Presiden blong World Bank Group i givim woning long ripot blong Jun 2022, i se: “Ekonomi blong wol i stap long denja bakegen. Naoia, praes blong evri samting i stap go antap kwiktaem, be ol man oli no gat bigfala mane blong spenem.”

 International Monetary Fund i talem se: “Praes blong kakae mo bensin i go antap kwiktaem, mo hemia i mekem se ol man long ol pua kantri oli stap safa.”

 Baebol i givhan long yumi blong kasem save from wanem yumi fesem ol trabol olsem, i talem wanem we yumi save mekem, mo i givim hop se ol trabol ya bambae oli finis blong olwe.

•    Baebol i talem se yumi stap laef long “ol las dei.”—2 Timoti 3:1.

•    Jisas i talem se long taem blong yumi, “ol man bambae oli luk plante samting we i mekem oli fraet.” (Luk 21:11) Taem praes blong evri samting i go antap, ol man oli fraet. Oli wari long fiuja blong olgeta, mo oli no save sipos bambae oli naf blong givim ol samting we famle blong olgeta i nidim.

•    Revelesen i talemaot se praes blong kakae bambae i go antap, i se: “Mi harem wan samting olsem wan voes . . . i talem se: ‘Praes blong wan kwot blong wit o tri kwot blong bale, hemia pei we wokman i winim long wan fuldei.’”—Revelesen 6:6, Easy-to-Read Version.

 Blong kasem save moa long “ol las dei” mo profet tok blong Revelesen, wajem video ya Ol Samting Long Wol Oli Jenis Stat Long 1914, mo ridim atikol ya “Ol Fo Man Ya Long Hos—?Oli Hu?”

•    “Bambae oli bildim ol haos mo oli stap long olgeta, mo bambae oli planem ol plantesen blong grep mo oli kakae ol frut blong olgeta. Bambae oli no bildim haos blong wan narafala man i stap long hem, no oli planem kakae blong ol narafala man oli kakae.”—Aesea 65:21, 22.

•    “Bambae i gat fulap garen blong sid long olgeta ples long wol, bambae oli kavremap top blong ol bigfala hil gogo i kafkafsaed.”—Ol Sam 72:16.

•    “Jehova i talem se: ‘From we ol man oli spolem olgeta we oli harem nogud, mo from we ol puaman oli stap pulum nogud win blong olgeta, bambae mi girap blong tekem aksen.’”—Ol Sam 12:5. a

 I no longtaem, God bambae i finisim ol problem blong ekonomi, i no long wan kantri nomo be long fulwol. Blong save moa, ridim atikol ya “?Bambae i No Moa Gat Problem Blong Ekonomi Samtaem?”

 Baebol i talem samting we yumi save mekem naoia, taem praes blong evri samting i go antap. Hem i givim ol gudfala advaes blong halpem yumi blong yusum mane long waes fasin. (Ol Proveb 23:4, 5; Prija 7:12) Blong kasem save moa, ridim tufala atikol ya “Protektem Olting Blong Yu” mo “Laef Wetem Smol Mane Nomo.”