante milian man long wol oli kasem help long plante defren rod taem oli ridim tufala magasin ya Wajtaoa mo Wekap! Oli luk se ol haf blong tufala magasin ya i givim save long olgeta, mo oli glad blong ridim. Naoia, oli prentem Wajtaoa magasin long 141 lanwis, mo Wekap! long 86 lanwis. Bambae yu tu yu save glad blong ridim Wajtaoa mo Wekap! magasin oltaem.