?Yu Save Faenem Pis Long Tingting?

Long 1854, Henry Thoreau, wan man blong raetem ol buk long Amerika, i raetem se: “Bighaf blong ol man oli folem wan fasin blong laef we, nating se oli no talemaot, i no gat hop.”

I klia se, long taem blong man ya, bighaf blong ol man oli no gat pis long tingting blong olgeta. Be, hem i talem tok ya klosap 150 yia bifo. ?Ol samting oli defren tede? ?Ol tok blong Thoreau oli stret yet long taem blong yumi? ?Olsem wanem long yu wan? ?Yu stap glad mo yu gat pis long tingting blong yu? No ?yu harem se yu no sefgud, yu no sua long saed blong fiuja, olsem Thoreau i talem se, yu ‘no talemaot’ be yu ‘no gat hop?’

SORE tumas, i gat plante samting long wol we oli spolem tingting blong man. I gud yumi tokbaot sam long ol samting ya. Long plante kantri ol man oli no gat wok, no mane we oli kasem i smol nomo, nao ol man oli pua tumas mo oli no gat hop blong winim problem ya blong ekonomi. Long sam narafala kantri bakegen, plante man oli spenem olgeta paoa blong olgeta blong ronem mane mo ol sas samting long saed blong bodi. Be plante taem, fasin ya blong traem winim narafala blong kasem plante sas samting, hem i no givim pis, be i mekem man i wari moa. Ol sik, faet, fasin blong brekem loa, mo fasin blong daonem narafala, olgeta samting ya tu oli karemaot pis long laef blong man.

Olgeta We Oli Lukaot Pis Long Tingting

Plante man oli no wantem letem fasin blong wol blong naoia i spolem olgeta. Antônio * i bos long ol wokman blong wan bigfala faktri long São Paulo, Brasil. From we hem i wantem mekem fasin blong laef i kamgud moa, hem i joen wetem ol narafala blong mekem ol demonstresen long rod blong soemaot tingting blong olgeta. Be samting ya i no givim pis long tingting blong hem.

Sam man oli ting se sipos oli mared, bambae laef blong olgeta i kam kwaet, be biaen maet olgeta tu oli harem nogud. Marcos i wan man blong bisnes we i win gud. Hem i joen long politik mo i kam mea long wan taon we i gat plante faktri long hem. Be, famle laef blong hem i nogud olgeta. Taem ol pikinini blong hem oli aot long famle, Marcos mo waef blong hem, tufala i seraot from we tufala i no moa save stretem ol problem blong tufala.

Gerson, wan pikinini blong rod long Salvador, Brasil, i laekem traem ol samting we i denja long laef. Hem  i wokbaot olbaot long wan taon i go long narafala taon wetem ol man we oli draevem ol bigfala kamiong. I no longtaem biaen, hem i stat blong yusum drag, mo hem i stilim mane blong narafala man blong pem ol drag blong hem. Plante taem polis i holem hem. Be, nating se Gerson i gat strong mo raf fasin, hem i wantem tumas blong gat pis long tingting. ?Bambae hem i save faenem samting ya?

Taem Vania i yang nomo, mama blong hem i ded, mo Vania i mas mekem wok blong lukaot long famle, mo sista blong hem tu we i sik. Nating se Vania i stap go long jos, hem i harem se God i lego hem. Hem i no gat pis nating long tingting blong hem.

Mo tingbaot Marcelo. Hem i wantem gat gudtaem nomo oltaem. Hem i laekem blong mekem lafet wetem ol narafala yangfala—blong danis, dring, mo yusum drag. Wan taem hem i joen long wan faet mo i givim bigfala kil long wan narafala yangfala. Biaen, hem i sore tumas mo i prea long God blong i givhan long hem. Marcelo tu, i wantem tumas blong gat pis long tingting blong hem.

Ol stori ya oli soemaot ol samting long laef we oli save spolem pis long tingting. Man ya we i bos long ol wokman, man blong politik, pikinini blong rod, gel we i gat tumas wok, no yangfala we i laekem lafet, ?i gat rod blong olgeta evriwan oli faenem pis long tingting blong olgeta? Mo ?yumi save lanem sam samting long stori blong olgeta? Ansa long tufala kwestin ya se, yes. Bambae yumi luk samting ya long nekis haf.

[Futnot]

[Tok blong pija long pej 3]

?Yu yu wantem tumas blong gat pis long tingting blong yu?