Bambae Man i No Moa Harem Nogud Wan Promes We Yu Save Trastem

“[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

?YU TING se bambae nambawan promes ya i kamtru? Yu traem tingbaot ol tok we God i talem blong givim woning long fas man. God i talem long Adam se sipos hem i no obei, bambae hem i “ded.” (Jenesis 2:17) Mo hem i ded, stret olsem we God i talem. Ded mo ol samting we i mekem man i harem nogud, oli frut blong sin we Adam i pasem long ol man. Ol nogud frut ya mo samting we i hapen long Adam oli soemaot long yumi se tok blong God i kamtru, mo yumi save trastem God. Taswe i stret we yumi gat strong tingting se promes blong God blong mekem wol i kam stret gud olgeta, hemia tu bambae i kamtru stret olsem we hem i talem.

Traem tingbaot ol fasin blong God we yumi tokbaot finis. Yumi wantem tumas blong finisim ol samting we oli mekem man i harem nogud, from we yumi gat ol fasin olsem God. Hem i harem nogud taem i luk we ol man oli harem nogud, hem i lavem narafala, mo hem i gat stret fasin. Mo ol samting we oli stap hapen long wol tede mo fasin blong ol man, oli soemaot se God bambae i tekem aksen i no longtaem.—Yu lukluk bokis ya  “?Bambae Ol Samting Ya Oli Kamtru Wetaem?”

?Wanem i soemaot se Jehova God hem i naf blong finisim ol samting we oli mekem man i harem nogud? Bambae yumi luk we Jehova i naf mo i mekem rod finis, blong stretem trifala samting ya we oli stamba samting we i mekem man i harem nogud. Bambae hem i yusum Pikinini blong hem Jisas.

Samting we yumi jusum. Bubu blong yumi, Adam, i jusum blong mekem sin we i karem nogud frut long ol pikinini blong hem. Aposol Pol i talem se: “Olgeta samting ya we God i mekem oli stap krae, from we olgeta oli stap harem nogud.” (Rom 8:22) Samting we God i mekem blong winim problem ya i soemaot stret fasin blong hem mo sore blong hem, mo i no fasfas. Rom 6:23 i talem se: “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.”

Jisas i stret gud olgeta, hem i no mekem sin. Taem ol man oli nilim hem long pos mo hem i ded, samting ya i openem rod long olgeta we oli obei, blong oli save kam fri long panis blong sin mo ded. Naoia yumi gat janis blong kasem laef we i no save finis long wan wol we yumi no gat sin blong pulum yumi blong jusum samting we i no waes. Ol man we oli minim nomo blong mekem narafala i harem nogud, bambae oli lus, from se “ol man nogud, Hae God bambae i ronemaot olgeta.”—Ol Sam 37:9.

Ol samting we yumi no tingbaot mo sin. God i putumap Jisas Kraes i King. Hem i gat paoa antap long ol samting we oli stap raonabaot long yumi. Taem Jisas i stap long wol, hem i stap long wan bot wetem ol aposol blong hem, nao “wan bigfala win i girap, i blu strong, i mekem wota long bigfala lugun ya i raf we i raf. Nao wota i stap kam insaed long bot ya we klosap bot i draon.” Taem ol aposol oli singaot Jisas blong i kam givhan long olgeta, “Jisas i girap, i tok long win ya, i talem se, ‘!Yu kwaet!’ Mo i tok long wota ya we i raf tumas, i talem se, ‘!I naf! !Yu stap kwaet!’ Nao win ya i finis, mo olgeta samting i kwaet.” Ol aposol oli sapraes tumas, oli talem se:  “!Nating we win mo wota, be tufala i harem tok blong hem, tufala i obei long hem!”—Mak 4:37-41.

Aninit long rul blong Jisas, ol man we oli obei, bambae oli ‘stap gud oltaem long laef blong olgeta. Bambae oli save we i no gat wan samting nating we i save mekem olgeta oli fraet.’ (Ol Proveb 1:33) Hemia i min se bambae i no moa gat ol disasta we oli mekem ol man i fraet. Bambae i no moa gat man we i spolem wol ya, bambae man i wokem gud ol haos, bambae man i gat save long ol samting we oli stap raonabaot long hem, mo bambae man i no mekem mastik. Mo bambae ol man oli no moa wari se wan trabol i save kasem olgeta long enitaem no long eniples.

Taem Jisas i stap long wol, hem i tokbaot wan narafala samting we bambae hem i mekem taem hem i rulum ol man. Hem i talem se: “Mi mi stamba blong laef bakegen long ded. Mi nao mi stamba blong laef.” (Jon 11:25) Yes, Jisas i gat paoa blong mekem plante milian man we oli ded long ol disasta, oli laef bakegen, mo hem i wantem tumas blong mekem olsem. ?Be olsem wanem? ?Promes ya bambae i kamtru? Taem Jisas i stap long wol, hem i mekem sam man oli laef bakegen. Samting ya i mekem bilif blong yumi i strong se promes ya bambae i kamtru. Baebol i tokbaot wan gel mo tu man, we Jisas i mekem olgeta oli laef bakegen.—Mak 5:38-43; Luk 7:11-15; Jon 11:38-44.

‘Setan i stap rulum wol ya.’ God i putumap Jisas Kraes i King, blong hem i “brekem paoa blong Setan, we i holem paoa blong ded.” (Hibrus 2:14) Jisas i talemaot se: “Naoia i taem blong God i jajem ol man long wol ya. Naoia bambae hem i brekem paoa blong Setan, we i stap rulum wol ya.” (Jon 12:31) Bambae Jisas i “brekemdaon ol wok we Setan i mekem” taem hem i mekem we Setan i no moa gat paoa long wol ya. (1 Jon 3:8) Yu traem tingbaot sipos Setan i no moa gat paoa long ol man. !Laef bambae i jenis bigwan! Fasin blong wantem plante samting, kruked fasin, mo fasin we man i tingbaot hem wan nomo, bambae oli finis evriwan.

[Bokis blong pija long pej 9]

 “?Bambae Ol Samting Ya Oli Kamtru Wetaem?”

Ol man blong Jisas oli askem long hem se: “?Bambae ol samting ya oli kamtru wetaem? ?Mo wanem saen we bambae i soemaot we yu bambae yu kambak bakegen, mo wol ya i finis?” (Matiu 24:3) Jisas i ansa long kwestin ya, mo afta we Jisas i ded, God i pulum ol man blong raetemdaon long Baebol sam moa toktok we i ansa long kwestin ya. Ol tok ya oli soemaot wanem bambae i hapen klosap long taem ya we God i finisim ol samting we oli mekem man i harem nogud. a Taem yu ridim ol profet tok we oli kam biaen, plis yu traem skelem ol profet tok ya wetem samting we i stap hapen tede mo wetem fasin blong ol man tede:

● Long olgeta ples long wol ol man bambae oli mekem faet—Matiu 24:7; Revelesen 6:4.

● Bambae i gat hadtaem blong kasem kakae mo ol strong sik—Luk 21:11; Revelesen 6:5-8.

● Ol man oli spolem wol—Revelesen 11:18.

● “Oli wantem mane tumas”—2 Timoti 3:2.

● “Oli no save ona long papa mo mama blong olgeta”—2 Timoti 3:2.

● “Oli wantem tumas ol samting we oli stap harem gud long hem, i winim we oli stap lavem God”—2 Timoti 3:4.

Ol Witnes blong Jehova oli glad blong soemaot long yu se i no longtaem, bambae man i no moa harem nogud. Plis yu toktok wetem ol Witnes long ples blong yu. Bambae oli glad blong stadi Baebol wetem yu long haos blong yu no long wan narafala ples we i stret long yu.

[Futnot]