Wan Kwestin

?From wanem long New World Translation, 2 Pita 3:13 i tokbaot “ol niufala heven [plante] mo wan niufala wol,” be Revelesen 21:1 i tokbaot “wan niufala heven [wan nomo] mo wan niufala wol”?

Hemia wan fasin blong toktok we i laenap wetem ol olfala lanwis. Tok ya i no gat wan spesel mining mo i no jenisim mining we i stap finis.

Fastaem, tingbaot Hibru haf blong Baebol. Long olfala lanwis, oltaem oli tanem Hibru tok ya sha·maʹyim, i kam “[ol] heven”. Tok ya “[ol] heven” i no min se i gat plante heven. Be hem i stap minim fulwan heven wetem olgeta defdefren haf blong hem. Samting ya i tru tumas, from we heven i bigwan mo i gat plante bilian sta long hem. Taem olfala lanwis i makem tok ya sha·maʹyim wetem ‘ya’ biaen long hem (olsem “heven ya”), klosap evri taem, New World Translation i putum “ol heven.” Yumi luk samting ya long Aesea 66:22. Long ol ples we oli no putum “ya” wetem sha·maʹyim, hem i save minim “heven,” (olsem we i stap long Jenesis 1:8; 14:19, 22; Ol Sam 69:34,) no “ol heven” (olsem long Jenesis 49:25; Jajes 5:4; Job 9:8; Aesea 65:17).

Long Aesea 65:17 mo 66:22, oli raetem Hibru tok ya heven olsem we i gat plante heven. Blong yusum sem fasin oltaem, oli jusum blong talem se “ol niufala heven mo wan niufala wol [no, niufala wol ya].”

Grik tok ya ou·ra·nosʹ i minim “heven,” mo ou·ra·noiʹ i minim “ol heven.” I gud blong save se ol man we oli tanem Grik Septuagint Baebol oli no yusum “ol heven” be oli yusum “wan niufala heven” long Aesea 65:17 mo 66:22.

?Be olsem wanem long “niufala heven [no ol niufala heven] mo wan niufala wol” we i kamaot long Kristin Grik haf blong Baebol?

Long 2 Pita 3:13 aposol Pita i yusum Grik tok se “ol heven.” Bifo long vas ya (vas 7, 10, 12), hem i tokbaot “ol heven” blong naoia we oli rabis. Taswe hem i gohed blong yusum sem tok ya “ol heven” long vas 13. Mo tu, i luk olsem se hem i bin yusum ol tok blong Aesea 65:17, we long ples ya Hibru lanwis i yusum tok ya “ol heven”. Hem i mekem sem samting long 2 Pita 2:22, taem hem i yusum Hibru tok we i stap finis long Ol Proveb 26:11. From samting ya, Pita i pulum tingting blong yumi se “stret long promes we God i mekem finis, yumi stap wet long ol niufala heven [plante] mo wan niufala wol.”

Long fasin we i defren smol, aposol Jon i yusum tok we i stap finis long Aesea 65:17 long Septuagint Baebol, taem hem i raetem tok blong hem long Revelesen 21:1, we, olsem yumi luk finis, hem i se “heven” [wan nomo]. Taswe, samting we Jon i raetem hemia se: “Mi luk wan niufala heven [wan nomo] mo wan niufala wol. Mo bambae yufala i no moa tingtingbak long ol olfala samting, mo bambae oli no moa girap long hat blong yufala.”

Hemia wan fasin blong toktok nomo we i laenap long ol olfala lanwis. I gud blong talem bakegen se, fasin ya blong toktok i no jenisim mining blong vas ya taem man i ridim, no i tokbaot “ol niufala heven” no “wan niufala heven.” Fasin blong yusum tufala tok ya i kavremap sem mining nomo.

[Foto Credit Line blong pija long pej 31]

Stars: Frank Zullo