?From Wanem Oli No Gat Pikinini?

DELE mo Fola, * wan hasban mo waef, tufala i wok mo i laef long branj ofis blong Watch Tower Sosaeti long Naejeria. I no longtaem afta we tufala i stat blong wok long ples ya, mama blong Fola i kam visitim tufala. Hem i kam long wan ples farawe blong tokbaot wan samting we i mekem hem i wari. Wari ya i mekem se hem i no save slip long naet.

Hem i talem se: “Yutufala i mekem plante gudfala samting blong givhan long mi. Yutufala i sanem ol presen i kam long mi, mo yutufala i visitim mi. Mi haremgud tumas from lav we yutufala i soemaot. Be ol samting ya oli mekem mi mi wari tu. Oltaem mi tingbaot se ?hu bambae i givhan long yutufala, taem yutufala i kam olfala olsem mi? Naoia yutufala i mared tu yia finis, be yutufala i no gat pikinini yet. ?Yutufala i no ting se i taem blong yutufala i aot long Betel, blong yutufala i gat pikinini mo statem wan famle?”

Tingting blong Mama i olsem: Dele mo Fola, tufala i stap longtaem finis long Betel. Naoia i taem blong tufala i tingbaot fiuja blong tufala. Yes, i mas gat sam narafala we oli save mekem wok blong tufala. I no minim se Dele mo Fola i mas lego wok blong prij fultaem, be maet tufala i save mekem wan narafala haf blong minista wok, we i mekem se tufala i save gat pikinini tu mo harem gud long wok blong papa mama.

Wari Blong Mama

Yumi kasem save long wari blong mama ya. Tingting ya blong wantem gat pikinini i wan stamba tingting blong ol man long olgeta ples long wol, i stat bifo kam kasem naoia. Taem wan woman i karem pikinini, samting ya i wekemap ol dip filing olsem glad mo hop insaed long hem. Baebol i talem se: “Ol pikinini ya blong yumi, hemia wan presen we Hae God i givim long yumi, wan gudfala samting we hem i givim blong leftemap yumi.” Yes, fasin blong bonem pikinini, i wan nambawan presen we Man ya we i Wokem yumi, we i gat lav, i givim long yumi. —Ol Sam 127:3.

Long plante ples long wol, ol man oli strong long olgeta we oli mared, se oli mas karem pikinini. Eksampel, long Naejeria, bighaf long ol woman oli bonem sikis pikinini. Plante taem long dei blong wan mared, yu harem ol man oli talem long tufala we i mared se: “Afta long naen manis, mifala i wantem harem krae blong wan bebi long haos blong yu.” Olsem presen blong mared, maet oli givim wan basket, blong bebi i save slip long hem. Mama blong hasban i wajem gud kalenda. Sipos waef i no gat bel insaed long wan yia, bambae mama ya i askem ol kwestin blong luksave wanem i rong mo olsem wanem hem i save givhan.

Long tingting blong plante mama, wan man mo woman i mared from wan risen nomo, hemia blong bonem pikinini mo blong famle laen blong hasban i gohed. Mama blong Fola i askem long hem se: “?From wanem nao yu mared, sipos yu no gat tingting blong karem pikinini? Wan woman i bonem yu, ale i blong yu nao blong bonem ol pikinini blong yu.”

Be antap long samting ya, i gat sam impoten samting blong tingbaot. Long plante kantri long Afrika, gavman i givhan smol nomo long ol olfala. Folem kastom blong olgeta, ol pikinini nao oli mas lukaot long olfala papa mama blong olgeta, olsem we ol papa mama ya i bin lukaot long olgeta taem oli smol. Taswe long tingting blong mama blong Fola, sipos ol pikinini blong hem oli no gat pikinini blong olgeta, long ol yia we oli kam olfala, bambae oli stap olgeta wan nomo, we i no gat wan i lukaot long olgeta. Maet oli pua tumas mo taem oli ded, maet i no gat wan we i berem olgeta.

Long plante ples long Afrika, ol man oli tingting se taem yu no gat pikinini, hemia i wan bigfala trabol. Long sam eria, ol woman oli mas soemaot bifo we oli mared se oli naf blong bonem pikinini. Plante woman  we oli no save gat bel, oli traehad blong faenem meresin blong mekem se oli save karem pikinini.

Long tingting blong plante man, olgeta we oli mared mo oli jus blong no karem pikinini, oli stap blokem olgeta wan long wan gudfala samting. Plante taem, ol man oli tingbaot olgeta ya olsem we oli krangke, oli no tingbaot fiuja blong olgeta, mo ol man oli sore long olgeta.

Wan Glad Mo Wan Wok

Ol man blong Jeova oli luksave se pikinini i givim glad mo i givim wok tu. Baebol i talem long 1 Timoti 5:8, se: “Man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”

Ol papa mama oli mas lukaotgud long famle blong olgeta, i no long saed blong bodi nomo, be long saed blong spirit tu. Oli mas traehad long plante yia blong mekem olsem. Oli no mas gat tingting ya se, from we ol pikinini oli wan presen we God i givim, taswe God bambae i lukaot long olgeta. Nogat. Ol papa mama oli luksave se God nao i givim wok long olgeta blong lukaotgud long ol pikinini blong olgeta folem ol rul blong Baebol. Mo hemia i wan wok we oli mas mekem fultaem. Ol no mas givim wok ya long ol narafala.—Dutronome 6:6, 7.

Wok blong trenem pikinini i rili strong naoia we yumi stap long taem blong ol “lasdei,” from we “laef long wol ya i kam strong tumas.” (2 Timoti 3:1-5) I tru se i strong blong kasem mane, be antap long hemia, fasin blong no bilif long God i stap kam antap, mekem se i hadwok tede blong trenem pikinini. Nating se i olsem, raonabaot long wol, plante Kristin papa mama oli wok strong blong trenemgud pikinini blong olgeta “olsem we Masta blong yumi i stap stretem yumi, i stap tijim yumi.” (Efesas 6:4) Jeova i lavem ol papa mama ya mo i blesem olgeta from hadwok blong olgeta.

Risen From Wanem Sam Man Oli No Gat Pikinini

Plante Kristin man mo woman we oli mared, oli no gat pikinini. Sam long olgeta oli no save karem pikinini. Be nating se i olsem, oli no wantem adoptem pikinini blong narafala man. Sam narafala hasban mo waef we oli save karem pikinini, oli jusum blong no gat pikinini. Olgeta oli mekem disisen ya, i no from we oli wantem ronwe long wok blong wan papa no mama, no from we oli fraet long ol problem we maet oli save fesem. Defren olgeta, ol hasban mo waef ya oli wantem yusum ful laef blong olgeta long ol defren haf blong fultaem minista wok. Oli no save mekem wok ya sipos oli gat pikinini. Sam long olgeta oli wok olsem misinari. Sam narafala bakegen oli mekem wok blong visitim ol kongregesen no oli wok long Betel.

Olsem olgeta Kristin, oli luksave se yumi gat wan impoten wok blong mekem. Jisas i talem se: “Bambae ol man oli stap talemaot gud nius blong kingdom blong God. Bambae oli talemaot long olgeta ples long wol, blong oli witnes long hem long fes blong olgeta man. Nao biaen, bambae en i save kam.” Wok ya i stap gohed tede. Hem i wan impoten wok, from we “en” i minim se olgeta we oli no wantem harem gud nius ya, bambae oli lus.—Matiu 24:14, NW; 2 Tesalonaeka 1:7, 8.

Taem blong yumi i olsem taem blong Noa mo famle blong hem. Olgeta oli mas wokem wan bigfala sip we ol man oli save stap long hem blong laef tru long Bigfala Wota we i ron. (Jenesis 6:13-16; Matiu 24:37) Nating se trifala pikinini blong Noa oli mared finis, i no gat wan long olgeta i gat pikinini long taem ya. Oli jes gat pikinini nomo afta we Bigfala Wota i ron. Maet wan risen hemia se, oli wantem yusum olgeta taem mo paoa blong olgeta long wok we i stap. Mo wan narafala risen se, maet oli no glad blong karem pikinini long wan wol we i fulap long ol fasin we i rabis mo i raf. Wan wol we ol man “oli stap mekem i nogud tumas, mo oltaem, tingting blong olgeta i fulap nomo long ol rabis fasin.”—Jenesis 6:5.

Samting ya i no min se i rong blong gat pikinini tede. Be, plante Kristin hasban mo waef, oli jus blong no gat pikinini blong oli save joen fulwan long impoten wok ya we Jeova i givim long ol man blong hem. Sam hasban mo waef oli wet sam yia, bifo we oli gat pikinini. Sam narafala bakegen oli jus blong no gat pikinini mo oli hop se maet oli save gat pikinini long niufala wol blong Jeova we stret fasin nomo i stap long hem. ?Olsem wanem? ?Samting ya i min se oli no stap lukluk i go long fiuja blong olgeta? ?Olgeta oli mestem wan gudfala samting long laef blong olgeta? ?Yumi mas sore long olgeta?

Wan Laef We i Sefgud Mo i Fulap Long Glad

Naoia Dele mo Fola, we yumi tokbaot tufala antap, i mared bitim ten yia finis, mo tufala i gat strong tingting yet blong no gat pikinini. Dele i talem se: “Ol famle blong mitufala oli stap gohed yet blong fosem mitufala blong gat pikinini. Samting we olgeta oli wari bigwan long hem, hemia fiuja blong mitufala. Oli wantem se mitufala i stap sefgud. Oltaem, mitufala i talem tangkiu long olgeta  from we oli tingbaot mitufala, be mitufala i talem long olgeta wetem kaen fasin se mitufala i glad tumas long wok we mitufala i mekem. Mo mitufala i eksplenem long olgeta se mitufala i trastem Jeova se bambae hem i lukaot gud long mitufala, mo se hem i kea mo i givhan long olgeta we oli stap tru long hem, oli stap holemstrong long hem. Mitufala i eksplenem tu se taem yumi gat pikinini, hemia i no min se ol pikinini ya bambae oli lukaotgud long papa mama taem tufala i kam olfala. Sam man oli no lukaotgud nating long papa mama blong olgeta, mo sam narafala oli no save givhan long olgeta, mo sam narafala bakegen oli ded bifo we papa mama blong olgeta i ded. Be long saed blong mitufala, mitufala i sua se bambae Jeova i lukaotgud long mitufala long fiuja.”

Dele mo sam narafala we oli olsem hem, oli trastem fulwan promes ya we Jeova i talem long ol trufala man blong hem se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Mo tu, oli bilif long tok ya se: “I nogud yufala i stap ting se Hae God i no gat paoa, mo hem i no save sevem yufala. Mo i nogud yufala i stap talem se sora blong hem i fas, mo sipos yufala i krae long hem, bambae hem i no save harem yufala.”—Aesea 59:1.

Taem yumi lukluk olsem wanem Jeova i bin givhangud long ol trufala man blong hem, samting ya tu i mekem se yumi trastem hem. King Deved i raetem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” Tingbaot samting ya. ?Yu yu save wan trufala man blong Jeova, we Jeova “i lego hem” olgeta? Ating nogat. —Ol Sam 37:25.

Olgeta we oli bin spenem laef blong olgeta blong mekem wok blong Jeova mo blong givhan long ol Kristin brata blong olgeta, oli no harem nogud from disisen ya we oli bin mekem. Defren olgeta, taem oli tingtingbak long laef blong olgeta, oli haremgud tumas. Brata Iro Umah i mekem fultaem minista wok blong 45 yia finis, mo naoia hem i mekem wok blong visitim ol kongregesen long Naejeria. Hem i talem se: “Nating se mi mo waef blong mi, mitufala i no gat pikinini, mitufala i tingbaot se oltaem, Jeova i lukaotgud long mitufala long saed blong spirit mo bodi tu. Mitufala i no sot long wan samting. Jeova bambae i no save lego mitufala taem mitufala i kam olfala. Ol yia ya we mitufala i bin spenem long fultaem minista wok, oli givim moa glad long mitufala i bitim ol narafala yia. Mitufala i glad tumas we mitufala i save givhan long ol brata blong mifala, mo ol brata oli gat bigfala tangkiu long wok we mitufala i mekem, mo oli givhan long mitufala tu.”

Nating se plante hasban mo waef oli no gat ol pikinini blong olgeta, yumi save talem se oli gat ol pikinini long narafala rod. Hemia ol Kristin disaepol we oli wosip long Jeova. Aposol Jon i gat klosap 100 yia taem hem i raetem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) Taem ol “pikinini” blong Jon—hemia olgeta we hem i tijim olgeta long “ol tok we i tru”—oli holemstrong long bilif blong olgeta, samting ya i givim bigfala glad long Jon.

Tede, plante man oli kasem semfala glad olsem. Bernice, wan woman Naejeria, i mared 19 yia finis mo hem i jus blong no gat pikinini. Long ol 14 yia we oli pas, hem i bin mekem wok blong paenia. Taem hem i kam klosap long ol yia we hem i no moa save karem pikinini, hem i no sore we hem i bin yusum laef blong hem blong mekem disaepol. Hem i talem se: “Mi glad blong luk we ol pikinini blong mi long saed blong spirit oli stap gruap. Sipos mi gat stret pikinini blong mi, mi no sua se bambae oli frengud wetem mi olsem olgeta we mi tijim olgeta long trutok. Olgeta oli mekem i gud long mi olsem we mi mi stret mama blong olgeta, oli storian wetem mi, oli tokbaot glad mo ol problem we oli kasem, mo oli askem sam advaes long mi. Olgeta oli raetem ol leta i kam long mi, mo mifala i visitim mifala.

“Sam man oli ting se fasin blong no gat pikinini i wan bigfala trabol. Oli talem se sipos yu mekem olsem, bambae yu harem nogud taem yu kam olfala. Be mi mi no agri wetem tingting ya. Mi save se sipos mi gohed blong mekem wok blong Jeova long ful hat blong mi, bambae hem i blesem mi mo i lukaotgud long mi. Neva hem i save sakemaot mi taem mi kam olfala.”

God i Gat Lav Mo i Tinghae Long Yumi

Olgeta we oli gat pikinini mo oli trenem olgeta blong “folem ol tok we i tru,” oli gat plante samting blong talem tangkiu long God from. Yumi no sapraes we Baebol i talem se: “Pikinini we fasin blong hem i stret, papa blong hem i save glad tumas from. Sipos pikinini blong yu i waes, bambae yu save glad from. Oltaem yu mas mekem we mi wetem mama blong yu, mitufala i save glad long ol samting we yu yu stap mekem. Mama blong yu i bonem yu, mo oltaem yu mas mekem hem i glad.”—Ol Proveb 23:24, 25.

Ol Kristin we oli no kasem glad ya blong bonem pikinini long wol ya mo trenem olgeta, oli kasem blesing long narafala rod. Plante long olgeta ya, oli mekem  wan bigfala wok blong mekem se gud nius blong Kingdom i go kasem moa man. Long ol yia we oli pas, oli lanem plante samting, oli kasem waes, oli lan blong gat gudhan, mekem se oli save givhan bigwan long wok blong Kingdom. Plante long olgeta oli stap lidim yumi long wok ya.

Nating se oli lego fasin blong gat pikinini from wok blong Kingdom, Jeova i blesem olgeta. Jeova i mekem se oli gat wan famle long saed blong spirit, we i gat lav, mo i gat bigfala fasin tangkiu from fulap samting we oli bin lego long laef blong olgeta. I olsem tok blong Jisas se: “Man we i tinghevi long mi, mo long gud nius blong mi, nao hem i lego haos blong hem, no brata no sista blong hem, no papa mo mama blong hem, no pikinini blong hem, no graon blong hem, hem bambae i no save sot long ol samting ya. Tru mi talem long yufala. Long wol ya, wanem samting we hem i lego, olsem haos blong hem, no brata no sista blong hem no mama blong hem, no pikinini blong hem, no graon blong hem, bambae hem i save kasem wan handred taem antap bakegen . . . Be long niufala wol ya we bambae i kam, hem bambae i gat laef we i no save finis.”—Mak 10:29, 30.

!Long lukluk blong Jeova, olgeta we oli stap tru long hem, oli sas tumas! Aposol Pol i leftemap tingting blong olgeta we oli holemstrong long Jeova, olgeta we oli gat pikinini wetem olgeta we oli no gat pikinini, se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”—Hibrus 6:10.

[Futnot]

[Tok blong pija long pej 23]

Plante oli no gat pikinini, be Jeova i givim wan famle long olgeta long saed blong spirit, wan famle we i lavem olgeta