I luk olsem se i gat klosap 500,000 kilometa blong wota we i no gat tumas sol long hem, i stap aninit long solwota long fulwol. Wan man we nem blong hem, Vincent Post we i tij long Flinders University long Adelaide i talem se: “I bin gat wan taem bifo we level blong solwota i godaon bigwan, mekem se mak blong solwota we i stap naioa i bin stap daon moa.” Long taem ya, “ren i foldaon long graon mo i fulumap ol ples we tede i stap aninit long solwota.” Ol saentis oli ting se ol freswota ya aninit long solwota oli save givhan long bitim 700 milian man we oli no gat klin wota.

Bighaf blong ol defdefren anamol we oli bin stap long draeples blong Sahara oli lus, mo samfala oli no moa gat ples blong olgeta. Oli stap laef long wan smol ples we i olsem 1 pesen nomo, long ples blong olgeta bifo. Hemia from we weta i jenis mo ol man oli kilim plante anamol. Nating se ol tri mo ol anamol long draeples oli sem mak long ol tri mo ol anamol long bus, be ol man blong stadi long ol tri mo anamol oli talem se: “Problem blong mane nao i mekem se ol man oli no lukaotgud long ol tri mo ol anamol long draeples.” From samting ya, i had blong ol man oli lukaot long ol ples olsem, blong blokem ol samting we i stap spolem ol tri mo ol anamol.

Long 2012, wan ripot i talem se long 8 man we i ded, 1 long olgeta i ded from doti win we i stap olbaot long wol. Wol Helt Ogenaesesen i talem se: “Doti win we i stap olbaot long wol i wan long ol bigfala problem long wol blong yumi.”