?I Gat Rod Blong Mekem Ol Man Oli Joengud?

NOMATA wanem bilif blong yu, ating yu yu agri se long evri skul i gat sam man we oli lavem trutok. Long skul blong Hindu, Katolik, Jiu, mo plante narafala bakegen, yumi save faenem sam man we oli laekem ol tok we oli tru mo we oli rere blong lukaot ol trutok ya. Be i luk olsem we ol skul oli stap mekem ol man oli seraot. Sam man oli yusum ol skul blong mekem ol rabis plan blong olgeta oli kamtru. ?Olgeta man blong ol defdefren skul, we oli lavem samting we i gud mo tru, bambae oli save joengud samtaem? ?I gat wan taem we olgeta ya bambae oli save wok wanples?

!Yumi sore tumas blong luk se plante moa skul naoia oli stamba blong fasin seraot bitwin ol man! Tingbaot sam eksampol. Ol Hindu oli faet agensem ol Budis long Sri Lanka. Ol Protestan, Katolik, mo Jiu oli bin kilim man i ded long plante faet. Ol “Kristin” oli faet agensem ol Muslim long Bosnia, Jejnia, Indonesia, mo Kosovo. Long Maj 2000, ol skul nao oli biaenem wan faet we i gohed blong tu dei mo i karemaot laef blong 300 man Naejiria. Fasin blong no laekem man we i blong defren skul i olsem bensin blong statem enjin. Yes, fasin ya i mekem ol faet ya oli raf tumas.

Ol man we oli laekem gudfala fasin oli harem nogud from ol rabis samting ya we ol skul oli mekem. Eksampol, plante man we oli stap go long jos oli sek bigwan taem skul blong olgeta i no mekem wan samting nating long ol pris we oli bin mekem rabis fasin wetem pikinini. Sam narafala memba blong jos oli sem bigwan long ol smosmol Kristin skul we oli stap seraot from ol defren tingting long saed blong man we i slip wetem man mo fasin blong kilim pikinini long bel. I klia se ol skul oli no mekem ol man oli joengud. Nating se i olsem, long ol defren skul, i gat sam man we oli lavem trutok. Ol stori we oli kam biaen, oli soemaot samting ya.

Oli Wantem Trutok Tumas

Fidelia i wan memba blong Katolik Jos blong San Francisco, we i stap long La Paz, Bolivia. Hem i strong long wosip blong hem. Hem i stap bodaon long aedol blong Meri mo hem i pem ol beswan kandel blong putum long fored blong kros. Evri wik, hem i givim plante kakae olsem presen i go long pris blong i givim long ol puaman. Be, faef bebi blong Fidelia oli ded bifo we jos i save baptaesem olgeta. Taem pris i talem long hem se ol bebi ya oli stap safa long tudak long ples ya we oli kolem Limbo, Fidelia i tingting se, ‘?Sipos God i gud, from wanem hem i mekem olsem?’

Tara, hem i wan dokta, mo hem i gruap long skul blong Hindu long Kathmandu, Nepal. Folem kastom blong ol bubu blong hem plante handred yia finis, hem i stap wosipim god blong ol Hindu long ol haos wosip blong olgeta mo hem i gat ol aedol long haos blong hem. Be i gat sam kwestin we Tara i wantem faenem ansa blong olgeta: ?From wanem plante man oli safa? ?From wanem ol man oli stap ded? Skul blong hem i no naf blong ansarem ol kwestin ya.

Panya i gruap long wan haos klosap long wan reva long Bangkok, Taelan, mo hem i folem skul blong Budis. Skul ya i tijim hem se man i safa from ol samting we hem i bin mekem long wan narafala laef. Tijing ya i talem se sipos wan man i wantem kam fri  long fasin safa ya, hem i mas lego olgeta filing blong hem blong wantem sam samting. Olsem ol narafala Budis, Panya i lanem blong soem respek long ol haeman blong jos blong hem we oli werem yala dres. Olgeta ya oli waes tumas mo oli kam long haos blong ol man evri moning blong askem mane. Panya i joen long fasin blong tingting dip mo i hivimap fulap pija blong Buda from we hem i bilif se ol pija ya oli save protektem hem. Afta long wan bigfala aksiden, haf bodi blong Panya i ded, stat long bel i godaon long leg. Hem i go oltaem long ol haos wosip blong Budis, from we hem i ting se maet bambae i gat wan merikel i kamaot long ples ya blong mekem hem i kamgud bakegen. Be hem i no kamgud bakegen, mo hem i no kasem wan spesel save. Long defren fasin, hem i stat joen long wok blong rabis spirit.

Virgil i bon long Yunaeted Stet. Taem hem i stap long haeskul, hem i joenem wan grup we oli kolem olgeta ol Blak Muslim. Hem i strong blong seremaot ol pepa mo buk blong skul ya we oli talem se ol waet man nao oli Devel Setan. Oli talem se hemia nao risen from wanem ol waet man oli mekem plante trabol long ol blak man. Virgil i strong long bilif blong hem, be i gat sam kwestin we i mekem tingting blong hem i trabol: ?I tru se olgeta waet man evriwan oli nogud? ?Mo from wanem bighaf blong ol toktok long jos i long saed blong mane nomo?

Charo i gruap long Saot Amerika we Katolik skul i strong, be hem i wan Protestan. Hem i glad blong stap long wan skul we i no wosipim ol aedol. Charo i laekem go long jos evri Sande blong lesin long strongfala tok blong pasta. Hem i laekem blong singaot “!Haleluia!” mo joen long ol singsing mo danis long jos. Charo i bilif strong se God i sevem hem finis mo hem i bon bakegen. Hem i givim ten pesen blong pei blong hem i go long jos, mo taem prija long televisin i askem man blong givim presen mane blong givhan long ol pikinini long Afrika, Charo i sanem mane i go. Be, taem hem i askem pasta se, from wanem God we i gat lav i stap mekem man i safa long helfaea, hem i luk se pasta ya i no naf blong ansarem kwestin blong hem. Mo tu, biaen, hem i faenemaot se ol presen mane ya we hem i stap sanem i go, oli no stap yusum nating blong halpem ol pikinini long Afrika.

Faefala man mo woman ya oli gruap long ol defren ples. Be evriwan i gat wan samting we i sem mak. Evriwan oli laekem trutok mo oli wantem tumas blong faenem stret ansa long ol kwestin blong olgeta. ?Be bambae oli save joengud long wan trufala skul? Stori we i kam biaen i ansa long kwestin ya.

[Tok blong pija long pej 4]

?Ol man we oli gruap long ol defdefren ples, oli save joengud?

[Foto Credit Line blong pija long pej 3]

G.P.O., Jerusalem