BAEBOL I TALEM SE: “?Hu man we i stret blong go long Haos Tapolen blong [God]? . . . Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret. Ol tok blong hem i tru mo i stret.”—Ol Sam 15:1, 2.

SAMTING WE I KAMAOT: Plante man oli tinghae long man we i tok tru, mo we narafala i save trastem hem. ?Be olsem wanem sipos narafala i pulum yu blong yu giaman, we man i no luk yu? Long taem olsem, bambae yu soemaot samting we i stap long hat blong yu.

Raquel, i wan woman we wok blong hem i blong pem ol samting long ol narafala kampani. Hem i talem se: “Sam man we oli mekem wok blong salem samting blong narafala kampani, oli promes long mi se sipos mi pem ol samting long olgeta, bambae oli “mekem praes i godaon” mo haf mane we i stap i blong mi. Be mi talem no long olgeta, from we mi tingbaot advaes blong Baebol we i talem se yumi no mas giaman. Taem bos blong mi i harem stori ya, hem i trastem mi moa.”

Sipos Raquel i agri blong mekem samting we ol man ya oli talem, maet hem i save gat plante mane kwiktaem. ?Be olsem wanem sipos bos i faenemaot hem? ?Yu ting se bambae hem i gohed blong wok? ?Mo olsem wanem sipos hem i go askem wok long wan narafala kampani? Samting we i moa impoten long Raquel, hemia tingting we hem i trenem folem Baebol, mo hem i wantem we ol man oli gat respek long hem. Ol Proveb 22:1 i talem se: “Sipos ol man oli luk se yu yu gudfala man nao oli ona long yu, hemia i gud moa i winim we yu kam rijman.”

Jessie i wan man we i no giaman mo ol narafala oli trastem hem. Hemia i mekem se bos blong hem i glad long hem. ?Wanem i kamaot from? Bos blong hem i putumap hem i kam maneja, be i no hemia nomo. Bos i givim sam fri taem long hem. From samting ya, hem i gat moa taem blong spenem wetem woman blong hem mo ol pikinini blong tufala, mo blong mekem wok blong Jehova.

Sam bos blong kampani, oli lukaot ol man we ol narafala oli save olgeta se oli man blong tok tru, mo oli no giaman. Eksampol, maneja blong wan kampani long Filipin, i raet i go long ofis blong ol Witnes blong Jehova, blong talem se sipos ol Witnes oli wantem wok, oli save go wok blong hem. Hem i talem se: “Ol Witnes oli man blong wok had, oli tok tru, mo oli gat strong tingting blong wok.” Be yumi leftemap Jehova God nomo, from we hem nao i tijim yumi blong ‘laekem fasin we i stret’ mo tanem baksaed long ‘fasin we i no stret.’—Amos 5:15.