Baebol i Talem Wanem

?Yu Save Mekem Wanem Blong Yu Gat Pis Wetem Ol Narafala?

BAEBOL i tokbaot ol man se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) I gat bitim seven bilian man long wol. From we olgeta evriwan oli no stretgud olgeta, plante taem oli stap raorao. ?Long taem olsem, yumi save mekem wanem blong yumi gat pis wetem ol narafala?

Baebol i givim ol gudfala advaes. Hem i tokbaot God ya we i Mekem olgeta samting, se hem i “stamba blong pis,” mo nem blong hem Jehova. (Hibrus 13:20; Eksodas 3:14, futnot) God i wantem se ol pikinini blong hem long wol oli gat pis. Hem nao i mekem samting ya fastaem. Taem fas man mo woman tufala i mekem sin agens long God, tufala i no moa gat pis wetem hem. Be kwiktaem nomo God i mekem rod blong ol man oli save fren wetem hem bakegen. (2 Korin 5:19) Yu traem tingbaot tri samting we yu save mekem blong yu gat pis wetem ol narafala.

Yu Mas Fogivim Narafala

?Baebol i talem wanem? “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.”—Kolosi 3:13.

?Wanem samting i had? Maet i tru se yu yu gat “poen agens” long wan narafala, mo yu no moa wantem joen wetem hem. Mo tu, maet yu ting se hem nao i mas talem sore long yu. Be sipos man ya i no save se hem i rong, no sipos hem i ting se yu nao yu rong, bambae problem ya i gohed nomo.

?Yu save mekem wanem? Yu mas folem advaes blong Baebol blong fogivim narafala, antap moa sipos problem ya i smol nomo. Yu traem tingbaot: Sipos God i raetemdaon ol mastik blong yumi, bambae hem i panisim yumi oltaem nomo. (Ol Sam 130:3) Be Baebol i talem se Jehova “i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem we oltaem i stap lavem man tumas hem i gud we i gud, i bitim mak. Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.”—Ol Sam 103:8, 14.

Mo tu, yu tingbaot waes tok ya blong Baebol, we i talem se: “Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.” (Ol Proveb 19:11) Sipos yu gat hed, bambae yu traem luksave from wanem man i talem no i mekem wan samting. Taswe, i gud yu askem ol kwestin ya: “?Man ya i taed? ?Hem i sik? ?Hem i stap wari?” I gud yu luksave from wanem man ya i mekem samting, hem i harem olsem wanem, mo laef blong hem i olsem wanem. Hemia i save daonem kros blong yu mo i save givhan long yu blong yu no tingbaot mastik blong hem.

Yu Mas Toktok Wetem Hem

?Baebol i talem wanem? “Sipos wan brata blong yu i mekem i no stret long yu, yu mas go luk hem, nao taem yutufala nomo i stap, yu mas talemaot long hem, samting nogud ya we hem i mekem. Sipos hem i save lesin long yu, toktok blong yu bambae i mekem hem i kambak, yutufala i fren gud bakegen.”—Matiu 18:15.

?Wanem samting i had? Maet yu yu fraet, yu kros, no yu sem, ale yu no wantem go luk man ya blong yutufala i stretem rao ya. Mo maet yu wantem pulum sam narafala oli kam long saed blong yu, ale yu tokbaot trabol ya long olgeta. Samting ya i save mekem se i gat sam moa man oli kam insaed long rao ya nao oli putum moa wud long faea.

?Yu save mekem wanem? Taem wan problem i bigwan mo yu luk se yu no save fogetem, i gud yu go toktok wetem man ya. Yu traem folem ol rod ya:

(1) Yu go luk hem kwiktaem: Yu no mas stap seftem dei we yu putum blong go luk man ya. Problem ya bambae i kam moa nogud, olsem wan soa we man i no putum meresin long hem. Yu traem folem advaes ya blong Jisas we i talem se: “Sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.”—Matiu 5:23, 24.

 (2) Yu no tokbaot problem ya long ol narafala: Ating yu wantem tumas blong tokbaot problem ya long ol narafala, be yu no mas mekem olsem. “Sipos yu wetem fren blong yu we i stap klosap long yu, yutufala i rao from wan samting, i moa gud yutufala nomo i stretem bisnes ya, mo biaen, bisnes ya we i no blong tokbaot, yu no mas tokbaot bakegen.”—Ol Proveb 25:9.

(3) Yu stretem bisnes ya long pis: Yu no mas traem blong faenemaot se hu i mekem i stret mo hu i mekem i no stret. Yu mas wantem nomo blong mekem pis wetem hem, i no blong win. Taem yu toktok long hem, i gud yu traem blong yusum tok ya “mi,” be yu no talem “yu.” Maet yu talem se: “Mi mi harem nogud from we . . . ” Hemia i moa gud i bitim we yu talem se: “!Yu yu mekem mi mi harem nogud!” Baebol i talem se: “Oltaem yumi mas strong blong folem ol fasin we i save mekem pis, mo we i save givhan long yumi, blong leftemap yumi.”—Rom 14:19.

Yu Mas Gat Longfala Tingting

?Baebol i talem wanem? “Sipos wan man i mekem i nogud long yufala, bambae yufala i no givimbak fasin ya long hem. . . . ‘Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wota long hem.’”—Rom 12:17, 20.

?Wanem samting i had? Sipos yu go blong mekem pis wetem man ya, be hem i no wantem, maet yu harem se yu wantem lego nomo.

?Yu save mekem wanem? Yu mas gat longfala tingting. Olgeta man wanwan oli gat ol defdefren fasin, mo samfala oli bigman moa long tingting blong olgeta i bitim ol narafala. Sam man oli tekem moa taem blong mekem kros i godaon. Sam narafala oli stap lanem yet ol fasin blong God. Yu mas gohed nomo blong lavem olgeta mo blong kaen long olgeta. Baebol i talem se: “Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.”—Rom 12:21.

Sipos yumi wantem gat pis wetem ol narafala, yumi mas traehad blong gat tingting daon, yumi mas gat hed, longfala tingting, mo lav. !Be i no blong nating nomo we yumi traehad olsem, from we bambae yumi gat pis wetem ol narafala!

?YU YU BIN TINGBAOT?

● ?Wanem bambae i givhan long yu blong yu fogivim narafala?—Kolosi 3:13.

● ?From wanem yu mas go luk man ya we yu gat problem wetem hem? —Matiu 5:23, 24.

● ?Sipos man ya i no wantem mekem pis, yu save mekem wanem?—Rom 12:17-21.

[Tok blong makem poen long pej 11]

“Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.”—OL PROVEB 19:11