Wan Kwestin

?Job i safa blong hamas yia?

Plante man oli ting se samting we Job i safa from, i stap plante plante yia, be buk blong hem i no talem olsem.

Faswan samting we i traem Job, hemia hem i lusum ol famle blong hem mo ol sas samting blong hem. I luk olsem se samting ya i no tekem longtaem. Baebol i talem se: “Wan dei, . . . ol pikinini blong Job oli stap mekem lafet long haos blong fasbon brata blong olgeta.” Fastaem, Job i kasem nius long ol wokman blong hem, wan afta narawan, se ol buluk, ol sipsip, mo ol kamel blong hem oli ded, wetem ol man we oli lukaot long ol anamol ya tu. Smoltaem biaen, Job i harem nius se ol boe mo gel blong hem, we “oli stap kakae mo dring waen long haos blong fasbon brata blong olgeta,” (NW ) oli ded. I luk olsem se olgeta samting ya i kamaot long wan dei nomo.—Job 1:13-19.

Ating nekiswan trabol we i kasem Job i tekem moa taem. Hemia taem we Setan i kam fored long Jeova mo i talem se, sipos Job i harem i soa long bodi blong hem, bambae hem i lego Jeova. Ale, Setan i “mekem we ol soa i kam kavremapgud bodi blong Job, i stat long hed blong hem, i go kasem leg blong hem daon.” Ating sik ya i tekem taem blong kavremap olgeta bodi blong hem. Mo ating i tekem taem tu blong nius ya we i mekem Job i “harem nogud tumas” i kasem trifala fren blong hem we oli sipos blong kam luk hem blong leftemap tingting blong hem.—Job 2:3-11.

Elifas i blong wan ples long Edom we nem blong hem Teman. Narawan, Jofara, hem i blong notwes blong Arebia. Ples blong tufala ya i no longwe long Uj we hem i ples blong Job, long not blong Arebia. Be narafala ya, Bildad, hem i blong Suaha, mo ol man Suaha oli stap olbaot long saed blong reva Yufretes. Sipos Bildad i stap long ples blong hem, maet i bin tekem sam wik no manis blong hem i harem nius long saed blong Job, mo blong hem i wokbaot i go long Uj. Be i tru, maet trifala ya i stap samples klosap long ples blong Job nomo, taem we Job i safa from ol samting ya. Nating se i olsem wanem, taem ol fren blong Job oli kamtru, oli “kam sidaon long graon wetem Job, oli stap seven dei mo seven naet” we oli no talem wan tok nating.—Job 2:12, 13.

Lashaf blong ol traem blong Job, oli fulumap plante japta blong Baebol. Trifala ya we oli sipos blong kam leftemap tingting blong Job, oli mekem plante toktok mo askem plante kwestin, mo plante taem Job i ansa. Afta we oli finis, yangfala man ya Elihu i givim advaes, mo Jeova i toktok i kam long heven blong stretem Job.—Job 32:1-6; 38:1; 40:1-6; 42:1.

Olsem nao, ating ol traem we Job i kasem, oli tekem sam manis nomo blong finis, maet i no kasem wan yia. Taem yumi kasem strong traem, yumi save ting se bambae i no save finis samtaem. Be, yumi no mas fogetem se bambae i gat en blong hem, sem mak olsem hemia blong Job. Nomata se traem i gohed longtaem olsem wanem, yumi mas tingbaot oltaem we God bambae i givhan long yumi. Tok blong hem i talem se: “Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya . . . we i no save finis samtaem.” (2 Korin 4:17) Aposol Pita i raetem se: “Bambae yufala i stap harem nogud long bodi blong yufala blong smoltaem, be biaen, God bambae i mekem yufala i stret gud. Hem bambae i mekem yufala i strong, i givim paoa long yufala, i stanemap yufala olsem pos we i no save muv.”—1 Pita 5:10.